Romanos 12:16 - Dios Iwene

¹⁶ Okobe deinö kwömöledöduwinö bakweminö dösölö̧jinö ja̧bö kwö̧jaduwo. Ja̧danö, Otiwadösa, jö̧ba̧löma kwomukwataduwoko, ja̧danö ju'wedönöma, Mikwawöködö, jö̧ba̧löma kwomukwataduwoko, jo̧kwadabedönöma. Okobe deinö kwömöledöduwinöma bakweminö ösödö kwomukwataduwo, ja̧danö, Aaa, waisadösa, jö̧ba̧löma kwomukwataduwoko.

Romanos 12:16 ပူးပေါင်းရင်းမြစ်များ

Diosnö ösödo̧ Job mikwo̧ usula emawina jawa 36:5

Diosma isabenö juluwo̧, jo̧kwaijayonö juluwo̧jayonö, jojo bakwo̧nöbi öpöjödö̧kö̧, –Bitema mikwawö̧kö̧, –jö̧ba̧lö. Isabenö juluwo̧ Diosma, ja̧danö okobe jwiinö okwa jawa waiso̧ Diosma.

Proverbios 17:5

Ja̧danö, ju'wibi yötawa: Isabenö, bakwo̧ma jwibo̧nö sulabenö edö obo̧ma Diosnöda sulabenö edö obo̧, Diosma jo̧ba jwibo̧nö otido̧obetjö̧. Ju'wibi yötawa: Bakwo̧ma usula emawo̧nö edö, otiwa, waiyinö usula emawo̧ jö̧ba̧lö, ösödobe. Isabenö yötawa: Jobekwö usula emawo̧nö edö, otiwa jö̧ba̧lö ösödo̧nöma Dios lȩebakwo̧.

Proverbios 19:17

Ja̧danö, ju'wibi yötawa wanedö: Bakwo̧ma jwibo̧nö lȩ lö̧jinö edö iyobe. Ja̧danö, jo̧ba jwibo̧nö iyi̧ma Isabenö Jo̧nöda öbalewobedanö jo̧be. Ja̧danö, ja̧ öbalewaja̧tjö̧ mikwa baibanö tjebatö iyakwo̧ Isabenö Jo̧ma iyo̧nöma.

Proverbios 19:22

Ja̧danö, ju'wibi yötawa wanedö: Bakwo̧ ö̧jobe ömöledönö ba̧kwȩlö̧jatebö ösödabikwawö pjabato̧ma. Isabenö, jo̧ba ösödabikwawi̧ma la'akatjöda balewachökakobe. Ba̧kwȩlö̧jatebö pjaatakwo̧. Jojodöma jo̧banö nöinö tjösödökwe, bite otiwanö omukwati̧ma balewachö̧kö̧, jö̧ba̧lö. Ja̧danö, ju'wibi wanedö yötawa, du̧ju̧tajanö wanedö jawa: Bakwo̧ balada jwibo̧ma ö̧jobe. Ja̧danö jelo̧, lȩekwa yöbawo̧nö omöna yöbawo̧ ö̧jobe. Ja̧danö, ¿dite ö̧ji̧ mikwawobeda? Balada, jwibo̧ ö̧jobökö̧, omöna yöbawo̧ ö̧jobökö̧? Isabenö yötawa: Jwibo̧ ö̧ji̧danö ö̧ji̧ma mikwawobe. Omöna yöbawo̧ ö̧ji̧tjö̧ bajalekwönönö mikwawobe jwibo̧ ö̧ji̧ma, jwiijayonö.

Proverbios 19:7

Ja̧danö, ju'wibi yötawa: Isabenö, okobe deinö tjöpöjödobe jwibo̧nö, yö̧ne ömöledöbi. Ja̧danö, jo̧ba yö̧ne ömöledöbi tjöpöjöditjö̧ma ¿dakwö tjösödoböda yö̧ne ömöledöböködöma? Tjöpöjödobe jo̧ba jwibo̧nöma jo̧ba ö̧jobekwö 'yö̧könö. Ja̧danö, jwibo̧ma ömöledönö yöa̧lobö isakwijayonö deobe jo̧banö ösödo̧ma.

Proverbios 26:12

Ja̧danö, ju'wibi yötawa: Isabenö, jweinö omukwatö̧kö̧nö pjatjatoböma jo̧be, omukwati̧ öbalewachibanö. Jobekwö pjaatobö jwiyobe jelo̧nö, ötjöma waiso̧sa jö̧ba̧lö omukwato̧nöma. Jao, ötjöma waiso̧sa jö̧ba̧lö omukwato̧nö pjatjatoböma jwiyobe, ja̧danö, omukwati̧ma la'akatjöda öbalewachökakwo̧. Ja̧danö, jobadötjö dujutajama, jweinö omukwatö̧kö̧nöda pjatjatobö jo̧be, omukwati̧ öbalewachibanö.

Proverbios 3:7

Ju'wibi yötawakwö chitji̧: Kwomukwatoko, ötjöma jwiinö waiso̧sa, jö̧ba̧lö. Jobekwödanömaökö chitji̧. Isabenö Jo̧nö yebabinö omukwatö kwö̧jo. Ja̧danö, suli̧ jawa öpöjödö kwö̧jo.

Isaías 5:21

Isabenö usula tjemawakwedö, —Waisanö omukwatadösa, okobe jwiinö waisakwawa jawa waisadösa, —jö̧ba̧lö sulabenö omukwatadöma.

Mateo 11:5

tjöbajale tjewawinadöma babema edadö, ja̧danö kwebachinöködöma babema kwebachadö, ja̧danö tji̧sȩdo̧ sulinadöma, babema tji̧sȩdo̧ otiwadö, ja̧danö a̧ja̧kwinöködöma babema a̧ja̧kwadö, ja̧danö ö'wö babibajadöma yemidanö 'yabibajadö, ja̧danö usula jojodöma otiwa jawa wene yöawakwawa a̧ja̧kwadö jö̧ba̧lö Juannö yökawaduwo, ja̧ baledi̧ a̧ja̧kwö ötjönö öwaisakobetjö̧.

Mateo 26:11

Jau chömöledö, usula jojodöma ba̧kwȩlö̧jatebö ökwödökwö tjö̧jakwedö, ba̧kwȩlö̧jatebö jobadönö pjakataduwobö, jo̧kwaijayonö ötjöma ba̧kwȩlö̧jateböma ökwödökwö chö̧jökakwo̧sa.

Lucas 14:13

Jau chömöledöso̧, Dios ökwö kwa̧debaja̧ omukwatö ökwönö mölejȩbetjö iyobö kwösöditjö̧ma, jwibadönöda pjabatö kwa̧debo, balekwa mikwa ökwönö a̧deböködönöda. Jau chömöledöso̧, usula jojodönöbi, kwebachöködönöbi, 'wabadönöbi, tjöbajale tjewawadönöbi kwa̧debenama, ja̧ edö Diosma ösödena, Bitema otiwanö dösölö̧jinö jojodönö pjabato̧, jö̧ba̧lö. Ja̧danö, otiwanö ja̧köbiökwe balekwa mikwa mölejȩbetjö ökwönö otiwa jawa iyena Diosma, ¿jö̧tö?

Lucas 6:20

Jojodönö otidö lobajo̧, Jesúsma iteda öba̧ja̧di̧ waisachadönö edö yöawinobe, baikwö: —Ökwödötjö usula jojodöma isabenö tjo̧'wo̧ ösöwanö ja̧dö, Dios la'aka luwo̧ ö̧jenajojodötjobetjö̧.

Hechos 4:32

Okobe deinö Jesúsnö ösödadöma tjomajadenö tjo̧'wo̧ luwo̧nö otiwanö bakwainö omukwatijadötö. Tju̧kwa teatjöbi ö'wiawökönö ju̧kwiabijadötö, okobe jwiinö dujuna̧li̧kwenama, Okobe deinö bakwainö du̧kwa tea, jö̧ba̧lö.

Romanos 11:20

Chömöledö, isabenö jobadönö tjebö loinobe, ja̧danö ajayi tjö̧jinemitjö balekwedönö ökwödönö ujuninobe. Biya̧ yötawa chömöledö: Dios iwene tjöpöjödiökwe, jobadönö tjebö loinobe, ja̧danö Dios iwene kwösödaduwobetjö̧, tjö̧jinemi kwö̧jaduwobe. Ja̧danö, Aaa, otiwadösa, jö̧ba̧lö kwomukwataduwoko chömöledö. Wainö kwomukwataduwo chömöledö, Isabenö Diosma iteda iwene öpöjödadönöma lȩbebo̧, jö̧ba̧lö kwomukwataduwo chömöledö.

Romanos 11:25

Jau chömöledö, biya̧ wene yötawaduwakwö, jojodö ajayinö wajwitjina wenema, Aaa, waisadösa, jö̧ba̧lö kwomukwataduwapji jö̧ba̧lö. Israel jojodötjö, ba̧jekwadö tjuu 'dibadö ja̧nö Diosnö tjöpöjödijayonö, ba̧kwȩlöjatebödama tjöpöjödökena, ju'winö tjösödakwedö chömöledö. Ja̧danö, Israel jojodöböködötjö, Diosnö tjösödakwedö tjuju̧kwobe. Jobadö Israel jojodöböködötjö tjösödakwedö okobe deinö tjösödenanö baibanö, tjöpöjödakwedö Israel jojodöma.

Romanos 12:3

Jau chömöledö, Diosma otiwa jawa iyö, ötjönö weinobe ökwödönö yötawobö. Jejenö weinobetjö̧, ökwödönö bakwo̧nökwena weta, Omukwatökönaduwi, ökwödöma otiwadösa, jö̧ba̧lö. Jau chömöledö, Diosda ökwödönö bakwo̧nökwena pjabatinama, Jesúsnö kwösödaduwobö, ¿jö̧tö? Jo̧kwajabetjö̧ otiwo̧sa jö̧ba̧löma kwomukwataduwa chömöledö, bakwo̧nökwena, Dios pjaatinökwesa, jö̧ba̧lö kwomukwataduwo.

Romanos 15:5

Chömöledö, Diosda ökwödönö dujuluwachibanö dö̧jobö pjabato̧ma, Diosda me'dawachibökönö dö̧jobö pjabato̧ma chömöledö. Ja̧danö, jo̧banö ateba ökwödönö chömöledö, ökwödö bakwainö kwomukwataduwobö pjaato jö̧ba̧lö, Cristo Jesús omukwati̧danö kwomukwataduwobö pjaato jö̧ba̧lö.

Romanos 6:2

Jejenömaökö chömöledö. Ina sulabedö dö̧jayi, sulabe dujuna̧li̧ juluwinobe ökwödönöma ichejekwa, jwaikwöda sulabenö ja̧dobö, ¿jö̧tö? Jo̧kwaijayonö ökwödö Jesúsnö ösödadöma, sulabedöböködösa ökwödöma babema. Ja̧danö, ju'wibi, ökwödö Jesúsnö ösödadöma, Jesús woenama, ökwödöbi wodinobe chömöledö, sulabe dujuna̧li̧ juluwökönö ökwödönöma. Jejenö wodinobetjö̧ ¿tajawedö ina sulabenö ja̧bö dö̧jobö chömöledö?

1 Corintios 1:10

Chömöledö, Duluwo̧ Jesucristo iminö wetaduwakwö bakwainö omukwatö kwö̧jaduwobö, ja̧danö kwömöledö Jesúsnö ösödadökwö ölakwabikwawa jwiinö kwö̧jaduwobö. Jau chömöledö, ju'wedö kwömöledö Jesúsnö ösödadökwö bakobe ja̧nö, isabenö bakwainö omukwatö, ja̧danö bakwainö ösödö kwö̧jaduwo.

1 Corintios 3:18

Chömöledö, isa̧ökö jawa omukwatökönaduwi. Ökwödötjö bakwo̧, Aaa, waiso̧sa, böjȩ waisakwawa jawa waiso̧sa jö̧ba̧lö omukwatitjö̧ma, wajwibo̧danö baibobö jo̧be. Jejenö wajwibo̧danö baibobö jo̧be, isabenö waisakwawa jawada waiso̧ baibo jö̧ba̧lö.

1 Corintios 4:10

Jau chömöledö, Cristo ömöledödobetjö̧, wajwibadödanö dichejekwa. Jejenö dichejekwonö, ökwödö Cristo ömöledö ja̧nö, Aaa, waisadösa jö̧ba̧lö kwomukwataduwobe. Ja̧danö, dujulu jwibadödanö dichejekwijayonö, ökwödöma Aaa juluwadösa jö̧ba̧lö kwomukwataduwobe. Ja̧danö, ju'wedö ökwödönö Aaa, jobadö Corintio jojodöma otiwadö jö̧ba̧lö tjomukwatonö, ökwödönö sulabedö jö̧ba̧lö tjomukwatobe.

1 Corintios 6:5

Jau chömöledö, jejenö ja̧köbaduwi̧ omukwatö, kwötabakwaduwo chömöledö. Ökwödö Jesúsnö ösödadötjö, ¿bakwo̧bi waiso̧ ö̧jokobeji̧, Jesúsnö ösödadökwö ju'wedö Jesúsnö ösödadökwö wene lȩekwa yöawo jö̧ba̧löma?

1 Corintios 8:2

Jau chömöledö, Aaa, waisadösa jö̧ba̧lö omukwatadöma, isabenö tjöwaiso jö̧tja̧li̧ma wajwibadö chömöledö.

2 Corintios 13:11

Tjo̧wi̧ta chömöledö, böja kwialusöja katatakwa̧ abönö, baikwö bajaleapo bakwamu jawa yötawiba chömöledö. Kwo̧'wo̧ luwo̧ ösöwachibanö kwö̧jaduwo, ja̧danö sulabenö ja̧bö kwö̧jaduwi̧ jwekekwaduwo, ja̧danö bakwo̧nökwena kwujuluwachibaduwobö pjakatakwawaduwo, ja̧danö kwömöledö Jesúsnö ösödadökwö bakwainö omukwatö kwö̧jaduwo, ja̧danö wene jwiinö kwö̧jaduwo chömöledö. Jau chömöledö, jejenö ja̧bö kwö̧jaduwo, ja̧danö jejenö ja̧bö kwö̧jaduwiökwe isabenö Diosma ökwödökwö ö̧jakwo̧. Jau chömöledö, Diosda dömöledönö ösödabikwawö dö̧jobö pjabato̧ma, ja̧danö dömöledökwö wene jwiinö dö̧jobö pjabato̧ma chömöledö, ja̧danö jo̧bama ökwödökwö ö̧jakwo̧.

Filipenses 1:27

Chömöledö, baikwö wetaduwakwö: Ba̧kwȩlö̧jatebö otiwa jawa wene ösödadö otiwanö ja̧bö tjö̧ji̧danö ja̧bö kwö̧jaduwo chömöledö, ökwödökwö chö̧jitjö̧bi, detitjö̧bi ökwödönö yötjawi̧ cha̧ja̧kwakobetjö̧: Filipos jojodöma bakwainö ösödö 'diinö pjolachibökönö ju̧kwadötö jö̧ba̧lö, ja̧danö biya̧da isabenö wene jö̧ba̧lö, bakwainö omukwatö bakobe otiwa jawa wene tjöbeba̧lö ju̧kwadötö jö̧ba̧lö cha̧ja̧kwakobetjö̧.

Filipenses 3:16

Ja̧danö chömöledö, baikwö yötawaduwakwö, ja̧bö dö̧jo jö̧ba̧lö döwaisachibinama, okobe deinö bakwo̧nökwena, ja̧ ida̧ökö döwaisachibina jawa ja̧bö dö̧jobö jo̧be.

Filipenses 4:2

Ja̧danö, ökwödötjö ya̧dö Evodia mikwujunöbi, Síntique mikwujunöbi budekwödanö bakwujunökwena ateba, kwömöledösujukwö ölakwabikwawö kwö̧jaduwi̧ma kabatibaduwi, Duluwo̧kwö dötewinö ja̧nö, bakwainö kwomukwataduwo jö̧ba̧lö.

Hebreos 13:5

Ja̧danö, ju'wibi yötawaduwakwö. Balada kwujuna̧laduwi̧dama omukwatö kwö̧jaduwoko chömöledö. Otiwanö omukwataduwi tjo̧wi̧ kwujuna̧laduwi̧ma, ju'wi jawabi, ju'wi jawabi, kabatökönö kwemaduwobö omukwatökönö. Chömöledö, ökwödöma jwiinö mikwawinö ji̧ juna̧ladöja, Diosma ökwödönö ile niebobetjö̧. Kwomukwataduwo Dios ökwödönö yöawina. Baikwö laebobe Dios iwenetjöma, iteda yöawina: Ökwödönö la'akatjöda le'dedibö chȩwa̧jökakwo̧sa. La'akatjöda ökwödönö katatibökakwo̧sa. Jejenö laebobe Dios iwenetjö, Diosma ba̧kwȩlö̧jatebö ökwödökwö jo̧, jö̧ba̧lö.

1 Pedro 3:8

Ja̧danö, bajaleapo okobe deinö ökwödönö baikwö yötawa chömöledö: Bakwainö omukwatö, lȩlö̧jinö kwomukwatakwawaduwo. Jau chömöledö, kwömöledöduwinö ösödabikwawö kwö̧jaduwo, ja̧danö, Aaa, otiwo̧sa, jö̧ba̧lö omukwatökönö, dösölö̧jinö ja̧bö kwö̧jaduwo kwömöledöduwinö.

1 Pedro 5:3

Ja̧danö labinö weba̧löma kwite'ada̧laduwoko, otiwanö ja̧bö kwi̧sebaduwodönö, jobadöma ja̧bö kwö̧jaduwi̧ edö bakwainö ja̧bö tjö̧jakobetjö̧.

3 Juan 1:9

Belö, kwialusöjanö wȩyudö wetijatö jobe kwitebobe, jobe ko̧ko̧kwa̧lö ba̧nö Jesúsnö ösödadönö yöbawö, Dios iwene yöbawö 'ya̧dönö pjakataduwobö jo̧be, jö̧ba̧lö. Jo̧kwaijayonö ökwödötjö bakwo̧, Diótrefes mikwo̧ma ötjö webö yötawi̧ öpöjödinobe. Yelösöda jo̧bama, Ötjödasa abönö la'aka luwo̧sa, jö̧ba̧lö, yötawi̧ma öpöjödinobe. Yelösöda öpöjödinobe, Juan, ja̧danö jo̧bakwö ja̧dö ökwödö duluwedöböködö, jö̧ba̧lö. Öpöjödinobe, Jobadö yötjawi̧ma da̧ja̧kwoko, jö̧ba̧lö.