Jueces 20:22 - Dios Iwene

^22-23 Jejenö balediawö̧, yemidanö Betelbe tji̧'yinobe, Isabenö Jo̧nö abebö tja̧ja̧kwobö. Jobadötjö ba̧jȩkwadönö Benjamin jojodö kwabö lotjiawö̧, möle baledibanö tjubudekwinobe, ja̧danö budekwajadö, yö̧te baibenama Isabenö Jo̧nö abebö tja̧ja̧kwinobe, —Duluwo̧, yemidanö dömöledö Benjaminsaso jojodönö mebibö, dölakwabikwawobö jo̧beji̧? —jö̧ba̧lö. Atjebökwe, —Jau, yemidanö jobadönö kwölakwabikwawaduwo, —jö̧ba̧lö atadinobe Isabenö Jo̧ma. Jo̧kwajabetjö̧, jejenö weawö̧, tjujuluwachibinobe, ja̧danö ajayi möle isa'banö tjölakwabikwawobö tjöjamatinadanö, yemidanö jobeda tjölakwabikwawobö tjö̧jamatinobe.

Jueces 20:22 ပူးပေါင်းရင်းမြစ်များ

2 Samuel 11:25

Yöawökwe, Davidma yöbawo̧nö atadinobe baikwö: —Chömöayo̧, baikwö yöta̧li̧ yökawo Joabnö, –Ja̧ baledina omukwatö kwo̧'wo tjo̧bekwö kwö̧joko Joab, Uriasbi, ju'wedöbi debö tji̧'yinama ökwö jawamaökö. Jau Joab, tjölakwabikwawenama, dakwö döwaisakwajö debö tji̧'yakwedönöma, ba̧kwelöjatebö baledajiadanö a̧dekwanö ju'wedöena, ju'wedöena ö'wö batjibobe tjölakwabikwawelöma. Jo̧kwajabetjö̧ kwujuluwachibanö kwö̧jo Joab, ja̧danö ajayitjö bajalekwönönö ja̧ comunidad jojodönö mebibö kwölakwabikwawo, jobadönö kwujuluwakobetjö̧, –jö̧ba̧lö Joabnö ujuluwachibanö yökawonö, —jö̧ba̧lö weinobe Davidma, yöbawo̧nö.

Jueces 20:15

Ja̧ möle, Benjaminsaso jojodötjö ömadö veintiseis milbedö ölakwabikwawadö jojodö Guibea jojodönö pjabatö tji̧'yinobe, ja̧danö ju'wibi Guibea jojodötjö setecientos ölakwabikwawadö tjö̧jinobe.

Jueces 20:17

Ja̧danö, ju'wedö israel jojodötjö, cuatrocientos milbedö ölakwabikwawa jojodö tjö̧jinobe, kwölete'onö ölakwabikwawadöma.

Jueces 20:21

Ja̧danö, Benjaminsaso jojodöma Guibea comunidadtjö labebö, ju'wedö israel jojodökwö tjölakwabikwawinobe, ja̧danö ba̧jȩkwadö israel jojodönö kwabawö lotjinobe ja̧ möle, veintidos mil ölakwabikwawadönö kwabö lotjinobe Benjaminsaso jojodöma.

1 Samuel 30:6

Tjömöledö deiawö̧, tjo̧'wo sulawö̧ tjö̧jinobe David ömöayedöma, ja̧danö tjo̧'wo sulawö̧ ja̧nö, ju'wedöma tjuluwo̧ Davidnö inawiya ikwawö lotjobö yötja̧lakwawinobe. Jejenö yötja̧lakwawiökwe, jwiinö o̧'wo tjo̧achinobe Davidma, jo̧kwaijayonö Uluwo̧ Isabenö Jo̧ Diosma ujuluwachibanö pjaatinobe.