Romanos 6:9 - Dios Iwene

⁹ Chömöledö, döwaisa, Diosma Cristonö tjeachajinö ja̧inobe woawatjöma, ja̧danö, jemi tupakwö, yemidanö woökena Jesúsma. Babema woawama juluwokobe yelösöda jo̧banöma.

Romanos 6:9 ပူးပေါင်းရင်းမြစ်များ

Romanos 5:14

Jau chömöledö, Moisés iwȩyudina ina jwiayi, okobe deinö Adán i̧tji̧mu tupadanö jojodöma wotjinobe. Adánnöma weinobe Diosma, Bowitjö kwukwoko, jö̧ba̧lö. Ikenama, Dios weökö jawa ja̧bö, Dios weinokowitjö ukwinobe Adánma. Ja̧danö, Adán i̧tji̧mu tupadanö jojodöma Dios weinokowitjö tjukwinokobe chömöledö, jo̧kwaijayonö ina Dios weökö jawa ja̧binadö jobadöbi. Ja̧danö, Dios weökö jawa ja̧tjinobetjö̧, okobe deinö wotjinobe, Dios Moisésnö iwȩyudobö weenanö baibanö. Jau chömöledö, ajayinö ji̧na Adánma, jemi tupakwö ichakwo̧ Jesúsdanö ichejekwinö̧kö̧.

Romanos 6:10

Jau chömöledö, Cristoma bakwötanöda woinobe, ökwödö sulabe dujuna̧li̧ imidawinobe, ¿jö̧tö? Ja̧danö, jejenö woinemi o̧pema, babema woawama yelösöda juluwokobe jo̧banöma, dötölatajanö woökena chömöledö. Babe tjebachajö ö̧jobema, otiwanö bakobe Dioskwöda ö̧jobe.

Romanos 6:14

Jau chömöledö, suli̧ma ökwödönö juluwoböma jwiobe yelösöda babema, Diosma suli̧tjö kwö̧jibaduwanö ja̧inobetjö̧. Jo̧kwajabetjö̧, jwaikwöda otiwanö ja̧bö kwö̧jaduwo, sulabenö ja̧bökönö. Jau chömöledö, Diosma ökwödönö weinokobe, Okobe jwiinö Moisés iwȩyudina ja̧bö kwö̧jaduwo, jö̧ba̧lö. Ju'wida ja̧inobe, itedada mikwa jwiinö otiwa jawa iyö, suli̧tjö kwö̧jibaduwanö ja̧inobe. Ja̧danö jejenö pjaatinobetjö̧, suli̧ma ja'yubebi ökwödönö juluwoböma jwiobe chömöledö.

Romanos 6:4

Ja̧danö, bakobe wodinobetjö̧, jo̧banö tjödinenama, bakobe ökwödönöbi tjödinobe. Ja̧danö, jemi tupakwö Abe'do Diosma, iteda ujulu i̧sebö Jesúsnö woawatjö tjebatajö ja̧inobe. Jejenö jo̧banö tjebatajö ja̧inenama, ju'wibi ja̧inobe chömöledö. Ökwödö jo̧bakwö a̧jadönöbi 'yadibajinö ja̧inobe. Ja̧danö, 'yadibajinö ja̧inobema, 'yayi̧ jawa, wainö ja̧bö dö̧jobö ja̧inobe. Jau chömöledö, yemidanö ajayinö ja̧bö dö̧jinadanö dö̧joböma ja̧inokobe, wainö ja̧bö dö̧jobö ja̧inobe Diosma.

Hebreos 7:16

Isabenö chömöledö, Dios wei̧ Moisés iwȩyudinama weinokobe Jesúsnö, Diostjö jojodötjö ö'weje la'aka pjabato̧ baiboböma. Jo̧bama Levítjö tupadanö jojobö̧kö̧obetjö̧ weinokobe. Jesús ö'weje la'aka pjabato̧ baibanöma jejenöma ji̧nokobe. Jesúsma, Melquisedec mikwo̧ ba̧kwȩlö̧jatebö ö̧ji̧danö, iteda ba̧kwȩlö̧jatebö ö̧ji̧ ujulunöda Diostjö jojodötjö ö'weje la'aka pjabato̧ baibinobe.

Hebreos 7:25

Jo̧kwaobetjö̧ Jesúsda jojodö Dioskwö ichibö tjö̧jibinö pjabato̧, Jesúsma dö̧jibinö pjabato̧, jö̧ba̧ladönöma. Ja̧danö, jobadö tjö̧ji̧bi okobe jwiinö pjaatinobe Jesúsma, ja'yubebi ji̧bökönö. Ja̧danö, Jesúsma jo̧banö ösödadönöma ba̧kwȩlö̧jatebö tjö̧jibinö pjabato̧, Jesúsma ba̧kwȩlö̧jatebö Diosnö abebö jobadönö pjaatobö ö̧jobetjö̧.

Apocalipsis 1:18

Ja̧danö, ötjödasa ba̧kwȩlö̧jatebö jo̧ma. Wotinajayonö edi, 'yaba̧lo̧sa. Ötjöma wobajaletjö tjetachajinobetjö̧ ba̧kwȩlö̧jatebö 'yaba̧lo̧sa. Yemidanöma wobö̧kö̧sa. Wanedö yötawa: Ötjöma wobajale uluwo̧danö webo̧sa, wobajaletjö o̧penönö juluwo̧chobetjö̧. Ja̧danö, wobajale uluwo̧danö chö̧jobetjö̧ ötjödasa wobinadö tjö̧bajemi yawepi̧ juna̧lo̧ma. Ja̧danö, wobinadö jobetjö latjebobö po̧beböbi po̧bebo̧sa. Ja̧danö, latjebokobö yö̧beböbi yö̧bebo̧sa— jejenö wanedö yöawijatö ötjönöma, Ötjödasa wobajale webo̧ma, jö̧ba̧lö.