Judas 1:6 - Dios Iwene

⁶ Ja̧danö, Dios ömöayedö ángelesdötjö, ju'wedöma Dios tjö̧jobö otidina öpöjödö jelobe latjebinobe. Ja̧danö jejenö labebajadönö Diosma ka̧lena ödinobe, yȩa'wo okwa tjö̧bobö Dios inesö lȩebakwa̧ möle baibenanö kabatö, ¿jö̧tö?

Judas 1:6 ပူးပေါင်းရင်းမြစ်များ

Mateo 10:15

Isabenö yötawaduwakwö chömöledö, Dios lȩebakwa̧ möle baibenama, ja̧ comunidad jojodönö isabenö lȩebakobe. Jau chömöledö jobadönö lȩebakwa̧ma, Sodoma jojodönöbi, Gomorra jojodönöbi labinö lȩebakwa̧tjö bajalekwönönö jwiinö lȩebakobe ökwödö pjakataduwobö öpöjödadönöma— jö̧ba̧lö yöawinobe Jesúsma.

Mateo 25:41

Jemi ikenama wajwitobekwöchobe ju̧kwadönö yötawocha: Ökwödö sulabedöma chö̧jelö labebaduwi. Dios Awetjanöbi, iteda ömöayedönöbi lȩebobö Dios otidö ujuninola ökwöla nöolabe 'ya̧duwi, jobetjö Dios lȩebi̧tjö kwemaduwo jö̧ba̧lö.

Mateo 8:29

Jobadöma Jesús ichobe edö, labinö jwötjeba̧linobe baikwö: —Ökwö Dios i̧tji̧ma, ¿tajawedö dö̧jobekwö kwichobeda? Lȩebakwa̧ möle ina baibököjayonö, ¿ökwödönö lȩbebö kwichaji̧?— jö̧ba̧lö jwötjeba̧linobe.

Juan 8:44

Ökwödö kwabe'doduwima Awetjada. Ökwödö ösödö kwö̧jaduwi̧ma Awetja ösödi̧danö ösödö kwö̧jaduwobe. Jo̧bama jojodönö kwabö lobo̧, ajayitjöda babe baibanö. Ja̧danö, isabenö jawa yöbawö̧kö̧, omönada yöbawo̧. Jo̧ba omajade okwa sule omönada a̧jobetjö̧ omönada yöbawo̧. Ja̧danö, isabenö yöawakwawama öpöjödo̧. Jo̧bama ajayinö omöna yöbawina. Ja̧danö, jojodönö tjo̧'wo̧ luwo̧nö öibobe omönada yötjawobö.

Romanos 2:5

Jo̧kwaijayonö, jejenö ite'ada̧lijayonö, jwaikwöda sulabenö omukwatadöja, kwomukwataduwi̧ balewachökönö. Ja̧danö, jwiinö labi̧ jawa lȩebakobe Diosma, ökwödönöma, jojodönö lȩebi̧ möle baibenama. Ja̧ möle baibenama, jweinöda lȩebakwo̧ Diosma, jojodö ja̧tji̧ mikwa baibanö.

Efesios 6:12

Chömöledö, ökwödönö tjujuluwo jö̧ba̧ladöma böjȩ jojodöböködö. Awetja ömöayedötjö la'aka luwedö, mölejȩbe ju̧kwadö öwawöködö. Jobadöma ba̧jekwadö. Yelösöda juluwadö. Jojodö, böjȩtjö yȩa'wo okwa kwebachadö tjuluwedö.

Hebreos 10:27

Chömöledö, bakwo̧ Jesúsnö kabatibajo̧ sulabenö ja̧ena, ja̧ sulabenö ja̧i̧ma Diosma söbebö lookobe. Jo̧bama ju'wi möle Dios öba a'ö ja̧nö Dios labinö lȩbebö yöawi̧ a̧ja̧kwakwo̧, yelösöda. ¡Ayö! Diosma jwiinö ölabikobe jo̧banö, Jesúsnö kabatibö sulabenö ja̧bö jo̧nöma. Jo̧banö i̧sebakobe iteda jwiinö ölabi̧, ökwöla jwiinö tubi̧danö ölabi̧ma. Ja̧ Dios jwiinö ölabi̧ma jo̧ba öpöjojodönö juwö loakwola tubi̧danö ölabi̧. Chömöledö Dios jwiinö ölabi̧ma ¿ökwödönö i̧sekwobö dösödiji̧? Döpöjöda. Labobe yelösöda. Jo̧kwaobetjö̧ jweinö omukwatö Jesúsnö ösödö kwi̧'yaduwo, jo̧banö kabatibökönö.

2 Pedro 2:4

Jau chömöledö, isabenö jobadönö Dios lȩebakwa̧ wene döwaisobe, jobadöjayedönö Diosma ida̧ökö damötjö lȩebinobetjö̧. Jau chömöledö, damötjö ángelesdötjö sulabenö ja̧binadöma Dios lȩebi̧tjö tjö̧jibinokobe, sulabenö ja̧tjiökwe Diosma jobadönö ödinobe, Dios lȩebakwawö̧ tjö̧jena tjö̧bobö, ja̧danö jobe ka̧lena tjö̧bobe, inesö Dios lȩebakwa̧ möle baibenanö kabatö, ¿jö̧tö?

2 Pedro 2:9

Ja̧danö baikwö yötawaduwakwö chömöledö, ja̧ wene edö, baikwö döwaisachibobö jo̧be, Diosma ökwödö jo̧banö ösödadönö isabenö usula demawi̧tjö dö̧jibinö pjaatobö waiso̧, jö̧ba̧lö. Ja̧danö, ju'wibi waiso̧ chömöledö, Diosnö öpöjödadö iteda lȩebakwa̧tjö dötjibapji jö̧ba̧lö ite'ada̧lobö waiso̧, inesö jojodö ja̧tji̧ otiwojobö sulojobö jö̧ba̧lö yöawakwa̧ möle baibenanö kabatö.

Judas 1:13

Ju'wibi yötawa jobadönö: Jobadöma taba jwiinö jojodö tjöba a'otjö sulabenö ja̧tji̧ tji̧sebobe, baikwö wanedö yötawa: Balawa inawanö loenama, itjei'wo dewinö öwawinö loobe, okobe deinö tjedobö, ¿jö̧tö? Ja̧danö, bidöbi okobe deinö tjöba a'otjö taba jwiinö sulabenö ja̧tjobe, okobe deinö tjedobö. Chömöledö, Dios yöawi̧ yöbawadöma jweinö jojodönö ötjibobö jo̧be, öbibö yötja̧wi̧ a̧ja̧kwö, Dios ösödi̧danö ja̧bö tjö̧jakobetjö̧, ¿jö̧tö? Jo̧kwaijayonö bidöma Dios yöawi̧ yöbawadösa jö̧tja̧lijayonö, Dios ösödi̧danö ja̧bö tjö̧joböma öbiböködö. Ötjibo jö̧tja̧li̧tjö 'da̧bachibö, sulabenö Dios öpöjödi̧danö ja̧bö tjö̧jobö öbibadö. Ja̧danö, jejenö ja̧bö tjö̧jiökwe Diosma omukwatö ujunajabe, inesö yȩa'wo okwa ba̧kwȩlö̧jatebö tjö̧bobö.

Apocalipsis 20:10

Ikenama Diosma Awetjanö, jojodönö ba̧kwȩlö̧jatebö suli̧ waedö yöba̧lo̧nöma, do̧batö töbebö loobe chedijatö, ökwöla nöola okwa. Jobema, ju'wedö du̧ju̧tajanö ajayinö töbebö loinemi. Ojwe okwatjö labebinanöbi ajayinö töbebö loinemi jemima. Ja̧danö, omöna yöba̧linanöbi, Ötjöma Dios yöawi̧ yöbawo̧sa, jö̧ba̧lö, yöba̧linanöbi, ajayinö töbebö loinemi jemima, ökwöla ubola okwama. Jobema tiibökönö, tubinö yelösöda ubobe, azufre mikwi̧ ubi̧ tubi̧ma. Ja̧danö, jobadö wa̧medukwama, ba̧kwȩlö̧jatebö labebökönö, mölebi yö̧tebi inia tjötjinö baledawö̧.

Apocalipsis 20:2

Jo̧bama, böjȩnö ichibö, toba'dadanöso̧nö do̧batö ka̧lenasonö 'diinö nu'yö di̧batö ödobe chedijatö. Jo̧bama, jejenö di̧batö ödajökwema, Awetja, damötjö ji̧na a̧ko'da, omöna yöba̧lo̧. Ja̧danö, di̧batö ödajökwema lekwe, mil imiamebiya jenanö, labebökönö bo̧.