Romanos 8:11 - Dios Iwene

¹¹ Jau chömöledö, Diosma Cristo Jesúsnö woawatjö tjeachajinö ja̧inobe. Ja̧danö, jo̧ba, Cristonö yemidanö tjeachajinö ja̧bina O̧'wo̧ Luwo̧da ökwödö kwo̧'wo̧ luwo̧duwinö ö̧jobe babema, ökwödönö ja̧kwawa iyö. Ja̧danö, kwo̧'wo̧ luwo̧duwinö ja̧nö, ja̧kwawa iyobetjö̧, kwiteba'oduwi ja̧kwawa jawabi iyobe ichejekwa. Jau, Cristo iteba'o woawatjö tjeachajinö ja̧inadanö, ökwödö kwiteba'oduwibi woawatjö tjeachajinö ja̧obedanö jo̧be chömöledö.

Romanos 8:11 ပူးပေါင်းရင်းမြစ်များ

Isaías 26:19

Jo̧kwaijayonö, Diosnö ösödadötjö ö'wö babibajadöma, isabenö a̧tjabayedö yemidanö 'yatjibakwedö. Jo̧kwajabetjö̧ ökwödö nijiso̧pjanö ba̧jadöma, wilubö kwo̧'woduwi ösöwachibanö lo̧köbaduwo. Jau, 'yakibaduwanö idejatakwo̧ Diosma, si̧li̧'idö tji'oli pokwi̧ pokwobö pjaati̧danö, Dios ökwödönö dejatima 'yakibaduwanö idejatakwo̧. Wanedö yöta̧la, jojosuju jitji̧nö jemi̧danö bö̧jȩma jojodönö emakobe ichejekwa, niji okwa ju̧kwadö ö'wö babibinadöma yemidanö 'yatjibajakobetjö̧. jö̧ba̧lö lo̧tjakwedö.

Juan 14:17

Jo̧bama Dios O̧'wo̧ Luwo̧, jweinöda yöbawo̧. Ja̧danö, jo̧bama otiwanö öba̧ja̧da̧lakwo̧ ökwödönöma, otiwanö kwöwaisachibaduwobö. Diosnö öpöjödadöma jo̧ba pjaati̧ma tjemökakwedö, tjomajade okwanö wajwitjökweobetjö̧. Jo̧kwaijayonö ida̧ökö ökwödöma kwöwaisaduwökwe babema ökwödökwö ö̧jobetjö̧. Ju'wi möle ökwödö kwo̧'wo̧ luwo̧duwi okwa tebachibö ö̧jakwo̧, ba̧kwȩlö̧jatebö ö̧jobö— yöawinobe Jesúsma öba̧ja̧di̧ waisachadönöma.

Juan 5:21

Ina yöawinobe: —Chabe'do Diosma iteda ösödi̧danö wobajadönö ja̧kwawa iyö, tjetjachajinö otido̧. Ja̧danö, ötjöma Chabe'do Dios otidi̧danö bakwainö otido̧sa. Ja̧danö, ötjöma Chabe'do jojodönö yemidanö tjetjachajinö otidi̧danö otido̧sa, jojodö jejenö tjetjachajobö, ösödö chomukwatawö̧nöma.

Hechos 2:24

Jo̧kwaijayonö Diosma Jesús yemidanö tjeachajinö ja̧bijetö, ö'wöchaja̧tjö ö̧jibinö ja̧bö. Diosma jejenö i̧sebijetö, Woawama yelösöda jwia Jesúsnöma, jö̧ba̧lö. Bakwo̧bi Jesús yemidanö tjeachajökönö ja̧bo̧ma deobe— yöbawijetö Pedroma—.

Romanos 16:10

Ja̧danö, Apelesnöbi dokwa ateba, jo̧bama öwaetjöda i̧sebinobe Jesúsnö ösödi̧ma, ja̧danö Aristóbulo ömöledönöbi dokwa ateba.

Romanos 16:3

Chömöledö Aquilanöbi, ilekwo Priscanöbi dokwa ateba. Jobadöma ötjökwö otidadö Cristo Jesús weina jawama.

Romanos 16:7

Ja̧danö, ötjöda chömöledö judío jojodö Andróniconöbi, Juniasnöbi dokwa ateba. Jobadöma ötjökwö ka̧lena ba̧jinadö, ja̧danö okobe deinö Jesús webawedöma tjöwaisawö̧ Andróniconö, Juniasnö, Otiwanö Duluwo̧ wei̧ ja̧badö, jö̧ba̧lö. Ötjötjö abönö Cristonö ösödinadö jobadöma.

Romanos 16:9

Ja̧danö, Urbano, ötjökwö Cristo jawa otido̧nöbi dokwa ateba, ja̧danö chösödökwe Estaquisnöbi dokwa ateba.

Romanos 6:12

Jau chömöledö, wanedö yötawa: Ajayima, suli̧ ömöayedödanö ji̧nadöja ajayima. Jo̧kwaijayonö, babema suli̧ ömöayedödanöböködöja. Jo̧kwajabetjö̧, suli̧ wei̧tjöma ja̧köbaduwa chömöledö, böjȩ jojodö sulabe jawa tjösödi̧ma.

Romanos 8:1

Ja̧danö chömöledö, babema Cristo Jesúskwö a̧jö dö̧jobetjö̧ bakwo̧bi deobe ökwödönö yöba̧lo̧ma, Bidöma sulabedö, Dios lȩebakwawö̧, jö̧ba̧lö.

Romanos 8:12

Yötawaja̧danö jo̧be chömöledö, jo̧kwajabetjö̧ Dios O̧'wo̧ Luwo̧ wei̧da ja̧bö dö̧jobö jo̧be babema, suli̧ wei̧maökö.

Romanos 8:2

Jau chömöledö, Jesúskwö a̧jö dö̧jobetjö̧, O̧'wo̧ Luwo̧ Dios ujulunöda dö̧jibinobe. Dios O̧'wo̧ Luwo̧ ujulunöda, sulabe dujuna̧li̧tjöbi, woawatjöbi dö̧jibinobe chömöledö. Ja̧danö, jejenö dö̧jibinobetjö̧, ba̧kwȩlö̧jatebö ja̧kwawa dujuna̧lobe babema Cristo Jesúskwö chömöledö.

Romanos 8:9

Jo̧kwaijayonö, jejenöböködöja ökwödöma. Ökwödöma suli̧ ömöayedödanöböködöja, Dios O̧'wo̧ Luwo̧ ömöayedödanöbedöja, kwo̧'wo̧ luwo̧duwinö ö̧jobetjö̧. Jau chömöledö, Dios O̧'wo̧ Luwo̧ma, okobe deinö Cristo ömöledö tjo̧'wo̧ luwo̧nö jo̧ chömöledö. Ja̧danö, Dios O̧'wo̧ Luwo̧ma bakwo̧ o̧'wo̧ luwo̧nö deitjö̧ma, Cristo ömöledöso̧bö̧kö̧ jo̧bama.

1 Corintios 15:16

Ja̧danö, wobajadöma woawatjö tjetjachajökötjö̧ma, Cristobi tjeachajinökena.

2 Corintios 4:11

Jau chömöledö, ökwödöma ina böjȩnö dö̧jayi, Jesús jawa dotidobetjö̧, ba̧kwȩlö̧jatebö labi̧ jawa döbaledobe, ja̧danö kabatökönö wodo jö̧da̧lobedanö ichejekwa. Ja̧danö, jejenö jo̧betjö̧, ökwödö diteba'o woawasa'otjö Jesús jawa ja̧kwawa isabenö ja̧kwawama öwawobe.

2 Corintios 4:14

Jau chömöledö, döwaisa, Duluwo̧ Jesúsnö woawatjö tjeachajinö ja̧binama, ökwödönöbi Jesúskwö tjedachajinö ja̧akwo̧ jö̧ba̧lö, ja̧danö ökwödönöbi, ökwödö Corintio jojodönöbi ja̧akwo̧, iteda öba a'o dö̧jakobetjö̧. Ja̧ wene ösödö dö̧jobe chömöledö, jo̧kwajabetjö̧ kabatibökönö jwaikwöda yöbawö dö̧jobe.

2 Corintios 5:4

Jau chömöledö, ina bi'o böjȩsa'onö dö̧jayi, usula emawö ö̧ö̧ö̧ jö̧ba̧lö jwödobe. Jo̧kwaijayonö, jejenö jwödi̧ma, ö'wö badibobö dösödobetjö̧ jejenö jwödökö chömöledö, bajalekwönönö ji̧ ja̧kwawa dujuna̧lowe jö̧ba̧lö jejenö jwödobe, ja̧danö babe woawasa'oma, ja̧kwawa jawasa'o baibanö balewachowe jö̧ba̧lö jejenö jwödobe.

Gálatas 6:8

Ja̧danö, bakwo̧ iteda sulabenö ösödi̧ jawa ja̧bö ö̧jitjö̧ma, sulabenö ösödi̧ jawa wa̧ji̧ emakobe, woawa jawa. Jo̧kwaijayonö bakwo̧ Dios O̧'wo̧ Luwo̧ ösödi̧ jawa ja̧bö ö̧jitjö̧ma, Dios O̧'wo̧ Luwo̧ ösödi̧ jawa wa̧ji̧ emakobe, ba̧kwȩlö̧jatebö ja̧kwawa jawa.

Efesios 2:5

sulabenö ja̧bö dö̧jijayonö pjaatinobe Diosma. Ökwödöma do̧'wo̧ luwo̧nöma wobinadödanö dö̧jijayonö Diosma, do̧'wo̧ luwo̧nö 'yadibajinö ja̧inobe, Cristokwöda dö̧jobö. Chömöledö Diosma mikwa jwiinö otiwa jawa iyö dö̧jibanö pjaatinawö̧sa.

Filipenses 3:21

Jo̧ba ichenama, diteba'o böjȩ jawasa'o balewachinö ja̧akobe chömöledö, iteda iteba'o otiwa'o juluwa'odanö ökwödöbi dujuna̧lakobetjö̧. Jau chömöledö, Duluwo̧ Jesucristoma okobe jwiinö juluwo̧, okobe deinöbi okobe jwiinöbi ujuluwo jö̧ba̧lö, ja̧danö ja̧ iteda ujulunö, döbalewachinö ja̧akwo̧.

Hebreos 13:20

Chömöledö, Duluwo̧ Jesúsma ökwösobu ebawinö iteda Diosnö iyawö midawö ö'wö baibinobe. Ja̧danö, jo̧bama midawö ö'wö baibena, Dios 'yayi̧ balekwa yöbawö ujuni̧ma jamatö 'yi̧nobe. Chömöledö, Jesús ökwösobu ebawinö ö'wö baibiökwe, Dios 'yayi̧ balekwa yöbawö ujuni̧ jamatö 'yo̧bö, Diosma Jesúsnö wobajaletjö yemidanö tjeachajinö ja̧inobe. Ja̧danö, tjeachajinö ja̧inökwenöma ökwödönö la'aka te'ada̧lo̧ baibanö 'da̧batö ujuninobe Diosma, iteda a̧jwi̧mu o̧bȩja̧dödanöbedönö la'aka te'ada̧lo̧ baibanö. Ja̧danö chömöledö Diosnö, do̧'wo̧ luwo̧ okwa wene jwiinö badibobö pjabato̧nö ateba ökwödönöma. Jo̧banö ateba ökwödönö pjaatobö iteda ösödi̧da ja̧bö kwö̧jaduwobö. Ja̧danö, jo̧banö ateba ökwödönö pjaatobö Jesucristo ujulunö kwo̧'wo̧ luwo̧duwi okwanö otiwanö Dios ösödi̧danö balewachinadö bakibaduwobö. Isabenö chömöledö, Diosnö ba̧kwȩlö̧jatebö dösödaduwo, Jo̧bada, jö̧ba̧lö. Ba̧kwȩlö̧jatebö dösödaduwo, Jwiinö juluwo̧, jwiinö otiwo̧, jö̧ba̧lö. Chömöledö, biya̧ yötawi̧ma isabenö ji̧ jawa yötawa.

1 Pedro 1:21

Ja̧danö, Cristo ökwödönö pjaatinobetjö̧, Diosnö ösödadöja chömöledö. Jau chömöledö, Diosda Cristonö wobajaletjö tjeachajinö ja̧binama, ja̧danö jo̧banö dejatinö ujulu iyinama, jo̧kwajabetjö̧ Cristonö kwösödaduwenama, Dios yöawi̧ ösödadöja, ja̧danö Diosnö kwo̧'wo̧ wana̧ladöja. Jau chömöledö, Dabe'do Diosma isabenö otiwanö pjaatinobe sulabetjö dö̧jibobö, jo̧kwajabetjö̧ ja̧ pjaatina omukwatö sulabenö ja̧bökönö dö̧jobö jo̧be.

1 Pedro 3:18

Jau chömöledö, Diosma isabenö ökwödö usula kwemawaduwobö weena, baikwö yötawa: Duluwo̧ Cristo usula emawobö weinobe, ¿jö̧tö? Ja̧danö Duluwo̧ Cristo usula emawobö ji̧natjö̧ma, ¿ökwödö usula demawobö jwienaji̧? Jȩna chömöledö. Jau chömöledö, sulabe dujuna̧li̧ imidawo jö̧ba̧lö, Cristoma bakwötanöda midawö woinobe, okobe deinö tjusula midawö. Sulabe jwibo̧da midawö woinobe chömöledö, ökwödö dusula juna̧ladö Dioskwö dichibobö ja̧bö. Jau chömöledö, iteba'oma kwabö lotjinobe, jo̧kwaijayonö Diosma o̧'wo̧ luwo̧nö 'yaibajinö ja̧inobe.

Apocalipsis 1:18

Ja̧danö, ötjödasa ba̧kwȩlö̧jatebö jo̧ma. Wotinajayonö edi, 'yaba̧lo̧sa. Ötjöma wobajaletjö tjetachajinobetjö̧ ba̧kwȩlö̧jatebö 'yaba̧lo̧sa. Yemidanöma wobö̧kö̧sa. Wanedö yötawa: Ötjöma wobajale uluwo̧danö webo̧sa, wobajaletjö o̧penönö juluwo̧chobetjö̧. Ja̧danö, wobajale uluwo̧danö chö̧jobetjö̧ ötjödasa wobinadö tjö̧bajemi yawepi̧ juna̧lo̧ma. Ja̧danö, wobinadö jobetjö latjebobö po̧beböbi po̧bebo̧sa. Ja̧danö, latjebokobö yö̧beböbi yö̧bebo̧sa— jejenö wanedö yöawijatö ötjönöma, Ötjödasa wobajale webo̧ma, jö̧ba̧lö.

Apocalipsis 11:11

Jo̧kwaijayonö wa̧pötakwa mölenö ja'ö baibajena wobinadöma yemidanö 'yabibajadö tjö̧jobe. Jobadönö kwabö lotjinajayonö, wa̧pötakwa möle ja'ö baibajena Dios imiyu'wo teachibawö̧ yemidanö 'yabibajadö tjö̧jobe. Ja̧danö, 'yabibajö tjöjamatiawö̧, jobadönö edadöma, ¡Ayö! jö̧ba̧lö, jwiinö yetjaibobe, yelösöda.