Romanos 3:22 - Dios Iwene

^22-23 Ja̧danö, Jesucristoda dö̧jibinö pjabato̧, jö̧ba̧lö, Jesucristonö dösödobetjö̧, jejenö ja̧obe Diosma ökwödönöma, suli̧ jwibadö badibanö. Jau chömöledö, okobe deinö suli̧ jwibadö badibobö jo̧be, bakwaibedödobetjö̧. Bakwaibedödanö, okobe deinö sulabenö ja̧badösa, ökwödö dujulunö Dios ö̧jobe, bakwainö otiwo̧ Dios ö̧jobe ichibökönö. Ja̧danö, okobe deinö bakwaibedödobetjö̧, okobe deinö Jesucristonö ösödadöma bakwainö suli̧ jwibadö badiboböma jo̧be.

Romanos 3:22 ပူးပေါင်းရင်းမြစ်များ

Isaías 61:10

Jwiinö cho̧'wo ösöwachibanö chösödobe Isabenö Jo̧nö, —Chösödökwe Diosma otiwanö pjabato̧, —jö̧ba̧lö. Jau, baikwö wanedö yöta̧la, ji̧ikwa jawa kamisinö 'duatajabe ötjönö, ja̧danö otiwanö ja̧bö ja̧kwawa jawa wamesa̧do̧nöbi 'duatajabe. Jobekwö 'duatajökwe, ö'weje pjabato̧bi, ilekwonö emakwo̧bi jwiinö otiwaka butjawaka tjubutjawi̧danö, ja̧danö jilekwenö jemakwuju sasiyu jöni̧danö, otiwanö 'dubawö jo̧sa, chösödökwe Diosma otiwanö pjaatobetjö̧.

Daniel 9:24

Baikwö yöawinobe Gabrielma Danielnö: —Diosma omukwatö ujunajabe, kwömöledö Israel jojodönö tjö̧jibinö pjaatakwa̧ abönö, ina cuatrociento noventa o̧biya tjöbaledobö jo̧be jö̧ba̧lö. Ja̧danö, Dios badedö ujunina möle badekwachenama, tjusulatjö tjö̧jibinö pjaatakobe. Sulabenö ja̧tji̧ katjatibobö ja̧akobe, ja̧danö tjusula söbebö loakobe, okobe jwiinö suli̧ söbebö loakobe. Ja̧danö ja̧ mölema Diosda yöbawö weakobe, bakwainö otiwanö ba̧kwȩlö̧jatebö yöbawö weakobe. Ja̧ mölema Dios yöawi̧ yöbawo̧ Jeremías iwȩyudinadanö badekwachakobe, ja̧danö ökwö kwi̧'wi̧dinö kwedinadanö badekwachakobe, ja̧danö Jerusalénnö jȩju Dios ejuma, yemidanö isabenö Dios eju baibanö dichö loakobe.

Lucas 15:22

Jejenö yöa̧lijayonö, isabenö chitji̧ kwö̧joböma mikwawö̧kö̧ja jö̧ba̧löma atadinokobe abe'doma. Itji̧nö ösödö ömöayedönö weinobe: Juluwanö ichejebaduwi inesö otiwado̧ jeledo̧tjö bajalekwönönö otiwado̧ kamijido̧ma, ja̧danö ja̧do̧nö bite chitji̧nö 'dubataduwi. Ja̧danö tjötö'anö nönawakwawabi, ötö'anö nönaduwi, ja̧danö sapatu ömasapiyanö 'dubataduwi, isabenö bitema ötjöda chitji̧obetjö̧.

Hechos 11:12

Ja̧danö, Dios O̧'wo̧ Luwo̧ma ötjönö öbibö jö̧a̧lijatö, Pedro, jobadöma judío jojodöböködöjayonö öpöjödabökönö jobadökwö kwi̧'yo, jö̧ba̧lö. Jo̧kwaobetjö̧ jobadökwö chi̧'yijatö, Cesareabe. Bidöbi, jelemutjö bakwo̧nö chömöledöma, Dios ömöledö babibadöma, ötjökwö tjichijatö. Ja̧danö, ökwödöma Cesareabe ichibö bakwo̧ Cornelio mikwo̧, judíoso̧bökö ejube tedachijatö.

Hechos 15:9

Chömöledö, Diosma judío jojodönöbi ja̧danö, judío jojodöböködönöbi bakwainö edo̧. Ja̧danö, bakwainö edobetjö̧ Diosma judío jojodöböködö tjo̧'wo̧ luwo̧nö dewinö baibanö tjusuli̧ma söbebö lobijetö, Jesúsnö tjösödobetjö̧, ökwödö dusuli̧ söbebö loinadanö.

Hechos 3:16

Ökwödöma Jesúsnö dösödobetjö̧ bite kwebachö̧kö̧nö otiwanö baibaja̧bi Jesús ujulunöda baibajabe. Babema jo̧banö kwedaduwobe. Kwöwaisaduwökwe. Ökwödöma Jesúsnö dösödobetjö̧ iteda ujulunö otiwanö baibajabe bitenöma, ökwödö kweda̧laduwonö— yöbawijetö Pedroma.

Romanos 1:17

Jau chömöledö, ja̧ wenema isabenö Dios ujulu ji̧ wene. Baikwö yötawa: Ja̧ wenema wajuwanö labebö lobö yöawobe, Dios jojodö suli̧ jwibadö batjibanö ja̧i̧ma, Dios iwene laebi̧danö. Baikwö laebobe Dios iwenema: Dios bidöma suli̧ jwibadö jö̧a̧lawö̧ma, Dios yöawi̧ tjösödobetjö̧da ja̧kwawa juna̧ladö, jö̧ba̧lö laebobe. Ja̧danö, la'akatjöda Dios yöawi̧ ösödadönöda suli̧ jwibadö batjibanö pjaatinobe Diosma, damötjö ju̧kwinadönöbi, babe ju̧kwadönöbi.

Romanos 10:12

Jau chömöledö, bakweminö jo̧be, judío jojodönöbi, judío jojodöböködönöbi, okobe deinö jo̧banö ösödadöma tjö̧jibakwedö chömöledö. Jau chömöledö, judío jojodöbi, judío jojodöböködöbi tjuluwo̧ Diosma bakwo̧da. Ja̧danö okobe deinö jo̧banö abebadönöma otiwanö pjabato̧ Diosma.

Romanos 10:4

Jau chömöledö, Cristoda okobe jwiinö Dios Moisésnö weina ja̧bina, ¿jö̧tö? Jo̧kwaijayonö, Cristoda okobe jwiinö ja̧inajayonö, Cristonö ösödadönöbi jö̧ba̧lo̧ Diosma, Bidöma sulabe jwibadö, jö̧ba̧lö. Ja̧danö, Cristoma Moisés iwȩyudinama söbebö loinobedanö ichejekwa chömöledö, Dios Moisésnö weina ja̧bökönö sulabe jwibadö badibobetjö̧.

Romanos 2:1

Chömöledö, babe sulabenö ja̧badö ja̧tji̧ wene yöta̧laja̧ kwa̧ja̧kwaduwenama, idöma sulabedö jö̧ka̧laduwena, Diosma jobadönö lȩebitjö̧ma otiwena, sulabenö ja̧tji̧ mikwa, jö̧ba̧lö. Jejenö jö̧ka̧laduwenama, isabenö idöda jawada jö̧ka̧laduwokobe, i̧seböbi kwi̧sekwaduwobe, Dios ökwödönöbi lȩebobö jo̧be, jö̧ba̧lö. Jobadö ja̧tji̧ma, sula jö̧ba̧lö kwöwaisaduwijayonö, ja̧tji̧danö ja̧badöja ökwödöbi. Ja̧danö, Diosma ökwödönöbi lȩebobö jo̧be, jö̧ba̧lö kwi̧sekwaduwobe.

Romanos 3:30

Bakwo̧da tjuluwo̧ Diosma, judío jojodöbi, judío jojodöböködöbi. Ja̧danö, judío jojodönöbi, judío jojodöböködönöbi Jesúsnö tjösödobetjö̧ bakwainö suli̧ jwibadö batjibanö ja̧bo̧ Diosma.

Romanos 4:16

Ja̧danö, Dios Abrahamnö chiyocha jö̧a̧lenama, Abraham Dios yöawi̧ ösödiökwe jö̧a̧linobe. Moisés iwȩyudina ja̧iökwema jö̧a̧linokobe. Jau, mikwa jwiinö otiwa jawa iyö, chiyocha jö̧a̧linobe. Ja̧danö, Dios jö̧a̧linada mikwawi̧ma, jojodö otiwanö ja̧tji̧maökö. Jo̧kwajabetjö̧, Dios jö̧a̧linada mikwawobetjö̧ jweinö döwaisa, Diosma isabenö Abraham i̧tji̧mu tupadanö jojodönö iyakobe, jö̧a̧linadanö. Jobadö Abraham i̧tji̧mu tupadanö jojodöma ¿didöda chömöledö? Sule jojodö ja̧bö tjö̧jo jö̧ba̧lö ¿Moisés iwȩyudina ja̧badödaji̧? Jobadömaökö, jo̧ba Dios yöawi̧ ösödinadanö ösödadöda Abraham i̧tji̧mu tupadanö jojodö chömöledö. Jau chömöledö, ökwödö okobe deinö Abraham ösödinadanö Dios yöawi̧ ösödadöma, Abraham i̧tji̧mu tupadanö jojodöbedösa.

Romanos 8:1

Ja̧danö chömöledö, babema Cristo Jesúskwö a̧jö dö̧jobetjö̧ bakwo̧bi deobe ökwödönö yöba̧lo̧ma, Bidöma sulabedö, Dios lȩebakwawö̧, jö̧ba̧lö.

Romanos 9:30

Chömöledö, ja̧ laebi̧ omukwatö, ¿dakwö döwaiso jö̧da̧lobeda? Baikwö yötawa chömöledö: Judío jojodöböködöma, la'akatjöda tjisakwinokobe sulabe jwibadö batjiboböma, ¿jö̧tö? Jo̧kwaijayonö, jejenö tjisakwököjayonö, Dios yöawi̧ tjösödiökwe, Diosma jobadönö jö̧a̧linobe, Bidöma sulabe jwibadö, jö̧ba̧lö.

1 Corintios 12:13

Bakwo̧da, Dios O̧'wo̧ Luwo̧da okobe deinö bakwa'o Cristo iteba'o badibanö ujuninobe ökwödönöma chömöledö, judío jojodönöbi, judío jojodöböködönöbi, tjömöayedö batjibanö midö tjeminawö̧nöbi, tjömöayedöböködönöbi. Ja̧danö bakwo̧da, Dios O̧'wo̧ Luwo̧da okobe deinö do̧'wo̧ luwo̧nö tebachibö jamatinama chömöledö.

1 Corintios 4:7

Jau chömöledö, ökwödöma ju'wedönötjö o̧penönö otiwadöböködöja chömöledö, ju'wedönö kwöpöjödaduwo jö̧ba̧lö. Okobe jwiinö kwujuna̧laduwi̧ma, Diostjöda ichobe, ökwödötjödamaökö, ¿jö̧tö? Ja̧danö, Diosda ökwödönö iyinobetjö̧, ¿tajawedö Aaa, ju'wedönötjö o̧penönö juna̧ladösa jö̧ba̧lö kwomukwataduwobö chömöledö? Jejenö kwomukwataduwoböma jwia chömöledö, Dios iyinada kwujuna̧laduwobetjö̧.

Gálatas 2:16

ökwödöma döwaisa Dios weina Moisés iwȩyudina ja̧böma sulabe jwibadö baibakwawokobe, sule Jesucristonö ösödöda sulabe jwibadö badibobö jo̧be jö̧ba̧lö döwaisobe, ¿jö̧tö? Ja̧danö ökwödöbi judío jojodöböködödanö bakweminö Cristo Jesúsnö dösödinobe, dö̧jibinö ja̧bo̧ jö̧ba̧lö. Jau, ökwödöma Moisés iwȩyudina ja̧böma sulabe jwibadö badibijökötö, bakwo̧bi Moisés iwȩyudina ja̧böma sulabe jwibo̧ baibokobetjö̧. Ökwödöma Cristonö dösödijatö, sulabe jwibadö badibo jö̧ba̧lö, jo̧kwajabetjö̧ judío jojodöböködönö weköboko judío jojodö ja̧tji̧danö ja̧tjo jö̧ba̧lö— lȩtebijatö Pedronöma.

Gálatas 2:20

Jau chömöledö, Cristokwö bakobe towisa'onö la̧nö wotinajayonö, 'yaba̧lo̧ chö̧jobe. Jo̧kwaijayonö, babe chö̧ji̧ma, ötjöma ida̧ökö wotinobetjö̧ babe chö̧ji̧ma ötjö chö̧ji̧maökö chömöledö, Cristo ö̧ji̧da. Ja̧danö, babe chiteba'onö chö̧ji̧ma, Dios itji̧nö ösödö, ötjönö ile nibebö midawö wobinanö ösödö chö̧jobe.

Gálatas 3:22

Jo̧kwaijayonö, Dios iwenema baikwö laebobe chömöledö: Okobe deinö böjȩ jojodöma sulabetjö ka̧lena tjö̧bobedanö ichejekwa. Ja̧danö jejenöobetjö̧, Diosma Jesucristonö ösödadönö chiyocha jö̧a̧linama, Jesucristonö tjösödobetjö̧ ösödadönö iyobe.

Gálatas 3:28

Jo̧kwajabetjö̧, judío jojodöbi, judío jojodöböködöbi bakwayedöda babema, ja̧danö jojodö tjömöayedöbi, tjömöayedöböködöbi bakwayedöda babema, ja̧danö ömadöbi ya̧döbi bakwayedöda babema. Jau chömöledö, okobe deinö Cristo Jesúskwö bakobe dötewadö ja̧nö, bakwo̧dabedöja.

Efesios 3:12

Chömöledö ökwödöma Cristo Jesúsnö dösödobetjö̧ Dios ö̧jobekwö yebabökönö tebachibö abebadösa, Diosma ökwödö adebi̧ma isabenö a̧ja̧kwo̧, jö̧ba̧lö.

Filipenses 3:9

Cristokwöda bakobe dötewinö chö̧jo jö̧ba̧lö. Ja̧danö, babema Moisés iwȩyudina ja̧bö, ötjöda chujulunö sulabe jwibo̧ batiboböma chisakwokobe chömöledö, babe sulabe jwibo̧ chö̧ji̧ma, Cristonö chösodiökwe Dios sulabe jwibo̧ batibanö ja̧i̧da chömöledö. Jau chömöledö, ja̧ sulabe jwibo̧ chö̧ji̧ma, ötjö ja̧ti̧maökö, yöawi̧ chösödiökwe Dios ja̧i̧da chömöledö.

Colosenses 3:11

Ja̧danö, babema 'yabayedö dö̧jobetjö̧, judío jojodöbi, judío jojodöböködöbi bakwayedöda dö̧jobe babema. Ja̧danö tjötade bajalesado̧ 'wibekwadöbi, 'wibekwöködöbi bakwayedöda dö̧jobe babema. Ja̧danö jelobetjö ichajadö ötjabiwö̧bi, labidö Escita jojodö ötjabiwö̧bi, tjömöayedö batjibanö midö tjeminawö̧bi, tjömöayedöböködöbi bakwayedöda dö̧jobe babema. Jau chömöledö, Cristoda inesö mikwawo̧ma, ja̧danö Cristo O̧'wo̧ Luwo̧ okobe deinö ökwödö jo̧banö ösödadö do̧'wo̧ luwo̧nö ö̧jobetjö̧, okobe deinö bakwayedöbedösa.

Santiago 2:23

Ja̧danö, Abrahamma jejenö Diosnö o̧'wo̧ wana̧lö ö̧ji̧bi, ja̧danö, Dios wei̧ a̧ja̧kwöbi ö̧jobema Dios ajayinö yöawina badekwachinö ö̧jinobe. Ja̧ ajayinö yöawinama baikwö laebobe Dios iwenetjö: Abrahamma Dios yöawi̧ ösödinobe, Diosma jweinö yöbawo̧, jö̧ba̧lö. Jejenö ösödiökwe Diosma jo̧banö jö̧a̧linobe, Chedemi bitema suli̧ jwibo̧, jö̧ba̧lö. Jejenö laebobe. Ja̧danö, ju'wi jawabi laebobe, Dios Abrahamnö yöawina, baikwö: Abrahamma ötjö chömöledöso̧. Jejenö laebobe Dios iwenetjö, Abraham ö̧jina iwȩyudinama— jejenö yöbawö chatadena ötjönö yöba̧lo̧nö, Ju'wedöma Jesúsnö tjo̧'wo̧ wana̧löda ja̧dö, i̧sekwökönö, yöba̧lo̧nöma.