Proverbios 20:19 - Dios Iwene

¹⁹ Ja̧danö, ju'wibi yötawa: Isabenö, bakwo̧ sulabenö tja̧ja̧kwokonö sewoba̧lö yöba̧lo̧ma omukwatökönö yöba̧lo̧. Ja̧danö, jelo̧ jo̧banö yöa̧lina, ju'wedö wajwitji̧ jawa, ja̧ jawa yöka̧loko jö̧ba̧lö weinajayonö tja̧ja̧kwokonö sewoba̧lö yöba̧lo̧ma ju'wedönöbi ju'wedönö omukwatökönö yöba̧lo̧. Jo̧kwaobetjö̧ jwebebö yötawaduwakwö: Jo̧ba omukwatökönö yöba̧lo̧ ö̧jelöma ödökwönönö kwö̧jaduwo, jo̧banö yöba̧lökönö, sulabenö omukwatökönöda yöba̧lo̧obetjö̧.

Proverbios 20:19 ပူးပေါင်းရင်းမြစ်များ

Proverbios 11:13

Ja̧danö, ju'wibi yötawa: Bakwo̧ oma'apekwönö yöba̧lo̧ma okobe jwiinö yöba̧lo̧, jelo̧ yöa̧lobö aebajököbi. Jobekwö yöa̧lokobe otiwanö omukwatö jweinöda yöba̧lo̧ma. Jo̧bama jelo̧ oma'apekwönöma yöba̧lö̧kö̧.

Proverbios 13:3

Ja̧danö, ju'wibi yötawa: Yöa̧lakwa̧ abönö ö'wiyawakwawönö omukwato̧ma iteda otiwanö ö̧ji̧ te'ada̧lo̧danö te'ada̧lobe, lekwe ö̧jakobetjö̧. Jobekwö ö̧jokobe yöa̧lakwa̧ abönö omukwatö̧kö̧ma. Jo̧bama omukwatökönö nöinö yöa̧lobetjö̧ usulaso̧da ö̧ja̧kwo̧.

Proverbios 16:29

Ja̧danö, ju'wibi yötawa: Labo̧ma iteda ömöledöso̧nöbi ölabobö öbibo̧. Isabenö, labo̧ma ömöledöso̧nö wene jwöebakwo̧, sulabenö omukwatö i̧'yobö öibakwo̧.

Proverbios 18:8

Ja̧danö, ju'wibi yötawa: Jojodöma, tja̧ja̧kwokonö sewoba̧lö sulabenö yötja̧li̧ a̧ja̧kwö jwiinö ösödadö, a̧ja̧kwaduwi jö̧ba̧lö. Isabenö, söi̧ kwakwawa tjukwi̧danö ösödadö. Jao, söi̧ kwakwawa tjö̧kati̧danö tjö̧katobe tja̧ja̧kwokonö sewoba̧lö sulabenö yötja̧li̧ma.

Proverbios 24:21

Jemi ikena jweinö omukwatadö yötjawinama baikwö laebobe, bakwo̧ iteda itji̧nö jwebebö yöawi̧danö: Chitji̧, Isabenö Jo̧nö yebabinö kwomukwatobö jo̧be. Ja̧danö, böjȩnö inesö la'aka luwo̧nöbi otiwanö omukwatö kwö̧jobö jo̧be, chuluwo̧, jö̧ba̧lö. Ja̧danö, Isabenö Jo̧ wei̧bi, böjȩnö inesö la'aka luwo̧ wei̧bi kwa̧ja̧kwobö jo̧be. Chitji̧ jwebebö yötawakwö: Isabenö Jo̧nöbi, inesö la'aka luwo̧nöbi a̧ja̧kwöködö labidökwö pjabacha̧lö kwö̧joko.

Romanos 16:18

Jau chömöledö, jejenö ja̧badöma Duluwo̧ Cristo wei̧ma ja̧böködö chömöledö, sule idöda tjösödi̧da ja̧bö ju̧kwadö. Jobadöma wajwibadönö dösölö̧jinö yöba̧ladö, ja̧danö, jojodö tjösödi̧ jawa yöba̧ladö jojodö jobadö omöna yötja̧li̧ a̧ja̧kwö tjösödobö.