Romanos 5:17 - Dios Iwene17 Isabenö bakwo̧ sulabenö ja̧inobetjö̧, woawa jamatinobe. Ja̧danö, jo̧ba sulabenö ja̧inama jwiinö juluwinobe ichejekwa, ba̧jekwadö wotjawinö ja̧bö. Jo̧kwaijayonö, jelo̧ Jesucristo ja̧inama, jemi bajalekwönönö juluwi̧ ji̧. Jau chömöledö, Jesús midawö woinobetjö̧, mikwa jwiinö otiwa jawa iyö, Diosma ba̧jekwadönö jö̧ba̧lo̧, Chedemi bidöma suli̧ jwibadö, jö̧ba̧lö. Ja̧danö bakwo̧, Jesucristoda midawö woinobetjö̧, ba̧jekwadöma ji̧badö, ja̧danö ba̧kwȩlöjateböda tjö̧ja̧kwedö. အခန်းကိုကြည့်ပါ။ |
Romanos 5:17
26 ပူးပေါင်းရင်းမြစ်များ
Jwiinö cho̧'wo ösöwachibanö chösödobe Isabenö Jo̧nö, —Chösödökwe Diosma otiwanö pjabato̧, —jö̧ba̧lö. Jau, baikwö wanedö yöta̧la, ji̧ikwa jawa kamisinö 'duatajabe ötjönö, ja̧danö otiwanö ja̧bö ja̧kwawa jawa wamesa̧do̧nöbi 'duatajabe. Jobekwö 'duatajökwe, ö'weje pjabato̧bi, ilekwonö emakwo̧bi jwiinö otiwaka butjawaka tjubutjawi̧danö, ja̧danö jilekwenö jemakwuju sasiyu jöni̧danö, otiwanö 'dubawö jo̧sa, chösödökwe Diosma otiwanö pjaatobetjö̧.
Ja̧danö, naukwabo̧ma sulabenö ja̧oböda icho̧, o̧bȩja̧dönö önaukwoböbi, kwabö looböbi, jwiinö söbebö looböbi. Jo̧kwaijayonö ötjöma naukwabo̧ sulabenö ja̧oböda ichi̧danöma chichinokobe böjȩnö ju̧kwadö jojodönöma. Jojodö ba̧kwȩlö̧jatebö tjö̧ji̧ chiyobö chichijatö. Ja̧danö, jojodö jwiinö otiwanö tjuju̧kwobö chichijatö ötjöma— yöawinobe Jesúsma.
Ja̧danö, Dios mikwa jwiinö otiwa jawa iyi̧ma, Adán Dios weökö jawa ja̧inadanö ichejekwokobe. Baikwö yötawa: Ajayinöma, bakwo̧da Dios weökö jawa ja̧inobetjö̧, okobe deinö woba jojodö batjibinobe. Jo̧kwaijayonö, Dios mikwa jwiinö otiwa jawa iyi̧ma wainö ji̧. Jesucristoma mikwa jwiinö otiwa jawa iyö ja̧inobetjö̧, mikwa jwiinö otiwa jawa iyawa jo̧be, ba̧jekwadönöma. Ja̧danö, Adánma ba̧jekwadö wotjawinö ja̧bina, ja̧danö Jesucristoma ba̧jekwadö ba̧kwȩlö̧jatebö tjö̧jinö ja̧bina.
Chömöledö, Diosma iteda wei̧ jojodö ja̧bö tjö̧jo jö̧ba̧lö wei̧ma Moisésnö iwȩyudobö weinobe. Jojodö Dios weökö jawa ja̧tji̧ma tjöwaisachibotö jö̧ba̧lö weinobe, ja̧ Moisés iwȩyudinama. Iwȩyudakwa̧ abönö, ida̧ökö Dios weökö jawa ja̧tjinajayonö, Moisés iwȩyudinelöda tjöwaisachibobö ji̧nobe, Aaa, Dios weökö jawa ja̧badösa, jö̧ba̧lö. Ja̧danö, jemi tupakwö, ina jwaikwöda sulabenö ja̧bö tjö̧jinobe jojodöma. Ja̧danö, jemi tupakwö jojodö sulabenö ja̧tji̧ma nöachinobe ichejekwa. Jo̧kwaijayonö, jojodö sulabenö ja̧tji̧ma nöachijayonö, Diosma ina lȩlö̧jinö edinobe jojodönöma. Ja̧danö, jojodö sulabenö ja̧tji̧ nöachemi o̧pekwönönö nöachinobe Dios lȩlö̧jinö edi̧ma ichejekwa. Ja̧danö lȩlö̧jinö edö, mikwa jwiinö otiwa jawa iyö, jojodönö pjaatinobe Diosma.
Jau chömöledö, suli̧ma ökwödönö juluwoböma jwiobe yelösöda babema, Diosma suli̧tjö kwö̧jibaduwanö ja̧inobetjö̧. Jo̧kwajabetjö̧, jwaikwöda otiwanö ja̧bö kwö̧jaduwo, sulabenö ja̧bökönö. Jau chömöledö, Diosma ökwödönö weinokobe, Okobe jwiinö Moisés iwȩyudina ja̧bö kwö̧jaduwo, jö̧ba̧lö. Ju'wida ja̧inobe, itedada mikwa jwiinö otiwa jawa iyö, suli̧tjö kwö̧jibaduwanö ja̧inobe. Ja̧danö jejenö pjaatinobetjö̧, suli̧ma ja'yubebi ökwödönö juluwoböma jwiobe chömöledö.
Isabenö jwiobe yelösöda ökwödönö 'da̧batö loawa jawama chömöledö. Mölejȩbe ju̧kwi̧tjöbi, böjȩ teebe ju̧kwi̧tjöbi okobe jwiinö Dios otidina jawatjö, ju'wi jayebi jwiobe yelösöda, ökwödönö 'da̧batö loawa jawama, Dios ökwödönö ile niebobetjö̧ chömöledö. Jau chömöledö, ja̧ Dios ökwödönö ile niebi̧ma, Duluwo̧ Cristo Jesúsda wajuwanö i̧sebinobe ökwödönöma.
Chömöledö, wanedö yötawa: Ökwödö Corintio jojodöma kwomukwataduwobe, ida̧ökö okobe jwiinö do̧'wo̧ luwo̧ jawama juna̧ladösa jö̧ba̧lö. Ja̧danö Dios ökwödönö iyobö jö̧a̧li̧ma, ida̧ökö okobe jwiinö juna̧ladösa jö̧ba̧lö kwomukwataduwobe. Ja̧danö, ökwödö ökwödönö yöbawinadöma luwedö badibököjayonö, ida̧ökö la'aka luwedö babibadösa jö̧ba̧lö kwomukwataduwobe chömöledö. Jejenö kwomukwataduwi̧ma, sulabenö omukwatadöja chömöledö. Isabenö la'aka luwedö bakibinaduwatjö̧ma, chösödo jö̧ta̧linena, ökwödöbi ökwödökwö la'aka luwedö badibo jö̧ba̧lö.
Cristokwöda bakobe dötewinö chö̧jo jö̧ba̧lö. Ja̧danö, babema Moisés iwȩyudina ja̧bö, ötjöda chujulunö sulabe jwibo̧ batiboböma chisakwokobe chömöledö, babe sulabe jwibo̧ chö̧ji̧ma, Cristonö chösodiökwe Dios sulabe jwibo̧ batibanö ja̧i̧da chömöledö. Jau chömöledö, ja̧ sulabe jwibo̧ chö̧ji̧ma, ötjö ja̧ti̧maökö, yöawi̧ chösödiökwe Dios ja̧i̧da chömöledö.
Ja̧danö, Duluwo̧ma ötjönö lȩlö̧jinö edö, mikwa jwiinö otiwa jawa iyinobe ötjönöma. Wanedö yötawa: Su̧'bȩ babibö welachibanö tupakwö kabatökönö iyinobe otiwa jawa ötjönöma. Ja̧danö ju'wibi, jo̧ba yöawi̧ chösödobö pjaatinobe. Ja̧danö, ju'wedö chömöledö Cristo Jesúsnö ösödadönö chösödobö pjaatinobe, okobe deinö Cristo Jesúskwö a̧jö ju̧kwadönö pjaati̧danö.
Chö̧ja̧wo̧dö chösödawö̧, a̧ja̧kwaduwitjö. Böjȩnö ju̧kwadöma usulasedönö edö, Bidöma mikwawöködö, jö̧ba̧lö, tjomukwatobe. Jo̧kwaijayonö Diosma jobadönö edö, Jwiinö mikwawadö, jö̧ba̧lö, edobe. Diosma jobadö jwibadönö omudawö ujuninobe jwiinö juna̧ladöda batjibobö, tjo̧'wo̧ luwo̧ jawa, Jesucristonö tjo̧'wo̧ tjöwana̧lobetjö̧. Ja̧danö, Diosma jobadönö omudawö ujuninobe ju'wi möle jo̧bakwö webö tjö̧jobö, iteda La'aka Luwo̧ webö ö̧jobe ja̧nö. Jau chö̧ja̧wo̧dö, usulasedönöbi jejenö tjö̧jobö omudawö ujuninobe Diosma okobe deinö jo̧banö ösödadö tjö̧jakwa̧ma.
Jo̧kwaijayonö jobadö Jesúsnö öpöjödö töbö metjijayonö, töböma meböködöja chömöledö, Dios omudawö ujuninawö̧ja, ja̧danö La'aka Duluwo̧ wei̧ otidadöja, ja̧danö mölejȩ jojodöja, ja̧danö Diosda ömöledöja chömöledö. Jau chömöledö, isabenö Dios wei̧ otidadö kwö̧jaduwobe. Diosma ökwödönöda 'da̧batö ujuninobe, jo̧ba inesö otiwanö pjaati̧ wene jojodönö yökawaduwobö. Jau chömöledö, Diosma isabenö otiwanö ökwödönö pjaatinobe, ökwödönö yȩa'wo okwatjö labeibö, iteda inesö idejatobekwö tekachaduwobö jwöinobe Diosma, ja̧danö jo̧ba inesö otiwanö pjaati̧ wene yökawaduwo jö̧ba̧lö, ökwödönö omudawö ujuninobe.
Jesucristoma ökwödönö 'da̧batö ujuninobe iteda ömöayedö badibanö, itenöda, Duluwo̧, jö̧ba̧lö, öbabidö badibanö. Damötjö, la'aka luwedö, Diostjö jojodötjö ö'weje pjabatadö pjatjatinadanö Jesucristoma 'da̧batö ujuninobe ökwödönöma, jojodönö pjadatobö. Ja̧danö, ökwödöma Diosnö abebadösa, Jesucristo abe'donöma, jojodönö pjaatobö. Chömöledö, Jesucristo otiwanö pjaatinobe ökwödönöma. Otiwanö pjaatinobetjö̧ jo̧banö dösödaduwo, Jwiinö juluwo̧, jö̧ba̧lö, Ba̧kwȩlö̧jatebö webö ö̧jobö jo̧be, jö̧ba̧lö. Chömöledö yötawi̧ma isabenö yötawa.
Ja̧danö, chedijatö ba̧kwawa ökiya, nöinö, la'aka luwedö tjö̧baji̧ ökiya. Ja̧ ökiyanö ba̧jadöma Dios lȩebakwa̧ jawa yötjawobö ba̧jadö. Ju'wedönöbi chedijatö, öwawöködönö. Jobadöma tjuubiya bulabinö lotjinawö̧, Dios iwenebi Jesús yöawinabi yötjawobetjö̧. Jobadöma ojwe okwatjö labebinanö, jo̧ba o̧'wo̧ jawabi öpöjödadö. Ja̧danö, jo̧ba imi número doawa, tjömamunöbi tjöbanöbi öpöjödadö. Jejenö tjöpöjödobetjö̧, tjuu bulatö lotjinawö̧. Ja̧danö, jobadöma wotjinajayonö yemidanö 'yabibajinadö, Cristokwö jojodönö webö tjö̧jobö, ja̧ mil imiamebiya jenanö.
Yelösöda, wobinadötjö ajayinö tjebachajinadöma, tjo̧'wo̧ ösöwanö ja̧dö, Dios wei̧ a̧ja̧kwö, Cristokwö. Jobadöma nöola ubolanö okwa loawatjö ji̧badö. Ja̧danö, Dioskwö Cristokwö lekwe, mil imiamebiya jenanö, Diostjö jojodötjö ö'weje pjabatadödanö tjotidakwedö. Dioskwö, Cristokwö mil imiamebiya jenanö tjotidakwedö.
Chömöledö, bakwo̧ sulabetjö juluwinanöma chö̧jobekwö ichibena, ötjö la'aka luwo̧ webö chö̧bemi pjeanö ö̧bobö wetakwo̧. Ötjöma wobajaletjö chujuluwina ikena Chabe'do ö̧bemi pjeanö chöbamatijatö, ba̧kwȩlö̧jatebö jenada chö̧bobö. Ja̧danö, sulabetjö juluwinanöbi, chö̧jobekwö ichibena chipjeanö ö̧bobö, la'aka luwo̧ baibanö.
ကြော်ငြာတွေ