Proverbios 10:6 - Dios Iwene

⁶ Ja̧danö ju'wibi yötawa: Diosma otiwanö pjaatakwo̧ iteda wei̧ a̧ja̧kwö ju̧kwadönöma. Ja̧danö ju'wibi yötawa: Sulabenö omukwatö yöba̧ladöma tjo̧majadenö tjo̧mukwati̧ waapjima i̧seböködö. Jojodönö yöba̧lö, sulabenö tjo̧mukwatijayonö omönada jojodönö yötja̧lenama ösödö yöba̧ladö. Jao, sulabenö tjo̧mukwatijayonö ösödö yöba̧ladö, tjo̧'wo̧nö tjo̧mukwati̧ sulabenö ja̧tjakwa̧ jawa tjöwaisachibapji jö̧ba̧lö.

Proverbios 10:6 ပူးပေါင်းရင်းမြစ်များ

Diosnö ösödo̧ Job mikwo̧ usula emawina jawa 29:13

Jejenö otiwanö pjatatiawö̧, ö'wö batjibo jö̧ba̧ladöma otiwanö yötja̧linobe ötjönö, –Otiwanö pjabato̧ Jobma, –jö̧ba̧lö, ja̧danö otiwanö pjatatiawö̧, tjilekwamu wobekwinadö ya̧döma, tjo̧'wo ösöwachibanö lo̧tjinobe.

Proverbios 10:11

Ja̧danö, ju'wibi yötawa: Dios wei̧ a̧ja̧kwo̧ yöawi̧ma yöawökwenö pjaatakobe otiwanö ö̧jobö. Wanedö yötawa: Dios wei̧ a̧ja̧kwo̧ yöawi̧ma ojwese'do su̧'bȩ babibö welache'dotjö tjowi̧danö wanekwachobe. Ja'dotjö ojwiyo welachojobuma pjaatobe jojodönöma, ojwiyo o̧ti̧lö̧jökönö tjö̧jobö. Ja̧ ji̧danö, Dios wei̧ a̧ja̧kwo̧ yöawi̧tjö ja̧akwawa jawa welachobe, yöawökwema otiwanö ö̧jobö. Isabenö, Dios wei̧ a̧ja̧kwo̧ yöawi̧ma jwiinö mikwawobe, ja̧kwawa jawa yöawobetjö̧. Jobekwö mikwawokobe sulabenö omukwato̧ yöawi̧ma. Jo̧bama, o̧'wo̧ sulinö edö omukwati̧ma öwawökönö omönada yöba̧lo̧ jojodö tjöwaisachibapji sulabenö omukwati̧ma. Isabenö, jo̧ba yöawi̧ma mikwawokobe.

Proverbios 10:5

Ja̧danö, ju'wibi yötawa: Isabenö, dösökwo̧ma ö'wöyawakwawönö jo̧. Jo̧bama o̧ba baibena batjonö tju̧junina ajayinö wa̧ji̧ma te'ada̧lökönö 'wibebö 'yo̧. Jo̧bekwödanöbo̧maökö 'du̧wekwo̧ma. 'Du̧wekwo̧ma wa̧ji̧ 'wiebobö ji̧jayonö otidökönö, ejunö aba̧löda aba̧lo̧. Isabenö, jo̧banöma, 'du̧wekwo̧, otidö̧kö̧, jö̧ba̧lö, taba̧löjinöda tjedakwo̧ jojodöma.

Proverbios 11:26

Ja̧danö, ju'wibi yötawa, wanedö: Bakwo̧ iteda öbatjonö waji̧ mikwanö iyo̧ma ö̧jobe. Ja̧danö, öbatjotjö ajayi waji̧ma iyökönö junö te'ada̧lo̧, ina ileseobe, balada nöinö mikwawenada chiyobö chite'ada̧la, jö̧ba̧lö. Jobekwö iyökönö ite'ada̧lobetjö̧ jojodöma jwiinö tjöpöjödobe, sulabenö omukwato̧, jö̧ba̧lö. Jobekwö tjo̧mukwatokobe jojodöma jelo̧ ile seijayonö iyo̧nöma. Jo̧bama öbatjonö wa̧ji̧ma ile seijayonö jojodö a̧wi̧chi̧ lö̧ji̧tjö tjö̧jibobö iyö pjabato̧. Jo̧banö nöinö tjösödobe, otiwanö omukwatö pjabato̧, jö̧ba̧lö.

Proverbios 24:25

Jo̧kwaijayonö lȩekwa yöbawo̧ma sulabenö ja̧binanö jweinö yöawitjö̧ma, bitema sulabenö ja̧inobetjö̧ lȩtebocha, jö̧ba̧lö jo̧ba leekwa yöbawo̧ma otiwanö ö̧jakwo̧. Ja̧danö, Diosma otiwanö edö pjaatakwo̧ jo̧ba lȩekwa yöbawo̧nöma, jweinö yöawobetjö̧.

Proverbios 28:20

Ja̧danö, ju'wibi yötawa: Ba̧kwȩlö̧jatebö yöbawö ujuninadanö badekwachinö i̧sebo̧nö Diosma pjaatakwo̧. Jo̧kwaijayonö Diosma pjaatokobe balada juluwanö emotö jö̧ba̧lö isakwo̧nöma. Diosma balada juluwanö emotö jö̧ba̧lö isakwo̧nöma isabenö lȩebakwo̧.

Proverbios 3:33

Ja̧danö, ju'wibi yötawakwö chitji̧: Isabenö Jo̧ma sulabenö omukwatö jo̧nöbi, jo̧ba ömöledönöbi, lȩtebocha, jö̧ba̧lö, yöbawö juno̧. Jo̧kwaijayonö Isabenö Jo̧ma jelo̧nö, iteda wei̧ a̧ja̧kwö jo̧nöma jwiinö ösödo̧. Ja̧danö, jo̧ba ömöledönöbi ösödo̧ Isabenö Jo̧ma, Pjatatocha, jö̧ba̧lö.

Isaías 3:10

Dios wei̧ a̧ja̧kwö ja̧dönö yökawaduwo, —Kwö̧jaduwi̧ma, isabenö otiwanö kwö̧jaduwakwedöja, —jö̧ba̧lö. Jau, jobadöma otiwanö Dios wei̧ a̧ja̧kwö tjö̧jobetjö̧, a̧ja̧kwö tjö̧ji̧ mikwa isabenö otiwanö tjemakwedö, tjo'wo ösöwachibanö.

Romanos 3:19

Jau chömöledö, döwaisa, Diosma Moisésnö weinobe, iwȩyudobö, jojodö ja̧bö tjö̧jo jö̧ba̧lö wei̧ma. Ja̧danö, ja̧ weinama, Israel jojodönö weinobe, okobe jwiinö ja̧bö tjö̧jo jö̧ba̧lö. Jo̧kwaijayonö, okobe jwiinö ja̧bö tjö̧jo jö̧tja̧lijayonö, ja̧tjinokobe, yelösöda waekwinobe. Jau chömöledö, böjȩ jojodöma okobe jwiinö Dios weina ja̧bö jö̧ködö, bakwo̧bi deobe ja'yubebi junibökönö ja̧bo̧ma. Jau chömöledö, bakwo̧bi deobe, okobe jwiinö Dios weina waekwökönö ja̧bo̧ma. Ja̧danö, Dios weina Moisés iwȩyudinama suli̧ jwibadö badiboböma pjaatokobe chömöledö, okobe jwiinö ja̧bö dö̧jokobetjö̧. Jau chömöledö, Moisés iwȩyudinama sule sulabe dujuna̧li̧ weneda yöawobe. Ja̧danö, Dios lȩebenama, okobe deinö ökwödö böjȩ jojodöma atadakwawa jwidakwedösa, lȩkeboko yöda̧lo jö̧ba̧lö.

Deuteronomio 28:2

Kwuluwo̧duwi Isabenö Jo̧ Dios wei̧ a̧ja̧kwö kwö̧jaduwitjö̧ma, baikwö yötawaduwakwö ökwödönö pjaatakwa̧ma chömöledö: