Romanos 12:6 - Dios Iwene

⁶ Ja̧danö, bakwo̧ iteba'obedö dö̧jobema, bakwo̧nökwena Dios ökwödönö wainökwena iyinadanö ja̧bö dö̧jo chömöledö. Baikwö yötawa chömöledö: Dios bakwo̧nö Dios iwene yöawo jö̧ba̧lö iyinatjö̧ma, Aaa, biya̧ma Dios yöawi̧, yötawobö webo̧ Diosma, jö̧ba̧lö öwaisi̧danö yöawobö jo̧be.

Romanos 12:6 ပူးပေါင်းရင်းမြစ်များ

Mateo 23:34

Ja̧köbaduwakwa̧ baikwö yötawaduwakwö: Dios yöawi̧ yöbawadönöbi, waisadönöbi, ba̧ja̧dadönöbi wetocha, ökwödönö yötjawobö, jo̧kwaijayonö jobadötjö ju'wedönö kwabö loköbaduwakwedöja, ja̧danö ju'wedönö towisa'onö kwönaduwakwedöja, ja̧danö ju'wedönö judío jojodö ba̧nö tja̧ja̧kwa̧lejubiyatjö kwakwaköbaduwakwedöja, ja̧danö ju'wedönö comunidadtjö jelobe, ja̧danö jelobe usula tjemawinö luka̧laduwakwedöja.

Mateo 25:22

Ja̧danö dos mil iyinökwebi ichö uluwo̧nö yöawinobe: Chuluwo̧, dos mil oro ö̧pi̧biya kwiyinobe ötjönö, ja̧danö edi, dos milnö kwiyinatjö, cuatro mil baibanö chotidajabe, jö̧ba̧lö.

Lucas 11:49

Jo̧kwajabetjö̧ Diosma itedada waisanö omukwatö yöa̧linobe: Yötawi̧ yöbawadönöbi, chömöayedö ötjö webawedönöbi wetocha, ja̧danö jobadötjö ju'wedönö kwabö lotjakobe, ja̧danö ju'wedönö usula tjemawinö ja̧tjakobe, jö̧ba̧lö. Jejenö omukwatö ujuninobe Diosma, iteda ömöayedö ökwödö babe möle ju̧kwadönö yötjawobö, ja̧danö jobadönö kwabö loköbaduwakobe. Jejenö kwabö loköbaduwiökwe, isabenö Dios lȩebakwawö̧ja. Jau isabenö Dios lȩebakwawö̧ja, kwa'dödö ja̧tjinadanö ja̧köbaduwiökwe okobe deinö Dios yöawi̧ yöbawadönö kwabö lotjiökwe Dios lȩebakwa̧ma ökwödö babe möle ju̧kwadönö badekwachakobe,

Hechos 13:1

Ja̧danö, Antioquíanö ju̧kwadöma, Jesúsnö ösödadötjö bakwamu jojodöma Dios iwene yöbawöbi, Jesúsnö ösödadönö ba̧ja̧dadöbi ju̧kwiabijadötö. Jobadöma bidö: Bakwo̧ma Bernabé. Jelo̧ma Simón. Jo̧bama ju'wi imi, Negro, mikwo̧. Jelo̧ma Cirenetjö ichina Lucio mikwo̧. Jelo̧ma Menahem mikwo̧, tjemu baiyo̧ma la'aka luwo̧ Herodeskwö ja̧nö bötjachina. Jelo̧ma Saulo.

Hechos 15:32

Ikenama Judasbi, Silasbi, Dios yöawi̧ yöbawadöma Antioquíanö ju̧kwadö Jesúsnö ösödadö tjo̧'wo̧ ösöwachibanö lekwe yöbawijadötö, tjo̧'wo̧ luwo ujuluwachibanö jemi tupakwö tji̧'yobö.

Hechos 2:17

Jo̧bama baikwö yöbawö wȩyudijetö: Baikwö yöawobe Diosma ökwödö judío jojodönöma: Böjȩ ina 'dö̧ibajökenanö Cho̧'wo̧ Luwo̧nö wetocha jojodökwö ö̧jobö. Ökwödötjö tupadanö jojodönöma ötjö yötawi̧ otiwanö yöbawadö batjibobö wetocha Cho̧'wo̧ Luwo̧nö, jobadökwö ö̧jobö. Ja̧danö, Cho̧'wo̧ Luwo̧ jobadö tjo̧'wo̧ luwo̧nö öba̧ja̧da̧lonö ötjö yötawi̧ yötjawakobe. Ja̧danö, möayedö ömadönöma ötjö chösödi̧ tjöwaisachibobö tji̧'wi̧di̧danö tjedobö chi̧sebakobe. Ja̧danö, damö ömadönöma ötjö chösödi̧ tjöwaisachibobö tji̧'wi̧dinö tjedobö chi̧sebakobe.

Hechos 21:9

Jo̧ba i̧tji̧muma, ya̧dö tji̧lȩkwa̧mu debadö ö'wejemu jojodöma, Dios yöawi̧ yöbawö ju̧kwiabijadötö.

Romanos 1:11

Jau chömöledö, isabenö ökwödönö pjatatobö chösödobetjö̧, ökwödönö edö chichobö jö̧ta̧la. Ja̧danö, O̧'wo̧ Luwo̧ Dios pjaatakobetjö̧ ökwödönö Dios iwene yöbawö pjatatobö jö̧ta̧la, kwo̧'wo̧ luwo̧duwi ujuluwachibanö tupakwö kwa̧ja̧kwaduwobö.

Romanos 12:3

Jau chömöledö, Diosma otiwa jawa iyö, ötjönö weinobe ökwödönö yötawobö. Jejenö weinobetjö̧, ökwödönö bakwo̧nökwena weta, Omukwatökönaduwi, ökwödöma otiwadösa, jö̧ba̧lö. Jau chömöledö, Diosda ökwödönö bakwo̧nökwena pjabatinama, Jesúsnö kwösödaduwobö, ¿jö̧tö? Jo̧kwajabetjö̧ otiwo̧sa jö̧ba̧löma kwomukwataduwa chömöledö, bakwo̧nökwena, Dios pjaatinökwesa, jö̧ba̧lö kwomukwataduwo.

1 Corintios 12:18

Jo̧kwaijayonö, okobe jwiinö bakwöta jawa baibanöma otidinokobe Diosma chömöledö, okobe jwiinö tjiteba'o jawa wainökwena iteda ösödi̧danö otidö ujuninobe.

1 Corintios 13:2

Ja̧danö, otiwanö Dios yöawi̧ yötawobö chöwaisena, ja̧danö okobe jwiinö chöwaisena, jojodö wajwitji̧ jawabi chöwaisena. Ja̧danö, jwaikwöda Diosnö chösödena, okobe jwiinö juluwo̧ jö̧ba̧lö. Jau chömöledö, mö'ösa'iju pjolachibinö weto jö̧ba̧lö Diosnö chösödena, Diosma mö'ösa'iju pjolachibinö ja̧obö juluwo̧ jö̧ba̧lö. Jo̧kwaijayonö, ju'wedönö ösödakwabikwawökönö chö̧jitjö̧ma, mikwawö̧kö̧sa chömöledö.

1 Corintios 14:1

Jau chömöledö, jwaikwöda kwisakwaduwo, ju'wedönö ösödabikwawö kwö̧jaduwo jö̧ba̧lö. Baikwö yötawa, Dios iteda i̧tji̧mu ja̧bö tjö̧jo jö̧ba̧lö Dios iyi̧ma chömöledö. Okobe jwiinö Dios iteda i̧tji̧mu ja̧bö tjö̧jo jö̧ba̧lö iyi̧ma kwösödaduwo chömöledö, jo̧kwaijayonö ja̧ jawatjö bajalekwönönö kwösödaduwo jö̧ka̧laduwi̧ma, Dios yöawi̧ yöawakwawa chömöledö.

1 Corintios 14:24

Jo̧kwaijayonö ju'wedö tjiwene wajwibadöbi, Jesúsnö öpöjödadöbi tetjachenama okobe deinö Dios yöawi̧ yökawaduwitjö̧ma, yökawaduwi̧ a̧ja̧kwö, tjusuli̧ tjöwaisachibena, Aaa, isabenö dusuli̧ juna̧ladösa jö̧ba̧lö chömöledö. Jau chömöledö, okobe jwiinö yökawaduwi̧ tja̧ja̧kwi̧ma tjusuli̧ wene yöawena ichejekwa,

1 Corintios 14:29

Ja̧danö, Dios yöawi̧ yöbawadöma bakwo̧nökwena yötjawo, du̧ju̧tajaena, wa̧medukwaena bakwo̧nökwena yötjawena. Ja̧danö yöbawo̧ yöawonö, ju'wedöma tja̧ja̧kwo, jweinö yöawojobö jö̧ba̧lö.

1 Corintios 3:5

Chömöledö, ¿tajawedö Apolosnö kwösödaduwobö? Ja̧danö ötjö Pablonö ¿tajawedö kwösödaduwobö? Apolosbi, ötjö Pablobi sule Dios ömöayedöda dö̧jobe chömöledö. Ja̧danö, bakwo̧nökwena Dios wainökwena pjadatobö weinadanö, Jesúsnö kwösödaduwobö pjadatijatö ötjöbi, Apolosbi.

1 Corintios 7:7

Ötjö chedemi, okobe deinö ötjödanö tji̧lȩkwa̧mu debadö tjö̧jitjö̧ma, chösödo jö̧ta̧lena. Jo̧kwaijayonö Diosma bakwo̧nökwena wainökwena iyo̧ ökwödönöma chömöledö. Ju'wedönö tji̧lȩkwa̧mu deinö emökönö tjö̧jo jö̧ba̧lö iyo̧, ja̧danö ju'wedönö tji̧lȩkwa̧munö emö tjö̧jo jö̧ba̧lö iyo̧ chömöledö.

2 Corintios 8:12

Jau chömöledö, isabenö iyö pjakataduwobö jö̧ka̧laduwitjö̧ma otiwa, baikwö yötawa: Isabenö iyö pjakataduwobö ösödö, kwujuna̧laduwi̧tjö kwiyaduwitjö̧ma, Diosma edö ösödakobe, jo̧bama kwujuna̧laduwi̧ öwaisobetjö̧. Jau chömöledö, Diosma sule kwujuna̧laduwi̧da edo̧, kwiyaduwi̧ otiwojobö jö̧ba̧lö, ja̧danö kwiyaduwobö kwujuna̧laduwi̧danö kwiyaduwenama, edö ösödo̧ Diosma, bidöma otiwanö pjatjatobö ösödadö jö̧ba̧lö.

Efesios 3:5

Damötjöma Diosma iteda tojö junö omukwatinama labebö lobijökötö da'dödöminenöma. Jo̧kwaijayonö, ökwödö dö̧ji̧ma, Dios O̧'wo̧ Luwo̧ma Dios ajayinö tojö junö omukwatinama labebö loinobe Dios 'da̧batö ujuninawö̧nö, Jesús webawedönöbi, Dios iwene yöbawadönöbi.

Efesios 4:11

Chömöledö, jo̧bama, mölejȩbe kabekwajinama, damötjö Dios iwenenö iwȩyudinökwe. Jo̧ba iwȩyudinökwe iyabinadanö, otiwa jawa iyabijetö. ¿Dakwö yöawobeda, otiwa jawa iyabijetö, jö̧ba̧löma? Biya̧ chömöledö: Cristoma jo̧banö ösödadönöma bakwo̧nökwena wainökwena jelo̧nö ju'wi, jelo̧nö ju'wi, tjo̧'wo̧ luwo̧ jawa tjotidawakwena iyabinobe, jojodönö pjabatö, Dios wei̧ tjotidobö. Jo̧banö ösödadötjö ju'wedönöma 'da̧batö ujuninobe iteda weawö̧ batjibinö ja̧bö. Ja̧danö, ju'wedönö 'da̧batö ujuninobe Dios iwene yötjawobö Jesúsnö ösödadönö. Ja̧danö, ju'wedönö ji̧bakwawa wene yötjawobö 'da̧batö ujuninobe. Ja̧danö, ju'wedönö Jesúsnö ösödadönö tjite'ada̧loböbi, tjöba̧ja̧doböbi 'da̧batö ujuninobe Cristoma.

Filipenses 3:15

Okobe deinö do̧'wo̧ luwo̧nö da̧peachinadöma jejenö Cristonö döwaisobö disakwo chömöledö, ja̧danö, ökwödötjö ju'wedö ina jejenö kwisakwaduwobö kwomukwataduwökötjö̧ma, Diosma i̧sebakobe ökwödönö, Cristonö kwöwaisaduwobö isakwö kwö̧jaduwo, jö̧ba̧lö.

1 Tesalonicenses 5:20

Dios yöawi̧ yöawakwawama öpöjödökönaduwi.

2 Pedro 1:20

Jau chömöledö, isabenö Dios yöawi̧ yöbawadö tjiwȩyudina kwösödaduwobö jo̧be, Dios yöawi̧da tjiwȩyudinobetjö̧. Jau chömöledö, ju'wi jayetjö bajalekwönönö inesö kwöwaisaduwobö ji̧ma biya̧ chömöledö, Dios yöawi̧ yöbawadö tjiwȩyudinenama, la'akatjöda idöda omukwatö tjiwȩyudinokobe, jö̧ba̧lö.