Romanos 8:8 - Dios Iwene8 Jau chömöledö, suli̧ ömöayedödanö ju̧kwadöma, Dios ösödi̧danöma ja̧böködö, la'akatjöda. အခန်းကိုကြည့်ပါ။ |
Jobadö, Diosnö öpöjödadönöma yötawaduwakwö chömöledö: Diosnö tjöwaisijayonö jo̧banö ösödöködö, ökwöma Duluwo̧ Dios, jö̧ba̧lö. Ju'wibi, Diosma jobadönö otiwanö pjaatijayonö, pjaataja̧ yelösöda omukwatöködö. Jemi tupakwö, Diosnö omukwatökönö, sulabe jawada, böjȩ jawada omukwatadö. Ja̧danö, okobe jwiinö tjomukwati̧ma, sulabenö omukwatadöda babibadö.
Jau chömöledö, suli̧ ömöayedödanö ina dö̧jayi, otiwanö ja̧bö dö̧joböma jwiinobe. Ja̧danö, Dios weina Moisés iwȩyudinama pjaatinokobe ökwödönöma. Moisésma iwȩyudinobe Dios ösödi̧ jawabi, Dios öpöjödi̧ jawabi, chömöledö. Ja̧danö, ja̧ jawa da̧ja̧kwenama, Dios ösödi̧ jawada ja̧do jö̧da̧linobe ¿jö̧tö? Jo̧kwaijayonö, waekwinobe chömöledö, Moisés iwȩyudina da̧ja̧kwenama, ju'wida baibinobe chömöledö. Dios öpöjödi̧ jawa da̧ja̧kwenama sulabe dujuna̧li̧ma ökwödönö weinobe ichejekwa. Ja̧danö, ökwödönö weenama, otiwanö Dios ösödinö ja̧doböma weinokobe, jwaikwöda Dios öpöjödi̧ jawada ja̧doböma weinobe ichejekwa. Ja̧danö, okobe jwiinö dö̧jinama, jwaikwöda woawa jawada ja̧bö ji̧adinobe chömöledö.
Jo̧kwaijayonö, jejenöböködöja ökwödöma. Ökwödöma suli̧ ömöayedödanöböködöja, Dios O̧'wo̧ Luwo̧ ömöayedödanöbedöja, kwo̧'wo̧ luwo̧duwinö ö̧jobetjö̧. Jau chömöledö, Dios O̧'wo̧ Luwo̧ma, okobe deinö Cristo ömöledö tjo̧'wo̧ luwo̧nö jo̧ chömöledö. Ja̧danö, Dios O̧'wo̧ Luwo̧ma bakwo̧ o̧'wo̧ luwo̧nö deitjö̧ma, Cristo ömöledöso̧bö̧kö̧ jo̧bama.
Jau chömöledö, otiwanö balada kwiyinaduwobetjö̧, otiwanö chujuna̧lobe. Wanedö yötawa: Su̧'bȩ babibö welachibanö chujuna̧lobe ichejekwa. Epafroditoma ökwödö kwiyaduwaja̧ balada ichejebinobetjö̧, okobe jwiinö chujuna̧lobe babema. Ja̧danö, kwiyinaduwama, Diosnö iyawadanö ichejekwinobe chömöledö. Wanedö yötawa: Söinö 'dö̧ekwi̧ iyawadanö ichejekwinobe, ja̧danö ja̧ 'dö̧batö ösödinobe Diosma chömöledö.
Chömöledö, belö ökwödönö yödawijatö, Dios ösödi̧danö ja̧kwawama, baikwö ja̧bö kwö̧jaduwo jö̧ba̧lö, ¿jö̧tö? Ja̧danö babema Duluwo̧ Jesús iminö budekwödanö wedaduwakwö, yödawinadanö ja̧bö kwö̧jaduwo jö̧ba̧lö. Isabenö jejenö ja̧bö ju̧kwadöja ida̧ökö chömöledö, jo̧kwaijayonö jemi tupakwöbi jejenö ja̧bö kwö̧jaduwo chömöledö.
Ja̧danö ju'wibi yötawa. Babe möle Diosnö diyobedanö diyi̧ma, biya̧: Jojodönö ju'wi jawabi, ju'wi jawa pjadatobö jo̧be chömöledö. Ja̧ pjadati̧ma Diosnö diyobedanö diyi̧. Ja̧danö ju'wibi, ökwödö dujuna̧li̧tjö jwibadönö pjabatö diyaduwo chömöledö. Ja̧ pjadati̧bi Diosnö diyobedanö diyobe. Chömöledö, jejenö, jojodönö pjadatena Diosma jwiinö ösödobe, o̧'wo̧ ösöwanö edö.