Proverbios 29:25 - Dios Iwene25 Ja̧danö, ju'wibi yötawa: Jojodö ökwönö tjo̧mukwati̧ma kwomukwatoko, ayö dakwö tjo̧mukwatobejö̧ ötjönöma, jö̧ba̧lö. Jobekwö kwomukwataja̧ma ökwödada 'daliwanö tjö̧li̧bidanö kwö̧libobö wanekwachobe. Jobekwö omukwatökönö, Isabenö Jo̧nöda kwo̧'wo̧ wa̧na̧lö kwö̧jitjö̧ma yebabökönö otiwanö kwö̧jakwo̧ja. အခန်းကိုကြည့်ပါ။ |
Ja̧danö, jobe Gerar jojodötjö ju'wedö ömadöma Isaacnö abebö a̧ja̧kwijadötö, Rebecanöma, ¿kwilekwoji̧? jö̧ba̧lö. Jejenö abebö atjebiökwe, chöjawuju, jö̧ba̧lö, atadijetö Isaacma. Jejenö atadijetö yebabinö, chilekwo, jö̧ba̧lö, jö̧ta̧litjö̧ma Rebecanö edinö, otiwuju, jö̧ba̧lö, tjo̧'wo̧ sulinö edö kwabö lotjena ötjönöma, Rebecanö tjemibobö.
ja̧danö jobadökwö tjölakwabikwawenama, Diosnö atjebinobe, —Duluwo̧ Dios, juluwanö pjakatobö adebakwö, —jö̧ba̧lö. Jobekwö tjo̧'wo wana̧lö atjebiökwe, atjebi̧ a̧ja̧kwinobe Diosma, ja̧danö otiwanö pjaatinobe. Jo̧kwajabetjö̧, jobekwö pjaatiawö̧, jwiinö tjujuluwinobe agarenos jojodönöbi, agarenos jojodönö pjabatadönöbi.
Chömöledö israel jojodö, tinö yekabinaduwada? O̧'wo jawa jwiinö yekabiduwobetjö ötjönö omöna yöka̧laduwaji̧? Tajawedö ötjönö kwo̧'woduwi jwikibaduwaja̧da, ja̧danö, —Dios ösödi̧ma di̧yajö, —jö̧ba̧lö tajawedö omukwatökönö kwö̧jaduwobeda? Lekwe möle ötjöma wi̧inö ja̧nö, ökwödönö lȩbebökönö chiteada̧lobetjö̧, ötjönö yebaböködö bakibaduwaji̧?
Jejenö balediökwe, Nabucodonosorma yöa̧linobe: —Isabenö okobe deinö tjösödobö jo̧be, Sadracbi Mesacbi Abednegobi tjösödökwe Diosnöma. Bidöma tjuluwo̧ Diosnö ösödö, weti̧ tjöpöjödinobe, debö di̧'yitjö̧böbi sule Duluwo̧ Diosnöda dösödakwedösa, jelo̧nö la'akatjöda dösödökakwedösa jö̧ba̧lö. Ja̧danö jejenö tjo̧'wo̧ tjöwana̧liökwe, Diosma iteda ömöayo̧ ángelnö weajabe, ökwölatjö tjö̧jibinö pjabatö, jo̧kwajabetjö̧ okobe deinö jo̧banö tjösödobö jo̧be.
Daniel ina yaba̧lo̧ ö̧jiökwe, Daríoma jwiinö o̧'wo̧ ösöwachibanö ö̧jinobe, ja̧danö weinobe Danielnö i̧lȩdo̧tjö tötjebobö. Ja̧danö i̧lȩdo̧tjö Danielnö latjebenama, ja'yubebi didibadö suli̧ tjöwaedajökökwenö tjedinobe. Diosnö o̧'wo̧ wana̧lö ösödiökwe, Diosma tjöbeba̧lö ite'ada̧linobe Danielnö, didibadö ja'yubebi Danielnö suli̧ tjöwaedapji jö̧ba̧lö.
Tupakwö yöawinobe Jesúsma öba̧ja̧di̧ waisachadönö: —Ökwödö yöne chömöledönö baikwö yötawa: Jojodönöma yekabiduwoko, jojodöma sule tjiteba'oda kwabö lobadötjobetjö̧. Jau chömöledö, sule tjiteba'oda kwabö lotjobö juluwadö jojodöma. Tupakwö ökwödönö suli̧ tjöwaedoböma juluwöködö, jo̧kwajabetjö̧ jobadönö yekabiduwoko.
Ja̧danö, jo̧bama Jesús ö̧jobekwö i̧'yinobe, yö̧te ja'ö. Ichibö jö̧a̧linobe Jesúsnö: —Ba̧ja̧dakwawa jojo, döwaisa ökwönöma, Dios weinökweja, jö̧ba̧lö, jojodönö kwöba̧ja̧dobö weinökweja, jö̧ba̧lö, ökwöma— jö̧a̧linobe—. Ökwöma Dios ujulunö i̧sebo̧ja, Diosma ökwökwö pjabatö ö̧jobetjö̧. Jelo̧ Dios weinökökwema, jejenöma i̧sebö̧kö̧, ökwö kwi̧sebi̧danöma— jö̧a̧linobe Nicodemoma.
Jojodö kwöba a'o tjichibenama, nöinö tjujuna̧litjö̧böbi, jwibadö tjö̧ji̧tjöböbi, bakwainö jweinöda lȩekwa yökawaduwo. Ja̧danö lȩekwa yökawaduwobö jȩnama, jojodönö yebabökönö jweinö yökawaduwobö ja̧kobe. Diosda inesö lȩekwa luwo̧ chömöledö, jo̧kwajabetjö̧ jojodönö yebabökönö, jo̧ba wei̧da a̧ja̧kwö, jweinö lȩekwa yökawaduwobö ja̧kobe. Ja̧danö, lȩekwa yökawaduwobö waiyitjö̧ma, chöba a'o tjichibobö ökibaduwo, wene juna̧ladönö, ötjö Moises yötja̧li̧ a̧ja̧kwö lȩekwa yötawobö,
Ja̧danö, Cristo ökwödönö pjaatinobetjö̧, Diosnö ösödadöja chömöledö. Jau chömöledö, Diosda Cristonö wobajaletjö tjeachajinö ja̧binama, ja̧danö jo̧banö dejatinö ujulu iyinama, jo̧kwajabetjö̧ Cristonö kwösödaduwenama, Dios yöawi̧ ösödadöja, ja̧danö Diosnö kwo̧'wo̧ wana̧ladöja. Jau chömöledö, Dabe'do Diosma isabenö otiwanö pjaatinobe sulabetjö dö̧jibobö, jo̧kwajabetjö̧ ja̧ pjaatina omukwatö sulabenö ja̧bökönö dö̧jobö jo̧be.
Jejenö yöawökwe, Saulma Samuelnö yöa̧linobe, —Isabenö sulabenö ja̧tajabe, Isabenö Jo̧ wei̧bi, ökwö weköbi̧bi isabenö a̧ja̧kwökönö ja̧tajabe, jojodönö yetabobetjö̧. Jau Samuel, jojodöma Dios wei̧tjö wainö tjösödinobe tja̧jwimunö do̧tja̧tobö tjösödinobe, ja̧danö jejenö tjösödi̧tjö, yebabinö yötja̧li̧da cha̧ja̧kwijatö, Dios wei̧ a̧ja̧kwökönö.
Ikenama, suli̧ chöwaedoböma chisakwökakwo̧sa jö̧ba̧lö Saul yöa̧lijayonö, Davidma omukwatinobe itedada: —Isabenö yemidanö isakwö ichakwo̧ Saulma, ja̧danö belö latebökötjö̧ma, ju'wi möle Saulma ötjönö kwabö loena. Jo̧kwajabetjö̧ bai israel nijinö chö̧jobö jwiobetjö̧, filisteo jojodö tjitebobe chi̧'yobö otiwena, jobadö tjitebonö chö̧jobö. Jejenö latebobetjö̧, israel nijitjö detiökwe, Saulma ötjönö isakwö kaatakwawena, ja̧danö jo̧batjö chö̧jibena, —jö̧ba̧lö omukwatinobe Davidma.
Ja̧danö, jejenö Aquisnö omöna yöa̧lobö omukwatobetjö̧, Davidma kwabawö i̧'yenama, bakwo̧bi ö̧ji̧bökönö kwabawö loinobe. Omukwatinobe, chujuluwajawö̧tjö ji̧bajadö tjö̧jitjö̧ma, ju'winö baikwö Gatbe ichibö Aquisnö yötjawena, —Kwitebonö ö̧jonö, Davidma itebo israel jojodönö kwabawö lobökönö, ökwödönöda kwabawö loajabe, —jö̧ba̧lö. Ja̧danö isabenö kwabö loawö̧nö Aquis öwaisachibapji jö̧ba̧lö, ji̧badö deinö kwabawö loinobe Davidma.