Isaías 66:19 - Dios Iwene

¹⁹ I̧sȩkwa jawa baibanö, labinö lȩtebakwo̧sa jobadönö. Ja̧danö lȩtebaja̧tjö ji̧badönö wetocha, tjitebotenia jojodönö yötjawobö, Tarsis nijibebi, Fut nijibebi, 'böawa waisadö tjitebo Lud nijibebi, Tubal nijibebi, Javan nijibebi yöbawö tji̧'yobö. Ja̧danö ötjönö a̧ja̧kwajiböködö, ja̧danö dejatinö chujulu edajiböködö tjitebo jwaibalawa ö'öbö nijibebi tji̧'yobö wetocha, ja̧danö tjitebotenia jojodönö chujulu yötjawakwedö, —Isabenö Jo̧ Diosma isabenö dejatinö juluwo̧, —jö̧ba̧lö.

Isaías 66:19 ပူးပေါင်းရင်းမြစ်များ

Génesis 10:13

Ja̧danö, Cam itji̧ Mizraimtjö̧ tupadanö jojodöma bidö: Ludim jojodö, Anamim jojodö, Lehabim jojodö, Nartuhim jojodö,

Génesis 10:2

Ja̧danö, Noé itji̧ Jafet i̧tji̧mu ömadöma bidö: Gomer, Magog, Madai, Javán, Tubal, Mesec, Tiras mikwadö.

Génesis 10:22

Ja̧danö, Sem i̧tji̧mu ömadöma bidö: Elam, Asur, Arfaxad, Lud, Aram.

Génesis 10:4

Ja̧danö, Javántjö tupadanö jojodöma bidö: Elisa jojodö, Tarsis jojodö, Quitim jojodö, Dodanim jojodö.

1 Crónicas 1:11

Cam itji̧ Egipto itji̧mu tupadanö jojodöma bidö: Ludim jojodöbi, Anamim jojodöbi, Lehabim jojodöbi, Nartuhim jojodöbi,

1 Crónicas 1:7

Ja̧danö Jafet itji̧ Javan itji̧mu tupadanö jojodöma bidö: Elisa jojodöbi, Tarsis jojodöbi, Quitim jojodöbi, Dodanim jojodöbi.

1 Crónicas 16:24

Tjitebokwena jojodönö yödawaduwo, —Isabenö Jo̧ma dejatinö juluwo̧, —jö̧ba̧lö. Okobe deinö tjitebokwena jojodönö yödawaduwo, iteda ujulunö jojodö edajitjökö jawa i̧sȩbinama.

Isaías 11:12

Iteda itea bandera kaebakobe, tjitebotenia jojodö öwawinö tjedobö, ja̧danö israel jojodö, ajayinö tjitebotjö a'dewö loinawö̧nö o̧ko̧kodakobe, ja̧danö Juda jojodö tjipjelekwachinö ju̧kwadönöbi o̧ko̧ko̧dakobe, bö̧jȩ bajale ju̧kwadönöbi o̧ko̧kodakobe, a̧dekwanö tjitebobe tjetjachajakobetjö̧.

Isaías 18:3

Okobe deinö ökwödö bö̧jȩnö ju̧kwadö, bö̧jȩ ba̧kwemeachibanö jojodöma, mösa'otjö banderasa̧do̧ kabebö tjö̧ni̧ kwedaduwakwedöja, ja̧danö trompeta pjutji̧ kwa̧ja̧kwaduwakwedöja, —Döpöjojodöma ichibö mebadötö, —jö̧balö.

Isaías 18:7

Ja̧danö, ja̧ möle yötawaja̧ niji jojodöma Diosnö iyö tjichakwedö. Jau, jobadö ödöbaedö tji̧sȩdo̧ sayuwawö̧, bö̧jȩ ba̧kwemeachibanö jojodö yetjabawö̧, juluwadö ba̧jȩkwadö tjitebokwena jojodönö juluwadöma, Isabenö Jo̧nö tjiyakwa̧ tjichejebakwedö. Tjitebo, ojwebiya 'da̧'yachemi nijiitjö iyawa tjichejebakobe, Jerusalennö ja̧'o Sion mösa'obe, Isabenö Jo̧ Okobe Jwiinö Juluwo Dios itebo comunidad ötjabobe, Diosnö tjiyakobetjö̧.

Isaías 2:16

Ja̧danö ju'wibi tjomukwatobe, —Jwaibalawa bakwachödö Tarsis nijibe kweachakwawowi isowibiya chujuna̧lobetjö̧, ja̧danö ju'wi isowibiya otiwowi chujuna̧lobetjö̧, isabenö ju'wedötjö bajalekwönönö nöinö juna̧lo̧sa, —jö̧ba̧lö tjomukwatobe.

Isaías 29:24

Ja̧danö ja̧ möle ajayinö sulabenö omukwatinadöma, otiwanö isabenö wene tjöwaisakwedö, ja̧danö ajayinö tjome sulinö yöba̧linadöma, otiwanö ba̧ja̧dakwawa tjösödakwedö, jokwajabetjö̧ ja̧ möle tja'dö Jacobma, itji̧mu tupadanö jojodönö edö, tabakwö ö̧jökakwo̧, —jö̧ba̧lö yöawobe Isabenö Jo̧ma.

Isaías 42:12

Ödö ju̧kwadö jwaibalawa ö'öbö ju̧kwadöbi Diosnö otiwanö omukwatö, jo̧banö kwösödaduwo, kwiteboduwi nijitjöbi yökawaduwo, —Diosma isabenö otiwo̧, —jö̧ba̧lö.

Isaías 42:4

Jwaikwöda me'dawachibökönö, waekwökönö lȩekwa yöbawö ö̧jakwo̧, bö̧jȩ ba̧kwemeachibanö ju̧kwadöma, lȩekwa yöawi̧ a̧ja̧kwö tjö̧jenanö baibanö. Ja̧danö ja̧ möle jwaibalawa ö'öbö ju̧kwadöbi jo̧ba wei̧ tja̧ja̧kwobö tjiteada̧lakwedö, —Dios ömöayo̧ webö ö̧ba̧ja̧dakwa̧ da̧ja̧kwaduwo, —jö̧ba̧lö, laebobe Dios iteda ömöayo̧nö yöa̧li̧ma.

Isaías 43:6

U'dakwö ju̧kwadönöbi, a̧li̧kwö ju̧kwadönöbi ja̧danö. U'da wetocha, –Chömöledö israel jojodönö iyitjö, –jö̧ba̧lö, ja̧danö a̧li̧ wetocha, –Chömöledö tjȩwa̧japji jö̧ba̧lö tjöbeba̧lökönui, –jö̧ba̧lö. Jobekwö bö̧jȩ bakwachö̧jetjöbi chitji̧mu ömadönöbi, ya̧dönöbi tjebatajö ödötjö chichejebakwo̧sa.

Isaías 49:1

Baikwö laebobe Dios ömöayo̧ yöa̧li̧ma: Ökwödö ödö ju̧kwadö jwaibalawa ö'öbö ju̧kwadöbi ju'wedö bö̧jȩ bakwachö̧jȩ ju̧wkadöbi, yötawi̧ kwa̧ja̧kwaduwo. Chojo'do jukwa'wo ina cha̧ja̧yi, Isabenö Jo̧ma ötjönö jwöinobe, iteda ömöayo̧ batibakobetjö̧, ina ötjönö jemakwa̧ abönö, chimi imidinobe Isabenö Jo̧ma.

Isaías 49:12

Ja̧danö pjatatiawö̧, ödötjö tjichakobe chömöledöma, u'dakwötjöbi, jawo̧ meajobekwötjöbi, Asuan nijitjöbi otiwanö tjebachajö tjichakwedö, chömöledö israel jojodöma.

Isaías 49:22

Baikwö yöa̧lobe Isabenö Jo̧ Diosma, ökwödö israel jojodönö pjaatakwa̧ma: Baikwö yötawaduwakwö chömöledö, ötjöma chömamu kabebö, tjitebotenia jojodönö weti̧ chi̧sȩbocha, ja̧danö chi̧sȩbiawö̧, kwitji̧muduwinö tjebatö, baikwö tjichejebakwedö. Jau, kwitji̧mu ömadönö apjö̧a̧lö tjichakwedö, ja̧danö tjöböbe'onö kwitji̧mu ya̧dönö e'ewö tjichejebakwedö.

Isaías 51:5

Chujulu chi̧sȩbakwa̧ möle juluwanö badekwachakobe chömöledö, ökwödönö kwö̧jibaduwinö pjatatakwa̧ma juluwanö badekwachakobe. Ötjöda chujulunö, juluwanö tjitebotenia jojodönö webö chö̧jakwo̧sa chömöledö, ja̧danö otiwanö webö chö̧jiawö̧, ödö ju̧kwadö jwaibalawa ö'öbö ju̧kwadöbi ötjönö tjo̧'wo tjö̧wa̧nalakwedö, ja̧danö chotidakwa̧ tjiteada̧lakwedö, inesö chujulunö otiwanö chotidakobetjö̧.

Isaías 52:10

Tjitebotenia jojodö tjö̧ba a'otjö iteda ujulu öwaetjöda öwawinö i̧sȩbajabe, ja̧danö bö̧jȩ ba̧kwemeachibanö ju̧kwadöma edö tjöwaisakwedö, —Duluwo̧ Diosma iteda ömöledönö tjö̧jibinö pjaatajabe, —jö̧ba̧lö.

Isaías 52:15

Jo̧kwajabetjö inesö la'aka luwo̧ baibiawö̧, tjöbajale jalaka baibanö tjedakwedö tjitebotenia jojodöma, ja̧danö jo̧ba öba a'otjö, a̧la̧ibö wi̧inö tjö̧jakwedö inesö la'aka luwedöma. Jau chömöledö, chömöayo̧nö ajayinö wajwitjinobe, —Biteda Dios ömöayo̧, —jö̧ba̧lö, jo̧kwaijayonö bajalianö jo̧banö wajwitjina jawa tjöwaisachibakwedö, ajayinö tja̧ja̧kwinökö jawa tja̧ja̧kakwedö, jo̧kwajabetjö̧ öba a'o tja̧la̧ibakwedö, —Duluwo̧ja, —jö̧ba̧lö, yöawobe Diosma, iteda ömöayo̧nö.

Isaías 55:5

Ja̧danö, ökwödökwöbi bakobe dösölö̧jinö dö̧jakwa̧ wene yöbawö dujunitjö̧ma, jo̧banö chujuninadanö chujunakwawö̧ja. Ja̧danö ju'wedö tjitebo jojodönö jwököbaduwakwedöja, ajayinö kwa̧ja̧kwinaduwököwö̧ jojodönö jwököbaduwakwedöja. Ja̧danö, jwököbiawö̧, ajayinö ökwödönö wajwitjinajayonö, juluwanö kwö̧jaduwobekwö ö'ötakwakwedö. Jau chömöledö, ötjö kwuluwo̧duwi Isabenö Jo̧, israel jojodö tjösödökwe Suli̧ Jwibo̧ Diosma ökwödönö otiwanö tjomukwatobö chujunobetjö, jobekwö jwököbaduwiawö̧ juluwanö tjichakwedö, jö̧ba̧lö yöa̧lobe Diosma.

Isaías 60:9

Ja̧ kwedaduwakwa̧ma baikwö yöta̧la, jwaibalawa bakwachawa ju̧kwadö ötjönö ösödö tjichakwedö, —Diosma isabenö pjaatakwo̧, —jö̧ba̧lö. Ja̧danö ju'wedö tjabönö, Tarsis niji isowibiyanö, kwitji̧muduwi ödö ju̧kwadönö ichejebö tjichakwedö, ja̧danö ju'wibi tjitea orobi, platabi iyö tjichakwedö. Jau, ötjö kwuluwo̧duwi Isabenö Jo̧, Israel jojodö tjösödökwe Suli̧ Jwibo̧ Diosnö otiwanö omukwatö tjösödobetjö̧, jobekwö tjichakwedö. Jau chömöledö, ja̧ möle okobe deinö otiwanö ökwödö israel jojodönö otiwanö tjomukwatobö pjatatocha, ja̧danö jobekwö pjatatiawö̧, jobekwö kwö̧jaduwobekwö tjichakwedö.

Isaías 62:10

Comunidad apjudebenö lakebaduwo chömöledö, Jerusalenbe ichibakwama mana otiwanö kwotidaduwo. Jalama otiwama baibanö kwotidaduwo, ja̧danö inawiya manatjö pjolatö loköbaduwo, Jerusalenbe tjichakwedö otiwanö kwetjachakobetjö̧. Ja̧danö mana i̧sȩba̧do̧, banderasa̧do̧ kabebö kwönaduwo, tjiteboteniatjö ichadöma mana otiwanö tjedakobetjö̧.

Isaías 65:1

Baikwö yöawobe Isabenö Jo̧ma: Isabenö chömöledönö cha̧ja̧kwobö chiteada̧lijatö, jo̧kwaijayonö atjebinokobe chömöledöma. Ja̧danö ötjönö tjöbadekwajobö chi̧sȩkwijayonö, ötjönö tjisakwinokobe chömöledöma. Chömöledö israel jojodö ötjönö, —Isabenö Jo̧, pjabati, —jö̧ba̧lö atjebököjayonö, jobadönö pjatatotö jö̧ba̧lö yöta̧lijatö, —Bai chö̧ja chömöledö, akebaduwotjö, —jö̧ba̧lö.

Daniel 11:18

Jemi ikenama, jwaibalawa ö'öbö niji ujuluwobö isakwakobe, ja̧danö jobetjö ju'wi comunidadkwenada ujuluwakobe. Ja̧danö, bajalianö öpöjojodötjö bakwo̧ guardia luwo̧ma jo̧banö ujuluwakobe, ja̧danö Siria luwo̧ juluwo̧sa̧ jö̧ba̧lö omukwati̧ kaatibobö ja̧akobe. Siria la'aka luwo̧ma, ajayinö jo̧banö ujuluwakwo̧nö omukwatinobe, mikwawö̧kö̧, ötjödanö juluwö̧kö̧ jö̧ba̧lö. Jo̧kwaijayonö jejenö omukwati̧ kaatibobö ja̧akobe öpöjojoma, ja̧danö balekwa mikwa Siria luwo̧ ujulu jwii̧ wene öwawatö i̧sebakobe, mikwawö̧kö̧ja, ötjödanö juluwö̧kö̧ja jö̧ba̧lö.

Mateo 28:19

jo̧kwajabetjö̧ baikwö wetaduwakwö: Böjȩ bakwameachibanö tjitebokwena jojodönö yöbawö, ösödadönö chöba̧ja̧di̧ waisachadö batjibanö yöbawaduwi. Ja̧danö, Chabe'do Diosbi, ötjö Dios Itji̧bi, Dios O̧'wo̧ Luwo̧bi ökwödönö wedobetjö̧, diminö jobadönö ojwenö bu̧dataduwi.

Marcos 16:15

Ikenama Jesúsma jö̧ba̧lijetö jobadönö: —Wetaduwakwö. Böjȩ okobe jwiinö 'ya̧duwi Dios otiwa jawa wene okobe deinö Dios otidinawö̧nö yökawaduwo.

Lucas 2:34

Jemi ikenama Simeonma Diosnö aebinobe, jobadönö pjaatobö, ja̧danö tjemu ojo'do Maríanö yöawinobe baikwö: —Bite tjemuma Dios 'da̧batö ujuninökwe, Israel jojodötjö ba̧jekwadö jo̧banö öpöjödö mebö metjakobetjö̧, ja̧danö ju'wedö jo̧banö ösödö tjo̧'wo̧ ösöwachibakobetjö̧. Jojodönö i̧sebotö jö̧ba̧lö Dios weinökwe bitema, jo̧kwaijayonö ba̧jekwadö jo̧banö tjöpöjödakobe.

Romanos 15:21

Dios iwene laebi̧danö ju'wedö yötjawokobe yötawijatö. Baikwö laebobe Dios iwene, damötjö tjiwȩyudinama: Jo̧banö ajayinö a̧ja̧kwöködöma jo̧banö tjedakwedö, ja̧danö jo̧banö ajayinö a̧ja̧kwöködöma jo̧banö tjöwaisachibakwedö, jö̧ba̧lö laebobe Dios iwenema.

Efesios 3:8

Chömöledö, ötjöma ju'wedö Dios ömöledö babibinadötjö baikwönönöda jo̧sa. Jejenöijayonö Diosma ötjönö lȩlö̧jino edö 'da̧batö ujuninobe, judío jojodöböködönö yötawobö, Cristoma jwiinö pjabato̧, jwiinö otiwo̧, jwiinö juluwo̧, jö̧ba̧lö. Ja̧ jawa, Cristo pjaati̧, otiwi̧, ujuluwi̧ jawa kaatiboböma jwibo̧, jö̧ba̧lö, yötawobö 'da̧batö ujuninökwesa.