Santiago 1:18 - Dios Iwene

¹⁸ Jau chö̧ja̧wo̧dö, Diosma otiwanöda iyo̧. Ja̧danö, jo̧ba otiwanöda iyo̧ma ökwödönö otiwanö pjabatö weinobe iteda iwene, isabenö ji̧ wenema. Ja̧ iwenema ökwödö dö̧jibinö pjaati̧ wene, chö̧ja̧wo̧dö. Ja̧danö, ja̧ wene a̧ja̧kwö dösödinobetjö̧ yemidanö döbötjachijatö do̧'wo̧ luwo̧nö, iteda i̧tji̧mu, jwiinö mikwawadö babibö. Jejenö ösödinobe Diosma, iteda isabenö iwene a̧ja̧kwö dösödobö, iteda i̧tji̧mu babibö. Yelösöda Diosma otiwanö pjaatinobe ökwödönö, jo̧ba otidinatjö o̧penönö mikwawadö badibinö. Ja̧danö, Diosma iteda okobe jwiinö otidinatjö ökwödönö edö yöa̧lobe, Bidö chi̧tji̧muma jwiinö mikwawadö, jö̧ba̧lö. Isabenö chö̧ja̧wo̧dö, okobe jwiinö Diostjö ichi̧ma otiwobe.

Santiago 1:18 ပူးပေါင်းရင်းမြစ်များ

Juan 1:13

Dios i̧tji̧mu, jö̧ba̧löma, tjojo'do jobadönö jemi̧danömaökö. Dios i̧tji̧mu batjibi̧ma, tjabe'do, tjojo'do tjöbötjati̧danömaökö. Ja̧danö, tji̧lȩkwa̧mukwö tjö̧ji̧tjö baibanömaökö, Dios i̧tji̧mu batjibi̧ma. Wainö bötjachadö, Dios i̧tji̧muma. Jobadöma, Dios ajayinö omukwati̧danö iteda i̧tji̧mu babibö bötjachadö, Dios iteda omukwati̧tjöda.

Romanos 4:17

Jau, chömöledö, baikwö laebobe Dios iwene, Diosma Abrahamnö yöawinama: Böjȩnö ju̧kwadö tjitebotenia ju̧kwadötjö ajayinö ji̧na baibanö pjatatakwö, jö̧ba̧lö laebobe. Ja̧danö, jö̧a̧linadanö jo̧be. Ökwödö okobe deinö jo̧ba Dios yöawi̧ ösödinadanö ösödadöma, Abraham i̧tji̧mu tupadanö jojodöbedösa, judío jojodöbi, judío jojodöböködöbi. Jau, Dios edemi, ökwödö okobe deinö Abraham Dios yöawi̧ ösödinadanö ösödadöma, Abraham i̧tji̧mu tupadanö jojodöbedösa, judío jojodöbi, judío jojodöböködöbi. Jau chömöledö, Dios, Abraham ösödinökwe Diosma, wobajadönö yemidanö 'yatjibajinö tjetjachajinö ja̧bo̧. Ju'wibi jo̧bama jwiobetjö otido̧ Abraham ösödinökwe Diosma chömöledö.

1 Corintios 4:15

Jau chömöledö, ökwödönö ba̧ja̧dadöma ba̧jekwadö tjö̧jena, wanedö yötawa, ba̧jekwadö diez mil jenanö ba̧ja̧dadö ökwödö Cristonö ösödadönö Dios iwene tjöba̧ja̧dena, jo̧kwaijayonö jobadötjö kwabe'dodanöbo̧ma ötjödasa chömöledö. Jau chömöledö, ötjö Pabloda ajayinö otiwa jawa wene ökwödönö yötawinobetjö̧, kwabe'dodanö chichejekwa chömöledö.

2 Corintios 6:7

Jau chömöledö, jwaikwöda isabenö wene yödawobe, ja̧danö ju'wibi ökwödönötjö Diosma iteda ujulu i̧sebobe. Ja̧danö guardia jojo kwölötebi, tjöekwapibi kweati̧danö, Dios bakwainö sulabe jwii̧ kwedatobedanö jo̧be chömöledö, döpöjojodönö dujuluwo jö̧ba̧löbi, ökwödönö metjibena tjöbeba̧lö dö̧joböbi.

Efesios 1:12

Ja̧danö, Diosma ökwödö judío jojodönö, abönö Cristonö ösödinadönöma 'da̧batö junijetö itenöda ösödanö yöbawadö badibobö, Diosma jwiinö otiwo̧, jö̧ba̧lö.

Efesios 1:13

Chömöledö ¿ökwödö judío jojodöböködöja? Ökwödöma Dios isabenö iwene yötjawi̧ a̧ja̧kwö kwösödinaduwobe. Jau chömöledö, kwö̧jibaduwinö ja̧awa, otiwa jawa wene yötjawi̧ a̧ja̧kwö, Jesúsnö kwösödinaduwobe, Jesúsma dö̧jibanö pjabato̧, jö̧ba̧lö. Ja̧danö, Jesúsnö kwösödaduwena Dios O̧'wo̧ Luwo̧ma tebachibö öjamatinobe ökwödö kwo̧'wo̧ luwo̧duwinöma. Jau chömöledö, Dios ajayinö yöbawö ujuninadanö, Ötjö Cho̧'wo̧ Luwo̧nö wetocha, jö̧ba̧lö, yöbawö ujuninadanö, iteda O̧'wo̧ Luwo̧nö weinobe ökwödö kwo̧'wo̧ luwo̧duwinö tebachibö öjamatobö. Ja̧danö jo̧ba tebachibö öjamatenama jweinö i̧sebinobe, Isabenö bidöma ötjö chi̧tji̧mu, jö̧ba̧lö.

2 Timoteo 2:15

Timoteo, jwaikwöda isakwö kwö̧jo, Dios öba a'otjö isabenö wene otiwanö yöbawö kwotidobö. Jejenö otidö kwö̧jitjö̧ma, Dios öba a'otjö kwi̧sebakwo̧ja, Dios wei̧ otiwanö otido̧sa jö̧ba̧lö, ja̧danö kwötabakwoböma jwiena, kwuluwo̧ wei̧ otiwanö ja̧bö kwö̧jobetjö̧.

Hebreos 12:23

Ja̧danö, kwo̧'wo̧ luwo̧duwinö jobe ichibö ökwödöma ju'wedökwö bakobe ko̧ko̧kwa̧lö kwuju̧kwaduwi̧danö ju̧kwadöja, okobe deinö Jesúsnö ösödadö, ba̧kwȩlö̧jatebö ja̧kwawa wȩyukwa'yenö tjimibiya ba̧jadökwö. Ja̧danö jobekwö ichibö, Dioskwöbi ju̧kwadöja, okobe deinö jojodönö lȩekwa yöawakwo̧kwö. Ja̧danö jobe Dios ö̧jobekwö ichibö, ju'wedökwöbi ko̧ko̧kwa̧lö ja̧nö ju̧kwadöja, Diosnö tjo̧'wo̧ wana̧ladö wobinadökwö, tjo̧'wo̧ luwo̧nöda. Jobadönöma Dios jö̧a̧lawö̧, Suli̧ jwiinö babibinadö, jö̧ba̧lö.

Santiago 1:15

Ja̧danö, bakwo̧, jejenö sulabenö ösödi̧da omukwata̧lö ö̧jitjö̧ma sulabenö omukwata̧li̧danö ja̧bö ö̧jena. Jemi ikenama yemidanö, yemidanöbi jejenö sulabenö ja̧böda jo̧ma, sulabenö omukwati̧ öbalewachökötjö̧ma Diostjö 'da̧bachiböda jo̧, o̧'wo̧ luwo̧nö ö'wö babibo̧da.

Santiago 1:21

Jo̧kwaobetjö̧ chö̧ja̧wo̧dö, okobe jwiinö suli̧ ja̧köbaduwi̧ma kakatibaduwo. Yelösöda kwomajadeduwinö suli̧ma su̧'bȩinö jo̧be. Ja̧danö, su̧'bȩinö jo̧betjö̧ suli̧ma kwomajadeduwitjö doibobe, ojwiyo doibi̧danö. Chö̧ja̧wo̧dö, ja̧ suli̧ma kabatibö, Suli̧ wei̧ cha̧ja̧kwökö, jö̧ba̧lö, kwöbalewachaduwo, Dios iwene ösödö, Jwiinö otiwa, jö̧ba̧lö. Wanedö yötawaduwakwö chö̧ja̧wo̧dö: Diosma iteda iwene önebia tjujuni̧danö kwo̧'wo̧ luwo̧duwinö ujuninobe. Ja̧ iwenema pjaati̧ wene, böjȩnö kwö̧jaduwena suli̧tjö kwö̧jibaduwinö pjaati̧ wenema. Ja̧danö chö̧ja̧wo̧dö, suli̧ wei̧ öpöjödö ökwödönöda omukwatökönuwi, Luwedösa, jö̧ba̧lö. Dios iweneda ösödö kwö̧jaduwo, jo̧ba yöawi̧ a̧ja̧kwö.

Santiago 3:14

Jo̧kwaijayonö ökwödötjö bakwo̧ ju'wedönö o̧'wo̧ luwo̧nö jwiinö sulabenö edö, ja̧danö, ö'wiawö edö, ja̧danö, iteda ösödi̧da omukwatö, Ötjödasa, jö̧ba̧lö, omukwato̧ma ¿jweinö omukwatö waiso̧ji̧? Waisö̧kö̧ inesö waisakwawama. Jo̧bama, Waisanö omukwato̧sa, jö̧ba̧lö, yöa̧lobö jwiobe, chö̧ja̧wo̧dö. Jejenö yöa̧litjö̧ma omönada yöa̧lena.

1 Pedro 1:23

bakwo̧da i̧tji̧muköbaduwobetjö̧. Jau chömöledö, Dios iwenema yaba̧lö ji̧, ja̧danö 'dö̧ibajökö ji̧, ja̧danö ja̧ wene ösödö, 'yayinö kwöbötjachinaduwobe chömöledö. Ja̧danö chömöledö, 'yayinö kwöbötjachinaduwenama, woba jojodö tji̧tji̧mu baibanöma kwöbötjachinaduwokobe, wobö̧kö̧ jo̧ Dios i̧tji̧muda bötjachinadöja.

1 Pedro 1:3

Dösödaduwo Diosnö, Duluwo̧ Jesucristo Abe'donö chömöledö, jo̧bama isabenö lȩlö̧jinö edö ökwödönö pjaatinobetjö̧. Jau chömöledö, Jesucristo wobajaletjö tjeachajinobetjö̧, ökwödönö 'yayinö bötjachibadö badibanö pjaatinobe. Jo̧kwajabetjö̧, babema isabenö inesö ja̧kwawa jawa do̧'wo̧ wana̧lö te'ada̧ladösa,

1 Juan 3:9

Chö̧ja̧wo̧dö, Dios Itji̧ babibo̧nöma Dios 'yayi̧ ja̧kwawa iyinökwe. Jo̧bama o̧'wo̧ luwo̧nö balekwo̧, 'yabayo̧da ö̧jökwe, omajade okwanö Dios omukwati̧danö omukwatinö. Ja̧danö, Dioskwö dötewinö 'ya̧nö jo̧ba 'yabayo̧ ö̧ji̧danö jo̧ma suli̧ jawa ja̧okobe.

Apocalipsis 14:4

Jobadö ciento cuarenta y cuatro ömadöma, isujukwö la'akatjöda jö̧ködö. Jobadöma, Diosnöda ösödö, jo̧ba wei̧da a̧ja̧kwö, ju̧kwadö. Ja̧danö, jobadöma Obeja Itji̧danö Jo̧ ökömanö kwebachadö. Ja̧danö, jobadöma böjȩnö ju̧kwadötjö ajayinö Dios omudawö eminawö̧. Batjo junawatjö ajayinö wa̧ji̧, damötjö wainö Diosnö tjiyinadanö, jobadöma Diosnöbi, Obeja Itji̧danö Jo̧nöbi ajayinö omudawö iyawinadö.