Proverbios 25:18 - Dios Iwene

¹⁸ Ja̧danö, ju'wibi yötawa: Bakwo̧ lȩekwa yöbawo̧nö ömöledöso̧nöma omöna yöawena jwiinö sulobe. Wanedö yötawa: Jo̧ba omöna yöawi̧ma ömöledöso̧nö kwakwatji̧danö ji̧, i̧sö̧'a̧ nö'a̧nö kwakwatji̧danö. Ja̧danö, kwölöte'onö dȩi̧danö, ja̧danö na̧yu̧nu̧ 'böi̧danö ji̧, ömöledöso̧nö omöna yöawi̧ma, lȩekwa yöbawo̧nö. Jwiinö inia tjöi̧danö niobe.

Proverbios 25:18 ပူးပေါင်းရင်းမြစ်များ

Éxodo 20:16

Ja̧danö ju'wibi wetaduwakwö: Kwömöledöso̧, wene juna̧lo̧ma omukwatö juno̧ luwo̧ öbajale a'otjö ja̧nö kwatadaduwobö aebitjö̧ma omöna yöka̧laduwoko.

Proverbios 12:18

Ju'wibi yötawa: Ba̧kwo̧ma ömöledöso̧nö öpöjödö labinö yöa̧litjö̧ma niatakwawadanö jena ömöledöso̧nöma. Isabenö, labinö öpöjödö yötja̧li̧ma i̧sapi̧nö titjati̧danö nii̧. Jobekwömaökö jweinö omukwato̧ ösödö yöa̧li̧ma. Jweinö omukwato̧ma ösödö yöba̧lo̧, yöa̧lökwenö pjabatö. Isabenö, jo̧ba ösödö yöa̧li̧ma otiwanö, jowobu tjowi̧danö seachobe yöa̧lökwenöma, o̧'wo̧ söawinö.

Proverbios 24:28

Ju'wibi yötawakwö chitji̧: Kwömöledöso̧kwö wene kwujuna̧lena nöi̧ jawa wene jwiitjö̧ma yöbawö kwi̧'yoko lȩekwa yöbawo̧ ö̧jobekwö. Ja̧danö, ju'wibi yötawa: Ju'wedönö kwömöledöso̧nöma omöna yökawoko jelobekwö tjo̧mukwatapji jö̧ba̧lö.

Proverbios 25:17

Ja̧danö, ju'wibi jwebebö yötawa: Ba̧kwȩlö̧jateböma kwipjeanö jo̧ ejube kwi̧'yoko jo̧bakwö yöba̧lö. Yemidanöbi yemidanö kwi̧'yiökwe, yelösöda ba̧kwȩlö̧jatebö ichiba̧lo̧, jö̧ba̧lö ökwönö jwiinö öpöjödachibena.

Santiago 3:6

Chö̧ja̧wo̧dö, jejenö ökwödö dinenenö yöda̧li̧ma. Ja'yubetjö nötekwajö ubö okobe jwiinö ubi̧danö dinenema ja'yuwijayonö jwiinö sulabenö baibobe. Yelösöda daatjö laebi̧, dinenenö yöda̧li̧ma juluwobe okobe jwiinö dö̧ji̧ma sulabenö baibanö dö̧jobö. Chö̧ja̧wo̧dö, do̧'wo̧ luwo̧nö sulabenö edö dinenenö yöda̧li̧ma Awetja ökwöla juwawa önötekwaji̧danö, okobe jwiinö ubö loobema, okobe jwiinö dö̧ji̧ma sulabenöda baibanö.