Proverbios 6:19 - Dios Iwene

¹⁹ Jemi ikena Isabenö Jo̧ öpöjödi̧ma baikwö laebobe: Bakwo̧ lȩekwa yöbawo̧nö omöna yöawobe, jelo̧nö lȩebobö. Jobekwö omöna yöba̧lo̧nöma jwiinö öpöjödobe Isabenö Jo̧ma. Jemi ikena Isabenö Jo̧ öpöjödi̧ma baikwö laebobe: Bakwo̧ omöna yöa̧lobetjö̧ ömöledötjö ju'wedökwö ju'wedökwö wene tjuju̧na̧lakwawobö jwöbebo̧nö jwiinö öpöjödobe Isabenö Jo̧ma. Ja̧ jelemutjö dötölataja jawa jojodö sulabenö omukwatö ja̧tji̧ jawa jwiinö öpöjödobe Isabenö Jo̧ma.

Proverbios 6:19 ပူးပေါင်းရင်းမြစ်များ

Éxodo 20:16

Ja̧danö ju'wibi wetaduwakwö: Kwömöledöso̧, wene juna̧lo̧ma omukwatö juno̧ luwo̧ öbajale a'otjö ja̧nö kwatadaduwobö aebitjö̧ma omöna yöka̧laduwoko.

Éxodo 23:1

Ina Isabenö Jo̧ma Moisésnö webijetö, weawa wene ujunobö Israel jojodönö a̧ja̧kwö tjö̧jobö, baikwö: —Ju'wedönöma omöna yöka̧laduwoko. Wanedö yötawa: Bakwo̧, sulabenö ja̧bo̧nöma ötjibobe lȩekwa omukwatö junadö tjöbajale a'o tjujunobö. Ja̧danö, omukwatö junadöma ökwönö jo̧banöma yöka̧lobö aeba̧litjö̧ma jweinöda yöka̧lo. Omönama yöka̧loko jo̧banö pjakatobö, ja̧danö jo̧banöma lȩtjebokobö. Jweinöda yöka̧lo.

Proverbios 12:17

Ja̧danö, ju'wibi yötawa: Lȩekwa yöbawo̧ öba a'o ja̧nö jweinö yöba̧lo̧ma baledina edi̧ma jweinö yöawobe. Jobekwö yöawokobe omöna yöba̧lo̧ma, omönada yöbawo̧ lȩekwa yöbawo̧nö.

Proverbios 14:5

Ja̧danö, ju'wibi yötawa: Bakwo̧, lȩekwa yöbawo̧ öba a'o ja̧nö ba̧kwȩjatebö jweinöda yöawitjö̧ma a̧ja̧kwadöma tjöwaisachibena, bitenö yöawobö atjebena jweinöda yöbawo̧, jö̧ba̧lö. Jobekwö yöawokobe omöna yöbawo̧ma. Omöna yöbawo̧ma lȩekwa yöbawo̧ öba a'o ja̧nö omönada yöbawo̧.

Proverbios 16:28

Ja̧danö, ju'wibi yötawa: Sulabenö omukwatö jo̧ma wene jwöbebo̧ jojodö tjölakwabikwawinö. Ja̧danö, ju'wibi yötawa: Bakwo̧ ju'wedönö yö̧ne tjö̧möledöso̧nöma omöna yöa̧liawö̧ tjö̧möledöso̧tjö̧ 'da̧bachibö tjö̧ja̧kwedö.

Proverbios 19:5

Ja̧danö, ju'wibi yötawa, wanedö: Bakwo̧ lȩekwa yöbawo̧ öba a'o ja̧nö iteda edinatjö̧bi, a̧ja̧kwinatjö̧bi yöawobö wetjökwe. Isabenö yötawa: Bakwo̧ lȩekwa yöbawo̧nö yöawena jweinö yöawobö jo̧be. Omöna yöbawo̧nö isabenö lȩtjebakwo̧. Yelösöda omöna yöbawo̧nöma lȩtjebakwa̧tjö ö̧jibobö jwiobe, ja̧danö döibajoböbi jwiobe.

Proverbios 19:9

Ja̧danö, ju'wibi yötawa wanedö: Bakwo̧ lȩekwa yöbawo̧ öba a'o ja̧nö iteda edinatjö̧bi, a̧ja̧kwinatjö̧bi yöawobö wetjökwe. Isabenö yötawa: Jo̧bama lȩekwa yöbawo̧nö yöawena jweinö yöawobö jo̧be. Omöna yöbawo̧nö isabenö lȩtjebakwo̧. Yelösöda omöna yöbawo̧nöma lȩtjebakwa̧tjö ö̧jibobö jwiobe, ja̧danö döibajoböbi jwiobe.

Proverbios 21:28

Ja̧danö, ju'wibi yötawa: Bakwo̧, lȩekwa yöbawo̧nö iteda edina yöa̧lobö aebökwema omöna yöa̧litjö̧ma lȩekwa yöbawo̧ma jo̧banö kaatibena, yöba̧lökönuwi, omöna yöbawo̧ja, jö̧ba̧lö. Jobekwö baledokobe jweinö yöbawo̧nö. Abebö a̧ja̧kwökwema lȩekwa yöbawo̧nö iteda edina jweinö yöawitjö̧ma lȩekwa yöbawo̧ma ösödobe tupakwö yöba̧li̧, jö̧ba̧lö. Jweinö yöawobetjö̧ lȩekwa yöbawo̧ma jo̧ba yöawi̧ a̧ja̧kwö ösödo̧, jo̧banö yöawoböma kabatibökönö.

Proverbios 22:10

Ja̧danö, ju'wibi yötawa: Isabenö, jojodönö sulabenö yöba̧lö obadöma deitjö̧ma otiwena. Jao, jobadö obadönö a'dewö loköbaduwobetjö̧ ölakwabikwawabi, wenebi, jelo̧nö jwöjwöakwawabi jwiena.

Proverbios 25:18

Ja̧danö, ju'wibi yötawa: Bakwo̧ lȩekwa yöbawo̧nö ömöledöso̧nöma omöna yöawena jwiinö sulobe. Wanedö yötawa: Jo̧ba omöna yöawi̧ma ömöledöso̧nö kwakwatji̧danö ji̧, i̧sö̧'a̧ nö'a̧nö kwakwatji̧danö. Ja̧danö, kwölöte'onö dȩi̧danö, ja̧danö na̧yu̧nu̧ 'böi̧danö ji̧, ömöledöso̧nö omöna yöawi̧ma, lȩekwa yöbawo̧nö. Jwiinö inia tjöi̧danö niobe.

Proverbios 26:20

Ja̧danö, ju'wibi yötawa: Ökwölama imi ubö 'dö̧ibajenama tiibi̧ ¿jö̧tö̧? Ja̧ ji̧danö jojodö tja̧ja̧kwokonö sewoba̧lö yöba̧lo̧ deitjö̧ma ökwöla imi ubö tiibi̧danö jojodö wene tju̧juna̧li̧ma tiibakobe.

Proverbios 6:14

Yelösöda, jo̧ba sulabenö omukwato̧ma sulabenö öwaedakwa̧da ajayinö omukwatö juno̧ o̧'wo̧ okwanö. Ja̧danö, jo̧bama ju'wedökwö wene tju̧juna̧loböda wene jwöbebo̧ ba̧kwȩlö̧jatebö.

Proverbios 8:13

Ju'wibi yöbawuju: —Chömöledö, Isabenö Jo̧nö yebabinö omukwatö kwö̧jaduwobö jö̧ka̧laduwitjö̧ma suli̧ jawa kwöpöjödaduwobö jo̧be. Ötjöma suli̧ jawa öpöjödujusa, jojodö sulabenö tjo̧mukwati̧ma. Baikwö jojodö sulabenö tjo̧mukwati̧ jwiinö chöpöjödobe: Bakwo̧, ötjödasa waiso̧ma, jö̧ba̧lö omukwato̧nöma jwiinö chöpöjödobe. Ja̧danö, ju'wibi jojodö tjo̧mukwati̧ma jwiinö chöpöjödobe: Bakwo̧ ju'wedönötjö o̧penönö inesö luwo̧ jo̧sa, jö̧ba̧lö, omukwato̧nöma jwiinö chöpöjödobe. Ja̧danö ju'wi jawabi ju'wi jawa chöpöjödobe: Sulabenöda omukwatö jo̧nö jwiinö chöpöjödobe. Ja̧danö, jelo̧nöbi jwiinö chöpöjödobe, jojodönö jelobekwö tjo̧mukwatobö ö'öbönö yöba̧lo̧nöma. Ja̧ jawa jwiinö chöpöjödobe— yöbawuju, jweinö omukwatö ja̧kwawa wanekwachujuma, isudada.

Mateo 15:19

Jau chömöledö, okobe jwiinö sulabenö tjomukwati̧ma, tjomajadetjö laebi̧, jojodönö kwabö lotjobö tjomukwati̧bi, tji̧lȩkwa̧muböködökwö sulabenö ja̧awa ja̧danö ju'wibi sulabenö 'da̧'da̧akwawa ja̧awa ja̧tjobö tjomukwati̧bi, tjönaukwobö tjomukwati̧bi, omöna yötja̧lobö tjomukwati̧bi, jojodönö sulabenö yötja̧lobö tjomukwati̧bi.

Mateo 26:59

Ö'weje pjabatadö la'aka tjuluwedöbi, judío jojodötjö inesö lȩekwa luwedöbi omöna yötja̧lakwedönö tjisakwinobe, Jesús sulabenö ja̧ina edinadösa jö̧ba̧lö omöna yötja̧lakwedönö. Jejenö tjisakwinobe, Jesús sulabenö ja̧ina wene omöna yötja̧lenama, Jesúsnö kwabö lotjobö lȩtjebakobetjö̧.

Hechos 6:13

Ja̧danö, ju'wedönö webijadötö omöna yöbawö jwötjeba̧lobö. Jobadöma omönanö yöbawijadötö: —Bitema kabatökönö sulabenö obö yöa̧lobe Dios ejubi, Dios weina Moisés iwȩyudinabi—yöbawijadötö.

2 Timoteo 2:23

Ja̧danö kwöwaisa Timoteo, jojodö wajwibö omukwatökönö yötja̧lakwawi̧ma, Aaa, biya̧daena, ju'widaena, jö̧ba̧lö yötja̧lakwawi̧ma mikwawokobe, sule jojodö jwöjwötjakwawobö ja̧i̧ ji̧, ¿jö̧tö? Jo̧kwajabetjö̧ ja̧ jaye yöa̧lakwawama kwöpöjödo, jojodökwö jwöjwöbakwawö kwö̧japji jö̧ba̧lö.

Santiago 3:18

Chö̧ja̧wo̧dö, Dios öibawö̧ waisanö omukwatadöma tjömöledönö dösölö̧jinö pjabatö, wene jwiinö isakwö ja̧dö. Jejenö ja̧nö tjisakwobetjö̧, wene jwiinö tjö̧jobö, tjömöledöbi wene jwiinö tjö̧jobö tjisakwobe. Wanedö yötawaduwakwö: Dösölö̧jinö omukwatö pjabatadöma batjo junawadanö tjujunobe. Tjujuni̧ önebiama idöda dösölö̧jinö tjomukwati̧, ja̧danö, tjömöledönö otiwanö omukwatö pjatjati̧ma. Ja̧ dösölö̧jinö tjomukwati̧ma, ja̧danö tjömöledönö pjatjati̧ma junawa tjujuni̧danö tjujunobe tjömöledökwö otiwanö tjö̧ji̧ma. Ikenama ja̧ tjujuni̧ma otiwanö pokwobe ju'wedö tjömöledö tjomajade okwa, otiwanö wene jwiinö omukwatö tjö̧jobö. Isabenö chö̧ja̧wo̧dö, otiwanö dösölö̧jinö omukwatö ju̧kwadöma ju'wedönöbi otiwanö wene jwiinö tjö̧jobö pjabatadö.