Romanos 8:10 - Dios Iwene

¹⁰ Jau, ökwödö a̧tji̧yedö kwiteba'oduwima isabenö woakobe chömöledö. Ökwödö böjȩ jojodö sulabe dujuna̧lobetjö̧, diteba'oma isabenö woakobe. Ja̧danö, diteba'oma ida̧ökö woinobedanö jo̧be. Jau chömöledö, diteba'oma woinobedanö jo̧be, jo̧kwaijayonö, Cristoma ökwödö kwo̧'wo̧ luwo̧duwinö ö̧jitjö̧ma, kwo̧'wo̧ luwo̧duwima woökena, Diosma ökwödönö ja̧inobetjö̧, suli̧ jwibadö bakibaduwanö.

Romanos 8:10 ပူးပေါင်းရင်းမြစ်များ

Juan 14:23

—Ötjönö ile nibebö ju̧kwadöma ötjö weti̧ a̧ja̧kwö ja̧badö. Ja̧danö, Chabe'doma jobadönö ile nibebö jo̧. Ja̧danö, ötjö, Chabe'do, jobadönö ichö, jobadökwö dö̧jakwedösa.

Juan 15:5

Ötjödasa ubasa'bama. Ökwödöma ubasa'ba opjiyabedöja, ötjökwö dötewinö ja̧nö. Ja̧danö, ötjöma ötjökwö dötewinö ja̧dökwö dötewinö jo̧sa. Jobadöma ubasa'ba otiwanö pokwö wa̧ji̧danö otiwanö da̧peachö tji̧'yakwedö. Ja̧danö, jobadöma otiwanö tjomukwatakwedö ötjökwö dötewinö tjö̧jobetjö̧. Jo̧kwaijayonö ötjökwö dötewinö jö̧ködöma otiwanö omukwatö tjö̧joböma jwibadö, ötjökwö dötewinö tjö̧jokobetjö̧.

Juan 17:23

Chabe'do, ötjökwö ökwökwö dötewinö bakwaibedösa. Ja̧danö, ökwöma ötjö cho̧'wo̧ luwo̧ okwa kwö̧jobe. Ja̧danö, ötjöma jobadö tjo̧'wo̧ luwo̧ okwa jo̧sa. Ja̧danö, jobadö tjo̧'wo̧ luwo̧ okwa chö̧jobetjö̧ bakwaibedödanö omukwatö tjuju̧kwobe. Jejenö, bakwaibedödanö omukwatö tjö̧jiawö̧ böjȩnö ju̧kwadöma, jobadönö edö tjöwaisachibakobe, Aaa, Diosma bidönö ile niebobe. Itji̧ Jesús, böjȩkwö weinökwenö ile niebi̧danö isabenö ile niebobe bidönö, Jesúsnö ösödadönöma, jö̧ba̧lö— jejenö Jesúsma aebinobe Abe'donö.

Juan 4:14

Jo̧kwaijayonö ötjö chiyobu owo̧ma yemidanöma ojwiyo owoböma o̧ti̧lö̧jökökwe, jo̧ba o̧'wo̧ luwo̧ okwanö ojwese'dodanö okwobetjö̧, ba̧kwȩlö̧jatebö ja̧kwawa okwe'dodanö— yöawinobe Jesúsma.

Juan 6:54

Ötjö chiteba'otjö kwadöda, chökwösobutjö owadöda ba̧kwȩlö̧jatebö ja̧kwawa tjujuna̧lakwedö. Jobadönöda tjetjachajinö pjatatakwawö̧ 'dö̧ibaji̧ möle badekwachenama.

Juan 6:56

Chiteba'o kwanöbi, chökwösobu owöbi ja̧badöma ötjökwö dötewinö ju̧kwadö. Ja̧danö, ötjöma jobadökwö dötewinö jo̧sa— Jesús jö̧a̧linobe—.

Romanos 5:12

Chömöledö, ju'wibi yötawa. Ajayinöma suli̧ jwiinobe böjȩnöma, ikenama bakwo̧da Dios weökö jawa ja̧inobe. Ja̧danö, jo̧ba Dios weökö jawa ja̧inobema, okobe deinö jo̧ba i̧tji̧mu tupadanö jojodöbi Dios weökö jawa ja̧tjinobe, woba jojodö batjibanö.

Romanos 5:21

Jau chömöledö, jojodö sulabenö ja̧tji̧ma isabenö juluwinobe, jojodö wotjawinö ja̧bö. Ja̧danö Dios mikwa jwiinö otiwa jawa iyi̧bi juluwi̧, jojodö ba̧kwȩlö̧jatebö tjö̧jakwedö batjibanö ja̧bö. Jau chömöledö, Duluwo̧ Jesucristoda midawö woinobetjö̧, Diosma, ökwödönö mikwa jwiinö otiwa jawa iyö, Chedemi bidöma suli̧ jwibadö, jö̧ba̧lö, ba̧kwȩlö̧jatebö ja̧kwawa iyobe ökwödönöma.

Romanos 8:11

Jau chömöledö, Diosma Cristo Jesúsnö woawatjö tjeachajinö ja̧inobe. Ja̧danö, jo̧ba, Cristonö yemidanö tjeachajinö ja̧bina O̧'wo̧ Luwo̧da ökwödö kwo̧'wo̧ luwo̧duwinö ö̧jobe babema, ökwödönö ja̧kwawa iyö. Ja̧danö, kwo̧'wo̧ luwo̧duwinö ja̧nö, ja̧kwawa iyobetjö̧, kwiteba'oduwi ja̧kwawa jawabi iyobe ichejekwa. Jau, Cristo iteba'o woawatjö tjeachajinö ja̧inadanö, ökwödö kwiteba'oduwibi woawatjö tjeachajinö ja̧obedanö jo̧be chömöledö.

1 Corintios 15:45

Jau chömöledö, baikwö laebobe Dios iwene: Ajayinö jojo Adánnö otidinobe, 'yabalo̧ baibanö, jö̧ba̧lö laebobe. Jo̧kwaijayonö, ikena luwo̧ Cristoma, ja̧kwawa iyo̧ O̧'wo̧ Luwo̧ baibinobe.

2 Corintios 13:5

Chömöledö, ökwödöda bakwo̧nökwena omukwatakwawö kwedaduwo isabenö Jesúsnö kwösödaduwojobö jö̧ba̧lö. Baikwö isabenö kwösödaduwojobö jö̧ba̧lö kwöwaisaduwobö jo̧be chömöledö, Jesúsma okobe deinö jo̧banö ösödadökwö ö̧jobe, jo̧kwajabetjö̧ isabenö jo̧banö ösödadö kwö̧jaduwitjö̧ma, isabenö ökwödökwöbi ö̧jena. Ja̧danö, Jesúsma ökwödökwö ja̧nö öwaetjöda i̧sebakobe ökwödönö, iteda webawo̧ chö̧ji̧ma chömöledö.

2 Corintios 4:11

Jau chömöledö, ökwödöma ina böjȩnö dö̧jayi, Jesús jawa dotidobetjö̧, ba̧kwȩlö̧jatebö labi̧ jawa döbaledobe, ja̧danö kabatökönö wodo jö̧da̧lobedanö ichejekwa. Ja̧danö, jejenö jo̧betjö̧, ökwödö diteba'o woawasa'otjö Jesús jawa ja̧kwawa isabenö ja̧kwawama öwawobe.

2 Corintios 5:21

Jau chömöledö, otiwa jawa wenema baikwö laebobe: Cristoma la'akatjöda sulabenö ja̧inököjayonö, Diosma weinobe, ökwödö sulabenö ja̧di̧ma Cristonö baibobö, jo̧bada midawö woobö. Jejenö weinobe chömöledö, ökwödöma Cristokwö dötewanö ja̧nö, Cristonötjö Dios sulabe jwii̧ ökwödöbi dujuna̧lakobetjö̧.

Gálatas 2:20

Jau chömöledö, Cristokwö bakobe towisa'onö la̧nö wotinajayonö, 'yaba̧lo̧ chö̧jobe. Jo̧kwaijayonö, babe chö̧ji̧ma, ötjöma ida̧ökö wotinobetjö̧ babe chö̧ji̧ma ötjö chö̧ji̧maökö chömöledö, Cristo ö̧ji̧da. Ja̧danö, babe chiteba'onö chö̧ji̧ma, Dios itji̧nö ösödö, ötjönö ile nibebö midawö wobinanö ösödö chö̧jobe.

Efesios 3:17

Ja̧danö, Diosnö atebobe, Cristo otiwanö ö̧jobö kwo̧'wo̧ luwo̧duwinö, jo̧banö kwösödinaduwobetjö̧. Ja̧danö Diosnö atebobe chömöledö, ökwödönö pjaatobö tupakwö, ba̧kwȩlö̧jatebö ösödabikwawö kwö̧jaduwobö ju'wedökwöbi Dioskwöbi.

Filipenses 1:23

Dötölataja jawa chomukwatobetjö̧, chomukwati̧ biya̧ chömöledö, baikwö yötawa: Inesö chösödi̧ma ö'wö babibö, mölejȩbe Cristokwö chö̧jobö chömöledö, ja̧da inesö otiwi̧ma.

Filipenses 3:9

Cristokwöda bakobe dötewinö chö̧jo jö̧ba̧lö. Ja̧danö, babema Moisés iwȩyudina ja̧bö, ötjöda chujulunö sulabe jwibo̧ batiboböma chisakwokobe chömöledö, babe sulabe jwibo̧ chö̧ji̧ma, Cristonö chösodiökwe Dios sulabe jwibo̧ batibanö ja̧i̧da chömöledö. Jau chömöledö, ja̧ sulabe jwibo̧ chö̧ji̧ma, ötjö ja̧ti̧maökö, yöawi̧ chösödiökwe Dios ja̧i̧da chömöledö.

Colosenses 1:27

Jojodö ajayinö wajwitjina wene Diosma iteda ömöledönö i̧sebobö jö̧a̧lobe, inesö otiwi̧ wenema. Ja̧danö ja̧ wenema sule judío jojodönöda i̧sebobömaökö, judío jojodöböködönöbi ja̧ ajayinö wajwitjina wene i̧sebobe chömöledö. Ja̧ wajwitjina wenema biya̧ chömöledö, Cristoma kwo̧'wo̧ luwo̧duwinö ö̧jobetjö̧, inesö otiwobe mölejȩbe kwö̧jaduwakwedöja jö̧ba̧lö.

1 Tesalonicenses 4:16

Baikwö baledakwa̧ yötawa: Duluwo̧ma mölejȩbetjö jwiachakobe, ja̧danö labinö webö jwöakobe, ja̧danö ángelesdötjö la'aka ángelma yöa̧lakobe, ja̧danö Dios asabi̧ jawa trompeta ökwöakobe. Jejenö baledenama, Jesúsnö ösödadötjö wobinadöma dabönö 'yabibajö katjekwajachakobe.

Hebreos 12:23

Ja̧danö, kwo̧'wo̧ luwo̧duwinö jobe ichibö ökwödöma ju'wedökwö bakobe ko̧ko̧kwa̧lö kwuju̧kwaduwi̧danö ju̧kwadöja, okobe deinö Jesúsnö ösödadö, ba̧kwȩlö̧jatebö ja̧kwawa wȩyukwa'yenö tjimibiya ba̧jadökwö. Ja̧danö jobekwö ichibö, Dioskwöbi ju̧kwadöja, okobe deinö jojodönö lȩekwa yöawakwo̧kwö. Ja̧danö jobe Dios ö̧jobekwö ichibö, ju'wedökwöbi ko̧ko̧kwa̧lö ja̧nö ju̧kwadöja, Diosnö tjo̧'wo̧ wana̧ladö wobinadökwö, tjo̧'wo̧ luwo̧nöda. Jobadönöma Dios jö̧a̧lawö̧, Suli̧ jwiinö babibinadö, jö̧ba̧lö.

Hebreos 9:27

Ja̧danö chömöledö, ökwödö jojodöma okobe deinö bakwötanöda wodakwedösa. Jemi ikenama, wobajadöma Dios öba a'o ja̧nö Dios ökwödö dö̧jina yöawi̧ da̧ja̧kwakwedösa, otiwanö ja̧bö dö̧jinabi, sulabenö ja̧bö dö̧jinabi.

Apocalipsis 14:13

Ikenama iwene cha̧ja̧kwijatö mölejȩbetjö, baikwö: —Juan, biya̧ yötawi̧ wȩyudi. Babe möle, inia tjötji̧ baledi̧ möletjö tupakwö, Jesúsnö dötewinö ju̧kwadöma tjo̧'wo̧ ösöwanö tjö̧jakwedö— jejenö chiwȩyudobö wei̧ cha̧ja̧kwijatö. Ikenama Dios O̧'wo̧ Luwo̧ma jö̧a̧lijatö: —Jau, jweinö yöawa. Jobadöma, Jesúsnö dötewinö ju̧kwadöma tjo̧'wo̧ ösöwanö tjö̧jakwedö. Yelösöda, tjime'dawachibanö otidinadöma bajaliyanö tjö'wachibakwedö, otidökönö. Ja̧danö, jobadö mölejȩbenö ja̧nö böjȩnö otidiatjinama i̧sebakobe, Bidöma jweinö Jesúsnö o̧'wo̧ wa̧na̧lö 'yi̧nadö, jö̧ba̧lö— jö̧a̧lijatö Dios O̧'wo̧ Luwo̧ma.