ökwödönö weijatö, yökawaduwo kwö̧ja̧wo̧ Josénöma, jwiinö sulabenö ja̧köbaduwinama o̧'wo̧ sököbo, jö̧ba̧lö. Jo̧kwaobetjö̧ ökwönö adeba: Kwo̧'wo sököbo ökwödö jwiinö sulabenö ja̧dina ökwönöma. Ökwödö, kwabe'do uluwo̧ Dios ömöayedöma ökwönö adeba, kwo̧'wo sököbo sulabenö ja̧dinama, yemidanö kwomukwatoko, jö̧ba̧lö— jejenö José öpöedöma webijadötö tjö̧mö̧ayo̧nö José yöawobö. Ja̧danö, Joséma jobadö atjebi̧ a̧ja̧kwö o̧'wo̧ jwiinö tjo̧bekwibö budekwabijetö.
Romanos 6:22 - Dios Iwene22 Jo̧kwaijayonö, Diosma suli̧tjö kwö̧jibaduwanö ja̧bö, iteda ömöayedö bakibaduwanö ja̧inobe. Ja̧danö, ja̧ Dios ömöayedö kwö̧jaduwi̧ mikwawi̧ma biya̧da chömöledö: Babema sulabetjö 'da̧bachibö ja̧nö, ba̧kwȩlö̧jatebö ja̧kwawa juna̧ladöja. အခန်းကိုကြည့်ပါ။ |
Romanos 6:22
40 ပူးပေါင်းရင်းမြစ်များ
Atadökwe, Isabenö Jo̧ma Awetjanö abebö a̧ja̧kwinobe: —Jobe bö̧jȩ kwebachö kwö̧jonö, chömöayo̧ Jobnö kwedaji̧? Bö̧jȩ ba̧kwemeachibanö ju̧kwadötjö, bakwo̧bi Jobdanöbo̧ma deobe, jö̧tö? Jau, Jobma isabenö otiwanö wene jwibo̧, Dios ösödi̧danö ja̧bö jo̧, ja̧danö Diosnö yebabinö ösödo̧, ja̧danö suli̧ jawa öpöjödö kabatibo̧, –Suli̧, Dios öpöjödi̧, –jö̧ba̧lö, jö̧tö? —jö̧ba̧lö abebö a̧ja̧kwinobe Awetjanö.
Ja̧danö, ötjö jobadönö otidinada ökwönö tjöbeba̧lo pjatatobetjö̧, okobe jwiinö ölakwabikwawa jawa tjotidi̧teniama, kwöba a'otjö suli̧ waekwakobe, ju'wi jawabi ökwönö suli̧ waedobö jwiakobe. Ja̧danö lȩekwa luwedö tjöba a'otjö, ju'wedö ökwönö wanedö yötja̧litjö̧ma, okobe deinö jobekwö wanedö yöba̧ladö yötja̧li̧ otiwanö i̧sȩbö kwatadakwujuja, —Omöna, lȩekwa yötjawobö jwia, —jö̧ba̧lö. Jobekwö pjabato̧sa ötjöda chömöayedönö Jerusalen, ja̧danö wene jwibadö tjö̧ji̧ i̧sȩkwama, ötjö tjuluwo̧ Isabenö Jo̧ Diostjö ichi̧, jö̧ba̧lö wanedö yöa̧lobe Diosma, Jerusalen comunidad jojodönö.
Ja̧danö, ötjönö tjösödobetjö̧ tjeju junibadö, ja̧danö tjöjawujudö ya̧dönöbi, tjö̧ja̧wo̧dö ömadönöbi, tjabe'donöbi, tjojo'donöbi, tji̧tji̧munöbi yöne tjömöledönöbi junibadö, ja̧danö tjöbatjiju junibadöma, ötjönö ösödö tjujunibobetjö̧ isabenö tjujunibinatjö yelösöda bajalekwönönö balekwa iyakwo̧ Diosma, ja̧danö ju'wibi ba̧kwȩlö̧jatebö ja̧kwawa jobadönö iyakwo̧.
Ja̧danö, ötjöma omudawö chujunijatö ökwödönöma ötjö chömöledö bakibaduwanö. Ökwödömaökö. Ötjönö omudawö juninöködöja. Ötjödasa. Ja̧danö, ökwödönö 'da̧batö chujunijatö ötjö yötawi̧ jojodönö yöbawö kwi̧'yaduwobö. Wanedö yötawa: Jojodöma ba̧jekwadö, nöinö wa̧ji̧danö, ökwödö yökawaduwi̧ a̧ja̧kwö ötjönö tjösödakobe. Ja̧ wa̧ji̧ma kököbachibö woökönö ba̧kwȩlö̧jatebö 'wa̧jakobe— wanedö yöawinobe—. Chömöledö, jejenö jojodönö yöbawö 'ya̧nö, okobe jwiinö ötjö chiminö Chabe'donö akebaduwinö jo̧bama a̧ja̧kwö pjaatakwo̧.
Ina yöawinobe: —Ja̧danö, bakwo̧, jojodönö Dioskwö tjichibobö öbibo̧ma, batjo junawa 'döbö emo̧danö jo̧, ida̧ökö yȩi̧ wa̧ji̧ 'döbö emo̧danö. Ja̧danö, jo̧ba batjo junawa emo̧ma, emaja̧ iyawö̧ma tjimidobe ¿jö̧tö? Ja̧ tjimidi̧danö, Diosma iteda otiwi̧ jawa iyakobe jojodönö öbibo̧nö, jo̧bakwö tjichibobö öbibo̧nöma. Jobadö öibawö̧ma, ba̧kwȩlö̧jatebö ja̧kwawa tjemakwedö, Dioskwö ichibö. Ja̧danö, ba̧kwȩlö̧jatebö ja̧kwawa tjemiökwe, jobadönö öbibo̧ma o̧'wo̧ ösöwanö ö̧jakwo̧. Ja̧danö, ajayinö Dios iwene yöbawinabi o̧'wo̧ ösöwanö ö̧jakwo̧. Jo̧bama ajayinö önebiya ujuninadanö ajayinö yöawinobe— jejenö yöawinobe—.
Ja̧danö, ötjö chöba̧ja̧di̧ waisachadö kwö̧jaduwobetjö̧ isabenö ji̧ yötawi̧ma kwöwaisachibaduwakwedöja. Wanedö yötawaduwakwö: Isabenö ji̧ yötawi̧ kwöwaisachibaduwobetjö̧, nu'yö di̧batö tjödinatjö̧ kwö̧jibaduwinö bakibaduwakwedöja, kwuluwo̧duwi wei̧tjö lakebaduwinö— jö̧a̧linobe Jesúsma, wanedö yöbawö.
Jau chömöledö, suli̧ma ökwödönö juluwoböma jwiobe yelösöda babema, Diosma suli̧tjö kwö̧jibaduwanö ja̧inobetjö̧. Jo̧kwajabetjö̧, jwaikwöda otiwanö ja̧bö kwö̧jaduwo, sulabenö ja̧bökönö. Jau chömöledö, Diosma ökwödönö weinokobe, Okobe jwiinö Moisés iwȩyudina ja̧bö kwö̧jaduwo, jö̧ba̧lö. Ju'wida ja̧inobe, itedada mikwa jwiinö otiwa jawa iyö, suli̧tjö kwö̧jibaduwanö ja̧inobe. Ja̧danö jejenö pjaatinobetjö̧, suli̧ma ja'yubebi ökwödönö juluwoböma jwiobe chömöledö.
Jejenö kwösödaduwiökwe, suli̧tjö kwö̧jibaduwanö ja̧inobe Diosma, iteda ömöayedö bakibaduwanö. Ja̧danö, Dios ömöayedö babibö, otiwa jawa ja̧tjakwedö bakibinaduwobe. Jau chömöledö, Diosma otiwanö pjaatinobe ökwödönöma. Ja̧danö, otiwanö pjaatina omukwatö, jo̧banöda dösödena, otiwanö pjabato̧ja jö̧ba̧lö.
Ökwödöbi ja̧danö chömöledö. Ökwödöbi ida̧ökö wodinobe chömöledö. Dios edemi Jesús woinenama, ökwödöbi bakobe Cristokwö a̧jö wodinobe. Jau chömöledö, Moisés iwȩyudina junibö, Jesúskwö a̧jö wodinobe. Ja̧danö jejenö wodinobetjö̧, Moisés iwȩyudinama ökwödönö weokobe babema, ida̧ökö wodinobetjö̧. Ja̧danö, babema Cristokwöda dö̧jobe. Jau chömöledö, Dios woawatjö tjeachajinö ja̧inökwekwöda dö̧jobe babema. Ja̧danö, jo̧bakwöda dö̧jobetjö̧, babema Dios ösödinö ja̧dobö jo̧be.
Jau chömöledö, Duluwo̧nö dösödenama, tjöekwado̧ kalebö loobe Duluwo̧ma, iteda salöinö ujulu dedakobetjö̧. Ja̧ Duluwo̧ jö̧ba̧lö yöta̧laja̧ma, Dios O̧'wo̧ Luwo̧nö yöta̧lobe chömöledö, bakwo̧dabedötjobetjö̧. Ja̧danö, baikwö yötawaduwakwö chömöledö: Dios O̧'wo̧ Luwo̧ do̧'wo̧ luwo̧nö ö̧jobetjö̧, tjöekwado̧ jwibadö dö̧jobe. Jau chömöledö, isabenö ja̧ tjöekwado̧ kalekwö loawa jo̧be, ja̧danö Israel jojodöbi tjöekwado̧ kalekwö lotjobö jo̧be, jo̧kwaijayonö Duluwo̧nö tjöpöjödobetjö̧, jwaikwöda tjöekwado̧ muchekwadöda tjö̧jobe.
Chömöledö, Diosma ökwödönö jwöinobe, Moisés iwȩyudinatjö kwö̧jibaduwinö, ¿jö̧tö? Jo̧kwaijayonö, Aaa, Moisés iwȩyudina ömöayedödanöböködö dö̧jobetjö̧, jwaikwöda dösödi̧ jawada ja̧bö dö̧jo jö̧ba̧löma kwomukwataduwa chömöledö, kwömöledöduwi Jesúsnö ösödadönö ösödabikwawö ja̧nö, tjömöayedödanö ja̧nö pjabatakwawö kwö̧jaduwo chömöledö.
Jo̧kwaijayonö Dios O̧'wo̧ Luwo̧ do̧'wo̧ luwo̧nö otidi̧ma wainö ji̧ chömöledö. Baikwö yötawa: Dios O̧'wo̧ Luwo̧ otidi̧ma chömöledö, biya̧: ösödabikwawi̧bi, tjo̧'wo̧ ösöwi̧bi, tjo̧'wo̧ luwo̧nö wene jwiinö ja̧kwawabi, tjo̧'wo̧ 'dibachibö ja̧kwawabi, jojodönö dösölö̧jinö ja̧danö otiwanö ja̧awabi, jö̧tja̧li̧danö ja̧awabi,
Ja̧danö, ökwödö Colose jojodötjö jojo ja̧danö Cristo Jesús ömöayo̧ Epafras mikwo̧ma ökwödönö deawobedanö dokwa jö̧ba̧lö aebobe. Jo̧bama kabatökönö ökwödönö omukwatö nöinö Diosnö aebobe chömöledö, kwo̧'wo̧ luwo̧duwi da̧peachö kwö̧jaduwakobetjö̧, ja̧danö dötölatajanö omukwatökönö, jwaikwöda Dios ösödi̧ jawada ja̧bö kwö̧jaduwakobetjö̧.
Tito, böja kwialusöjanö ötjö Pablo mikwo̧ma wȩyudö wetakwö. Ötjöma Dios ömöayo̧sa, ja̧danö Jesucristo webawo̧sa. Ötjöma Dios 'da̧batö ujuninökwesa, Dios omudawö ujuninawö̧nö pjabatö chöba̧ja̧do jö̧ba̧lö. Ja̧danö, jobadönö chöba̧ja̧dobe, jwaikwöda Dios yöawi̧ tjösödakobetjö̧. Ja̧danö, isabenö wene tjöwaisakobetjö̧ chöba̧ja̧dadönö. Ja̧danö, Dios ösödi̧danö ja̧bö tjö̧jakobetjö̧ chöba̧ja̧dadönö.
Chömöledö, ökwödöma kwö̧ja̧wo̧dökwö ösödabikwawö, wene jwiinö kwuju̧kwaduwobö kwisakwaduwo. Ja̧danö, Dios i̧tji̧mu bakibinaduwobetjö̧ sulabenö ja̧bökönö kwö̧jaduwobö kwisakwaduwo. Chömöledö, sulabenö ja̧bökönö ju̧kwadöma Duluwo̧kwö dötewinö ju̧kwadö. Isabenö chömöledö, sulabenö ja̧bö ju̧kwadöma Duluwo̧kwö dötewinö ju̧kwöködö.
Jau chömöledö, isabenö jö̧a̧li̧danö ja̧akwo̧ jö̧ba̧lö Jesúsnö kwösödaduwobetjö̧, kwo̧'wo̧ luwo̧duwima isabenö ji̧binobe, Dios iyi̧ emadö bakibaduwanö. Jau chömöledö, 'dö̧ibaji̧ mölema Dabe'do Diosma isabenö otiwanö ökwödönö pjaatakobe, ja̧danö ja̧ wene omukwatö, babe usula kwemawaduwijayonö, kwo̧'wo̧ ösöwanö ja̧nö, Dabe'do Diosnö kwösödaduwobe.
Jau chömöledö, kwöwaisaduwa, ju'wedö Cristonö ösödadöma yötja̧lena, Aaa, Cristonö chösödobetjö̧, ida̧ökö mölejȩ jojosa, böjȩ jojobö̧kö̧sa, jo̧kwajabetjö̧ luwedö wetji̧ cha̧ja̧kwobö jwibo̧sa, mölejȩ jojodö tjuluwedötjokobetjö̧, jö̧ba̧lö. Jau chömöledö, jejenö omukwatadö tjuju̧kwobe, ja̧danö jejenö omukwatö, sulabenö ja̧bö tjö̧jobe. Jobadö tjomukwati̧danöma kwomukwataduwa chömöledö. Isabenö yötja̧li̧danö, böjȩ luwedö tjömöayedöböködösa, jo̧kwaijayonö Dios ömöayedösa, ja̧danö jo̧bama ökwödönö weobe, luwedö wetji̧ ja̧bö dö̧jobö. Jau chömöledö, Dios ömöayedö ja̧nö, sulabenö ja̧bökönö jwaikwöda otiwanö ja̧bö kwö̧jaduwo.
ကြော်ငြာတွေ