Marcos 9:12 - Dios Iwene

^12-13 Jejenö abebö tja̧ja̧kwökwe Jesúsma jö̧ba̧lijetö: —Jau, jweinö yötjawobe, Elíasma abönö ichakwo̧, jö̧ba̧lö. Jo̧bama Dios jojodö tjö̧jibinö pjaatobö weakwo̧ ichakwa̧ abönö ichakwo̧. Jojodöma Dios weakwo̧nö otiwanö tjite'ada̧lobö abönö ichakwo̧—jö̧ba̧lijetö— ¿Wajwiköbaduwiji̧? Isabenö bakwo̧ma, Elías ichö ö̧ji̧danö ida̧ökö ichinobe. Ju'wedöma jo̧banö öpöjödö, idöda sulabenö omukwatö yelösöda inia tjöinö ja̧tjinobe jo̧banöma, Dios iwene yöawi̧danö— jö̧ba̧lijetö Jesúsma, ajayinö Juan Ojwenö Bu̧dato̧nöda yöba̧lö. Ida̧ökö, Elías ichö ö̧ji̧danö ichinobe Juanma, jö̧ba̧lö, jö̧ba̧lijetö Jesúsma. Ina jö̧ba̧lijetö: —Ja̧danö, ju'wibi yöawobe Dios iwenema. Ju'wedöma jelo̧nöbi öpöjödö sulabenö omukwatö yelösöda inia tjöinö ja̧tjakobe. ¿Dakwö yöawobeda Dios iwenema ötjönöma, jojo baibanö jeminökwenöma? Baikwö yöawobe: Ötjönö, jojo baibanö jeminökwenöma öpöjödö, Itema usulaso̧, mikwawö̧kö̧, jö̧ba̧lö, inia tjöinö ja̧tjakobe, Dios iwene yöawi̧ badekwachinö— jö̧ba̧lö yöbawijetö.

Marcos 9:12 ပူးပေါင်းရင်းမြစ်များ

Isaías 49:7

Isabenö Jo̧, Israel jojodönö tjöbeba̧lö pjabato̧, tjösödökwe suli̧ jwibo̧ma, baikwö yöa̧lobe tjitebotenia jojodö tjöpöjödökwe, ajayinö mikwawö̧kö̧ jö̧ba̧lö tjomukwatökwe la'aka luwedö tjö̧möayo̧nö: Ötjö ba̧kwelöjatebö yötawi̧danö ja̧bö jo̧ Isabenö Jo̧, Israel jojodö tjösödökwe Suli̧ Jwibo̧ Diosma ökwönö omudawö chujuninökweja, ötjöda chömöayo̧ bakibanö. Jo̧kwajabetjö̧, ju'winö inesö la'aka luwedöma ökwönö edö, kwöba a'o a̧la̧ibö tjöjamatakwedö, –Ökwöma mikwawo̧ja, –jö̧ba̧lö, ja̧danö ju'wedö luwedö kwöba a'o bȩbachibö tjö̧jakwedö, jö̧ba̧lö yöa̧lobe Diosma, iteda ömöayo̧nö.

Isaías 50:6

Ja̧danö öpöjödadö ötjönö kwakwatjenema, yayonö katatibijökötö, jwaikwöda Dios wei̧ a̧ja̧kwö ja̧nö, wainö chibeka kwakwatjobö chi̧sȩbijatö. Ja̧danö cha̧jȩsa'ye 'yetjobö jö̧tja̧lenama, öpöjödökönö cha̧jȩ chi̧sebijatö, wainö 'yetakobetjö̧. Ötjönö otjenabi, ötjönö sutjenabi, yayonö tabatjö chöbama ju̧kwawö̧kö̧sa.

Isaías 52:14

Jo̧kwaijayonö ajayinö jo̧banö tjedenama, tajijö jö̧ba̧lö, tjöbajale jalaka baibanö tjedinökwe. Jau, nöinö kwakwatjökwe, öbama jojo öbadanö ichejekwinokobe, ja̧danö jwiinö usula emawo̧ ö̧ji̧ edö, jo̧banö wajwitjo jö̧tja̧linena, —Bitema jojoso̧, —jö̧ba̧lö.

Mateo 16:21

Ja̧ möle jamatö, tupakwö bajalenö Jesúsma iteda öba̧ja̧di̧ waisachadönö jweinö yöawinobe: —Jerusalénbe chi̧'yobö jo̧be. Ja̧danö, jobetjö Israel jojodötjö damötjöbi, Diostjö jojodötjö ö'weje pjabatadö la'aka tjuluwedötjöbi, Moisés iwȩyudina ba̧ja̧dadötjöbi usula chemawobö ja̧kobe, ja̧danö ötjönö kwabö lotjobö ja̧kobe. Ja̧danö, jemi tupakwö wa̧pötakwa möle baledibajenama wobajaletjö tjetachajobö ja̧kobe— jö̧ba̧lö.

Mateo 26:24

Jau chömöledö, ötjö jojo baibanö jeminökwema, isabenö ö'wö batibobö jo̧be, Dios iwene damötjö tjiwȩyudina laebi̧danö. Jo̧kwaijayonö ötjönö iyö loakwo̧nö, isabenö labinö lȩebakwo̧ Diosma chömöledö, ojo'do jo̧banö la'akatjöda jeminökötjö̧ma, o̧penönö otiwo jö̧a̧linena, Dios lȩebi̧tjö emapji jö̧ba̧lö— yöawinobe Jesúsma.

Marcos 10:33

baikwö: —A̧ja̧kwaduwitjö. Jerusalénbe di̧'ya. Jobe dichibena ötjönö, jojo baibanö jeminökwenöma, jojodöma iyö lotjakobe jojodötjö Diostjö ö'weje pjabatadö tjuluwedönöbi, Moisés iwȩyudina ba̧ja̧dadönöbi. Ikenama, jobadöma ötjönö kwabö lotjobö webö, iyö lotjakobe la'aka luwedönö, judío jojodöböködönö.

Marcos 9:31

Iteda öba̧ja̧di̧ waisachadönöda öba̧ja̧dobetjö̧ jobe i̧'yobema ju'wedö tji̧'yo jö̧ba̧löma öpöjödijetö. Ja̧danö, baikwö yöbawijetö iteda öba̧ja̧di̧ waisachadönö: —Ju'winöma, ju'wedöma ötjönö, jojo baibanö jeminökwenö öpöjödadöma ju'wedönö iyö lotjakobe. Ikenama iyö lotjawö̧ma kwabö lotjakobe ötjönöma. Jo̧kwaijayonö kwabö lotjaja̧ ikena wa̧pötakwa möle baledibajena ötjöma, wobajo̧ma yadakwödanö tjetachajakobe— yöbawijetö Jesúsma iteda öba̧ja̧di̧ waisachadönö.

Lucas 1:76

Ja̧danö chitji̧ Juan, ökwönö okobe jwiinö juluwo̧ Dios yöawi̧ yöbawo̧ jö̧ba̧lö ötjabikwo̧ja, Duluwo̧ jweinö i̧'yakwa̧ otidö jo̧ba i̧'yakwa̧ abönö kwi̧'yakobetjö̧.

Lucas 23:11

Ja̧danö, Herodesbi, Herodes ömöayedö guardia jojodöbi Jesúsnö obö sulabenö ja̧tjinobe, ja̧danö Jesúsnö obö, otiwado̧ la'aka luwo̧ 'duawado̧ 'dutjatinobe Jesúsnö. Ikenama, obö 'dubatajadö, wetjinobe yemidanö Pilato öba a'o Jesúsnö tjujunobö.

Lucas 23:39

Ja̧danö jo̧bakwö la̧jadö sulabenö ja̧badötjö bakwo̧bi Jesúsnö obö sulabenö yöa̧linobe: —Ökwöma Dios weakwo̧ jö̧a̧linökweja, ¿jö̧tö? Jo̧kwajabetjö̧ Dios weakwo̧ jö̧a̧linökweköbobetjö̧, kwö̧jibinö ja̧bi, ja̧danö ökwödö kwipjeanö la̧jadönöbi dö̧jibinö ja̧bi— jö̧ba̧lö obö yöa̧linobe Jesúsnö.

Hechos 1:6

Ja̧danö, ju'wi möle, Jesús öba̧ja̧di̧ waisachadöma, ina Jesúsma böjȩnö ö̧jayi, jo̧bakwö ko̧ko̧kwachibö abebö a̧ja̧kwijadötö Jesúsnöma: —Duluwo̧ ¿Pjakatakwa̧ji̧ ökwödönöma, israel jojodönöma, romano jojodönö a'dewö lobö? ¿Ina? ¿Pjakatakwa̧ji̧ damötjö ökwödö da'dödömine tjuju̧kwinadanö, ökwödötjö bakwo̧, judío jojo wei̧da ja̧bö otiwanö duju̧kwobö, romano jojodö tjuluwo̧ wei̧maökö? ¿Tjo̧wi̧ pjakatakwa̧ji̧?— abebö a̧ja̧kwijadötö.

Hechos 4:11

Baikwö laebobe Dios iwenetjö, damötjö Dios yöawi̧ yöbawina iwȩyudina: Inawiyatjö o̧do otidadöma, biwama sulabawa, jö̧ba̧lö, lobijadötö. Jo̧kwaijayonö, öpöjödö lotjinawada otiwawa, la'aka junawawa baibijetö, jö̧ba̧lö laebobe.