Santiago 1:14 - Dios Iwene

¹⁴ Ja̧danö yötawaduwakwö. Ökwödö jojodö domajade okwatjöda jwiinö dösöda sulabenö ja̧doböma. Jo̧kwaobetjö̧ ökwödöda ödikwobe sulabenö dösödi̧ omukwata̧lö. Diosmaökö jojodönö sulabenö jelobekwö domukwatobö öbibo̧ma.

Santiago 1:14 ပူးပေါင်းရင်းမြစ်များ

Génesis 3:6

Ja̧danö, isujuma jowinö wa̧ji̧ma jedemi kwakwawanöbi otiwijetö. Jowibi jedemi jwiinö otiwijetö. Waisakwawabi otiwioko ösödinö edijotö. Jo̧kwaioko jowinö wa̧ji̧ma 'döbebö kwijotö. Kwaja̧ju jilekwenö iyijotö. Ja̧danö, jo̧babi kwijetö.

Génesis 6:5

Jojodöma jwiinö sulabeda ja̧bö ju̧kwijadötö böjȩnö, ba̧kwelöjatebö. Tjomajadenö tjomukwati̧ma sulabeda omukwatijadötö, okobe jwiinö. Isabenö Jo̧ma jobadö jwiinö sulabenö ja̧bö tjuju̧kwobe edijetö.

Génesis 8:21

Ja̧danö, Isabenö Jo̧ Diosma Noé ujuwi̧ söinö 'dö̧ekwobe 'dö̧batö jö̧ba̧lijetö itedada: —Yemidanöma lȩbebö wetökakwo̧sa niji suli̧ waekwobö, jojodö sulabenö omukwatö tjö̧ji̧ balekwa mikwama. Chöwaisawö̧ jojodönöma. La'akatjöda, tjemu tjö̧jemitjö̧ damö batjibanö sulabenö omukwatö ja̧badö. Jejenö tjö̧jijayonö yemidanöma lȩbebö wetökakwo̧sa niji suli̧ waekwinö. Ja̧danö, yemidanöma söbeböbi lotökakwo̧sa babe söbebö lotinanöma, okobe deinö böjȩnö 'yaba̧ladönö söbebö lobö— jö̧ba̧lijetö Isabenö Jo̧ Diosma itedada, söinö 'dö̧ekwobe 'dö̧atena.

2 Samuel 11:4

Jejenö yötjawökwe, Davidma ömöayedönö weinobe, Betsabenö tjichejebobö. Betsabema ida̧ökö iwonö jö̧lajabetjö̧ jusula dichawö lobö kajatakwawinobe, ja̧danö tjichejebajoko Urias ilekwo Betsabekwö ö̧jinobe Davidma. Ikenama Betsabema jȩwa̧jinobe jejube.

Diosnö ösödo̧ Job mikwo̧ usula emawina jawa 31:27

jojodö wajwitjonö chomajadenö möle jawo̧nöbi, yöte jawo̧nöbi bȩbachibö chösödobö omukwatö, chömamu du̧batö jobadönö chösödinatjö̧ma,

Diosnö ösödo̧ Job mikwo̧ usula emawina jawa 31:9

Ja̧danö isabenö jelo̧ ilekwonö ösödö, jobujukwö chö̧jotö jö̧ba̧lö eju apjude pjeanö ju̧kwawö chiteada̧linatjö̧ma,

Proverbios 4:23

Ja̧danö, ju'wibi yötawakwö chitji̧: Kwomajadenö kwomukwati̧ma ö'wiyawakwawönö kwite'ada̧lakwawo sulabenö kwomukwatapji jö̧ba̧lö. Chitji̧, kwomajadenö otiwanö kwomukwatitjö̧ma otiwanö kwö̧jakwo̧ja. Jo̧kwaijayonö kwomajadenö sulabenö kwomukwatitjö̧ma sulabenö omukwatö kwö̧jakwo̧ja. Isabenö chitji̧, kwomajadenö kwomukwataja̧ma kwite'ada̧lobö jo̧be, otiwanö jweinö kwomukwatakobetjö̧.

Isaías 44:20

Jau chömöledö, jobekwö omukwatö otido̧ma, wajwibö ja̧bo̧. Otiwi̧ kwakwawa kwökönö, ökwölaso̧pja̧da kwo̧ ichejekwa, ja̧danö sulabenö omukwati̧ma, jelobekwö ö'öbönö öibökwe. Jo̧bajayo̧ma la'akatjöda iteda ö̧jibinö ja̧oböma jwibo̧, ja̧danö iteda ösödökwe, ömamunö do̧'alökwe o̧'wo jawanö omukwatö̧kö̧, —Bite chösödökwema, diosbö̧kö̧, omöna jawa, —jö̧ba̧lö omukwatö̧kö̧.

Mateo 15:18

Jo̧kwaijayonö jejenömaökö tjaatjö laebi̧ yötja̧li̧ma. Tjaatjö laebi̧ma, tjomajadetjö laebi̧, ja̧danö ja̧da suli̧ ja̧i̧ma.

Mateo 15:20

Ja̧ jawama isabenö suli̧ ja̧i̧ chömöledö, jo̧kwaijayonö tjömamiju dichawökönö kwakwawa tjukwi̧ma suli̧ ja̧ökö ji̧— jö̧ba̧lö yöawinobe Jesúsma.

Mateo 4:1

Jemi ikenama, Dios O̧'wo̧ Luwo̧ma Jesúsnö öibinobe, jojodö deobe i̧'yobö, jobetjö Jesús sulabenö ja̧ojobö ja̧okojobö jö̧ba̧lö Awetja edö ja̧obö.

Mateo 5:28

Jo̧kwaijayonö babema jemi bajalekwönönö baikwö yötawaduwakwö ötjöma chömöledö: Sule kwi̧lȩkwa̧muböködökwö kwö̧jitjö̧damaökö, bakwo̧ ilekwobökujunö edö, Aaa, isujunö chö̧jowe, jö̧ba̧lö omukwatitjö̧ma, omajadenö ilekwobökujunö ida̧ökö ö̧jajabe.

Romanos 7:11

Jau chömöledö, wanedö yötawa: Sulabe chujuna̧li̧ma, ötjönö omöna yöba̧lö, suli̧ waedinobe ichejekwa. Ajayinöma, Moisés iwȩyudina cha̧ja̧kwenama, Biya̧nö ja̧bö chö̧jibocha, jö̧ba̧lö, chomukwatinobe. Ikenama, waekwinobe. Diosma otiwanö weinajayonö, sulabe chujuna̧li̧ma, ja̧ Dios otiwanö weina jawatjö ötjönö ö'wö batibanö ja̧inobe ichejekwa.

Romanos 7:13

Ja̧danö, Dios weina Moisés iwȩyudinada ¿ö'wö batibanö ja̧inaji̧ chömöledö? Ö'wö batibanö ja̧inokobe, sule i̧seböda i̧sebinobe chusuli̧ma. Ja̧danö, sulabe chujuna̧li̧da ö'wö batibanö ja̧inobe chömöledö. Diosma otiwa jawa iyö weinajayonö, sulabe chujuna̧li̧ma ja̧ otiwa jawatjö ötjönö ö'wö batibanö ja̧inobe ichejekwa chömöledö. Jau, sulabe dujuna̧li̧ma jwiinö sulobe chömöledö.

Efesios 4:22

Chömöledö, ajayinöma kwomajadeduwinö ju'wida ba̧kwȩlö̧jatebö omukwatö ju̧kwiaköbinaduwobe. Ja̧danö, sulabenö ja̧köbaduwoböda jelobe omukwatinadöja, Aaa, sulabenö ja̧titjö̧ma otiwena, jö̧ba̧löda. Chömöledö, ja̧ kwomukwatinaduwama omönada kwomukwatinaduwobe. Babema ja̧ ajayinö kwomukwatinaduwama kabatakwawaduwi, balekwa, otiwi̧, 'yayi̧ jawa omukwatakwawa omukwatö.

Hebreos 3:13

Isabenö, tjöbebalö̧jönö ökwödödada kwite'ada̧laduwobö jo̧be chömöledö. Ja̧danö, bakwöta mölekwena dö̧ja̧wo̧dönö pjabatö yödawobö jo̧be, ina böjȩnö dö̧jayi. Pjabatö yödawo tjo̧'wo̧ tjujuluwachibanö, ökwödötjö ju'wedöma, tjuubiya 'dibö ja̧nö, jelobekwö idöda sulabenö tjomukwati̧da omukwatö tji̧'yapji jö̧ba̧lö. Chömöledö, wanedö yötawaduwakwö, suli̧ wanedöma: Suli̧ma omöna yöbawo̧ yöa̧li̧danö ji̧, jojodönö öbibö jelobekwö omukwatö tji̧'yobö. Jo̧kwaobetjö̧ kwö̧ja̧wo̧dönö yöbawö pjakataduwobö jo̧be, suli̧ma ökwödötjö ju'wedönö tjo̧'wo̧ luwo̧nö jelobekwö tjomukwatobö öibapji jö̧ba̧lö, Diosnö katjatibobö.

Santiago 1:13

Chö̧ja̧wo̧dö, Diosnö ösödadötjö ju'wedöma, wene balediawö̧ tjime'dawachibobe Dioskwö tupakwö 'yö̧könö, Sula, jö̧ba̧lö. Jobadöma tjomukwatena, ¡Ayö! Diosma ökwödönö wene webö öibobe jelobekwö di̧'yobö, jö̧ba̧lö. Isabenö chö̧ja̧wo̧dö, jejenö tjomukwatobö jwiobe, Diosma la'akatjöda jelobekwö omukwatö di̧'yobö öibokobetjö̧. Ja̧danö, Diosma suli̧ wei̧ a̧ja̧kwö jelobekwö omukwatö i̧'yobö jwiobe, yelösöda. Chö̧ja̧wo̧dö kwöwaisaduwa, Diosma jwiinö otiwo̧, la'akatjöda öbibö̧kö̧ jojo sulabenö ja̧bö ö̧joböma.

Santiago 1:15

Ja̧danö, bakwo̧, jejenö sulabenö ösödi̧da omukwata̧lö ö̧jitjö̧ma sulabenö omukwata̧li̧danö ja̧bö ö̧jena. Jemi ikenama yemidanö, yemidanöbi jejenö sulabenö ja̧böda jo̧ma, sulabenö omukwati̧ öbalewachökötjö̧ma Diostjö 'da̧bachiböda jo̧, o̧'wo̧ luwo̧nö ö'wö babibo̧da.