Isaías 8:17 - Dios Iwene

¹⁷ Jau chömöledö, babe Isabenö Jo̧ma öba muchekwö Jacobmine itji̧mu tupadanö jojodönö edökönö ö̧jobedanö ichejekwa babe döpöjojodöma ökwödönö tjujuluwobetjö̧, jo̧kwaijayonö ötjöma jo̧ba pjaatakwa̧ chiteada̧locha, —Isabenö yöawinadanö pjaatakwo̧, —jö̧ba̧lö, ja̧danö ja̧ wene cho̧'wo wana̧lö chö̧jakwo̧sa.

Isaías 8:17 ပူးပေါင်းရင်းမြစ်များ

Génesis 49:18

Dannö yöawaja̧ ikena Jacobma Isabenö Jo̧ Diosnö jwöbijetö: —Isabenö Jo̧ Dios, ökwönöda cho̧'wo wa̧na̧lö, chöpöjöjödötjö chö̧jibanö pjakatakwa̧ te'ada̧lo̧sa— jwöbijetö Isabenö Jo̧ Diosnö ösödö.

Diosnö ösödo̧ Job mikwo̧ usula emawina jawa 13:24

—Chuluwo̧ Dios, tajawedö ötjönö le'dedö lobö, atebi̧ kwa̧ja̧kwokobeda? Tajawedö kwöpöjojo chö̧jobedanö kwi̧sȩbobeda?

Diosnö ösödo̧ Job mikwo̧ usula emawina jawa 14:14

Chuluwo̧, bakwo̧ ö'wö baibitjö̧ma, isabenö 'dö̧ibaji̧ möle yemidanö 'yaa̧lenaji̧? Isabenö 'dö̧ibaji möle yemidanö 'yata̧lobö ji̧tjö̧ma, usula emawö chö̧ji̧ 'dö̧ibajenanö kabatö cho̧'wo 'dibachibö chiteada̧locha, 'dö̧ibaji möle yemidanö 'yata̧lakwa̧ möle baibenanö kabatö.

Diosnö ösödo̧ Job mikwo̧ usula emawina jawa 35:14

—Ökwö yöka̧li̧bi ja̧danö Job. Ökwöma Diosnö yöka̧lajabe, –Diosnö chedökökwe, sulabenö jatinojobö ja̧tinokojobö jö̧ba̧lö yöawakwo̧, yöa̧lakwa̧ teada̧lo̧sa, –jö̧ka̧lajabe. Jo̧kwaijayonö ju'wibi yöka̧lajabe, –Diosma sulabedönö dameakwö lȩebo jö̧a̧lijayonö, sulabenö lȩbȩbö̧kö̧, jadanö jojodö sulabenö jatji̧ edö omukwatö̧kö̧, –jö̧ba̧lö yöka̧lajabe. Jobekwö dötölatajanö ömukwatö sulabenö yöka̧liökwe, ökwö budekwö yöka̧li̧bi a̧ja̧kwökena Job.

Isaías 1:15

Jo̧kwajabetjö̧, ötjönö abebö kwa̧ja̧kwaduwakobetjö̧, kwömamijuduwi kabebö dekataduwenama, jalachibö jelobekwö edo̧sa, ja̧danö nöinö abeba̧lö ötjönö akebaduwenama, a̧ja̧kwö̧kö̧sa, jojodönö sulabenö kwabö lobajadö, kwömamuduwi̧ tjökwösobu 'yoliwinö kwö̧jaduwobetjö̧.

Isaías 25:9

—Ja̧ möle baikwö yötja̧lakwedö Isabenö Jo̧nö: –Bite Isabenö Jo̧ Diosda, dösödökwe Diosma. Jo̧banö o̧'wo wana̧lö, pjaatakwa̧ diteada̧lajabe, -Isabenö ökwödönö pjaatakwo̧, -jö̧ba̧lö, ja̧danö otiwanö pjaatajabe. Dösödökwe Isabenö Jo̧ Diosma jo̧bada, jo̧ba pjaatakwa̧ diteada̧lajabe, jadanö babe ökwödönö pjaatajobetjö̧, do̧'wo ösöwachibanö dösödaduwo, -Diosma otiwanö dö̧ji̧binö pjaatajabe, –jö̧ba̧lö yötja̧lakwedö ja̧ möle.

Isaías 26:8

Duluwo̧ Isabenö Jo̧, lȩekwa yökawakwa̧ teada̧ladösa, weköbi̧ a̧ja̧kwö, do̧'wo wana̧lö teada̧ladösa, —Duluwo̧ Diosma lȩekwa jweinö yöawakwo̧, —jö̧ba̧lö. Isabenö ökwönö ösödadösa duluwo̧ Dios, okobe deinö ökwönö tjaja̧kwobö ösödadösa, okobe deinö ökwönö tjomukwatibobö ösödadösa, —Isabenö Jo̧ Diosma otiwo̧, —jö̧ba̧lö.

Isaías 30:18

Jo̧kwaijayonö jobekwö baledoböma ösödö̧kö̧ Isabenö Jo̧ma. Jo̧bama o̧'wo 'dibachibö, lekwe teada̧lo̧, ökwödönö dösölö̧jinö pjaatobö ösödobetjö̧. Iteda ujulu i̧sȩbö, ökwödönö lȩlöjinö edobö ösödo̧ chömöledö. Jau chömöledö, Isabenö Jo̧ Diosma, otiwanö ja̧o jö̧a̧li̧danö ja̧bö jo̧, ja̧danö okobe deinö jo̧banö tjo'wo wana̧lö teada̧ladönö isabenö otiwanö pjabato̧, jo̧ba yöawi̧ kwa̧ja̧kwaduwo chömöledö.

Isaías 33:2

Chuluwo̧ Isabenö Jo̧, ökwödönö lȩlöjinö edö pjakatobö atebakwö, lekwe möle pjakatakwa̧ diteada̧lajabe chuluwo̧, —Duluwo̧ Dios isabenö pjaatakwo̧, —jö̧ba̧lö. Mölekwena ökwöda kwujulunö, tjöbeba̧lö pjakatobö atebakwö, wene döbaledenama, dö̧jibinö pjakatobö atebakwö.

Isaías 45:15

Jau chuluwo̧ Dios, isabenö ökwöma dedökökwe Diosja, jo̧kwaijayonö döbajalenö ökwönö dedobö jwiijayonö, ökwö Israel jojodö dösödökwe Diosma, isabenö dö̧jibinö pjabato̧ja.

Isaías 50:10

Baikwö yöta̧laduwakwö chömöledö: Ökwödötjö didöda Isabenö Jo̧ Diosnö yebabinö ösödö kwö̧jaduwobeda? Ökwödö Diosnö ösödadösa jö̧ba̧ladöma, Dios ömöayo̧ yöawi̧ a̧ja̧kwö kwö̧jaduwo chömöledö. Ja̧danö ökwödötjö yȩa'wo okwa, dewi̧ ja'yubebi dewokobe kwebachadöma, Isabenö Jo̧nö kwo̧'woduwi wana̧lö kwö̧jaduwo, kwuluwo̧duwi Diosnö ösödö kwö̧jaduwo, —Diosda pjaatakwo̧, —jö̧ba̧lö.

Isaías 54:8

Jau, jwiinö ökwönö chödameakwobetjö̧, juluwanö lekwökönö jelobekwö chöjalachibijatö, ökwönö öpöjödö, jo̧kwaijayonö lekwemaökö. Ja̧danö ökwönö lȩlöjinö edö ile 'di̧tebi̧ma, ba̧kwelöjatebö 'dö̧ibajökönö ökwönö ile 'di̧tebakwo̧sa, jö̧ba̧lö wanedö yöa̧lobe Isabenö Jo̧, Jerusalen jojodönö tjö̧jibinö pjabato̧ma, Jerusalennö ju̧kwadönö.

Isaías 57:17

Jojodö idöda tjujuna̧lotö jö̧ba̧lö, sulabenö ja̧bö tjö̧jitjö̧, jobadönö chödameakwijatö, ja̧danö lȩbebö, jobadönö lȩtebijatö. Ja̧danö dameakwö ja̧nö, le'dedö lotijatö, —Wainö usula emawö tjö̧jo, —jö̧ba̧lö. Jo̧kwaijayonö, jobekwö jobadönö lȩtebinajayonö, sulabenö ja̧bö tjö̧ji̧ma katjatibinokobe, jwaikwöda idödada tjomajadenö tjösödi̧danö ja̧bö tjö̧jinobe.

Isaías 59:2

Ökwödönö pjabatökönö ö̧ji̧ma, baikwö labebö lobö yötawaduwakwö chömöledö: Ökwödö sulabenö ja̧bö kwö̧jaduwi̧ma, tjöekwemidanö ji̧, Diostjö 'da̧bachibö kwö̧jaduwakobetjö̧. Ja̧danö sulabenö ja̧bö kwö̧jaduwiökwe, kwö̧jaduwelö jelobekwö öjalachibajabe Diosma, ja̧danö akebaduwi̧ a̧ja̧kwö̧kö̧.

Isaías 64:4

Jau chuluwo̧, ökwödanöbo̧, jo̧banö tjo̧'wo wana̧ladönö pjabato̧ma bakwo̧bi deobe. Damötjö baikwö bajalenö, la'akatjöda a̧ja̧kwajiböködösa, la'akatjöda bakwo̧bi ölakiyunö a̧ja̧kwinokobe, ja̧danö bakwo̧bi öbajalenö edinokobe, ökwöjayo̧ ösödadönö otiwanö pjabato̧nöma.

Isaías 64:6

Okobe deinö kwöba a'otjö yȩbekwadödanö babibadösa chuluwo̧. Ja̧danö otiwanö ja̧badösa jö̧ba̧lö yöda̧li̧jayonö, ja̧di̧ma yȩekwado̧, iwonö lu̧ju pjajawa̧do̧danö ichejekwobe. Ökwödöma towisöja kököachibi̧danö ichejekwadösa, ja̧danö jwa̧le'epjo e'ewibobedanö, sulabenö ja̧bö dö̧ji̧ma jelobekwö badibanö öibawö̧sa.

Isaías 64:7

Babe ökwönö abebadöma deobe ditebotjö chuluwo̧, bakwo̧bi jwaikwöda ökwönö ösödö jo̧ma deobe. Jau chuluwo̧, dö̧jelö jelobekwö kwöjalachibajabe chuluwo̧, ökwödönö edökönö, —Wainö sulabenö ja̧bö ja̧nö, usula tjemawo, —jö̧ba̧lö iyö loköbajabe chuluwo̧.

Lucas 2:38

Ja̧danö, Simeón Jesúsnö ina yöawayi, jobuju Anama ichibö, Diosnö jösödinobe otiwanö pjabato̧ja jö̧ba̧lö. Jobe ju̧kwadötjö ju'wedöma Dios pjaatakwa̧ möle te'ada̧lö tjö̧jinobe, isabenö ökwödö Jerusalénnö ju̧kwadönö dö̧jibinö pjaatakwo̧ Diosma, jö̧ba̧lö. Ja̧danö, jobadö jejenö te'ada̧ladönö Anama yöjawinobe tjemunö, Diosma isabenö otiwanö ökwödönö pjaatajabe, jö̧ba̧lö.

Lucas 24:27

Ja̧danö jemi ikenama Moisés iwȩyudinatjö jamatö, okobe jwiinö ju'wedö Dios yöawi̧ yöbawinadö Dios weakwo̧ jö̧a̧linökwenö tjiwȩyudinakwö bajalenö, okobe jwiinö Dios weakwo̧ jö̧a̧linökwenö tjiwȩyudina jawa labebö lobö yöawinobe, tjiwȩyudinama baikwö badekwachobe jö̧ba̧lö. Jejenö labebö lobö öwaetjöda i̧sebinobe, Jesúsnö baledinama jwaikwöda ajayinö tjiwȩyudinadanöda badekwachinobe jö̧ba̧lö.

Deuteronomio 32:20

Sulabenö ja̧tji̧ökwe, –Bidö chi̧tji̧muma jwiinö sulabedö, ja'yubebi ja̧tjo̧ jö̧tja̧li̧danöma ja̧böködö, jo̧kwajabetjö̧ jobadönö pjabatökönö chö̧ja̧kwo̧sa, jobadönö baledakwa̧ma dakwö baledakwojobö jö̧ba̧lö.

1 Tesalonicenses 1:10

Ja̧danö, Dios Itji̧ mölejȩtjö ichakwa̧ te'ada̧lö ju̧kwadötö jö̧ba̧lö yötjawobe. Jau chömöledö, Diosma iteda Itji̧ Jesúsnö woawatjö tjeachajinö ja̧inobe, ja̧danö jo̧ba Jesúsda Dios lȩebakwa̧tjö dö̧jibinö ja̧bo̧ma.

2 Tesalonicenses 3:5

Chömöledö, Duluwo̧ ökwödö kwomajadeduwinö öba̧ja̧dobö chösöda, Dios ökwödönö ile niebi̧ wene kwöwaisachibaduwobö, ja̧danö Cristo o̧'wo̧ 'dibachibö ö̧ji̧ wene kwöwaisachibaduwobö.

Hebreos 2:13

Ja̧danö, ju'wi Jesús jö̧a̧linabi laebobe Dios iwenetjö, baikwö: Diosnöda cho̧'wo̧ wana̧lö jo̧sa. Jejenö laebobe, Jesúsma iteda ö̧ja̧wo̧dödanö Diosnö o̧'wo̧ wana̧lö jo̧, jö̧ba̧lö. Ja̧danö ju'wibi laebobe baikwö: Bena chö̧ja, Dios i̧tji̧mu, ötjönö iyinawö̧kwö. Jejenö laebobe Jesús jö̧a̧lina iteda ö̧ja̧wo̧dönö. Jo̧kwaobetjö̧ chömöledö, wajuwanö döwaisachibobö jo̧be, Ökwödöma Dios ju'wedö i̧tji̧musa, Jesús ö̧ja̧wo̧dösa, jö̧ba̧lö. Isabenö chömöledö, Dabe'doma bakwo̧da, Diosda, ökwödöbi Jesúsbi do̧'wo̧ döwana̧lökwema.

Hebreos 9:28

Ja̧danö, Cristobi bakwötanöda woinobe jojodö tjusula tjumusidi̧ midawö. Ja̧danö, ju'wi möle yemidanö ichenama jojodö dusula dumusidi̧ imidawobö ichökakwo̧. Yemidanö ichenama jo̧ba yemidanö ichakwa̧ te'ada̧ladönö mölejȩbekwö öibobö ichakwo̧. Jejenö okobe jwiinö dö̧jibinö pjaati̧ma tjo̧wi̧ kaatakobe.