Proverbios 28:18 - Dios Iwene

¹⁸ Ja̧danö, ju'wibi yötawa: Otiwanö omukwatö, jweinö yöba̧lö jo̧nöma labi̧ baledi̧tjö ö̧jibinö pjatjatökwe. Jobekwö baledokobe sulabenö omukwatö jo̧nö. Sulabenö omukwatö jo̧nöma ö̧jibi̧ jwibo̧, juluwanö söbebö lotjakwo̧.

Proverbios 28:18 ပူးပေါင်းရင်းမြစ်များ

Proverbios 10:25

Ja̧danö, ju'wibi yötawa, wanedö: Bö̧jenö ja̧nö labi̧ jawa baledi̧ma jwa̧lȩ'ȩpjo dobibajö ichi̧danö wanekwachobe. Ja̧danö, jwa̧lȩ'epjo dobibajö ichena Dios wei̧ a̧ja̧kwadöma 'diinö tjö̧jobetjö̧ jwa̧lȩ'ȩpjo emibökakwawö̧. Jobekwö baledokobe sulabenö omukwatadönöma. Jobadö sulabenö omukwatadöma jwa̧lȩ'ȩpjo dobibajö ichena jwa̧lȩ'ȩpjo emibi̧danö emibakwawö̧.

Proverbios 10:27

Ja̧danö, ju'wibi yötawa: Isabenö Jo̧nö yebabinö omukwatadöma lekwe tjö̧jakwedö, tjö̧ji̧ deatawö̧. Jobekwö tjö̧jokobe sulabenö omukwatadöma. Jobadö sulabenö omukwatadöma ina damö tjö̧japii debö tji̧'ya̧kwedö, tjö̧ji̧ peatawö̧.

Proverbios 10:9

Ja̧danö, ju'wibi yötawa: Otiwanö omukwatö jo̧ma jwaikwöda yebabökönö 'yo̧. Jo̧kwaijayonö sulabenö omukwato̧ma jobekwö jwaikwöda i̧'yokobe. Jo̧bama sulabenö öwaedotö jö̧ba̧lö i̧'yijayonö öwaekwakwo̧, jojodöma jo̧ba sulabenö tjo̧mukwati̧ tjöwaisachibobetjö̧.

Proverbios 28:10

Ja̧danö, ju'wibi yötawa, wanedö: Sulabenö omukwatadöma otiwanö omukwatadönö sulabenö ötjibobe jelobekwö omukwatö sulabenö ja̧tjobö. Isabenö yötawa: Jobekwö sulabenö öbibadöma idönöda wene jwötjebakwedö. Jobadöma 'daliwa tjö̧naja̧nöda tjö̧li̧bakwedö, idönöda sulabenö badekwachawö̧ jö̧ba̧lö. Jobekwö badekwachokobe jweinö yöba̧lö otiwanö omukwatadönöma. Jobadö otiwanö omukwatadönöma otiwanö badekwachawö̧.

Proverbios 28:6

Ja̧danö, ju'wibi yötawa, du̧ju̧tajanö wanedö: Bakwo̧ma ö̧jobe otiwanö omukwatö ö̧jobö isakwo̧. Jo̧bama nöinö balada, itea jwibo̧ijayonö o̧'wo̧ ösöwanö jo̧, otiwanö ja̧bö ö̧jobö isakwobetjö̧. Ja̧danö, jelo̧ma ö̧jobe balada nöinö juna̧lo̧ma. Jo̧bama sulabenö omukwatö omöna yöba̧lö jo̧. Ja̧danö, ¿dite otiwanö ö̧jobeda? Isabenö yötawa: Balada, itea jwibo̧ma balada juna̧lo̧, sulabenö omukwato̧ ö̧ji̧tjö̧ bajalekwönönö otiwanö ö̧jobe, balada itea jwiijayonö.

Gálatas 2:14

Jau chömöledö, judío jojodöböködökwö kwakwawa kabatibö, isabenö wene otiwa jawa wene laebi̧danö ja̧tjinokobe. Jo̧kwajabetjö̧ jejenö sulabenö ja̧tjobe edö, ötjöma okobe deinö Jesúsnö ösödadö tjöba a'otjö jamatö Pedronö lȩbebö yötawijatö, baikwö: —Pedro, ökwöma judío jojoköbijayonö, judío jojodö tjö̧ji̧ jawa kakatinobe, mikwawökö jö̧ba̧lö, ja̧danö judío jojodöböködö ja̧bö tjö̧ji̧danö kwö̧jobe, ¿jö̧tö? Jo̧kwajabetjö̧ ökwöma judío jojodö tjö̧ji̧ jawa mikwawökö ji̧ jö̧ba̧lö kakatibinatjö̧ma, ja̧ jawa judío jojodöböködönö weköboko, judío jojodö ja̧bö tjö̧ji̧danö ja̧bö tjö̧jo jö̧ba̧lö.

1 Tesalonicenses 5:3

Jojodö, Aaa, wene jwia, yedaboböma jwia jö̧ba̧lö tjomukwatelö ja'ötjö, juluwanö baibakobe jobadönö lȩebakwa̧ma. Jau chömöledö, ja̧ baibakwa̧ma wanedö yötawa, jitji̧nö jemakwujuma, jo̧'wo̧ söba̧lö jö̧jelö ja'ötjö, juluwanö niatibobe, ¿jö̧tö? Jejenö baibakobe jojodönö lȩebakwa̧ma, ja̧danö döibajakwa̧ma jwiakobe.

Apocalipsis 3:3

Yötawaduwakwö. Omukwataduwi. Ajayima Dios iwene yötjawi̧ a̧ja̧kwö jwiinö kwösödinaduwobe. Ja̧danö, ja̧ ajayi a̧ja̧kwö kwösödinaduwadanö yemidanö kwösödaduwobö, babe jelobekwö kwomukwataduwi̧ma kabatibö balewachaduwi. Chömöledö, kwo̧'wo̧ luwo̧duwi okwanö woawatjö yemidanö 'yabibajadö bakibaduwanö wilubakwawaduwi. Jejenö, wiluköbakwawaduwökötjö̧ma ötjöma, ökwödö wajwiköbaduwonö naukwabo̧ ichi̧danö chichakwo̧sa, ökwödönö lȩbebö.