Proverbios 28:21 - Dios Iwene

²¹ Ja̧danö, ju'wibi yötawa: Lȩekwa yöbawo̧ma du̧ju̧taja wene juna̧lakwawadö yötjawi̧ a̧ja̧kwö, bakwemiinö edobö jo̧be. Jelo̧nö ösödö, jelo̧nö öpöjödö edobö jwiyobe. Bakwemiinö edö lȩebakwa̧ma jweinö yöawobö jo̧be. Jobekwö jweinöda yöawobö ji̧jayonö, lȩekwa yöbawadötjö ju'wedöma sulabenö omukwatadö. Jobadöma ju'wedö mikwanö tji̧yitjö emadö omöna yötjawobö, ja'yube mikwanö tjiyitjö̧bi.

Proverbios 28:21 ပူးပေါင်းရင်းမြစ်များ

Éxodo 23:2

Ja̧danö, ju'wi wanedö yötawa: Ökwödötjö ju'wedöma, ba̧jȩkwadö sulabenö ja̧tja̧kwa̧ yöba̧lakwawö junö tjö̧jitjö̧ma ökwödöma wainö kwö̧jaduwo, jobadökwö pjabacha̧lö ko̧ko̧kwökönö. Ja̧danö, ju'wi wanedö yötawa. Ökwödöma lȩekwa omukwatö junadönö yöka̧laduwena, jelo̧ sulabenö ja̧inojobö, sulabenö ja̧inokojobö jö̧ba̧lö, ju'wedöma ömöna yöka̧laduwobö atjebena, lȩekwa omukwatö junadöma lȩtjebokobö tjöbajale a'o jo̧nöma. Jejenö atjebitjö̧ma kwa̧ja̧kwaduwoko. Lȩekwa omukwatö junadöma jweinö omukwatö tjujunakobetjö̧ jweinö yöka̧laduwobö jo̧be.

Éxodo 23:8

Ja̧danö, ju'wi wanedö yötawa: Lȩekwa omukwatö junadö tjöbajale a'o ja̧nö, jelo̧ma ökwödönö aeba̧lena, omöna yöba̧lö pjakatitjö̧ma balada chimidakwö, jö̧ba̧lö. Jejenö aeba̧litjö̧ma kwa̧ja̧kwaduwoko. Ja̧ balada kwemobö omöna yöka̧litjö̧ma lȩekwa omukwatö junadö tjöbajale tjewawö̧ edöködödanö wajwitjena isabenö baledinama. Jejenöobetjö̧ sulabenö omukwatö ja̧bö̧kö̧nöda lȩtjebakobe, sulabenö ja̧ököjayonö— jejenö webijetö Isabenö Jo̧ma Moisésnö, weawa wene ujunobö Israel jojodönö.

Proverbios 18:5

Ja̧danö, ju'wibi yötawa wanedö, du̧ju̧tajanö, sulabenö ja̧binanöbi, sulabenö ja̧binö̧kö̧nöbi. Ja̧danö, lȩekwa yöbawo̧ma lȩekwama jweinö yöawökötjö̧ma sulabenö ja̧obe. Wanedö yötawa: Sulabenö ja̧binanö edö jo̧banö lȩebobö jo̧be. Jao, lȩebobö jijayonö, lȩekwa yöbawo̧ma, lȩtebökökwe jö̧ba̧lö yöawitjö̧ma sulabenö omukwatö yöawena. Ja̧danö jelo̧nö, sulabenö ja̧binö̧kö̧nö edö, lȩebobö jwiijayonö, lȩekwa yöbawo̧ma lȩtebakwo̧ jö̧ba̧lö yöawitjö̧ma sulabenö omukwatö yöawena lȩekwa yöbawo̧ma. Isabenö, jweinöda yöawobö jo̧be lȩekwa yöbawo̧ma.

Proverbios 24:23

Baikwöbi laebobe jweinö omukwatadö yötjawina jawa, lȩekwa yöbawo̧nö yötjawinama: Wanedö yötawa: Lȩekwa yöbawo̧ öba a'otjö du̧ju̧taja wene juna̧lakwawadö yötjawobe lȩekwa yöbawo̧nö, wene tju̧juna̧lakwawi̧ jawama. Bakwo̧nökwena yötjawobe lȩekwa yöbawo̧nöma, öwaisachibobö tida jweinö yöawojobö, tida omöna yöawojobö. Ja̧danö, lȩekwa yöbawo̧ma jobadö du̧ju̧taja wene juna̧lakwawadö yötjawi̧ a̧ja̧kwö, bakwemiinö edobö jo̧be. Jelo̧nö ösödö, jelo̧nö öpöjödö edobö jwiyobe. Bakwemiinö edö lȩebakwa̧ma jweinö yöawobö jo̧be.

Romanos 16:18

Jau chömöledö, jejenö ja̧badöma Duluwo̧ Cristo wei̧ma ja̧böködö chömöledö, sule idöda tjösödi̧da ja̧bö ju̧kwadö. Jobadöma wajwibadönö dösölö̧jinö yöba̧ladö, ja̧danö, jojodö tjösödi̧ jawa yöba̧ladö jojodö jobadö omöna yötja̧li̧ a̧ja̧kwö tjösödobö.

Deuteronomio 1:17

Jojodö kwöba a'o tjichibenama, nöinö tjujuna̧litjö̧böbi, jwibadö tjö̧ji̧tjöböbi, bakwainö jweinöda lȩekwa yökawaduwo. Ja̧danö lȩekwa yökawaduwobö jȩnama, jojodönö yebabökönö jweinö yökawaduwobö ja̧kobe. Diosda inesö lȩekwa luwo̧ chömöledö, jo̧kwajabetjö̧ jojodönö yebabökönö, jo̧ba wei̧da a̧ja̧kwö, jweinö lȩekwa yökawaduwobö ja̧kobe. Ja̧danö, lȩekwa yökawaduwobö waiyitjö̧ma, chöba a'o tjichibobö ökibaduwo, wene juna̧ladönö, ötjö Moises yötja̧li̧ a̧ja̧kwö lȩekwa yötawobö,

2 Pedro 2:3

Ja̧danö, idöda tjemotö jö̧ba̧lö tjösödobetjö̧, jobadö sulabenö yöbawadöma ökwödönö omöna yötja̧lakobe, ökwödötjö balada tjemo jö̧ba̧lö. Jo̧kwaijayonö Diosma damötjö jobadönö lȩebobö omukwatö ujuninobe chömöledö, ja̧danö isabenö jobadönö lȩebakobe.