Marcos 1:24 - Dios Iwene

²⁴ Jo̧ba sulabo̧ma, jojo a̧jiökwema, Jesúsnö jwöbeba̧lö jö̧ba̧lijetö, iwenema jojo aatjö labebö: —Jesús, Nazarettjö bötjachino̧ja ¿tajawedö kwichaja̧da? ¿Ökwödönö kwabö lobö kwichaja̧ji̧? Ötjöma chöwaisa ökwönöma. Ökwöma Dios weinökweja. Ja̧danö, suli̧ jwibo̧ja ökwöma—jwöbeba̧lö jö̧ba̧lijetö.

Marcos 1:24 ပူးပေါင်းရင်းမြစ်များ

Éxodo 14:12

Isabenö yöda̧lijatö ökwönö Egiptonö dö̧jena, Wainö ja̧dösa, Egipto jojodö wetji̧ma otidö. Pjakatoböma döpöjöda, jö̧ba̧lö. Dedemi Egipto jojodö wetji̧ dotidinatjö bajalekwönönö otiwa belö mejetjö wodi̧ma— tjo̧'wo sulawö̧ jwöbeba̧lijadötö Israel jojodöma Moisésnö.

Daniel 9:24

Baikwö yöawinobe Gabrielma Danielnö: —Diosma omukwatö ujunajabe, kwömöledö Israel jojodönö tjö̧jibinö pjaatakwa̧ abönö, ina cuatrociento noventa o̧biya tjöbaledobö jo̧be jö̧ba̧lö. Ja̧danö, Dios badedö ujunina möle badekwachenama, tjusulatjö tjö̧jibinö pjaatakobe. Sulabenö ja̧tji̧ katjatibobö ja̧akobe, ja̧danö tjusula söbebö loakobe, okobe jwiinö suli̧ söbebö loakobe. Ja̧danö ja̧ mölema Diosda yöbawö weakobe, bakwainö otiwanö ba̧kwȩlö̧jatebö yöbawö weakobe. Ja̧ mölema Dios yöawi̧ yöbawo̧ Jeremías iwȩyudinadanö badekwachakobe, ja̧danö ökwö kwi̧'wi̧dinö kwedinadanö badekwachakobe, ja̧danö Jerusalénnö jȩju Dios ejuma, yemidanö isabenö Dios eju baibanö dichö loakobe.

Mateo 2:23

Ja̧danö, Galilea nijibe 'ya̧nö, Nazaret comunidadnö tjö̧jinobe. Ja̧ baledi̧ma Dios yöawi̧ yöbawadö Dios weakwo̧nö tjiwȩyudinadanö baledinobe. Baikwö laebobe Dios iwene, damötjö tjiwȩyudinama: Jo̧banö Nazaret jojo ötjabikobe, jö̧ba̧lö laebobe.

Mateo 8:29

Jobadöma Jesús ichobe edö, labinö jwötjeba̧linobe baikwö: —Ökwö Dios i̧tji̧ma, ¿tajawedö dö̧jobekwö kwichobeda? Lȩebakwa̧ möle ina baibököjayonö, ¿ökwödönö lȩbebö kwichaji̧?— jö̧ba̧lö jwötjeba̧linobe.

Marcos 1:23

Ikenama Jesús yöbawö ö̧jena bakwo̧ tebachibijetö o̧'wo̧ luwo̧nö sulabo̧ ö̧jökwe.

Marcos 1:25

Jejenö jö̧a̧lökwe Jesúsma labinö jö̧ba̧lijetö: —¡Ö'wainö ja̧wi! ¡Jo̧batjöma labebaji!— jö̧ba̧lijetö.

Marcos 10:47

Jo̧bama, Jesús, Nazaret jojo yöne öbaledobe a̧ja̧kwö jwöbijetö: —Jesús, Davidtjö tupadanö jojo, ¡lȩlö̧jino editjö!— jwöbijetö.

Marcos 14:67

Jobujuma edijotö Pedronö, ökwöla 'yöbakwö bo̧nö. Jo̧banö edö jö̧ba̧lijotö: —Ökwöbi Jesús Nazaret jojokwö kwebacho̧ja— jö̧ba̧lijotö.

Marcos 16:6

Yetjaibiökwe Dios weajökwe ángelma jö̧ba̧lijetö: —Yekabiduwa— jö̧ba̧lijetö—. Chöwaisa kwichaja̧duwama. Ökwödöma Jesús Nazaretso̧nö, towisa'onö bȩbö tjujuninökwenö edö kwichajaduwobe. Yötawaduwakwö: Jo̧bama benama deobe. Yemidanö tjeachajabe. Yemi edaduwi, jo̧banö ödinemi. Deobe. Yemidanö tjeachajabe— jö̧ba̧lijetö—.

Marcos 5:7

Ikenama Jesúsma jö̧ba̧lijetö, o̧'wo̧ luwo̧nö sulabo̧ jo̧nö webö: —O̧'wo̧ luwo̧nö sulabo̧, ökwönö weta. ¡Bitetjö labebaji!— webijetö. Jejenö weökwe o̧'wo̧ luwo̧nö sulabo̧ jo̧ma labinö jwöbeba̧lö jö̧ba̧lijetö, jojo aatjö: —Jesús, Inesö La'aka Luwo̧ Dios Itji̧ ¿dakwö ja̧köbobö kwichaja̧da ötjönöma? Jweinö yöba̧li, Dios öba a'otjö, ötjönöma sulabenö niinö ja̧köbököma. Dios iminö atebatjö, sulabenö inia tjötinö ja̧bökönuwi ötjönöma— jwöbeba̧lö abebijetö o̧'wo̧ luwo̧nö sulabo̧ jo̧ma Jesúsnöma.

Lucas 1:35

Ajebiökwe ángelma atadinobe: —Dios O̧'wo̧ Luwo̧ma ökwönö ichakobe, ja̧danö okobe jwiinö juluwo̧ Dios ujuluma ökwönö ja̧kobe. Jo̧kwajabetjö̧ kwitji̧ma isabenö suli̧ jwibö ö̧jakobe, ja̧danö jo̧banö Dios Itji̧ jö̧ba̧lö ötjabikobe.

Lucas 24:19

Yöa̧liökwe: —¿Diya̧ jawa? Yöbawitjö— jö̧ba̧lö atadinobe Jesúsma. Abebö a̧ja̧kwawö̧ yötjawinobe: —Jesús Nazaret jojonö baledina yöda̧lakwawobe. Jo̧ba Jesúsma Dios yöawi̧ yöbawo̧ juluwo̧ ö̧jinobe. Yöbawöbi otiwanö ujulunö yöawinobe, ja̧danö jojodö edajitjökö juluwi̧ jawabi i̧sebinobe. Isabenö Diosbi edemi, ja̧danö jojodöbi tjedemi jo̧ba Jesúsma Dios yöawi̧ yöbawo̧ juluwo̧inobe.

Lucas 4:34

—Ayö, ökwö Nazaret jojo Jesús, ¿taji kwöwaedakwa̧da ökwödönöma? ¿Ökwödönö söbebö lobö kwichaji̧? Ökwönö chöwaisökweja, ökwöma sulabe jwibo̧ Diostjö ichinaja— jö̧ba̧lö jwöeba̧linobe jo̧bama.

Lucas 8:28

Jo̧ba jojo o̧'wo̧ luwo̧nö sulabedö tjö̧jinobe, ja̧danö nöinö jo̧banö tjujuluwinobe, wetji̧danö ja̧o jö̧ba̧lö. Ajayinö ina comunidadnö ö̧jayima, sulabenö ja̧iawö̧, jojodö jo̧banö ka̧lena tjödinobe, 'dii̧ jawanö ömajamijunöbi ömasapiyanöbi yö̧beba̧lö tjödinobe, ja̧danö te'ada̧la̧dönö tjujuninobe, jo̧banö tjite'ada̧lobö. Jo̧kwaijayonö o̧'wo̧ luwo̧nö sulabedö tjuju̧kwobetjö̧, yö̧ekwa 'döbekwa̧lö loinobe, ja̧danö o̧'wo̧ luwo̧nö sulabedö wetjökwe, jojodö deobe i̧'yinobe. Jesúsma o̧'wo̧ luwo̧nö sulabedö ja̧dönö weinobe jojotjö latjebajobe, ja̧danö weawö̧, Jesús öba a'otjö meinobe jojoma, ja̧danö labinö yöa̧linobe Jesúsnö: —Ökwö Inesö La'aka Luwo̧ Dios i̧tji̧ma, ¿tajawedö dö̧jobekwö kwichobeda? Ökwönö adeba, ökwödönö lȩkebapji jö̧ba̧lö— jö̧ba̧lö.

Lucas 8:37

ja̧danö yötjawiawö̧, jwiinö yetjaibinobe jojodöma. Ja̧danö, jwiinö yetjaibobetjö̧, okobe deinö gadarenos tjitebo jojodöma Jesúsnö atjebinobe, tjitebotjö laebajobö. Ja̧danö, atjebökwe, Jesúsma yemidanö isowinö a̧jibinobe, ȩwa̧jobö.

Juan 6:69

Ökwö yökawi̧ a̧ja̧kwö dösödijatö, Jweinö yöbawo̧, jö̧ba̧lö. Döwaisachibijatö, Ökwöma suli̧ jwibo̧ja, Dios weinökweköbobetjö̧, jö̧ba̧lö— jejenö atadinobe Simón Pedroma.

Hechos 2:27

Ja̧danö, ötjö Chuluwo̧ Diosnö yöta̧la: Chuluwo̧, wotaja̧ okobema ökwöma ötjö cho̧'wo̧ luwo̧nöma ba̧kwȩlö̧jatebö wobadö tja̧jemi cha̧jinöma weköbökakwo̧ja. Ötjönö a̧tjȩonö, i̧lȩdo̧ okwa tjödajökwenöma, 'doloböbi wotinöma weköbökakwo̧ja. Jejenöma ja̧köbökakwo̧ja ötjönöma, jwiinö otiwo̧nöma, ökwö weköbina ja̧bo̧nöma, jejenö yöta̧la Chuluwo̧ Diosnö.

Hechos 24:5

Bitenö, Pablonö yödawa. Jo̧bama yelösöda sulabenö ja̧bö jo̧. Jelobebi jelobebi 'ya̧nö judío jojodö jwiinö tjölakwabikwawinö ja̧bö yöbawo̧, chuluwo̧. Ja̧danö, Nazaretnö ji̧na yöawina ösödadö la'aka luwedötjö jojo.

Hechos 3:14

Jesúsnö, suli̧ jwibo̧nö, Dioskwö wene jwibo̧nö öpöjödö, laeboböma akebaduwijökötö, Jesúsnö labebökönuwi, jö̧ba̧lö. Jo̧banö laebo jö̧ba̧lö weköbaduwokonö jelo̧nö, sulabo̧nö, jojodönö kwabö lobinanöda weköbaduwijatö Pilato laeboböma.

Hechos 4:27

Ina abebijadötö: —Dios, döwaisa ja̧ yökawinama tjo̧wi̧ baledinobe. La'aka luwedöma, Herodes mikwo̧, Pilato mikwo̧ benada tjoko̧ko̧kwinobe israel jojodökwöbi, israel jojodöböködökwöbi. Jobadöma Jesúsnö kwabö loawa wetjobö ko̧ko̧kwa̧lö tjomukwata̧linobe. Ökwö weköbina ja̧bo̧nö, suli̧ jwibo̧nö, ökwö yöbawö kwujuninökwe Jesúsnö kwabö loawa wetjobö ko̧ko̧kwa̧lö tjomukwata̧linobe jobadöma.

Santiago 2:19

Ju'wibi chatadena jo̧banö: —Yöta̧lakwö. Ökwöma jweinö yöka̧lobe, Diosma isabenö ö̧jobe, bakwo̧da, jö̧ba̧lö. Isabenö, otiwanö yöka̧lobe. Jo̧kwaijayononö ¿ja̧ yöba̧löda yöka̧li̧ma kwi̧sekwobeji̧ Diosnö kwo̧'wo̧ wana̧lö kwö̧ji̧ma? Kwi̧sekwokobe. ¿Wajwiköbiji, Awetja ömöayedö isapjobedöbi jejenö yötja̧lobe, Diosma isabenö ö̧jobe, bakwo̧da, jö̧ba̧lö? Jejenö jö̧ba̧lö yebabinö tjö̧bawadö, Diosma lȩebakwo̧, jö̧ba̧lö. Jo̧kwaobetjö̧ sule yöba̧löda yöka̧litjö̧ma jobadö Awetja ömöayedö isapjobedö yötja̧li̧danö yöka̧lobe, Diosma isabenö ö̧jobe, jö̧ba̧lö. Yötawakwö. Yöba̧löda yöka̧loko. Kwo̧'wo̧ kwöwana̧li̧ kwi̧sebobö jo̧be, jojodönö pjabatö— jejenö chatadena.

1 Juan 2:20

Ja̧danö chö̧ja̧wo̧dö, ökwödöma Dios isabenö ji̧ iwene waisadöja. Jau chö̧ja̧wo̧dö, Jwiinö Otiwo̧ Cristoma Dios O̧'wo̧ Luwo̧nö ökwödö kwo̧'wo̧ luwo̧duwinö tebachibö ö̧jobö weinobe. Ja̧danö, Dios O̧'wo̧ Luwo̧ma ökwödö kwo̧'wo̧ luwo̧duwinö ö̧jobetjö̧ Dios isabenö ji̧ iwene waisadöja.

Apocalipsis 3:7

Ja̧danö, chedökwema ina chiwȩyudobö weijatö: —Juan, biya̧ yötawi̧ma wȩyudi weköbo, Filadelfia jojodötjö ötjönö ko̧ko̧kwa̧lö ba̧nö ösödadönö te'ada̧lakwawa jojonöma. Jo̧banö weköbo, jobe ju̧kwadö ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma suli̧ jwibo̧ yöawi̧. Ja̧danö, jö̧a̧linadanö ja̧bo̧ yöawi̧, biya̧ chiwȩyudi̧ma. Ja̧danö, jo̧bama la'aka luwo̧ Davidmine u̧kwa yawepi̧ juna̧lo̧. Jo̧bada apjude po̧bebö tebato̧ma. Ja̧danö, jo̧bada apjude yö̧beböbi yö̧bebo̧. Jo̧bama baikwö yöawobe ökwödö Filadelfia jojodönö, jo̧banö ösödadönöma: