Romanos 4:11 - Dios Iwene11-12 Jau chömöledö, Abraham Dios yöawi̧ ösödiökwe, jo̧banö jö̧a̧linobe Diosma, Chedemi bitema suli̧ jwibo̧, jö̧ba̧lö. Ja̧danö, ja̧ suli̧ jwibo̧ ö̧ji̧ i̧sebö weinobe Diosma, ja̧ tjötade bajalesado̧ 'wiekwama. Ina ötade bajalesado̧ 'wibekwö̧kö̧ ö̧jayi, Diosma jo̧banö, Chedemi bitema suli̧ jwibo̧, jö̧a̧linobe. Ja̧danö, ja̧ suli̧ jwiinö ö̧ji̧ i̧sebö, ötade bajalesado̧ 'wiekwa weinobe Diosma. Ja̧danö, okobe deinö Dios yöawi̧ ösödadötjö ajayinö ji̧na jo̧bama, Abrahamma. Okobe deinö Dios, Chedemi bidöma suli̧ jwibadö, jö̧a̧lawö̧tjö ajayinö ji̧na. Jau chömöledö, isabenö Abraham i̧tji̧mu tupadanö jojodöma, ¿didöda chömöledö? Abraham i̧tji̧mu tupadanö jojodöma ¿sule tjötade bajalesado̧ 'wibekwadödaji̧? Jobadömaökö. Ja̧danö, 'wibekwadö tjuju̧kwijayonö, Abraham i̧tji̧mu tupadanö jojodöböködö tjö̧jena chömöledö. Sule Abraham Dios yöawi̧ ösödinadanö tjösöditjö̧da, ina 'wibekwö̧kö̧ ö̧jayi ösödinadanö tjösöditjö̧da, jo̧ba i̧tji̧mu tupadanö jojodö chömöledö, 'wibekwadöma. Ja̧danö, 'wibekwöködöbi, chömöledö. Dios yöawi̧ ösödadöma, 'wibekwöködö ösödadöma, jobadöbi Abraham i̧tji̧mu tupadanö jojodö, jo̧ba ösödinadanö ösödadöma chömöledö. အခန်းကိုကြည့်ပါ။ |
Romanos 4:11
46 ပူးပေါင်းရင်းမြစ်များ
—Moisés weköbo Israel jojodönö ötjö weti̧danö a̧ja̧kwö tjotidoko otikwö̧kö̧ mölȩma. Ja̧danö, ökwödö babe ju̧kwadöbi, ökwödötjö tupadanö jojodöbi jejenö a̧ja̧kwö kwö̧jaduwobö jo̧be, otikwö̧kö̧ mölȩ otidökönö. Ja̧ mölȩ otidökönö kwö̧jaduwobetjö̧ kwöwaisachibaduwakobe, ökwödöma Isabenö Jo̧ wainö ujuninawö̧sa, ja̧danö, jo̧ba weina a̧ja̧kwadösa, jö̧ba̧lö.
Jejenö jelemutjö dötölataja mölȩ baibena kwö'wachaduwobetjö̧ kwi̧sekwaduwakobe, Isabenö Jo̧ ö'wachinadanö ö'wachadösa, iteda wei̧danö, jö̧ba̧lö. Jao chömöledö, jelemutjö bakwöta mölȩ chotidijatö böjȩbi mölöjȩbi. Ikenama, chotidawatjö okobe jwiinö katatakwawajabetjö̧ ju'wi dewachö möle, jelemutjö dötölataja mölema chö'wachijatö, otidökönö. Cho'wonö emawö̧, otiwa jö̧ba̧lö, chö'wachijatö. — jejenö yöba̧lijetö Isabenö Jo̧ma Moisésnö, jobetjö Sinai mö'ösa'onö.
Jejenö yöa̧liökwe, Jesúsma yöawinobe: —Bitema sulabenö omukwataja̧ kabatibö öbalewachobetjö̧ babe möle beju jojo ö̧jibajabe. Jau chömöledö, ötjö jojo baibanö jeminökwema le'dewinadönö isakwö chichijatö, tjö̧jibanö pjatatobö. Ja̧danö bitebi Abraham itji̧ tupadanö jojoobetjö̧, jo̧banöbi ö̧jibanö pjatatajabe— jö̧ba̧lö yöawinobe Jesúsma Zaqueonö.
Jejenö atjebökwe: —Ötjödasa ba̧kwȩlö̧jatebö ja̧kwawa iyi̧ kwakwawama— yöawinobe—. Ötjönö ichibö ösödadöma a̧wi̧chi̧ tjöböbi la'akatjöda tjuju̧kwökakwedö. Ja̧danö, ojwiyo o̧ti̧ tjöböbi la'akatjöda tjuju̧kwökakwedö. Ja̧ a̧wi̧chi̧ tjöbö, ojwiyo o̧ti̧ tjöbö tjuju̧kwökakwedö, jö̧ba̧löma, tjo̧'wo̧ luwo̧ jawa wanekwachobe— yöawinobe Jesúsma.
Jau chömöledö, Cristoda okobe jwiinö Dios Moisésnö weina ja̧bina, ¿jö̧tö? Jo̧kwaijayonö, Cristoda okobe jwiinö ja̧inajayonö, Cristonö ösödadönöbi jö̧ba̧lo̧ Diosma, Bidöma sulabe jwibadö, jö̧ba̧lö. Ja̧danö, Cristoma Moisés iwȩyudinama söbebö loinobedanö ichejekwa chömöledö, Dios Moisésnö weina ja̧bökönö sulabe jwibadö badibobetjö̧.
Jo̧kwaijayonö, jejenömaökö Jesúsnö tjösödiökwe Dios, Bidöma sulabe jwibadö, jö̧a̧lawö̧nöma. Okobe jwiinö Dios weina ja̧böda ichiböködö, ja̧danö nöinö Dioskwö tjichibobö isakwöködö. Baikwö laebobe Dios wanedö yöawinama: Omukwatökönuwi, ¿tijö mölejȩbe isakwö i̧'yakwo̧ma, Cristonö öbibö böjȩkwö ichejebakwo̧ma? jö̧ba̧lö. Ja̧danö, ju'wibi omukwatökönuwi, ¿tijö wobajadö tjuju̧kwemi isakwö i̧'yakwo̧ma, Cristonö woawatjö tjeachajinö ja̧akwo̧ma? jö̧ba̧lö yöawinobe Diosma, Ji̧kwa wenema ödöokobe, ödöma kwisakwaduwoko, jö̧ba̧lö.
Ja̧danö, Jesucristoda dö̧jibinö pjabato̧, jö̧ba̧lö, Jesucristonö dösödobetjö̧, jejenö ja̧obe Diosma ökwödönöma, suli̧ jwibadö badibanö. Jau chömöledö, okobe deinö suli̧ jwibadö badibobö jo̧be, bakwaibedödobetjö̧. Bakwaibedödanö, okobe deinö sulabenö ja̧badösa, ökwödö dujulunö Dios ö̧jobe, bakwainö otiwo̧ Dios ö̧jobe ichibökönö. Ja̧danö, okobe deinö bakwaibedödobetjö̧, okobe deinö Jesucristonö ösödadöma bakwainö suli̧ jwibadö badiboböma jo̧be.
Chömöledö, Diosma iteda isabenö ja̧akwa̧ wene yöbawö ujuninobe Israel jojodönö, ökwödönö pjatatocha jö̧ba̧lö, ¿jö̧tö? ¿Dakwö kwomukwataduwa? Jö̧a̧li̧danö pjatatocha jö̧a̧linawö̧nö ¿pjaatinökiji̧ Diosma? Ja̧maökö chömöledö, baikwö labebö lobö yötawa: Israel i̧tji̧mu tupadanö jojodötjöma, Israel jojodöböködö tjuju̧kwobe ju'wedöma, Dios ömöledö tjö̧jokobetjö̧.
Ja̧danö, iteda O̧'wo̧ Luwo̧ do̧'wo̧ luwo̧nö ö̧jobö weenama, ökwödönö seyu doinobedanö ichejekwa, bidöma ötjöda chömöledö jö̧ba̧lö. Ja̧danö, ja̧ iteda O̧'wo̧ Luwo̧nö iyinama öwaetjöda i̧sebobe, isabenö Dios ömöledösa jö̧ba̧lö. Isabenö okobe jwiinö jö̧a̧li̧danö ja̧bo̧ Duluwo̧ma chömöledö, jo̧kwajabetjö̧ jo̧ba webawo̧ ja̧nö, ötjöbi jweinö yötawobö jo̧be.
Chömöledö ¿ökwödö judío jojodöböködöja? Ökwödöma Dios isabenö iwene yötjawi̧ a̧ja̧kwö kwösödinaduwobe. Jau chömöledö, kwö̧jibaduwinö ja̧awa, otiwa jawa wene yötjawi̧ a̧ja̧kwö, Jesúsnö kwösödinaduwobe, Jesúsma dö̧jibanö pjabato̧, jö̧ba̧lö. Ja̧danö, Jesúsnö kwösödaduwena Dios O̧'wo̧ Luwo̧ma tebachibö öjamatinobe ökwödö kwo̧'wo̧ luwo̧duwinöma. Jau chömöledö, Dios ajayinö yöbawö ujuninadanö, Ötjö Cho̧'wo̧ Luwo̧nö wetocha, jö̧ba̧lö, yöbawö ujuninadanö, iteda O̧'wo̧ Luwo̧nö weinobe ökwödö kwo̧'wo̧ luwo̧duwinö tebachibö öjamatobö. Ja̧danö jo̧ba tebachibö öjamatenama jweinö i̧sebinobe, Isabenö bidöma ötjö chi̧tji̧mu, jö̧ba̧lö.
Ju'wibi yötawa chömöledö, ökwödönöma. Dios O̧'wo̧ Luwo̧ o̧'wo̧ tjo̧ekwinöma ja̧köbaduwoko. Ökwödöma seyu dobawedödanöbedösa Dios O̧'wo̧ Luwo̧ tebachibö öjamatinobetjö̧. Ja̧danö, Dios O̧'wo̧ Luwo̧ ökwödö do̧'wo̧ luwo̧nö ö̧ji̧ma i̧sebobe, Bidöma Dios ömöledö babibinadö, Dios lȩebi̧tjö emökönö, ba̧kwȩlö̧jatebö Dioskwö tjuju̧kwakwedö, jö̧ba̧lö. Jo̧kwaobetjö̧, Dios O̧'wo̧ Luwo̧ o̧'wo̧ tjo̧ekwinöma ja̧köbaduwa.
—Ju'wibi kwuluwo̧duwi Isabenö Jo̧ Dios ökwödönö pjaatakwa̧ yötawaduwakwö chömöledö, okwanö kwöbalewachaduwinö pjaatakwo̧, wanedö yötawa, kwomajadeduwi wamesa̧do̧, Diosnö kwösödaduwapji jö̧ba̧lö tjöekwa̧do̧ma, ökwödö kwomajadeduwitjöbi, kwitji̧muduwi tjomajadetjöbi 'wibebö loakobe, jwaikwöda okobe jwiinö kwomajadeduwinöbi, kwo̧'woduwinöbi kwuluwo̧duwi Isabenö Jo̧ Diosnö ile nibebö kwösödaduwakobetjö̧. Jejenö ökwödönö pjaatakwo̧ Diosma chömöledö, 'ya̧ba̧ladö kwö̧jaduwakobetjö̧.
Cristokwöda bakobe dötewinö chö̧jo jö̧ba̧lö. Ja̧danö, babema Moisés iwȩyudina ja̧bö, ötjöda chujulunö sulabe jwibo̧ batiboböma chisakwokobe chömöledö, babe sulabe jwibo̧ chö̧ji̧ma, Cristonö chösodiökwe Dios sulabe jwibo̧ batibanö ja̧i̧da chömöledö. Jau chömöledö, ja̧ sulabe jwibo̧ chö̧ji̧ma, ötjö ja̧ti̧maökö, yöawi̧ chösödiökwe Dios ja̧i̧da chömöledö.
Ja̧danö, da'dömine Noébi Diosnö o̧'wo̧ wana̧lö ji̧na. Diosma jo̧banö yöawinobe jojodönö lȩbebö weakwa̧, wotjinö baibanö ojwe okwatinö baledakwa̧ma. Ja̧danö Noéma, ja̧ yöawi̧ma, jejenö okwatobe la'akatjöda edajiököjayonö Diosnö o̧'wo̧ wana̧lö ö̧jinobe. Ja̧danö, Noéma Diosnö yebabinö ja̧nö, jo̧banö o̧'wo̧ wana̧lö, Dios wei̧ a̧ja̧kwinobe, isowi otidobö wei̧ma. Jo̧kwaobetjö̧ Noéma, Diosnö o̧'wo̧ wana̧lö isowi nöowi otidinobe ömöledönö tjö̧jibinö pjaatobö. Ja̧danö jo̧ba Diosnö o̧'wo̧ wana̧lö isowi otidinama i̧sebinobe, Isabenö, böjȩnö ju̧kwadö Dios wei̧ a̧ja̧kwöködöma sulabedö, Dios lȩebakwawö̧, jö̧ba̧lö. Jo̧kwaijayonö Noéma Diosnö o̧'wo̧ wana̧liökwe Diosma, itenöda ösödadönö jö̧a̧li̧danö jö̧a̧linobe Noénö, Chedemi bitema suli̧ jwibo̧, jö̧ba̧lö.
Dokwa chömöledö, Ötjöma Simón Pedrosa, ja̧danö Jesucristo webawo̧sa, ja̧danö ju'wibi jo̧ba ömöayo̧sa. Ötjöma böja kwialusöja wȩyudö wetaduwakwö, ökwödö Cristonö chösödi̧danö bakwainö ösödadönö. Jau chömöledö, dö̧jibinö pjabato̧ Dios Jesucristoma bakweminö jojodönö edo̧obetjö̧, ötjönö pjaatinadanö ökwödönöbi pjaatinobe, Cristonö chösödi̧danö ökwödöbi bakwainö kwösödaduwobö. Ja̧danö, ökwödö bakwainö ösödadönö böja kwialusöja wȩyudö wetaduwakwö.
ကြော်ငြာတွေ