Proverbios 14:11 - Dios Iwene

¹¹ Ja̧danö, ju'wibi yötawa: Sulabenö omukwato̧ ejuma söbebö lotjakweju, lekwe jö̧kakweju. Jobekwö baledokobe otiwanö omukwato̧ ejuma. Jo̧ba ejuma lekwe ja̧kweju.

Proverbios 14:11 ပူးပေါင်းရင်းမြစ်များ

Diosnö ösödo̧ Job mikwo̧ usula emawina jawa 15:34

—Jau Job, isabenö tjöwaekwakwedö Diosnö öpöjödadöma. Jobadöma tji̧tji̧mu tupadanö jojodö ina deayi debö tji̧'yakwedö. Ja̧danö ju'wibi, ju'wedö sulabenö ja̧tjobö tjimidawö̧, tjimidi̧ balada emö sulabenö ja̧tjobö ösödadöma, ajayinö nöinö tjujuna̧lakobe, jo̧kwaijayonö waekwakobe tupakwöma, tjejubiya jwiinö ubakobe.

Diosnö ösödo̧ Job mikwo̧ usula emawina jawa 18:21

–Ayö, isabenö itenö baledi̧danö baledawö̧, sulabedönöma, Diosnö öpöjödadönöma, —jö̧ba̧lö Bildad yöa̧linobe Jobnö, Isabenö sulabo̧ja, jö̧ba̧lö.

Diosnö ösödo̧ Job mikwo̧ usula emawina jawa 21:28

Ökwödöma yöba̧ladöja, –Juluwadötjö sulabedö tjö̧jinejubiyama, söbebö lotjinemi, sulabedö tjö̧jinemima jwiinö söbebö loawemida jo̧be, –jö̧ba̧lö yöka̧laduwobe.

Diosnö ösödo̧ Job mikwo̧ usula emawina jawa 8:15

Jau, jobadö Diosnö öpöjödadöma idöda tjujuna̧li̧ jawa tjo̧'wo wana̧ladö, –Otiwanö chujuna̧lobetjö̧, otiwanö chö̧jakwo̧sa, –jö̧ba̧lö, jo̧kwaijayonö waekobe, tjujuna̧li̧ jawa 'diinö do̧ba̧lö tjö̧jijayonö, 'diokobetjö̧ waekwobe.

Diosnö ösödo̧ Job mikwo̧ usula emawina jawa 8:22

Kwösödiökwe, jejenö pjaatakwo̧ ökwönö Job, ja̧danö ökwönö pjaatonö, ökwönö öpöjödadö taba lö̧jinö tjö̧jobö weakwo̧. Jau Job, ökwönö pjaatakobe Diosma, jo̧kwaijayonö sulabedönö söbebö loakobe, tjö̧jemi jwiinö baibanö, —jö̧ba̧lö yöa̧linobe Bildadma, Jobnö.

Proverbios 11:28

Ja̧danö, ju'wibi yötawa, wanedö: Bakwo̧ma yöa̧lena, Aaa, balada nöinö chujuna̧lobetjö̧ otiwanö chö̧jobe, jö̧ba̧lö. Isabenö yötawa: Jobekwö omukwato̧ma meakwo̧, imiame ichobe öjiya soi̧danö. Jobekwö baledokobe Dios wei̧ a̧ja̧kwö jo̧nöma. Dios wei̧ a̧ja̧kwö jo̧ma jwaikwöda i̧'yakwo̧, mebökönö, o̧ba ichobekwö öjiya soöködanö.

Proverbios 12:7

Ju'wibi yötawa: Diosma iteda wei̧ a̧ja̧kwö ju̧kwadönöma lekwe tjö̧jobö pjabato̧. Ja̧danö jobadötjö tupadanö jojodöma ba̧jȩkwadö tjö̧jakwedö. Jobekwö tjö̧jokobe sulabenö omukwatadöma. Jobadö sulabenö omukwatödöma lekwe tjö̧jökakwedö. Diosma jobadönöma söbebö loakwo̧, jobadötjö tupadanö jojodö tjö̧ba̧jȩkwachökakobetjö̧.

Proverbios 15:25

Ja̧danö, ju'wibi yötawa: Isabenö Jo̧ma jwiinö öpöjödo̧ ju'wedönö nijakwö edö, ötjödasa otiwo̧ma, jö̧ba̧lö omukwato̧nöma. Jobekwö omukwato̧ ejuma söbebö loakwo̧ Isabenö Jo̧ma. Jo̧bekwö öpöjödokobe Isabenö Jo̧ma jilekwenö wobekwinujunö. Jilekwenö wobekwinuju jitea niji te'ada̧lo̧ Isabenö Jo̧ma, naukwabidöma ajayinö ji̧nadö niji tjötjebinemi i̧sekwi̧ jawama tjopjolatapji jö̧ba̧lö.

Proverbios 21:12

Ja̧danö, ju'wibi yötawa: Suli̧ Jwibo̧ Diosma okobe jwiinö edo̧ ¿jö̧tö̧? Ja̧danö, sulabenö ja̧badö tjeju okwa baledi̧bi edö waiso̧ Diosma. Jobadö sulabenö ja̧badönö lȩebakwo̧, jwiinö labi̧ jawa jobadönö baledobö weakwo̧.

Proverbios 21:20

Ja̧danö, ju'wibi yötawa: Jweinö omukwato̧ma itea jwiinö mikwawi̧ jawa, ja̧danö o̧tesobubi jwiinö mikwawobu eju okwa wa̧nö te'ada̧lo̧. Jobekwödanö ite'ada̧lokobe jweinö omukwatö̧kö̧ma. Jo̧ba jweinö omukwatö̧kö̧ma okobe jwiinö ujuna̧li̧ma, iteabi, kwakwawabi juluwanö 'dö̧ibajökwe.

Proverbios 3:33

Ja̧danö, ju'wibi yötawakwö chitji̧: Isabenö Jo̧ma sulabenö omukwatö jo̧nöbi, jo̧ba ömöledönöbi, lȩtebocha, jö̧ba̧lö, yöbawö juno̧. Jo̧kwaijayonö Isabenö Jo̧ma jelo̧nö, iteda wei̧ a̧ja̧kwö jo̧nöma jwiinö ösödo̧. Ja̧danö, jo̧ba ömöledönöbi ösödo̧ Isabenö Jo̧ma, Pjatatocha, jö̧ba̧lö.