Romanos 10:3 - Dios Iwene

³ Jau chömöledö, Dios öba a'otjö sulabe jwibadö batjibobö tjisakwijayonö, Dios ja̧i̧ma wajwibadö, jojodö sulabe jwibadö batjibobö ja̧i̧ma. Ja̧danö, ja̧ wajwibö, Dioskwö tjichibobö isakwadö, idöda ja̧tji̧da, idöda tjujulunöda. Ja̧danö, idöda tjujulunöda ja̧bö tjisakwobema, Dios jojodö sulabe jwibadö batjibobö ja̧i̧ma tjöpöjödobe chömöledö.

Romanos 10:3 ပူးပေါင်းရင်းမြစ်များ

Diosnö ösödo̧ Job mikwo̧ usula emawina jawa 33:27

—Jejenö balediökwe, o̧'wo ösöwanö lo̧ena, ju'wedönö yöbawö lo̧ena, –Sulabenö ja̧bö, isabenö wene laeböködanö sulabenö jatijatö, jadanö sulabenö ja̧tiökwe, ötjönö lȩebo jö̧a̧linobe Diosma. Jo̧kwaijayonö lȩebi̧tjö chemo jö̧ta̧linadanö lȩebinokobe ötjönö, lȩlöjinö edinobe Diosma.

Isaías 51:1

Okobe deinö ökwödö Isabenö Jo̧ Diosnö isakwadö, jo̧ba wei̧ a̧ja̧kwö kwö̧jaduwobö omukwatadöma, baikwö yöta̧li̧ kwa̧ja̧kwaduwo: Wanedö yötawa, ökwödötjö ajayinö jinawa, Dios 'dȩbö otidinawa kwomukwataduwo, ja̧danö ja̧wa ajayinö ji̧nemi, löwö eminelö kwomukwataduwo.

Isaías 51:6

Möakwö mölejebe kwedaduwo chömöledö, ja̧danö nijakwö bö̧je kwedaduwo. Babe ji̧danöma, lekwema jö̧köjȩ chömöledö, baikwö yötawa: Imiyu'wo juluwanö debi baibidanö, juluwanö debi baibakobe mölejȩma, ja̧danö kamijido̧ damö waekwö, suli̧ waekwi̧danö, bö̧jȩ suli̧ waekwakobe. Bö̧jȩnö ju̧kwadöbi ja̧danö, okobe deinö damö waekwö debö batjibakwedö. Jo̧kwaijayonö jejenömaökö ötjö chö̧ji̧ma, ötjö tjö̧ji̧binö pjatati̧ma, ba̧kwelöjatebö ji̧ jawa chömöledö, ja̧danö otiwanö webö chö̧ji̧ma, la'akatjöda 'dö̧ibökakobe.

Isaías 51:8

Jobadö ökwödönö obadöma juluwanö detjakwedö chömöledö, baikwö wanedö yöta̧la: Pjȩlȩbö̧ kamijido̧ suli̧ tjöwaedi̧danö, ja̧danö sa̧dö obejadö tjöwö'yetjö otikwa̧do̧ tjukwi̧danö, baledakwawö̧ ökwödönö obadönö, jobadönö yekabiduwoko. Jo̧kwaijayonö ötjö chujulunö kwö̧jibaduwinö pjatati̧ma, ba̧kwelöjatebö ji̧ jawa, ja̧danö kwö̧jibaduwinö pjatatobetjö̧, 'dö̧ibajökönö ba̧kwelöjatebö otiwanö ji̧bajadö kwö̧jaduwakwedöja, jö̧ba̧lö yöa̧lobe Diosma

Isaías 56:1

Baikwö yöawobe Isabenö Jo̧ma: Chömöledö, ja'yubenö lekwajabetjö tjö̧jibinö pjatatakwa̧ möle badekwachakobe, chujulu i̧sȩbö pjatatakwa̧ mölema, jo̧kwajabetjö̧ weti̧ a̧ja̧kwö, otiwanö ja̧bö kwö̧jaduwo.

Isaías 57:12

Ötjöda yötawocha, weti̧ a̧ja̧kwö kwö̧jaduwojobö jö̧ba̧lö, ja̧danö otiwanö ja̧bö kwö̧jaduwojobö jö̧ba̧lö. Ja̧danö o̧'wo jawa ösödö kwö̧jaduwi̧ma, ja'yubebi pjaatökakobe chömöledö, kwö̧jibaduwobö.

Isaías 64:6

Okobe deinö kwöba a'otjö yȩbekwadödanö babibadösa chuluwo̧. Ja̧danö otiwanö ja̧badösa jö̧ba̧lö yöda̧li̧jayonö, ja̧di̧ma yȩekwado̧, iwonö lu̧ju pjajawa̧do̧danö ichejekwobe. Ökwödöma towisöja kököachibi̧danö ichejekwadösa, ja̧danö jwa̧le'epjo e'ewibobedanö, sulabenö ja̧bö dö̧ji̧ma jelobekwö badibanö öibawö̧sa.

Daniel 9:24

Baikwö yöawinobe Gabrielma Danielnö: —Diosma omukwatö ujunajabe, kwömöledö Israel jojodönö tjö̧jibinö pjaatakwa̧ abönö, ina cuatrociento noventa o̧biya tjöbaledobö jo̧be jö̧ba̧lö. Ja̧danö, Dios badedö ujunina möle badekwachenama, tjusulatjö tjö̧jibinö pjaatakobe. Sulabenö ja̧tji̧ katjatibobö ja̧akobe, ja̧danö tjusula söbebö loakobe, okobe jwiinö suli̧ söbebö loakobe. Ja̧danö ja̧ mölema Diosda yöbawö weakobe, bakwainö otiwanö ba̧kwȩlö̧jatebö yöbawö weakobe. Ja̧ mölema Dios yöawi̧ yöbawo̧ Jeremías iwȩyudinadanö badekwachakobe, ja̧danö ökwö kwi̧'wi̧dinö kwedinadanö badekwachakobe, ja̧danö Jerusalénnö jȩju Dios ejuma, yemidanö isabenö Dios eju baibanö dichö loakobe.

Lucas 10:29

Jo̧ba Moisés iwȩyudina ba̧ja̧do̧ma öwaisinobe, okobe deinö jojodönö ösödö̧kö̧sa jö̧ba̧lö. Jo̧kwaijayonö ju'wedönö öpöjödijayonö, omukwatinobe, jobadönö chöpöjödi̧ma sulökö, ötjö chömöledötjokobetjö̧ jö̧ba̧lö. Jejenö omukwatö, Jesúsnö abebö a̧ja̧kwinobe: —Chömöledöso̧nö chösödobö jo̧be jö̧ba̧lö laebi̧ma, ¿ditenö wanekwachobeda? ¿Didönö chösödobö wanekwachobeda? Okobe deinö jojodönö chösödobö laebokobe, ¿jö̧tö?— jö̧ba̧lö.

Lucas 16:15

Jejenö otjiökwe, Jesúsma jobadönö yöa̧linobe: —Ökwödöma jojodö tjöba a'otjö otiwadödanö kwichejekwaduwobö ja̧bö ju̧kwadöja, jo̧kwaijayonö Diosma wamenö otiwadödanö kwichejekwaduwi̧ma omukwatö̧kö̧, Diosma kwomajadeduwinö sulabenö kwomukwataduwi̧ waiso̧. Jau, jojodö tjedemi biya̧ma nöinö mikwawi̧ jö̧ba̧lö tjösödi̧ jawama, Dios edemi mikwawökö ji̧, iteda öpöjödi̧ jawaobe. Ja̧danö, jojodö wamenö ökwödönö edö bidöma otiwadö jö̧ba̧lö tjomukwatijayonö, Diosma kwomajadeduwinö edö öpöjödobe, Bidöma sulabedö jö̧ba̧lö. —

Romanos 1:17

Jau chömöledö, ja̧ wenema isabenö Dios ujulu ji̧ wene. Baikwö yötawa: Ja̧ wenema wajuwanö labebö lobö yöawobe, Dios jojodö suli̧ jwibadö batjibanö ja̧i̧ma, Dios iwene laebi̧danö. Baikwö laebobe Dios iwenema: Dios bidöma suli̧ jwibadö jö̧a̧lawö̧ma, Dios yöawi̧ tjösödobetjö̧da ja̧kwawa juna̧ladö, jö̧ba̧lö laebobe. Ja̧danö, la'akatjöda Dios yöawi̧ ösödadönöda suli̧ jwibadö batjibanö pjaatinobe Diosma, damötjö ju̧kwinadönöbi, babe ju̧kwadönöbi.

Romanos 10:2

Jweinö yötawaduwakwö chömöledö, isabenö isakwadö Israel jojodöma Dios ösödinö ja̧tjo jö̧ba̧lö. Jo̧kwaijayonö, Dios ösödi̧danö ja̧tjotö jö̧ba̧lö tjisakwijayonö, wajwibö isakwadö chömöledö.

Romanos 10:20

Ja̧danö, Dios iwene wȩyudina Isaíasbi biya̧ wene yebabökönö iwȩyudinobe, Dios Israel jojodöböködönö yöawi̧ma. Baikwö laebobe Isaías iwȩyudinama: Ötjönö Diosnö isakwöködöma, tjisakwököjayonö, ötjönö tjöbadekwajinobe. Ja̧danö, ötjönö isakwö abebinöködöma, jobadönö chi̧sekwijatö, ötjönö tjedobö, jö̧ba̧lö laebobe Dios Israel jojodöböködönö yöawinama.

Romanos 11:7

Chömöledö, judío jojodötjö sule ja'yubenöda ösödadö tjuju̧kwobema, ¿dakwö domukwatobö jo̧beda? Baikwö labebö lobö yötawa chömöledö: Israel jojodöma sulabe jwibadö batjibobö tjisakwinobe, ¿jö̧tö? Jejenö tjisakwobema, ¿sulabe jwibadö batjibinaji̧? Batjibinokobe chömöledö. Sule Dios iteda ömöledö batjibanö 'da̧batö ujuninawö̧da sulabe jwibadö batjibinobe, ja̧danö ju'wedöma sule tjuu 'dibadöda batjibinobe chömöledö.

Romanos 3:22

Ja̧danö, Jesucristoda dö̧jibinö pjabato̧, jö̧ba̧lö, Jesucristonö dösödobetjö̧, jejenö ja̧obe Diosma ökwödönöma, suli̧ jwibadö badibanö. Jau chömöledö, okobe deinö suli̧ jwibadö badibobö jo̧be, bakwaibedödobetjö̧. Bakwaibedödanö, okobe deinö sulabenö ja̧badösa, ökwödö dujulunö Dios ö̧jobe, bakwainö otiwo̧ Dios ö̧jobe ichibökönö. Ja̧danö, okobe deinö bakwaibedödobetjö̧, okobe deinö Jesucristonö ösödadöma bakwainö suli̧ jwibadö badiboböma jo̧be.

Romanos 3:26

Ja̧danö, babema, Jesúsnö ösödadönö jö̧ba̧lo̧ Diosma, Bidöma suli̧ jwibadö, jö̧ba̧lö. Jau chömöledö, Jesúsma woinobetjö̧, Dios suli̧ jwii̧ wenema öwawobe, ja̧danö Dios jojodönö suli̧ jwitjinö ja̧i̧ wenebi öwawobe.

Romanos 5:19

Jau chömöledö, bakwo̧da Dios weökö jawa ja̧inobetjö̧, okobe deinö suli̧ juna̧ladö batjibinobe. Ja̧danö, bakwo̧da Dios wei̧ ja̧inobetjö̧, ba̧jekwadö suli̧ jwibadö batjibobe. Jau chömöledö, bakwo̧da Dios wei̧ ja̧inobetjö̧, ba̧jekwadönö jö̧ba̧lo̧ Diosma, Chedemi bidöma suli̧ jwibadö, jö̧ba̧lö.

2 Corintios 5:21

Jau chömöledö, otiwa jawa wenema baikwö laebobe: Cristoma la'akatjöda sulabenö ja̧inököjayonö, Diosma weinobe, ökwödö sulabenö ja̧di̧ma Cristonö baibobö, jo̧bada midawö woobö. Jejenö weinobe chömöledö, ökwödöma Cristokwö dötewanö ja̧nö, Cristonötjö Dios sulabe jwii̧ ökwödöbi dujuna̧lakobetjö̧.

Deuteronomio 6:25

Ja̧danö jwaikwöda okobe jwiinö bi̧ya ökwödönö wei̧ jawa, duluwo̧ Isabenö Jo̧ Dios öba a'o ja̧nö, weinadanö ja̧bö dö̧jitjö̧ma, duluwo̧ Diosma isabenö ökwödönö ösödakobe, Bidöma otiwadö, jö̧ba̧lö. –Jobekwö kwatadaduwena kwitji̧muduwinö, ökwödönö abebö tja̧ja̧kwenama, —jö̧ba̧lö yöawinobe Moisesma, israel jojodönö.

Filipenses 3:9

Cristokwöda bakobe dötewinö chö̧jo jö̧ba̧lö. Ja̧danö, babema Moisés iwȩyudina ja̧bö, ötjöda chujulunö sulabe jwibo̧ batiboböma chisakwokobe chömöledö, babe sulabe jwibo̧ chö̧ji̧ma, Cristonö chösodiökwe Dios sulabe jwibo̧ batibanö ja̧i̧da chömöledö. Jau chömöledö, ja̧ sulabe jwibo̧ chö̧ji̧ma, ötjö ja̧ti̧maökö, yöawi̧ chösödiökwe Dios ja̧i̧da chömöledö.

2 Pedro 1:1

Dokwa chömöledö, Ötjöma Simón Pedrosa, ja̧danö Jesucristo webawo̧sa, ja̧danö ju'wibi jo̧ba ömöayo̧sa. Ötjöma böja kwialusöja wȩyudö wetaduwakwö, ökwödö Cristonö chösödi̧danö bakwainö ösödadönö. Jau chömöledö, dö̧jibinö pjabato̧ Dios Jesucristoma bakweminö jojodönö edo̧obetjö̧, ötjönö pjaatinadanö ökwödönöbi pjaatinobe, Cristonö chösödi̧danö ökwödöbi bakwainö kwösödaduwobö. Ja̧danö, ökwödö bakwainö ösödadönö böja kwialusöja wȩyudö wetaduwakwö.