Marcos 8:34 - Dios Iwene

³⁴ Ikenama Jesúsma jwöbijetö okobe deinö ichajadönöbi, iteda öba̧ja̧di̧ waisachadönöbi iteda ö̧jobekwö tjichobö. Ichajadönö jö̧ba̧lijetö: —Chömöledö baikwö wanedö yötawa: Bakwo̧ ötjö chöba̧ja̧di̧ waisacho̧ baibobö ösöditjö̧ma, iteda ösödi̧ jawa junibö, iteda woakwa'o towisa'o kabebö, ötjö chökömanö e'ewobö jo̧be, Aaa, wotapji jö̧ba̧lö chi̧'yökena, jö̧ba̧lö, omukwatökönö— yöbawijetö—.

Marcos 8:34 ပူးပေါင်းရင်းမြစ်များ

1 Reyes 14:8

David itji̧mu tupadanö jojodötjö 'dötebijatö, israel niji la'aka luwedö tjö̧jima, ja̧danö 'döbebajo̧, ökwönö chujunijatö, tjö̧jinemi ökwöda la'aka luwo̧ kwö̧jobö. Jo̧kwaijayonö, jejenö otiwanö ökwönö chiyinajayonö, chömöayo̧ Davidmine otiwanö ja̧bö ö̧ji̧nadanöma ja̧bö jö̧kö̧ja. Jau Jeroboan, Davidma weti̧ a̧ja̧kwö ö̧jinobe, ja̧danö jwaikwöda okobe jwiinö omajadenö ötjönö ösödö ja̧nö, jwaikwöda chösödi̧danö ja̧obö isakwinobe.

Mateo 10:38

Ja̧danö chömöledö, bakwo̧ towisa'o, iteda woakwa'o kabeibö, ötjö chökömanö ichobö öpöjöditjö̧ma, chöba̧ja̧di̧ waisacho̧ ö̧joböma mikwawö̧kö̧, isabenö chöba̧ja̧di̧ waisachadö woawa yetjabobö jwiobetjö̧.

Mateo 16:24

Ikenama Jesúsma iteda öba̧ja̧di̧ waisachadönö yöawinobe: —Chömöledö, baikwö wanedö yötawa: Bakwo̧ ötjö chöba̧ja̧di̧ waisacho̧ baibobö ösöditjö̧ma, iteda ösödi̧ jawa junibö, iteda woakwa'o towisa'o kabebö, ötjö chökömanö ichobö jo̧be.

Mateo 27:32

Comunidadtjö latjebenama, jelo̧nö tjöbadekwajinobe, Cirene comunidad jojo Simón mikwo̧nö, ja̧danö jo̧banö wetjinobe towisa'o, Jesús ö̧lakwa'o e'ewobö.

Marcos 10:21

Jejenö jö̧a̧lökwe Jesúsma isabenö ile nibebijetö jo̧banöma. Jo̧banö edö jö̧ba̧lijetö: —Ökwöma, Okobe jwiinö ja̧bajibo̧sa jö̧ka̧lijayonö ina, yada bakwöta jawa ja̧bököja. A̧ja̧kwitjö. Kwu̧kwa tea okobe jwiinö kwujuna̧li̧ kwiyabija̧ mikwawama usulasedönö kwiyo. Jejenö kwiyobetjö̧ isabenö ju'winö mölejȩbe ja̧nö Diosma jwiinö otiwa jawa iyakwo̧ja. Usulasedönö kwiyo. Kwiyaja̧ ikena ötjökwö kwicho— jö̧ba̧lijetö Jesúsma jo̧banöma.

Marcos 7:14

Ikenama Jesúsma yemidanö jwöbijetö jojodönö iteda ö̧jobekwö tjichobö. Jwöawö̧ ichajadönö jö̧ba̧lijetö: —Ökwödö okobe deinö tjöbeba̧löjönö a̧ja̧kwaduwitjö. Wanedö yötawaduwinö:

Lucas 13:24

—Chömöledö, apjude ja'yuwadebenö tekachaduwobö jwaikwöda kwisakwaduwo, jade utumatakwa̧ abönö. Jau chömöledö, ba̧jekwadö tetjachobö tjisakwakobe, jo̧kwaijayonö tetjachoböma jwiakobe, utumatakwa̧ abönö ja'yuwadebenö tetjachokobetjö̧.

Lucas 14:33

Jau chömöledö, böjȩtjö abönö omukwatadöja, ja'öda kwöwaekwaduwapji jö̧ba̧lö, ja̧danö ötjö chöba̧ja̧di̧ waisachadö batjibobö omukwatadöbi jejenö jweinö omukwatönö tjomukwatobö jo̧be, isabenö chöba̧ja̧di̧ waisachadö batjibobö tjösödojobö jö̧ba̧lö. Ja̧danö, ötjö chöba̧ja̧di̧ waisachadöma wotjenanö kabatö jwaikwöda ötjönöda tjösödobö jo̧betjö̧, abönö otiwanö tjo̧mukwatobö jo̧be, isabenö chöba̧ja̧di̧ waisachadö batjibobö tjösödojobö tjöpöjödojobö jö̧ba̧lö. Ja̧danö, okobe jwiinö tjujuna̧li̧ mikwawökö ji̧ jö̧ba̧lö lödibö, chökömanö tjichobö tjöpöjöditjö̧ma, isabenö chöba̧ja̧di̧ waisachadö batjiboböma jwibadö— jö̧ba̧lö yöawinobe Jesúsma.

Lucas 18:22

Abebö a̧ja̧kwökwe, Jesúsma a̧ja̧kwö atadinobe: —Ina bakwöta jawa jwiobe ja̧köboböma. Okobe jwiinö kwitea iyö lobö, usula jojodönö kwiyabo, mölejȩbetjöda nöinö mikwawi̧ jawa kwujuna̧lakobetjö̧. Ja̧danö, iyö lobajo̧, ötjökwö ichi, chömöayo̧ bakibanö— jö̧ba̧lö atadinobe Jesúsma.

Lucas 20:45

Ja̧danö, jojodö tja̧ja̧kwa̧lonö, Jesúsma iteda öba̧ja̧di̧ waisachadönö yöawinobe:

Lucas 9:23

Jesúsma jojodönö yöawinobe: —Chömöledö, baikwö wanedö yötawa: Bakwo̧ ötjö chöba̧ja̧di̧ waisacho̧ baibobö ösöditjö̧ma, iteda ösödi̧ jawa junibö, iteda woakwa'o towisa'o kabebö, ötjö chökömanö e'ewobö jo̧be, Aaa, wotapji jö̧ba̧lö chi̧'yökena, jö̧ba̧lö omukwatökönö.

Juan 10:27

Ötjö cha̧jwi̧muma ötjö chiwene a̧ja̧kwö waisadö, ja̧danö, jobadönö chöwaisawö̧. Ja̧danö, jobadöma chökömanö ichadö.

Juan 19:17

Jejenö weawö̧ guardia jojodöma Jesúsnö öbibö tji̧'yinobe. Jesúsma jobe 'ya̧nö towisa'o e'ewinobe, itenöda bȩbö tjujunakwötema. Jöte e'ewö i̧'yinobe, mö'ösa'obe, hebreo tjiwenenö Gólgota mikwa'obe, tjuusöseba'o, jö̧ba̧lö.

Hechos 14:22

Jobe comunidadkwena 'ya̧nö Jesúsnö ösödadönö pjabatö yöbawijadötö, Kwo̧'wo̧ luwo̧duwi juluwachibanö tupakwö kwi̧'yaduwo, jö̧ba̧lö. Jesúsnö kabatibökönö kwö̧jaduwo. Ja̧danö, jo̧banö omukwatö kwö̧jaduwo, jö̧ba̧lö, pjabatö yöbawijadötö. Jobadönö jö̧ba̧lijadötö: —Chömöledö ¿wajwiköbaduwiji̧? Ökwödö Jesúsnö ösödadöma, usula demawobö jo̧be. Isabenö ökwödöma usula emawadösa. Ökwödöma Dios webö ö̧jena ja̧nö, do̧'wo̧ ösöwachibanö duju̧kwenanö baibanö, usula emawadösa— jö̧ba̧lijadötö.

Romanos 6:6

Tupakwö yötawaduwakwö chömöledö: Ökwödö do̧'wo̧ luwo̧ ajayi luwo̧ma woinobe, bakobe Cristokwö towisa'onö ja̧nö. Ja̧danö, ajayi luwo̧ do̧'wo̧ luwo̧ma woinobe, jemi tupakwö sulabe dujuna̧li̧ ökwödönö juluwökönö.

Romanos 8:17

Ja̧danö, ju'wibi jo̧be chömöledö. Dios i̧tji̧mudobetjö̧, Diosma iteda i̧tji̧munö otiwa jawa iyakwa̧ma, ökwödönö ja̧ jawa iyakobe chömöledö. Ja̧danö, otiwa jawa Jesúsnö iyi̧tjöbi, ja̧danö ökwödönöbi iyakobe chömöledö, Jesúskwö bakobe dö̧jobetjö̧. Jau chömöledö, ina böjȩnö ja̧nö, Cristo usula emawinadanö, bakwainö usula emawadösa. Ja̧danö, tupakwö, mölejȩbe ja̧nö, Dabe'do Dios jo̧banö otiwa jawa iyakwa̧bi bakwainö ökwödönöbi iyakobe chömöledö.

1 Corintios 15:31

Chömöledö, jwiinö chösödaduwakwö, ja̧danö bakobe Duluwo̧ Cristo Jesúskwö dötewinö duju̧kwobetjö̧, ökwödönö ösödö yötawobe, chömöledö Corintio jojodöma otiwadö jö̧ba̧lö. Kwöwaisaduwa chömöledö isabenö ökwödönö ösödö yötawobe chömöledö, ja̧danö ja̧ yötawaja̧ isabenö ji̧danö, ju'wi isabenö wene yötawaduwakwö chömöledö, Cristo jawa wene yöbawö chö̧jobetjö̧, kabatökönö woto jö̧ta̧lobe ichejekwa chömöledö.

1 Corintios 8:13

Jejenöobetjö̧, baikwö yötawaduwakwö chömöledö: Jejenö chu̧kwa kwakwawama chöjawo̧nö töbö meobö ja̧ena jö̧ba̧lö chomukwatitjö̧ma, ja'yubebi itebiya chukwökena wotenanö baibanö, chöjawo̧nö meobö ja̧tapji jö̧ba̧lö.

1 Corintios 9:19

Jau chömöledö, ötjöma ju'wedö tjömöayo̧bö̧kö̧sa ötjöma, ötjönö wetjo jö̧ba̧lö. Jo̧kwaijayonö, tjö̧möayo̧bö̧kö̧ chö̧jijayonö, okobe deinö tjömöayo̧danö batibanö ja̧tajabe chömöledö, ba̧jekwadönö tjö̧jibobö pjabatö.

Gálatas 2:20

Jau chömöledö, Cristokwö bakobe towisa'onö la̧nö wotinajayonö, 'yaba̧lo̧ chö̧jobe. Jo̧kwaijayonö, babe chö̧ji̧ma, ötjöma ida̧ökö wotinobetjö̧ babe chö̧ji̧ma ötjö chö̧ji̧maökö chömöledö, Cristo ö̧ji̧da. Ja̧danö, babe chiteba'onö chö̧ji̧ma, Dios itji̧nö ösödö, ötjönö ile nibebö midawö wobinanö ösödö chö̧jobe.

Gálatas 5:24

Baikwö yötawa chömöledö: Cristo Jesús ömöledöma ajayinö tjösödina kabatibö, tjiteba'o wame luwo̧nöbi, jo̧ba sulabenö ösödi̧bi, towisa'onö bȩtjinobe ichejekwa, ö'wöchinö ja̧bö.

Gálatas 6:14

Jo̧kwaijayonö ötjöma sule bakwöta jawada yöbawo̧sa, biya̧da otiwa, jö̧ba̧lö. Sule Duluwo̧ Jesucristo towisa'onö midawö woina weneda jejenö yöta̧lobe chömöledö, Biya̧ weneda jwiinö otiwa, jö̧ba̧lö. Ja̧danö, wanedö yötawa: Jesúsma towisa'onö midawö woinobetjö̧, ötjöma böjȩ jawa katatibinobedanö ichejekwa, ja̧danö balekwa mikwa böjȩ jawama ötjönö kaatibinobedanö ichejekwa.

Filipenses 3:10

Jwaikwöda Cristonö chöwaisobö chisakwobe chömöledö, ja̧danö jo̧ba ujulu chöwaisobö chisakwobe. Jau chömöledö, Cristoma isabenö juluwo̧obetjö̧, woawatjö tjeachajinobe, ¿jö̧tö? Ja̧ Cristo ujulu chöwaisobö chisakwobe. Jo̧kwajabetjö̧ chömöledö, wanedö yötawa: Jo̧bakwö bakobe usula chemawobö chisakwobe, ja̧danö jo̧ba woinama, jo̧bakwö bakobe batibobö chisakwobe, jo̧ba woawatjö tjeachajinadanö ötjöbi tjetachajobö.

Filipenses 3:7

Jau chömöledö, ajayinöma ja̧ jawa cho̧'wo̧ chöwana̧lijatö, ja̧tjö otiwo̧sa jö̧ba̧lö, jo̧kwaijayonö cho̧'wo̧ chöwana̧lokobe babema chömöledö. Babema Cristonöda chösödo jö̧ba̧lö, ja̧ jawa chöpöjöda, mikwawökö ji̧ jö̧ba̧lö.

Colosenses 1:24

Chömöledö, ökwödönö pjabatö usula chemawobe, ja̧danö jejenö ökwödönö pjabatö usula chemawobetjö̧, cho̧'wo̧ ösöwanö chö̧jobe. Jau chömöledö, ökwödö Cristo iteba'obedö usula demawobö jo̧be, ja̧danö Cristo iteba'obedö usula tjemawo jö̧tja̧li̧ma, ötjöma pjabatö usula emawö chö̧jobe.

Colosenses 3:5

Jo̧kwajabetjö̧, ajayinö kwösödinaduwa jawa kakatibaduwo chömöledö. Wanedö yötawa: Sulabenö kwösödaduwi̧bi, sulabenö ja̧köbaduwi̧bi kwabö loköbaduwo chömöledö. Jau chömöledö, kwi̧lȩkwa̧muböködökwö ja̧awabi, ja̧danö sulabenö alewakwawabi, ja̧danö sulabenö 'da̧'da̧akwawa kwösödaduwi̧bi, ja̧danö sulabe jawa kwösödaduwi̧bi, kakatibaduwo chömöledö. Ja̧danö ökwöda kwemotö jö̧ba̧lö ösödakwawabi kakatibaduwo chömöledö, ökwöda kwemotö jö̧ba̧lö ösödakwawama, o̧'wo̧ jawa ösödakwawi̧danö ichejekwobetjö̧.

2 Tesalonicenses 3:11

Jobekwö yötawa chömöledö, ökwödönö da̧ja̧kwobetjö̧, Tesalónica ju̧kwadö Jesúsnö ösödadötjö, ju'wedöma otidökönö ja̧nö, sule ju'wedönö weba̧lö sulabenö kwebacha̧lö tjö̧jobe.

Tito 2:12

Ja̧danö, ja̧ Dios mikwa jwiinö otiwa jawa iyi̧ma ökwödönö ba̧ja̧dobe Diosnö öpöjödö ja̧kwawama kadatibobö, ja̧danö böjȩ jojodö sulabe dösödi̧ jawa ja̧bökönö kabatibö ja̧dobö. Ja̧danö, tupakwö ba̧ja̧dobe ökwödönö, Dios mikwa jwiinö otiwa jawa iyi̧ma, obökönö dö̧jobö, ja̧danö sulabenö ja̧bökönö dö̧jobö, ja̧danö Diosnö ösödö dö̧jobö ina böjȩnö dö̧jayi.

Hebreos 13:13

Jo̧kwaobetjö̧ chömöledö, ajayinö domukwatina, Dios ajayi wei̧ da̧ja̧kwinama kadatakwawaduwo. Ja̧ domukwati̧ junibö kabatakwawö tupakwö di̧'yaduwo Jesúsnö do̧'wo̧ wana̧lö, jojodö tjö̧jemi tupakwö usula emawö wobinanö. Chömöledö, jwaikwöda di̧'yaduwo, do̧'wo̧ juluwachibanö jojodö ökwödönö öpöjödö otjenabi Jesúsnö dösödobetjö̧.

1 Pedro 4:1

Ja̧danö chömöledö, Cristoma mölejȩbe ȩwa̧jakwa̧ abönö iteba'otjö usula emawinobe, ¿jö̧tö? Jau chömöledö, jo̧bama usula emawinobe, jo̧kwaijayonö usula emawijayonö jwaikwöda otiwanö ja̧bö ö̧jinobe, ¿jö̧tö? Ja̧danö, jo̧ba jejenö usula emawö jwaikwöda otiwanö ja̧bö ö̧jinobetjö̧, ökwödö babe usula emawadöma jo̧ba omukwatinadanö domukwataduwo chömöledö. Wanedö yötawa: Jo̧ba omukwatinama 'dudawaduwo, jo̧ba otiwanö ja̧bö ö̧jinadanö ökwödöbi otiwanö ja̧bö dö̧jakobetjö̧. Jau chömöledö, ökwödö Cristonö dösödobetjö̧ usula emawadöma sulabenö ja̧bö dö̧jina ida̧ökö kabatibinadösa,

1 Pedro 4:13

Jau chömöledö, kwo̧'wo̧ tjo̧bekwökönö, kwo̧'wo̧ luwo̧ ösöwachibanö kwö̧jaduwobö jo̧be, Cristokwö bakobe usula emawadösa, jö̧ba̧lö. Jau chömöledö, jo̧bakwö bakobe usula emawadöja babema, tupakwö iteda ujulu öwawachibenama, kwo̧'wo̧ ösöwaduwachibanö kwö̧jaduwakobetjö̧.

2 Pedro 1:14

Chöwaisa chömöledö, ö'wö batibakwa̧ma yöneawachibobe ida̧ökö jö̧ba̧lö, Duluwo̧ Jesucristoma ötjönö jejenö i̧sebinobetjö̧.

1 Juan 3:16

Ja̧danö chö̧ja̧wo̧dö, dö̧ja̧wo̧dönö ile nibebö dö̧ji̧ma ¿dakwö ja̧bö dö̧jobeda? ¿Ti i̧sebinada döwaisachibanö, Ja̧da ile nibebö ja̧kwawa, jö̧ba̧lö? Jesúsda chö̧ja̧wo̧dö. Jesúsma ökwödönö ile nibebö, ökwödö diminö dusula dumusidi̧ midawö ö'wö baibinobe. Chö̧ja̧wo̧dö, ökwödöma Jesús ile nibebö ö̧jinadanö, okobe jwiinö iyö, ökwödöbi dö̧ja̧wo̧dönö pjabatö, ile nibebö dö̧jobö jo̧be, debö di̧'yitjö̧bi.

Apocalipsis 2:10

Yötawaduwakwö lekwokobetjö inia tjököbaduwinö baledakobe ökwödönöma. Jejenö baledi̧ma yekabiduwoko, chömöledö. Kwo̧'wo̧ 'dibachibö kwö̧jaduwo. A̧ja̧kwaduwitjö. Awetjama ökwödötjö ju'wedönö ka̧lena ba̧kwawejunö tjödobö weakobe, ötjönö kwo̧'wo̧ kwöwana̧laduwi̧ma kakatibaduwojobö edobö. Ja̧danö, jo̧bama inia tjököbaduwinö ja̧tjobö weakobe, ja'yubeda lekwe, domulataja möle baibanö. Ja̧danö, chömöledö, kabatibökönö kwo̧'wo̧ kwöwana̧laduwotjö, kwabö lotjobö jö̧tja̧lenabi. Yekabiduwoko chömöledö. Ö'wö bakibaduwaja̧ ikena, chöba a'o kwichibaduwena, ba̧kwȩlö̧jatebö ja̧kwawa chiyakwo̧sa, Otiwanö kwujuluwaduwajabe, jö̧ba̧lö.