Proverbios 9:17 - Dios Iwene

¹⁷ Jwiinö kwösödaduwena kwilekwobö̧kujukwö kwö̧jaduwoböma. Ojwiyo kwönaukwaja̧duwobu o̧tobudanö o̧tena kwilekwobö̧kujukwö kwö̧jaduwi̧ma. Ja̧danö, ju'wedöma tjedokonö emiba pan jo̧dawa'ye kukwi̧ pan söi̧danö söena kwilekwobö̧kujukwö kwö̧jaduwi̧ma, ichaduwi— jwöbeabuju sulabenö obujuma.

Proverbios 9:17 ပူးပေါင်းရင်းမြစ်များ

Génesis 3:6

Ja̧danö, isujuma jowinö wa̧ji̧ma jedemi kwakwawanöbi otiwijetö. Jowibi jedemi jwiinö otiwijetö. Waisakwawabi otiwioko ösödinö edijotö. Jo̧kwaioko jowinö wa̧ji̧ma 'döbebö kwijotö. Kwaja̧ju jilekwenö iyijotö. Ja̧danö, jo̧babi kwijetö.

Proverbios 20:17

Ja̧danö, ju'wibi yötawa, wanedö: Bakwo̧, sulabenö ja̧bö kwakwawa emobe. Ja̧danö ja̧ emaja̧ kwakwawama ajayinöma söa, jö̧ba̧lö ösödijayonö bajaliyanöma inaso tjukwi̧danö sulakwa̧ baibobe. Ja̧ wanekwachi̧ma, jo̧ba sulabenö ja̧bö emaja̧ma ajayinö otiwanö ösödijayonö bajaliyanö öpöjödachibakobe, jö̧ba̧lö wanekwachobe.

Proverbios 30:20

Ja̧danö, ju'wibi yötawa: Bakwuju jelo̧kwö jilekwebö̧kö̧kwö jujuma baikwö omukwatö juju: Jilekwebö̧kö̧kwö jö̧jaja̧ ikenabi kwanö, ja̧danö jukwaja̧ ikenabi jaa do̧bawö yöja̧lobe, sulabenö ja̧bö̧kujusa, jö̧ba̧lö.

Proverbios 5:16

Jao chitji̧ bakwuju, kwilekwokwöda kwö̧jo. Ju'wi wanedö yötawa: Bakwa'do ojwese'dotjö ya̧dö ba̧jekwadö ojwiyo tjowobö wabö tji̧'ye'do. Ökwöma ja'dodanö kwö̧joko chitji̧, ba̧jȩkwadö ya̧dö watje'dodanöma kwö̧joko. Ja̧ wanekwachi̧ma jeluju, jelujunöma ökwökwö jö̧joböma jwiobe jö̧ba̧lö wanekwachobe.

Proverbios 5:18

Chitji̧, kwilekwokwö, ina möayo̧köbayi kweminokokwöda kwö̧jo, kwo̧'wo̧ ösöwanö. Jobujunöda ösödö kwö̧jo, otiwuju, jwiinö chösödoko, jö̧ba̧lö. Ba̧kwȩlö̧jatebö kwo̧'wo̧ ösöwanö kwö̧jo jobujukwöda.

Romanos 7:8

Ja̧danö, Dios weina cha̧ja̧kwenama, sulabe chujuna̧li̧ ötjönö suli̧ waedinobe ichejekwa, ajayi ju'wedö tjujuna̧li̧ ösödö chedinemi bajalekwönönö ösödö chedinö. Jau chömöledö, ajayinöma, Ötjöma otiwo̧sa, jö̧ba̧lö, chomukwatinobe. Ikenama, Dios weina a̧ja̧kwö, sulabe chujuna̧li̧ chöwaisachibinobe. Ja̧danö, sulabe chujuna̧li̧ chöwaisachibenama, sulabe chujuna̧li̧ma jwiinö juluwinobe ötjönöma, jwaikwöda sulabenö ja̧tinö. Jau chömöledö, Dios weina chöwaisachibakwa̧ abönö, sulabe chujuna̧li̧ma ötjönö juluwinokobe ichejekwa. Jo̧kwaijayonö, chöwaisachibenama, jenada juluwinobe ötjönöma ichejekwa, ö'wö batibanö ja̧bö.

Efesios 5:12

Chömöledö, jobadö sulabenö ja̧badöma, jojodö tjedokonö sulabenö ja̧badö. Tabakwadö, jwiinö taba̧lö̧ji jawa ja̧tjobetjö̧. Jobadö ja̧tji̧ma yöba̧löbi yöka̧laduwa, ja̧ma jwiinö taba̧lö̧ji jawaobetjö̧.