Romanos 1:8 - Dios Iwene

⁸ Chömöledö, ökwödönö nöinö yötawakwa̧ abönö, yötawaduwakwö chömöledö: Böjȩnö ju̧kwadö okobe deinö yötja̧lobe ökwödönöma, Roma jojodöbi Jesucristonö ösödadö, jö̧ba̧lö. Jejenö yötja̧li̧ a̧ja̧kwö, ötjöma jwiinö cho̧'wo̧ ösöwanö cha̧ja̧kwobe. Ja̧danö ösödö, Diosnö yöta̧lobe, Jesucristo midawö woinobetjö̧, ökwödönö Romanö ju̧kwadönö jwiinö otiwanö pjaatinobe, jö̧ba̧lö, yöta̧lobe Diosnöma chömöledö.

Romanos 1:8 ပူးပေါင်းရင်းမြစ်များ

Mateo 24:14

Ja̧danö, Dios yöbawö ö̧jena jawa otiwa jawa wenema böjȩ bakwameachibanö yötjawakobe tja̧ja̧kwobö, okobe deinö tjitebotenia jojodö tja̧ja̧kwobö, ja̧danö jemi ikenada 'dö̧ibaji̧ möle baibakobe.

Lucas 2:1

Ja̧danö, ju'wi möle baikwö badekwachinobe Josenöbi Maríanöbi: María metu'wo jö̧jayi, inesö la'aka luwo̧ma romano jojodötjö emperador Augusto César mikwo̧ma weinobe okobe deinö wȩyukwö tjitebotenia tjiwȩyukwobö.

Hechos 11:28

Jobadötjö bakwo̧ma, Agabo mikwo̧ma, Jesúsnö ösödadö ko̧ko̧kwö tjöba̧jemi 'da̧de jamatö yöbawijetö: —Dokwa chömöledö. Babema yötawa a̧wi̧chö̧lö̧ji̧ma lekwokobetjö baledakobe böjȩ bakwameachibanö— yöbawijetö Agaboma, Dios O̧'wo̧ Luwo̧ öba̧ja̧da̧lonö. Ja̧ a̧wi̧chi̧ tjöawa Agabo baledakwa̧ yöawinadanö, tupakwö baledijetö romano jojodö tjuluwo̧ Claudio mikwo̧ yöbawö ö̧benama.

Hechos 28:22

Jo̧kwaobetjö̧ wajwida. Yöbawi. Kwo̧'wo̧ kwöwana̧li̧ma, yöbawi da̧ja̧kwo. Ökwödöma biya̧da, ja'yubeda da̧ja̧kwijatö, Ökwö kwo̧'wo̧ kwöwana̧li̧ma ba̧jekwadö jwiinö tjöpöjödobe, jö̧ba̧lö— atadijadötö.

Romanos 10:18

Chömöledö, Israel jojodöma otiwa jawa wene tjöpöjödinobe, ¿jö̧tö? ¿Tajawedö tjöpöjödinada chömöledö? ¿Tja̧ja̧kwokobetjö̧ tjöpöjödinaji̧? Ja̧maökö chömöledö, isabenö tja̧ja̧kwinobe otiwa jawa wenema. Dios iwene baikwö laebobe: Otiwa jawa wene yötjawobe ökwöi̧ma böjȩ bakwameachibanö jojodönö ökwöinobe, ja̧danö böjȩ ö'öbönö ju̧kwadöbi tja̧ja̧kwinobe, jö̧ba̧lö laebobe.

Romanos 16:19

Jau chömöledö, okobe deinö jojodöma ökwödönö tja̧ja̧kwobe, Roma jojodöma jwaikwöda otiwa jawa wene ösödadö, jö̧ba̧lö. Ja̧danö, ötjöma ja̧ wene a̧ja̧kwö chösöda chömöledö. Ja̧danö, otiwa jawa Dios ösödi̧ jawada waisadö kwö̧jaduwoböma chösöda, Dios öpöjödi̧ jawa ja̧bökönö.

Romanos 6:17

Ja̧danö, ökwödöma ajayinöma suli̧ ömöayedödanö kwuju̧kwinaduwobe. Jo̧kwaijayonö, suli̧ ömöayedödanö kwuju̧kwaduwemi ja'ötjö, Dios iwene kwa̧ja̧kwinaduwobe. Ja̧danö, isabenö wene a̧ja̧kwibö, jwaikwöda Dios iwene kwösödinaduwobe chömöledö.

1 Corintios 1:4

Chömöledö, Diosma ökwödö Corintio jojodötjö Cristo Jesúskwö dötewadönö kwo̧'wo̧ luwo̧duwi jawa otiwa jawa iyinobe, ja̧danö ökwödö Corintio jojodönö jejenö iyinobetjö̧, jo̧banö ba̧kwȩlö̧jatebö yötawobe, otiwanö iyo̧ja jö̧ba̧lö.

2 Corintios 2:14

Jau chömöledö, ökwödönö cha̧ja̧kwokobetjö̧ cho̧'wo̧ tjo̧achijatö. Jo̧kwaijayonö, cho̧'wo̧ tjo̧achijayonö, Diosma otiwanö pjaatinobe chömöledö, ja̧danö jo̧banö chösödobe, ba̧kwȩlö̧jatebö ujuluwobetjö̧. Ja̧danö wanedö yötawa: Guardia la'aka luwo̧danö, Diosma ökwödönö öbibö Cristo jawa wene öpöjödadönö dujuluwobö pjabato̧, ja̧danö ökwödönötjö böjȩ bakwameachibanö jojodö Cristo jawa wene tjöwaisobö pjabato̧.

Efesios 1:15

Chömöledö, Duluwo̧ Jesúsnö kwösödaduwi̧bi, ju'wedö Dios ömöledö babibinadökwö ösödabikwawö kwö̧jaduwi̧bi yötjawi̧ cha̧ja̧kwinobetjö̧ ba̧kwȩlö̧jatebö Diosnö ösödö yöta̧lobe, Chabe'do otiwanö pjakatinobe, jö̧ba̧lö. Ja̧danö, Diosnö atebena ba̧kwȩlö̧jatebö ökwödönö pjaatobö atebobe.

Efesios 3:21

Jo̧banö ba̧kwȩlö̧jatebö dösödaduwo, Diosma jwiinö otiwo̧, jö̧ba̧lö. Ökwödö Jesúsnö ösödadö, Jesúskwö bakobe dötewadöma Diosnö dösödaduwo ba̧kwȩlö̧jatebö.

Efesios 5:20

Jejenö lo̧bö Diosnö kwösödaduwo ba̧kwȩlö̧jatebö, jwiinö sulabenö baledenabi, otiwanö jenabi. Jesucristoma ökwödö kwuluwo̧duwiobetjö̧, Diosnö kwösödaduwo, Dabe'do ökwönö dösöda, otiwanö pjabato̧ja, jö̧ba̧lö.

Filipenses 1:3

Chömöledö, ba̧kwȩlö̧jatebö ökwödönö chomukwatenama, Chuluwo̧ Diosnö ösödö atebobe, jwiinö otiwa jö̧ba̧lö.

Colosenses 1:3

Chömöledö, ökwödönö da̧ja̧kwijatö baikwö: Colose jojodöma Cristo Jesúsnö ösödadötö, jö̧ba̧lö, ja̧danö okobe deinö Dios ömöledönö ösödabikwawö ju̧kwadötö, jö̧ba̧lö. Jejenö da̧ja̧kwinobetjö̧, ba̧kwȩlö̧jatebö ökwödönö omukwatö Diosnö, Duluwo̧ Jesucristo Abe'do Diosnö adebenama, jo̧banö ösödö adebobe, otiwanö ökwödönö pjaatinobe, jö̧ba̧lö.

1 Tesalonicenses 1:2

Chömöledö, ba̧kwȩlö̧jatebö Dabe'do Diosnö adebenama, ökwödönö adebobe. Jau chömöledö, Jesúsnö kwösödaduwobetjö̧, jo̧ba wei̧ ja̧bö kwotidaduwobe, ja̧danö ju'wedönö ösödö pjabatö kwö̧jaduwobe, ja̧danö jwaikwöda kwo̧'wo̧ wana̧lö kwö̧jaduwobe, isabenö Duluwo̧ Jesucristoma yemidanö ichakwo̧ jö̧ba̧lö. Ja̧danö, jejenö kwö̧jaduwi̧ omukwatö, kabatökönö ökwödönö omukwatö Dabe'do Diosnö ösödö adebobe, otiwanö ökwödö Tesalónicanö ju̧kwadönö pjaatinobe jö̧ba̧lö.

1 Tesalonicenses 2:13

Ja̧danö, ju'wibi yötawaduwakwö chömöledö. Ökwödönö Dios iwene yödawenama, Aaa, jojodö yötjawi̧ jö̧ba̧löma kwöpöjödinaduwokobe, Dios iwene jö̧ba̧lö kwösödinaduwobe chömöledö. Ja̧danö, jejenö kwösödinaduwobetjö̧, Diosnö kabatökönö ösödö adebobe, otiwanö Tesalónicanö ju̧kwadönö pjabato̧ja jö̧ba̧lö. Jau chömöledö, yödawina wenema isabenö Dios iwene, ja̧danö ja̧ wenetjö Diosma ina ökwödö Jesúsnö ösödadönö kwöbalewachibaduwanö ja̧bo̧.

2 Tesalonicenses 1:3

Chö̧ja̧wo̧dö, Diosma ökwödönö pjaatobetjö̧, jo̧banö dösödobö jo̧be, ja̧danö dösödo jö̧da̧li̧danö kabatökönö otiwanö Diosnö ösödö yöda̧lobe, otiwanö Tesalónicanö ju̧kwadönö pjabato̧ja jö̧ba̧lö. Jau chömöledö, ökwödönö pjaatobetjö̧, Jesúsnö kwösödaduwi̧ma nöachobedanö ichejekwa, ja̧danö kwömöledö Jesúsnö ösödadönö kwösödabikwawaduwi̧bi nöachobedanö ichejekwa. Ja̧danö jejenö pjaatinobetjö̧, otiwanö pjabato̧ja jö̧ba̧lö yöta̧lanö chömöledö.

2 Timoteo 1:3

Timoteo, kabatökönö ökwönö omukwatö Diosnö ösödö yöta̧lobe, otiwa jö̧ba̧lö. Jau Timoteo, cha'dödömine otiwanö Dios wei̧ ja̧bö tjö̧jinadanö, ötjöbi chomajadenö otiwanö chöwaisi̧danö, jwaikwöda Dios wei̧ ja̧bö jo̧sa. Ja̧danö jo̧ba wei̧ ja̧bö chö̧jonö, mölebi, yö̧tebi kabatökönö ökwönö omukwatö atebobe chuluwo̧ Diosnö.

Filemón 1:4

Filemón, ökwönö otiwanö cha̧ja̧kwajabe, isabenö otiwanö Duluwo̧ Jesúsnö ösödö kwö̧ji̧bi, jo̧ba yöawi̧ ösödö kwö̧ji̧bi, ja̧danö isabenö okobe deinö dömöledö Jesúsnö ösödadönö ösödö kwö̧ji̧bi. Ja̧danö, jejenö cha̧ja̧kwobetjö̧ kabatökönö ökwönö omukwatö Diosnö atebenama, ökwönö ösödö atebobe, Isabenö otiwanö pjakatajabe, jö̧ba̧lö Diosnö atebobe.

Hebreos 13:15

Ja̧danö chömöledö, ju'wi Diosnö iyö dumusidi̧ midawama jwiobe. Jesús iteda iyawinada jo̧be. Jejenö ji̧jayonö babe mölema ökwödöma Diosnö diyi̧danö juna̧ladösa, Jesús imidawinobetjö̧. Ja̧danö ¿tajida babe Diosnö diyi̧ma? Biya̧ chömöledö: Babe böjȩnö ja̧nö, Diosnö diyi̧ma jo̧banö ba̧kwȩlö̧jatebö abebö, ösödö, Dios ökwöma jwiinö otiwo̧ja, jwiinö pjabato̧ja, jö̧ba̧lö, dö̧ji̧.

1 Pedro 4:11

Baikwö yötawa: Yöbawadöma, Dios yöawi̧ yötjawobö jo̧be, ja̧danö pjabatadöma, Dios ujulunö pjabatö tjö̧jobö jo̧be. Jejenö Dios iyinadanö ja̧bö kwö̧jaduwenama, Diosda ökwödönötjö pjaatobe jojodönö chömöledö. Ja̧danö Dios pjaati̧ edö okobe deinö Diosnö tjösödakobe, Jesucristo midawö woinobetjö̧ otiwanö pjabato̧ja jö̧ba̧lö. Jau chömöledö, Dabe'do Diosda ba̧kwȩlö̧jatebö dejatinö juluwo̧ma ja̧danö jo̧bada inesö la'aka luwo̧ma, babebi ba̧kwȩlö̧jateböbi, jejenö otiwa.