Diosnö ösödo̧ Job mikwo̧ usula emawina jawa 5:2 - Dios Iwene

² —Usula emawö ja̧nö, kwödameakwoböma jwiobe Job, baikwö yötawa: Waisanö omukwatöködöma, waisachibökönö jwaikwöda dameakwö ju̧kwadö, ja̧danö ja̧ tjö̧dameakwi̧ma, ö'wö batjibobö ja̧i̧, jö̧tö? Ja̧danö wajwibadöma, ö'wiyabinö edadö ju'wedönö, ja̧danö ö'wiyabinö tjedobetjö̧, ja̧tjö̧ debö 'ya̧dö omukwatöködöma, jö̧tö?

Diosnö ösödo̧ Job mikwo̧ usula emawina jawa 5:2 ပူးပေါင်းရင်းမြစ်များ

Génesis 30:1

Raquelma, ötjöwe, tjemu debujusa, ja̧danö Jacob i̧tji̧munö 'yatebökakwujusa, jö̧ba̧lö ö'wiawinö edijotö jöpöo Leanöma ji̧tji̧mu ö'wejemu luwanö 'yajebioko. Jo̧kwaobetjö̧ Jacobnö jö̧ba̧lijotö: —Chilekwe ötjökwö kwö̧jo metu'wo batibobö, kwi̧tji̧munö 'yatebinö. Isabenö tjemu debujuchitjö̧ma debö chi̧'yena— jö̧ba̧lijotö.

Génesis 38:9

Jo̧kwaijayonö Onánma öpöjödijetö, jobujutjö chi̧tji̧muma ötjö chi̧tji̧mu̧böködö batjibena, chöpöemine i̧tji̧mu̧da, jö̧ba̧lö . Jo̧kwaobetjö̧ Onánma Tamarkwö ö̧jenama metu'wo jö̧joböma öpöjödö Tamar jipjeanöda ja̧bö lobiabijetö.

Diosnö ösödo̧ Job mikwo̧ usula emawina jawa 18:4

—Ökwöma dameakwö ja̧nö, ökwödada suli̧ jwöbekwo̧ja, kwiteba'o yö̧yö̧bakwawo̧danö suli̧ waedakwawo̧ja Job, sula. Kwedemi, ökwöda jejenö kwödameakwobetjö̧, bö̧jȩma jojodö deö̧jȩ baibobö jȩnaji̧? Kwedemi ökwöda kwödameakwobetjö̧, inawiya pjolachibobö jȩnaji̧? Ja̧maökö Job, jweinö kwomukwatobö jo̧be.

Proverbios 12:16

Ja̧danö, ju'wibi yötawa: Jweinö omukwatö̧kö̧ma juluwanö dameakwo̧, ödameakwi̧ma tjöbeba̧lökönö. Jobekwö i̧sekwokobe ö'wiyawakwawönö omukwato̧ma. Ö'wiyawakwawönö omukwato̧ma jelo̧ jo̧banö sulabenö jö̧a̧lena öpöjödijayonö 'wiinöda atadökönö jo̧.

Proverbios 19:16

Ja̧danö, ju'wibi yötawa: Bakwo̧ Dios wei̧ a̧ja̧kwo̧ma lekwe ö̧jakwo̧. Jobekwö ö̧jokobe Dios wei̧ öpöjödo̧ma. Dios wei̧ öpöjödo̧ma iteda omukwati̧da ösödo̧. Ja̧danö iteda omukwati̧da ösödö ö̧jobetjö̧ lekwe jö̧könö debö i̧'yakwo̧.

Proverbios 19:19

Ja̧danö, ju'wibi jwebebö yötawaduwakwö: Bakwo̧ juluwanö dameakwo̧ma, ba̧kwȩlö̧jatebö juluwanö dameakwo̧obetjö̧ ba̧kwȩlö̧jatebö wene ujuna̧lakwo̧, yemidanöbi yemidanö. Ja̧danö, ökwödöma kwomukwataduwena, wene ujuna̧li̧tjö̧ ö̧jibobö pjadatena, jö̧ba̧lö. Chömöledö, isabenö yötawa: Jo̧ba wene ujuna̧li̧tjö ö̧jibinö pjakataduwitjö̧ma yemidanö yemidanöbi ba̧kwȩlö̧jatebö pjakataduwobö jena, jo̧bama kabatökönö wene ujuna̧lakwobetjö̧. Jo̧kwaobetjö̧ jwebebö yötawaduwakwö: Pjakataduwobö jwiyobe, pjakataduwokonö.

Proverbios 27:3

Ja̧danö, ju'wibi yötawa, wanedö: Bakwo̧ inawa ömökawa e'ewö jwöbo̧, jwu'we, chime'dawachiba ömöka jö̧ba̧lö. Ja̧danö, so̧bi̧ya̧pu̧ bade'donö su̧'bȩinö anibö e'ewo̧ma jwöbo̧, jwu'we, chime'dawachiba ömöka jö̧ba̧lö jö̧ba̧lö. Ja̧danö, jweinö omukwatö̧kö̧ma jelo̧nö wene nöinö jwöebobetjö̧, wene jwöebökwema ömöki̧ e'ewi̧danö jwöbo̧, jwu'we, me'dawachibo̧sa, jö̧ba̧lö. Isabenö, ömöki̧ e'ewi̧ ime'dawachibi̧tjö̧ bajalekwönönö ime'dawachibobe wene nöinö jwöebökwema, jweinö omukwatö̧kö̧ jo̧banö wene jwöebobetjö̧.

Proverbios 8:5

Ökwödötjö ju'wedöma ö'wiyawakwawönö kwomukwatakwawaduwobö ina wajwiköbaduwobe. Ökwödö wajwibadönö yötawa: Ö'wiyawakwawönö kwomukwataduwobö kwöwaisachibaduwakobetjö̧ a̧ja̧kwaduwitjö. Ja̧danö, ökwödö jweinö omukwatöködönö yötawa: Di̧ya sulojobö jö̧ba̧lö, di̧ya otiwojobö jö̧ba̧lö kwöwaisachibaduwakobetjö̧ ¡a̧ja̧kwaduwitjö!

Romanos 2:8

Jo̧kwaijayonö, isabenö wene öpöjödibö, sulabeda ösödadönöma, idöda tjomukwati̧da ja̧badönöma lȩebakwo̧ Diosma. Jwiinö labi̧ jawa lȩebakwo̧ jobadönöma, sulabenö ja̧tjina öpöjödö lȩebakwo̧ chömöledö.

2 Timoteo 3:6

jobadöma isabenö jojodönö suli̧ tjöwaedobetjö̧. Jau Timoteo, isabenö jojodönö suli̧ tjöwaedobe, jobadötjö ju'wedöma tebachö, sulabenö yöbawö 'daliwa tjönobedanö ichejekwa, ya̧dö tjo̧'wo̧ luwo̧nö me'dawadönö do̧tjatotö jö̧ba̧lö. Jobadö tjo̧'wo̧ luwo̧nö me'dawadö ya̧dönö baikwö yötawa: Jobadöma jwaikwö idöda tjösödi̧ jawada isakwadö, ju'wi tjösödi̧ jawabi, ju'wi tjösödi̧ jawabi, ja̧danö tjösödi̧ jawa jwaikwöda isakwö, nöinö sulabenö ja̧bö tjö̧jobe.