Romanos 14:5 - Dios Iwene

⁵ Ja̧danö, möle jawa kwomukwataduwi̧ yötawa. Ju'wedö tjomukwatena, Bakwöta mölema wainö 'da̧batö chujunobö jo̧be, wainö chujunökötjö̧ma sulena, jö̧ba̧lö. Jejenö tjomukwatonö, ju'wedö tjomukwatena, Bakwainö jo̧be mölema, wainö 'da̧batö chujunoböma jwia, jö̧ba̧lö. Biya̧ jawa bakwo̧nökwena kwomukwataduwo chömöledö, Diosma ökwödönö weojobö, weokojobö jö̧ba̧lö, wainö 'da̧batö kwujunaduwoböma.

Romanos 14:5 ပူးပေါင်းရင်းမြစ်များ

Lucas 1:1

Ötjö Lucasma böja kwialusöja wȩyudö weta jojodö otiwanö tjo̧mukwatökwe Teófilo mikwo̧nö. Chömöledöso̧ Teófilo, kwöwaisa, ba̧jekwadö wȩyudö tjotidinobe, dö'da̧detjö baledina jawa, Jesús ö̧jina jawa tjiwȩyudobö.

Romanos 14:14

Biya̧ wene labebö lobö yötawa chömöledö: Ötjöma, chuluwo̧ Jesúskwö ja̧nö chöwaisa, Okobe jwiinö kwakwawama, wame jawada, suli̧ waedökö, jö̧ba̧lö. Jejenö chöwaisijayonö, jelo̧ omukwatena, Aaa, biya̧ chukwoböma webö̧kö̧ Diosma, jö̧ba̧lö. Baikwö yötawaduwakwö chömöledö: Ja̧ kwakwawa sulököjayonö, jejenö omukwato̧nö suli̧ waedobedanö ichejekwa, Dios öpöjödi̧ jawa jö̧ba̧lö omukwatobetjö̧. Ja̧danö, jo̧ba ja̧ kwakwawa ukwoböma, sulena chömöledö.

Romanos 14:23

Jo̧kwaijayonö, Aaa, biya̧ma chukwitjö̧ma sulena, Dios öpöjödena, jö̧ba̧lö kwomukwatitjö̧ma, kwukwoko, ökwönö suli̧ jawa baibobetjö̧. Baikwö yötawa chömöledö: Ökwöma, Biya̧ma Dios öpöjödi̧ jawa, jö̧ba̧lö kwomukwatonö kwukwitjö̧ma, sula, ja̧danö, Dios weökö jawa chukwobe, jö̧ba̧lö kwukwiökwe Diosma ökwönö yöawena, Sulabenö kwo̧, jö̧ba̧lö. Jau chömöledö, Biya̧ma Dios weökö jawa, jö̧ba̧lö omukwatö kwukwobetjö̧, sulabenö Dios öpöjödinö kwukwena.

Romanos 4:21

Jau chömöledö, Abrahamma jwaikwöda omukwatinobe, Diosma ja̧tocha jö̧a̧litjö̧ma, ja̧akwo̧, ujulubi jö̧a̧li̧danö ja̧oböma juna̧lo̧, jö̧ba̧lö, omukwatinobe Abrahamma.

1 Corintios 8:11

Ja̧danö, jejenö ökwöma, Aaa, waiso̧sa jö̧ba̧lö kwukwobetjö̧, kwöwaisi̧ma kwöjawo̧ Jesúsnö ösödo̧nö suli̧ waedena ichejekwa chömöledö, Dios öpöjödi̧, jö̧ba̧lö, ukwobö ja̧köbobetjö̧. Jau chömöledö, jo̧banö ösödö Cristoma midawö woinajayonö, ökwöma, Aaa, waiso̧sa jö̧ba̧lö omukwatö kwukwobetjö̧, jo̧banö suli̧ kwöwaedena.

1 Corintios 8:7

Jau chömöledö, döwaisa, jojodö tjösödawö̧ o̧'wo̧ jawa iyawa kwakwawama sulökö, o̧'wo̧ jawama Diosbö̧kö̧obetjö̧. Ja̧danö, Dios ökwödönö otiwanö edo jö̧ba̧lö ja'yubebi mikwawokobe kwakwawama jö̧ba̧lö döwaisobe. Ja̧danö, kwakwawama pjabatöbi pjaatokobe, ja̧danö suli̧ waedöbi suli̧ waedokobe do̧'wo̧ luwo̧ jawama jö̧ba̧lö döwaisobe. Jo̧kwaijayonö, jejenö ökwödö döwaisijayonö, ju'wedö Jesúsnö ösödadöma ina ja̧ wene wajwibadö chömöledö. Jobadöma Jesúsnö tjösödakwa̧ abönö, Aaa, bite o̧'wo̧ jawama Diosbo̧ jö̧ba̧lö tjomukwatinobe. Ja̧danö, jejenö la'akatjöda tjomukwatinobetjö̧, babebi ja̧ kwakwawa tjukwobö öpöjödadö, biya̧ o̧'wo̧ jawa iyawa kwakwawa dukwitjö̧ma, o̧'wo̧ jawa dösödena ichejekwa jö̧ba̧lö. Jau chömöledö, tjo̧'wo̧ luwo̧nö ina tjöda̧peachokobetjö̧, tjomajadenö Aaa, dukwitjö̧ma suli̧ waedena jö̧ba̧lö omukwatadö.