Ja̧danö, ju'wibi yötawa: Jojodönö lȩlö̧jinö edö pjabato̧ma itedada pjaatakwo̧. Jao, jojodöma balekwa mikwa jo̧banö lȩlö̧jinö edö pjatjatakobetjö̧, itedada pjaatakwo̧ jojodönö lȩlö̧jinö edö pjabato̧nöma. Jobekwö baledokobe jojodönö lȩ lö̧jökönö edo̧nöma. Jo̧ba lȩ lö̧jökönö edo̧ma itedada wene jwöekwakwo̧, jojodöma balekwa mikwa lȩ lö̧jökönö tjedakobetjö̧ jo̧banöma.
Mateo 25:34 - Dios Iwene34 Ikenama ötjö la'aka luwo̧ma, chöwaisobekwöchobe ju̧kwadönö yötawocha: Ökwödöma kwo̧'wo̧ ösöwanö Chabe'do pjaatawö̧ja. Ina böjȩ otidapji, Dios la'aka luwo̧ ö̧jakwa̧ otidö ujuninobe, ökwödö jobe kwö̧jaduwobö, jo̧kwajabetjö̧ babema ichö tebachaduwi. အခန်းကိုကြည့်ပါ။ |
Mateo 25:34
68 ပူးပေါင်းရင်းမြစ်များ
Jobekwö edö, jwiinö yetaibijatö, ja̧danö yöta̧lijatö, —Ayö, ötjöwe, isabenö debö chi̧'yakwo̧sa, ötjö sulabo̧ma chöbajalenö inesö la'aka luwo̧ Okobe Jwiinö Juluwo̧ Isabenö Jo̧ Diosnö chedajobetjö̧. Jau, sulabenö yöba̧lo̧chobetjö̧, cha̧jȩ yȩökwesa, ja̧danö chömöledö israel jojodö tja̧jȩ yȩbadö tjö̧'da̧de jo̧sa, ötjöwe, isabenö debö chi̧'yakwo̧sa, —jö̧ba̧lö yebabinö yöta̧lijatö.
Isabenö inesö la'aka duluwo̧ ö̧jakwo̧ jo̧ba jitji̧ma, ajayitjö bajalekwönönö, ujulu nöamachibanö ba̧kwelöjatebö 'dö̧bibajökönö webö ö̧jakwo̧. Ja̧danö webö ö̧jobetjö̧ 'dö̧bibajökönö ba̧kwelöjatebö wene jwiinö dö̧jakwedösa. Jo̧bama Davidmine iteaka inesö la'aka luwo̧ ö̧binakanö öbamatakwo̧, jadanö David webö ö̧jinemi webö ö̧jakwo̧. Jau, David webö ö̧jinemima yemidanö ditebo baibanö 'diinö 'dö̧bibajökönö ujunakobe, la'akatjöda 'dö̧ibajökö ditebo baibanö, ja̧danö babe jamatö, ba̧kwelöjatebö 'dö̧ibajökönö baibanö, jweinö jwebebö, Dios wei̧danö webö ö̧jakwo̧. Jau, ökwö Okobe Jwiinö Juluwo̧ Isabenö Jo̧ Diosma jobekwö ö̧jobö kwösödobetjö̧, jobekwö baledakobe, jo̧kwajabetjö̧ kwömöledö israel jojodöma kwöba a'otjö tjo̧'wo ösöwachibanö tju̧ju̧kwobe, jö̧balö yöta̧la, tupakwö otiwanö tjö̧jakwa̧ jawama.
Baikwö kwöwaisobö jo̧be Daniel, la'aka luwo̧ma yemidanö Jerusalén comunidad tjotidobö weakobe, ja̧danö ja̧ weaja̧ ikena, cuarenta y nueve o̧biya baledakobe, otidö katjatenanö baibanö. Jerusalén comunidadnö yemidanö mana tjotidakobe, ja̧danö comunidad söpödö sobö ojwe tjönakobe, tjöpöjojodö ichibö tjujuluwapji jö̧ba̧lö. Jejenö otidajadö, cuatrociento treinta cuatro o̧biya baledibanö comunidad söbebö lotjökakobe, jo̧kwaijayonö söbebö lötjököjayonö, ina nöinö wene baledakobe. Ja̧danö ja̧ cuarenta y nueve o̧biakwö, cuatrociento treinta y cuatro o̧biakwö baledibajenama, la'aka luwo̧ Dios weakwo̧ jö̧a̧linökwema ichibakobe.
Ja̧danö, ötjönö tjösödobetjö̧ tjeju junibadö, ja̧danö tjöjawujudö ya̧dönöbi, tjö̧ja̧wo̧dö ömadönöbi, tjabe'donöbi, tjojo'donöbi, tji̧tji̧munöbi yöne tjömöledönöbi junibadö, ja̧danö tjöbatjiju junibadöma, ötjönö ösödö tjujunibobetjö̧ isabenö tjujunibinatjö yelösöda bajalekwönönö balekwa iyakwo̧ Diosma, ja̧danö ju'wibi ba̧kwȩlö̧jatebö ja̧kwawa jobadönö iyakwo̧.
Jesúsma jobadönö yöawinobe: —Isabenö usula chemawi̧danö usula kwemawaduwakwedöja chömöledö, jo̧kwaijayonö chöwaisobekwö, ja̧danö wajwitobekwö chipjeanö tjö̧bakwedönöma omudawö junö̧kö̧sa ötjöma. Chabe'doda ja̧ omudawö juno̧ma, ja̧danö jo̧bada omudawö ujunawö̧da jobe tjöbamatakwedö— jö̧ba̧lö atadinobe.
Jo̧kwajabetjö̧, tjiwȩyudina jawatjö bakwöta jawabi jelo̧, Aaa, mikwawökö ji̧ jö̧ba̧lö ujunibitjö̧ma, ja̧danö ju'wedöbi tjujunibobö öba̧ja̧ditjö̧ma, Dios la'aka luwo̧ ö̧jakwa̧ jojodötjö baikwönönö bo̧, jö̧ba̧lö ötjabikobe jo̧banö. Jo̧kwaijayonö bakwo̧ tjiwȩyudina jawa ja̧itjö̧ma, ja̧danö ja̧ jawa jweinö öba̧ja̧ditjö̧ma, Dios yöbawö ö̧jena jojodötjö bajalekwönönö bo̧, jö̧ba̧lö ötjabikobe.
Jejenö jo̧be, jo̧kwajabetjö̧ ökwödö cha̧jwi̧mu chite'ada̧lawö̧ o̧bȩja̧dödanöbedönö baikwö yöta̧la: Yekabiduwa, Kwabe'doduwi Diosma otiwanö ökwödönö iyobö ösödobetjö̧. Jau chömöledö, Kwabe'doduwima isabenö otiwanö ökwödönö iyobö ösödo̧, ja̧danö jejenö iyobö ösödobetjö̧ iteda la'aka luwo̧ ö̧jenabi ökwödönö iyakobe. Jo̧kwajabetjö̧, jwidena jö̧ba̧lö yekabiduwobö jwiobe yelösöda chömöledö, Diosma isabenö otiwanö ökwödönö te'ada̧lö iyakwo̧, jö̧ba̧lö.
Ja̧danö, ju'wibi jo̧be chömöledö. Dios i̧tji̧mudobetjö̧, Diosma iteda i̧tji̧munö otiwa jawa iyakwa̧ma, ökwödönö ja̧ jawa iyakobe chömöledö. Ja̧danö, otiwa jawa Jesúsnö iyi̧tjöbi, ja̧danö ökwödönöbi iyakobe chömöledö, Jesúskwö bakobe dö̧jobetjö̧. Jau chömöledö, ina böjȩnö ja̧nö, Cristo usula emawinadanö, bakwainö usula emawadösa. Ja̧danö, tupakwö, mölejȩbe ja̧nö, Dabe'do Dios jo̧banö otiwa jawa iyakwa̧bi bakwainö ökwödönöbi iyakobe chömöledö.
Jo̧kwaijayonö, wajwitjinajayonö, Diosma isabenö otiwa jawa ökwödönö iyobö omukwatobe Dios iwene laebi̧danö. Baikwö laebobe Dios iwene: Diosma inesö otiwa jawa otidinobe jo̧banö ösödadönö iyobö. Jojodöma jejenöjaye otiwa jawama la'akatjöda edöködö, ja̧danö la'akatjöda a̧ja̧kwöködö, ja̧danö la'akatjöda tjomajadenö omukwatöködö, tjomukwati̧tjö bajalekwönönö otiwobetjö̧. jö̧ba̧lö laebobe.
ja̧danö tjo̧'wo̧ sulinö edawabi, ja̧danö 'dukwachinö owa̧lakwawabi, ja̧danö 'dukwachinö ja̧nö sulabenö alewakwawabi. Ja̧ jawama böjȩ jojodö sulabenö tjösödi̧danö ja̧awa chömöledö, ja̧danö belö ökwödönö lȩbebö yötawinadanö yemidanö yötawaduwakwö, jejenö ja̧badöma Dios webö ö̧jobe tjo̧'wo̧ ösöwanöma tjö̧jökakwedö.
Babema öwaitjöda yötawa chömöledö. Bakwo̧ ilekwobökujukwö jo̧bi, bakwuju jilekwebö̧kö̧kwö ju̧jubi, ju'wi jwiinö taba̧lö̧ji jawa ja̧badöbi Dios Cristokwö webö tjö̧jobekwöma yelösöda tetjachökakwedö. Ja̧danö, bakwo̧, böjȩ jawada ösödanö edö, Diosnö omukwatökönö böjȩ jawada ösödö edo̧ma Dios Cristokwö webö tjö̧jobekwö teachökakwo̧.
Ja̧danö, jejenö ja̧bö chö̧jiökwe, chuunö chubutjawakwaka, sulabe jwibadö tjubutjawakama, ida̧ökö mölejȩbe te'ada̧lö jo̧be, 'dö̧ibaji̧ möle Duluwo̧ chuunö öwanenanö kabatö. Jau Timoteo, Duluwo̧da sulabe jwibo̧ inesö lȩekwa luwo̧ma, ja̧danö ja̧ mölema, Duluwo̧ma ja̧ka inesö otiwaka ötjönö iyö öwanakobe. Jo̧kwaijayonö sule ötjönödamaökö, okobe deinö Duluwo̧ ichakwa̧ ösödö te'ada̧ladönöbi iyakobe ja̧ mölema.
Jejenö weinokobe jobadö isapjobedönöma Dios ömöayedödatjobetjö̧. Jobadöma Dios ömöayedö ja̧nö, jojodönö pjatjatobö Dios weawö̧. Isabenö, ángelesdöma jojodönö pjatjatobö weawö̧, Dios mikwa jwiinö tjö̧jibinö pjaati̧tjö tjemakwedönöma. Isabenö chömöledö, ángelesdöma Dios ömöayedöda, jojodönö pjatjatobö weawö̧. Jo̧kwaobetjö̧ chömöledö, döwaisachibanö wajuwanö i̧sebobe, Dios Itji̧ma ángelesdönötjöbi o̧penönö jwiinö inesö jo̧, jö̧ba̧lö.
Tjeachakwawa öpöjödö, jwaikwöda 'ya̧nö böjȩnö tjitebotjö o̧penönö otiwemi omukwatö tjite'ada̧linobe, tjitebo baibakwemi. Mölejȩbe Dioskwö tjö̧ji̧ tjitebo baibakwemima tjo̧'wo̧ ösöwanö ja̧nö omukwatö tjite'ada̧linobe. Jejenö omukwatö tjite'ada̧liökwe Diosma jwiinö o̧'wo̧ ösöwanö ö̧jinobe. Ja̧danö, o̧'wo̧ ösöwi̧ i̧sebö jobadö mölejȩbe tjitebo otidinobe, iteda ö̧jobe tjö̧jobö.
Jo̧kwaijayonö ökwödö, Dios yöawi̧ ösödadöma, Jweinö yöbawo̧, jö̧ba̧lö, jo̧bakwö do̧'wo̧ luwo̧ okwanö ö'wachö bamatadösa. Jo̧kwaijayonö da'dödöminema Dios yöawi̧ tjöpöjödiökwe Diosma jwiinö ölabinobe jobadönöma. Jo̧kwaobetjö̧ jobadönö yöawinobe, Bidöma tjo̧'wo̧ luwo̧ okwanö ö'wachö tjöbamatökakwedö, jö̧ba̧lö. Chömöledö, baikwö laebobe Dios iwenetjö, Dios iteda yöawi̧ öpöjödadönö yöawinama: Ja̧danö, jwiinö chölabobetjö̧ jobadönö isabenö baledakwa̧ yöbawö lȩtebijatö, Isabenö ökwödöma kwiteboduwinö tekachaduwökakobe, otiwemi chiyemima, jö̧ba̧lö. Ja̧danö, yöbawö lȩtebijatö, Ötjökwö kwo̧'wo̧ luwo̧duwi kwanö ö'wachö kwöbamataduwökakobe, jö̧ba̧lö. Jejenö laebobe Dios iwenetjö, Bidöma tjo̧'wo̧ luwo̧ okwanö ötjökwö ö'wachö tjöbamatökakwedö, jö̧ba̧lö. Isabenö chömöledö, Diosma ajayitjöda jojodö jo̧bakwö tjo̧'wo̧ luwo̧nö ö'wachö tjöbamatobö ösödinobe. Ja̧danö jo̧ba otidawatjö, böjȩbi, mölejȩbi okobe jwiinö kaatakwawi̧ möletjö jemi tupakwöbi jojodö jo̧bakwö ö'wachö tjöbamatobö ösödinobe. Jejenö ösödö böjȩ otidinobe. Ja̧danö döwaisa chömöledö. Diosma iteda otidawatjö kaatakwawinobe, Dios iwene jejenö yöawobetjö̧. Baikwö laebobe Dios iwenetjö: Jelemutjö dötölataja mölema ida̧ökö otidijökötö Diosma, iteda otidawatjö okobe jwiinö kaatakwawobetjö̧. Ja̧danö, iteda otidawatjö okobe jwiinö kabatakwawajo̧ ö'wachö bamatijetö Diosma. Jejenö laebobe Dios iwenetjö. Chömöledö, ja̧ möletjö baikwö ichibö Diosma ösödobe jo̧banö ösödadö jo̧bakwö ö'wachö tjöbamatobö. Jojodö Dioskwö tjo̧'wo̧ luwo̧nö ö'wachö bamatö tjö̧jemima la'akatjöda ji̧nobe. Isabenö chömöledö, Diosma ajayitjöda jejenö ösödinajayonö da'dödöminema Dios yöawi̧ tjöpöjödobetjö̧ Dioskwö ö'wachö tjöbamatinokobe.
Isabenö chömöledö, Cristoma yemidanöbi, yemidanö ökwösobu o̧ba bakwabakwena ebawö woobö ji̧tjö̧ma, yelösöda, böjȩ otidina möletjö babe baibanö usula emawobö jȩna. Jo̧kwaijayonö yemidanöbi yemidanöbi usula emawökönö Cristoma bakwötanöda böjȩkwö ichinobe, Dios ajayinö yöbawö ujunina 'dö̧ibaji̧ mölema. Ja̧danö, böjȩkwö ichinobe woobö, iteda ökwösobu ebawö, iteda bakwötanöda iyawö dusuli̧ söbebö loobö.
Chö̧ja̧wo̧dö chösödawö̧, a̧ja̧kwaduwitjö. Böjȩnö ju̧kwadöma usulasedönö edö, Bidöma mikwawöködö, jö̧ba̧lö, tjomukwatobe. Jo̧kwaijayonö Diosma jobadönö edö, Jwiinö mikwawadö, jö̧ba̧lö, edobe. Diosma jobadö jwibadönö omudawö ujuninobe jwiinö juna̧ladöda batjibobö, tjo̧'wo̧ luwo̧ jawa, Jesucristonö tjo̧'wo̧ tjöwana̧lobetjö̧. Ja̧danö, Diosma jobadönö omudawö ujuninobe ju'wi möle jo̧bakwö webö tjö̧jobö, iteda La'aka Luwo̧ webö ö̧jobe ja̧nö. Jau chö̧ja̧wo̧dö, usulasedönöbi jejenö tjö̧jobö omudawö ujuninobe Diosma okobe deinö jo̧banö ösödadö tjö̧jakwa̧ma.
Jau chömöledö, isabenö jö̧a̧li̧danö ja̧akwo̧ jö̧ba̧lö Jesúsnö kwösödaduwobetjö̧, kwo̧'wo̧ luwo̧duwima isabenö ji̧binobe, Dios iyi̧ emadö bakibaduwanö. Jau chömöledö, 'dö̧ibaji̧ mölema Dabe'do Diosma isabenö otiwanö ökwödönö pjaatakobe, ja̧danö ja̧ wene omukwatö, babe usula kwemawaduwijayonö, kwo̧'wo̧ ösöwanö ja̧nö, Dabe'do Diosnö kwösödaduwobe.
Ju'wedö ökwödönö sulabenö ja̧tjenama, balekwa mikwa sulabenöma ja̧köbaduwoko, ja̧danö ökwödönö sulabenö yötja̧lenama, balekwa mikwa jobadönö sulabenöma kwatadaduwoko. Jau chömöledö, jobadönö balekwa mikwa sulabenöma ja̧bökönö, Diosnö akebaduwo, jobadönö pjaatobö. Jau chömöledö, Diosma ökwödönö jwöinobe, okwödönö dösölö̧jinö pjaatobö, ja̧danö Dios ökwödönö jejenö pjaatobetjö̧, ja̧ omukwatö ju'wedönö pjabatö Diosnö akebaduwobö jo̧be.
Ja̧danö, ba̧jekwadö, böjȩ bakwameachibanö ju̧kwadöma jo̧banö ösödadö, ojwe okwatjö labebajo̧nöma. Jo̧kwaijayonö ju'wedöma, ba̧kwȩlö̧jatebö ja̧kwawa'yenö tjimi wȩyukwadöma jo̧banö jwiinö öpöjödadönö chedijatö. Jobadöma, böjȩ ina jwiayi, tjimi wȩyukwinawö̧ kwialu'yenö, Obeja Itji̧danö Jo̧, ösötenö bȩtjinökwe u̧kwa kwialu'yenö, ba̧kwȩlö̧jatebö ja̧kwawa wȩyukwa'yenöma.
Jo̧ba isuju jö̧wökwe, 'yaba̧lajo̧ma ida̧ökö ö'wö baibajabe. Jo̧kwaijayonö ju'winö yemidanö 'yabibajö, laju möajutjö laebakwo̧. Yelösöda, lajutjö laebenama böjȩnö ju̧kwadö, ba̧kwȩlö̧jatebö ja̧kwawa'ye tjimibiya iwȩyudinököwö̧ma, ¡Ayö ¿dakwö baibajö? Wobinama yemidanö tjeachajabe, jö̧ba̧lö, tjedakwedö, tjöbajale jalakanö baibanö. Ja̧danö, yemidanö tjebachajo̧ma, lajutjö labeibö jelobe i̧'yakwo̧. Jobetjö bakwo̧ma jo̧ba sulabo̧nö kwabö loakobe, yemidanö 'yaibajökönö— jejenö yöawijatö ángelma ötjönöma.
Dios ömöledö babibinadönöma bakwaso batjibanö ja̧binaja, bakwainö Dioskwö ja̧nö, iteda wei̧ ja̧badö batjibanö. Jobadönöma Diostjö jojodötjö ö'weje pjabatadödanö batjibanö ja̧binaja, bakwainö Dioskwö, iteda wei̧ ja̧badö batjibanö. Ju'winö böjȩnö ja̧nö, jojodö tjuluwedö batjibanö ja̧köbakwo̧ja, jö̧ba̧lö lo̧tjijatö tjöbajalebiya a̧tja̧bayedöda ju̧kwawö̧ma, damö la'aka luwedökwö Obeja Itji̧danö Jo̧nö ösödö.
ကြော်ငြာတွေ