Proverbios 22:1 - Dios Iwene

¹ Salomón ju'wi jwebebö yöawakwawa jawanö wanekwachi̧ jawa baikwö laebobe: Isabenö yötawa: Jojodöma ökwönö edö, otiwanö omukwatö jo̧ jö̧ba̧lö tjöwaisachibi̧ma jwiinö mikwawobe. Isabenö, balada, kwitea nöinö kwujuna̧li̧tjö̧ bajalekwönönö mikwawobe jojodö ökwönö edö, otiwanö omukwatö jo̧ jö̧ba̧lö tjöwaisachibi̧ma. Ja̧danö, oro, plata nöinö kwujuna̧li̧tjö̧ bajalekwönönö mikwawobe jojodö ökwönö edö tjösödi̧ma, Otiwanö omukwato̧, jö̧ba̧lö.

Proverbios 22:1 ပူးပေါင်းရင်းမြစ်များ

1 Reyes 1:47

ja̧danö duluwo̧ la'aka luwo̧ David ömöayedötjö la'aka luwedöma, ida̧ökö David öba a'o ichibö yötja̧lajabe, –Kwitji̧ma otiwanö duluwo̧ baibajabe, ja̧danö kwuluwo Dios isabenö jo̧banö pjaatobö dösöda, ja̧danö ökwönö tja̧ja̧kwinatjö bajalekwönönö, okobe deinö kwitji̧ Salomonnö tjaja̧kwobö dösöda, ja̧danö ökwö kwujulutjö bajalekwönönö, juluwo̧ baibanö Salomonnö pjaatobö dösöda, –jö̧ba̧lö yöba̧lö tjichibajabeta. Ja̧danö, ju'wibi, la'aka luwo̧ Davidma, camapjonö ba̧nö, Salomonnö ösödö bȩachibajabeta,

Proverbios 10:7

Ja̧danö, ju'wibi yötawa: Dios wei̧ a̧ja̧kwö ji̧abina debö i̧'yajabe okobe jojodöma tjo̧'wo̧nö omukwatabinö omukwatadö jo̧banöma, otiwanö ji̧abina, jö̧ba̧lö. Jobekwö tjo̧mukwatokobe sulabenö omukwatö ji̧abinanöma. Sulabenö omukwatö ji̧abina debö i̧'yajabe okobema jojodöma jo̧banöma tjo̧mukwatokobe, juluwanö tjo̧'wo̧ sötjibökwe.

Lucas 10:20

Jau chömöledö, isabenö otiwanö ökwödönö chiyajabe, tjo̧'wo̧ luwo̧nö sulabedönö juluwadö bakibaduwanö, jo̧kwaijayonö ja̧damaökö inesö kwo̧'wo̧ ösöwanö kwö̧jaduwobö ji̧ma chömöledö. Jau chömöledö, o̧penönö kwo̧'wo̧ ösöwanö kwö̧jaduwobö ji̧ma biya̧da, Diosma mölejȩbetjö kwimiduwi iwȩyudinobetjö̧, Bidöma ja̧kwawa juna̧ladö, jö̧ba̧lö, iwȩyudinobetjö̧, kwo̧'wo̧ ösöwanö kwö̧jaduwobö jo̧be. Jau chömöledö, sulabedönö juluwadö kwö̧jaduwi̧tjö bajalekwönönö inesö mikwawi̧ma biya̧da, ba̧kwȩlö̧jatebö ja̧kwawa mölejȩbetjö kwujuna̧laduwobö— jö̧ba̧lö yöa̧linobe Jesúsma.

Hechos 7:10

José usula emawijayonö usula emawi̧tjö ö̧jibinö pjabatijetö Diosma. Ja̧danö, Egipto la'aka luwo̧ faraón, Josénö otiwanö edobö, Bitema waiso̧, jö̧ba̧lö, pjabatijetö Diosma. Ja̧danö, faraónma junijetö Josénöma iteda eju otikwa weawa jojo baibanö. Egiptonö ju̧kwadö tjuluwo̧ baibanöbi junijetö faraónma Josénöma—yöbawijetö Estebanma.

Filipenses 4:3

Ja̧danö, ökwönö weta chömöledöso̧, ökwöma otiwanö ötjökwö otido̧ja, jo̧kwajabetjö̧ jobadö ötjönö pjabatinadönö ya̧dönö pjakato, bakwainö omukwatö tjö̧jo jö̧ba̧lö. Jau chömöledöso̧, jobadö ya̧döma ötjökwöbi, Clemente mikwo̧kwöbi, ju'wedö ötjökwö otiwa jawa wene yöbawö otidinadökwöbi tjotidinobe. Ja̧danö, jobadö ötjökwö otidinadönö baikwö yötawa: Dios ujuna̧la'ye, ja̧kwawa juna̧ladö tjimibiya wȩyukwa'yenö Diosma jobadö tjimibiyabi wȩyudö ödinobe, Bidöma ja̧kwawa juna̧ladö, jö̧ba̧lö.

Hebreos 11:39

Chömöledö, bidö yötawawö̧ma Diosnö tjo̧'wo̧ wana̧lö tjö̧jiökwe Diosma o̧'wo̧ ösöwanö edinobe jobadönöma, Otiwanö ösödö ju̧kwadö, jö̧ba̧lö. Yayonö jo̧ba jwiinö otiwi̧ jawa, ba̧kwȩlö̧jatebö ji̧ jawa, yöbawö ujunina iyakwa̧ma ina badekwachinokobe jobadönöma. Jobadötjö bakwo̧bi deobe Dios jwiinö otiwi̧, ba̧kwȩlö̧jatebö ji̧ jawa iyi̧tjö eminama.