Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -




Isaías 65:16 - Dios Iwene

16 Ja̧ möle israel jojodönö chödameakwi̧ katatibakwo̧sa, ja̧danö cho̧'wo jwitibakwo̧sa, ajayinö israel jojodö sulabenö ja̧bö tjö̧jinama. Ja̧danö, ja̧ möle ju'wedö diosböködönö atjebökakwedö, sule ötjö isabenö Diosbo̧nöda atjebakwedö. Ja̧danö ja̧tja̧kwa̧ yöbawö tjujunenama, sule ötjö isabenö Diosbo̧ chiminöda yöbawö tjujunakwedö, jö̧ba̧lö yöawobe Diosma.

အခန်းကိုကြည့်ပါ။ ကော်ပီ




Isaías 65:16
34 ပူးပေါင်းရင်းမြစ်များ  

—Jau Job, yötawaja̧danö ja̧köbitjö̧ma, isabenö otiwanö kwö̧jakwo̧ja, babe usula kwemawi̧ jawa kwo̧'wo jwiköbenanö baibanö. Kwöwaisa, juluwanö tjo̧'wo jwibibadö jojodöma, tjöba a'o ojwe isuwajobuma, jö̧tö? Ökwö usula kwemawi̧bi ja̧danö, jwiinö otiwanö kwö̧jakobetjö̧, juluwanö kwo̧'wo jwikibakwo̧ja, babe usula kwemawi̧ma.


Ikenama Moisés öba a'o baledö baikwö jwöbijetö: Ötjödasa Isabenö Jo̧ma, ötjödasa Isabenö Jo̧ma. Ötjödasa lȩlö̧jinö edo̧ Diosma, ja̧danö, dö̧sölö̧jinö edö pjabato̧ Diosma. Ja̧danö, ötjödasa jojodönö juluwanö cho̧'wo sulinö edö̧kö̧ Diosma. Ja̧danö, ötjödasa jwiinö ile nibebo̧ Diosma, balewachökönö. Ja̧danö, ötjödasa yöbawö chujuni̧danö ja̧bo̧ Diosma.


Jau, damötjö israel jojodö Egipto nijitjö latjebena, jwaibalawa ö'wejenö jalama po̧ebinadanö, Asiria nijitjö jalama baibanö ujunakobe Diosma, iteda ömöledö israel jojodötjö ina 'yaba̧ladöma jweinö tjitebobe tjetjachajakobetjö̧.


Ja̧ möle jwiinö Diosnö yetjabobetjö̧, Egipto niji comunidadbiyatjö̧, bakwamu jawa comunidadbiya jojodöma Isabenö Jo̧ Diosnö tjösödakwa̧ wene yöbawö tjujunakwedö, —Isabenö Jo̧ Diosnöda dösödakwedösa, —jö̧ba̧lö, ja̧danö jobekwö yöbawö junö, bemi canaan niji ju̧kwadö diwene, israel jojodö diwene waisachibö, idöda tjiwene baibanö yötja̧lakwedö. Ja̧ comunidadbiyatjö, bakwöta comunidadma, Möle Jawo̧ Comunidad, jö̧ba̧lö ötjabikobe.


Tjöpöjojodö tjujulutjwö Isabenö Jo̧ tjö̧jibinö pjaatinawö̧ jamabenö Sion mösa'obe tjȩwa̧jakwedö. Tjo̧'wo ösöwachibanö lo̧awa lo̧bö, Sion mösa'obe tjichibakwedö, ja̧danö 'dö̧bibajökönö, ba̧kwelöjatebö tjo̧'wo ösöwanö tjö̧jakwedö. Ja̧ möle la'akatjöda o̧'wo tjo̧achö tjö̧jökakwedö, ja̧danö la'akatjöda usula tjemawökakwedö, Isabenö Jo̧ pjaatiawö̧, jwaikwöda ba̧kwelöjatebö tjo̧'wo ösöwanöda tjö̧jakwedö.


Baikwö laebobe Dios yöawi̧, Judasaso jojodönö: Ökwödö Jacob ömöledö, israel jojodö ötjabawö̧ma, ökwödönö yötawi̧ kwa̧ja̧kwaduwo. Ökwödöma Juda itji̧mu tupadanö jojodöja, ja̧danö ökwödö yöbawö kwujunaduwenama, ötjö Isabenö Jo̧ Dios chiminö yöbawö junadöja, ja̧danö yöba̧ladöja, —Ökwödöma Israel jojodö tjösödökwe Diosnö ösödadösa. Ja̧danö iteda itebo comunidad baibanö Dios 'da̧batö ujuninemi comunidad jojodösa. Isabenö Jo̧ Okobe Jwiinö Juluwo̧ Dios jö̧ba̧lö mikwo̧nö do̧'wo wana̧ladösa, —jö̧ba̧lö yöba̧ladöja. Jo̧kwaijayonö, jobekwö wamenö yöka̧laduwijayonö, omöna, ökwödöma ötjö weti̧ a̧ja̧kwöködöja.


Tupakwö Jerusalen comunidad jawa wanedö yöawinobe Diosma, jojosujunö yöa̧li̧danö: Yebabökönui Jerusalen, bemi tupakwö tabakwö kwöjökakwujuja. Kwo̧'wo tjo̧kekwobö jwiobe, isabenö ökwönö tabakwö kwö̧jobö wetjökakobetjö̧. Jau, ina möayuju kwö̧jayi, tabakwö kwö̧jinajayonö, ja̧ tabakwö kwö̧jina kwo̧'wo jwikibakwujuja. Ja̧danö, —Bisuma jilekwe wobekwinuju mikwawökuju, —jö̧ba̧lö yötja̧lioko taba lö̧jinajayonö, bemi tupakwö ja̧ sulabenö tjomukwatioko taba lö̧jinö kwö̧jinama la'akatjöda kwomukwatibökakwujuja.


Jau, ökwö kwilekwedanöbo̧ma, ökwönö otidina Isabenö Jo̧ Okobe Jwiinö Juluwo̧ Dios jö̧ba̧lö mikwo̧da. Ökwönö kwö̧ji̧binö pjabato̧ma, Israel jojodö tjösödökwe Suli̧ Jwibo̧ Dios, okobe deinö bö̧jȩnö ju̧kwadö tjuluwo̧ Dios jö̧ba̧lö ötjabökweda kwilekwedanöbo̧ma, jo̧kwajabetjö̧ tabakwö kwö̧jobö jwibujuja.


Ja̧danö ötjöma cho̧'wo ösöwanö chö̧jakwo̧sa, —Chitebo comunidad Jerusalenma isabenö otiwobe, ja̧danö chömöledö Jerusalennö ju̧kwadöma isabenö otiwadö, —jö̧ba̧lö. Ja̧danö jemi tupakwö, o̧'wo tjoachö tjubudekwökakwedö Jerusalennö ju̧kwadöma, jemi tupakwö tjubudekwobe ökwöi̧ma, la'akatjöda ökwöökakobe.


Tupakwö yöawinobe ángelma Danielnö: —Ja̧danö, ja̧ yötawaja̧ jawa baledaja̧ ikena, Miguel, inesö ökwödö Israel jojodönö te'ada̧lakwawa luwo̧ ángelso̧ma ichakobe. Isabenö yötawakwö ja̧ mölema nöinö usula tjemawakobe kwömöledö Israel jojodöma, la'akatjöda ja̧ jaye usula emawakwawa edajiböködö Israel jojodöma, ökwödötjö ajayinö ji̧nadö tjö̧jinatjö baikwö bajalenö, jwiinö nöinö usula tjemawakobe. Jo̧kwaijayonö, ja̧ möle ju'wibi baledakobe, Diosma kwialu'ye ujunalobe, bidöma ja̧kwawa juna̧ladö jö̧ba̧lö wȩyukwa'yema, ja̧danö okobe deinö ja'yenö tjimibiya wȩyudö lödawedönöma, tjö̧jibinö pjaatakobe Diosma.


Ja̧danö, 'dö̧ibaji̧ möle Diosnö öpöjödo̧ma, möletenia Diosnö iyawa katjatibobö ja̧akobe, ja̧danö inesö suli̧ jawa Dios ejunö ujunakobe. Ja̧ möle ikena, mil doscientos noventa möle baledakobe, 'dö̧ibakwa̧ abönö.


Ja̧danö, Dios Iwene Jo̧, jö̧ba̧lö, ötjabökwema jojo baibanö jeminökwe. Ja̧danö, jojo baibanö jeminökwema böjȩnö ökwödökwö ö̧jinobe. Ökwödöma jo̧banö edö, Jwiinö otiwo̧, jö̧ba̧lö, dösödijatö. Yelösöda, jo̧bama Dios Itji̧, iteakwo̧daobetjö̧ jwiinö otiwo̧. Ja̧danö, jo̧bama jwiinö lȩlö̧jino edöda pjabato̧. Ja̧danö, jweinöda yöba̧lo̧.


Damötjö Diosma iyinobe Moisésnö ökwödönö yöawobö, iteda weina jawa wene, a̧ja̧kwö dö̧jobö weinama. Jo̧kwaijayonö Moisés weinatjö̧ Diosma i̧sebinokobe iteda lȩlö̧jino edi̧ma. Iteda weina jawada i̧sebinobe. Ja̧danö Diosma Jesucristonö weenama ja̧ Moisésnö weinatjö o̧penönö mikwawi̧ma iyinobe ökwödönöma. Ja̧danö, Jesucristonötjö Diosma i̧sebinobe iteda jwiinö lȩlö̧jino edi̧ma, jojodönö pjabatö. Ja̧danö, Jesucristonötjö Diosma itedada jweinö yöa̧lina i̧sebinobe ökwödönöma, Ötjö jö̧ta̧li̧danö isabenö ja̧bo̧sa, jö̧ba̧lö.


—Ötjödasa Dios ö̧jobekwö 'ya̧kwawa manama— yöawinobe Jesúsma—. Ja̧danö, ötjödasa jweinö yöbawo̧ma jweinö jo̧chobetjö̧. Ja̧danö, ötjödasa ba̧kwȩlö̧jatebö ja̧kwawa iyo̧ma. Ja̧danö, ötjöma Dios ö̧jobekwö 'ya̧kwawa manachobetjö̧, ötjönöda 'yo̧ma Dabe'do Dios ö̧jobekwö ichibakwo̧.


Baikwö laebobe Dios iwene, jojodö Dios öba a'otjö tjö̧jakwa̧ma: Ötjö La'aka Luwo̧ Diosma isabenö yöbawö chujuna, jojodö ja̧tjakwa̧ma. Okobe deinö jojodöma chöba a'otjö ja̧nö, bȩbachibö yötjawakwedö, Biteda inesö La'aka Luwo̧ Dios, jö̧ba̧lö laebobe Dios iwenema.


—Kwuluwo̧duwi Isabenö Jo̧ Diosnöda yebabinö omukwatö kwösödaduwo chömöledö, jo̧banöda bȩbachibö kwösödaduwo, jo̧banöda do̧ba̧lö kwö̧jaduwo, –Duluwo̧ Dios, –jö̧ba̧lö, ja̧danö jo̧ba iminöda yöbawö kwujunaduwo, –Yöbawö chujunaja̧danö ja̧bökönö, wainö ja̧titjö̧ma, Isabenö Jo̧ lȩebobö ja̧kobe, –jö̧ba̧lö.


Jo̧ba Diosma inesö tjöeba̧la̧wa inawadanöbo̧, ja̧danö okobe jwiinö ja̧bö ö̧ji̧ma, otiwanö ja̧bö jo̧. Jojodönö wainökwena edökönö, bakwainö jweinö edo̧ jojodönö. Jo̧ba dösödökwe Diosma omöna yöba̧lö̧kö̧, ba̧kwelöjatebö jö̧a̧li̧danö ja̧bo̧, ja̧danö la'akatjöda sulabenö ja̧bö̧kö̧.


—Chömöledö, kwuluwo̧duwi Isabenö Jo̧ Diosnö yebabinö kwomukwataduwo, –Isabenö Dios wei̧ cha̧ja̧kwobö jo̧be, –jö̧ba̧lö. Jo̧banöda ösödö kwö̧jaduwobö jo̧be, ja̧danö isabenö ja̧köbaduwakwa̧ wene yöbawö kwujunaduwenama, kwuluwo̧duwi Isabenö Jo̧ iminöda wanedö yöbawö kwujunaduwo, –Yöta̧löködanö sulabenö ja̧titjö̧ma, Isabenö Jo̧ ötjönö lȩebobö jȩna, –jö̧ba̧lö.


bȩbachibö öwaetjöda yötjawakwedö, Jesucristoma inesö la'aka luwo̧ jö̧ba̧lö, ja̧danö jejenö yötjawi̧ma, öwaetjöda i̧sebakobe, Abe'do Diosma isabenö otiwanö ja̧bo̧ jö̧ba̧lö.


Ja̧danö, chedijatö ba̧kwawa ökiya, nöinö, la'aka luwedö tjö̧baji̧ ökiya. Ja̧ ökiyanö ba̧jadöma Dios lȩebakwa̧ jawa yötjawobö ba̧jadö. Ju'wedönöbi chedijatö, öwawöködönö. Jobadöma tjuubiya bulabinö lotjinawö̧, Dios iwenebi Jesús yöawinabi yötjawobetjö̧. Jobadöma ojwe okwatjö labebinanö, jo̧ba o̧'wo̧ jawabi öpöjödadö. Ja̧danö, jo̧ba imi número doawa, tjömamunöbi tjöbanöbi öpöjödadö. Jejenö tjöpöjödobetjö̧, tjuu bulatö lotjinawö̧. Ja̧danö, jobadöma wotjinajayonö yemidanö 'yabibajinadö, Cristokwö jojodönö webö tjö̧jobö, ja̧ mil imiamebiya jenanö.


ကြှနျုပျတို့နောကျလိုကျပါ:

ကြော်ငြာတွေ


ကြော်ငြာတွေ