Marcos 13:31 - Dios Iwene

³¹ Isabenö, mölejȩbi böjȩbi 'dö̧ibajijayonö ötjö chiwenema la'akatjöda 'dö̧ibajökakwa̧— jö̧ba̧lö yöbawijetö Jesúsma öba̧ja̧di̧ waisachadönö.

Marcos 13:31 ပူးပေါင်းရင်းမြစ်များ

2 Reyes 15:12

Ajayinö Zacarias a'dömine Jehu israel la'aka luwo̧ baibenama, Isabenö Jo̧ma Jehunö yöbawö ujuninobe, —Ökwö kwitji̧mu tupadanö jojodöbi luwedö tjö̧jobö wetakwo̧sa, kwitji̧bi, kwö̧'dö̧bi, kwö̧'dö itji̧bi, kwö̧'dö̧ ö̧'döbi inesö la'aka luwedö batjibanö, la'aka luwo̧ iteakanö tjöbamatobö chiyakwo̧sa, —jö̧ba̧lö yöbawö ujuninobe Isabenö Jo̧ma. Ja̧danö, Isabenö Jo̧ yöawi̧ badekwachinö, baledinobe.

Isaías 40:8

Jau, meje'yema kököbachibö suli̧ waekwobe, ja̧danö o̧bubiya otiwi̧ma 'kököbachö 'di̧bachö suli̧ jwöachobe, jo̧kwaijayonö dösödökwe Dios yöawi̧ma, la'akatjöda 'dö̧bibajö̧kö̧ ji̧, ba̧kwelöjatebö 'diinö ja̧kobe dösödökwe Dios yöawi̧ma.

Isaías 51:6

Möakwö mölejebe kwedaduwo chömöledö, ja̧danö nijakwö bö̧je kwedaduwo. Babe ji̧danöma, lekwema jö̧köjȩ chömöledö, baikwö yötawa: Imiyu'wo juluwanö debi baibidanö, juluwanö debi baibakobe mölejȩma, ja̧danö kamijido̧ damö waekwö, suli̧ waekwi̧danö, bö̧jȩ suli̧ waekwakobe. Bö̧jȩnö ju̧kwadöbi ja̧danö, okobe deinö damö waekwö debö batjibakwedö. Jo̧kwaijayonö jejenömaökö ötjö chö̧ji̧ma, ötjö tjö̧ji̧binö pjatati̧ma, ba̧kwelöjatebö ji̧ jawa chömöledö, ja̧danö otiwanö webö chö̧ji̧ma, la'akatjöda 'dö̧ibökakobe.

Mateo 24:35

Jau chömöledö, isabenö yötawi̧danö baledakobe. Baikwö yötawa: Böjȩbi, mölejȩbi isabenö 'dö̧ibajakobe, jo̧kwaijayonö ötjö yötawi̧ma ba̧kwȩlö̧jatebö ja̧kobe— jö̧ba̧lö yöawinobe Jesúsma.

Mateo 5:18

Isabenö yötawaduwakwö chömöledö, böjȩbi, mölejȩbi ina ja̧yi, ja̧ tjiwȩyudina jawatjö ja'yubebi söbebö lotjökakobe, okobe jwiinö tjiwȩyudinama badekwachenanö kabatö.

Marcos 13:30

Isabenö jö̧ta̧la ökwödönö. Babe ju̧kwadötjö ju'wedöma ina 'yatja̧layi ja̧ yötawaja̧ baledakobe.

Marcos 13:32

Jesúsma ina yöbawijetö: —Jau, yemidanö chichakobe jö̧ta̧lijayonö ötjö chichakwa̧ mölema jojodöma yelösöda wajwibadö. Ángelesdö, mölejȩbe ju̧kwadöbi wajwibadö. Ötjö, Dios Itji̧bi wajwibo̧sa, yemidanö chichakwa̧ma. Bakwo̧da, Chabe'do Diosda chichakwa̧ möle waiso̧ma.

Lucas 21:33

Jau chömöledö, isabenö yötawi̧danö baledakobe. Baikwö yötawa: Böjȩbi, mölejȩbi isabenö 'dö̧ibajakobe, jo̧kwaijayonö ötjö yötawi̧ma ba̧kwȩlö̧jatebö ja̧kobe— jö̧ba̧lö yöawinobe Jesúsma.

2 Timoteo 2:13

Ja̧danö, jö̧tja̧li̧danö ja̧böködöma, isabenö jö̧tja̧li̧danöma ja̧tjökakwedö, jo̧kwaijayonö Cristoma ba̧kwȩlö̧jatebö iteda jö̧a̧li̧danö ja̧bo̧, la'akatjöda jö̧a̧löködanöma ja̧bö̧kö̧. Jau Timoteo, Cristoma jö̧a̧löködanö ja̧oböma la'akatjöda jwibo̧, jo̧kwajabetjö̧ ba̧kwȩlö̧jatebö jö̧a̧li̧danö ja̧bo̧. Jejenö jo̧be Timoteo, jo̧kwajabetjö̧ usula kwemawijayonö, Jesucristo ömöayo̧ ja̧nö jo̧ba wei̧ ja̧bö kwö̧jo.

Tito 1:2

Ja̧danö, Dios omudawö ujuninawö̧nö chöba̧ja̧dobe, Diosnö tjo̧'wo̧ wana̧lö tjomukwatobö, Aaa, isabenö ökwödöma ba̧kwȩlö̧jatebö ja̧kwawa dujuna̧lakwedösa, Dios jö̧a̧li̧danö, jö̧ba̧lö tjomukwatobö. Ja̧ ba̧kwȩlö̧jatebö ja̧kwawa dujuna̧lakwa̧ wenema omöna yöba̧lö̧kö̧ Diosma yöbawö ujuninobe, ina böjȩ otidakwa̧ abönö.

Apocalipsis 20:11

Ja̧danö, chedijatö Diosnö, inesö ö̧baka, dewakanö bo̧nö. Ikenama böjȩbi, mölejȩbi jwiinö baibobe chedijatö, yemidanö baibökönö.