Isaías 64:7 - Dios Iwene

⁷ Babe ökwönö abebadöma deobe ditebotjö chuluwo̧, bakwo̧bi jwaikwöda ökwönö ösödö jo̧ma deobe. Jau chuluwo̧, dö̧jelö jelobekwö kwöjalachibajabe chuluwo̧, ökwödönö edökönö, —Wainö sulabenö ja̧bö ja̧nö, usula tjemawo, —jö̧ba̧lö iyö loköbajabe chuluwo̧.

Isaías 64:7 ပူးပေါင်းရင်းမြစ်များ

Diosnö ösödo̧ Job mikwo̧ usula emawina jawa 10:9

Kwomukwatibobö atebakwö chuluwo̧, lete'otjö kwotidinobe ötjönö, jö̧tö? Babema yemidanö nijiso̧pja̧ batibanö loköbobö kwomukwatobeji̧?

Diosnö ösödo̧ Job mikwo̧ usula emawina jawa 8:4

Jau Job, Diosma kwitji̧munö lȩbebö, jobadönö kwabö loinobe, jo̧kwajabetjö̧ öwaetjöda öwawobe, kwi̧tji̧mu sulabenö ja̧tjiökwe, jobadönö lȩbebö kwabö loinobe, jö̧ba̧lö. Sulabenö ja̧böködönö lȩbȩbö̧kö̧ Diosma, jo̧kwajabetjö̧ öwaetjöda öwawobe, jobadönö lȩebinenama, sulabenö ja̧tjina mikwa baibanö jobadönö lȩebinobe, jö̧ba̧lö.

Éxodo 32:12

Jobadönö söbebö loköbitjö̧ma Egipto jojodöma sulabenö yötja̧lena, Israel jojodö tjösödökwe Diosma jobadönö mö'ösa'ijunö söbebö lootö jö̧ba̧lö öbibö i̧'yinobe, böjȩnöma detjakobetjö̧, jö̧ba̧lö. Isabenö Jo̧, kwo̧'wo̧ sulinö kwedoko, ja̧danö jobadönö söbebö loköbobö kwomukwati̧ kabatibö kwöbalewo, jobadönö söbebö lobökönö.

Isaías 1:15

Jo̧kwajabetjö̧, ötjönö abebö kwa̧ja̧kwaduwakobetjö̧, kwömamijuduwi kabebö dekataduwenama, jalachibö jelobekwö edo̧sa, ja̧danö nöinö abeba̧lö ötjönö akebaduwenama, a̧ja̧kwö̧kö̧sa, jojodönö sulabenö kwabö lobajadö, kwömamuduwi̧ tjökwösobu 'yoliwinö kwö̧jaduwobetjö̧.

Isaías 27:5

—Ju'wibi chösödena, sȩakadanö ichejekwadöbi, ju'wi sula'wodanö ichejekwadöbi, chöbatjo öpöjojodö tjö̧ji̧ kabatibö, chömöayedö batjibanö tjichobö chösödena. Ölakwabikwawa kabatibö, ötjökwö wene jwiinö tjöjakwa̧ yöbawö tjujunobö chösödena, —jö̧ba̧lö wanedö yöa̧lobe Diosma.

Isaías 45:9

Ayö, bakwo̧ jo̧banö otidina Dioskwö ölakwabikwawö jo̧ma, isabenö wene juna̧lo̧. Jo̧bajayo̧nö baikwö wanedö yöta̧la: Jo̧bajayo̧ma, sule lete'otjö dadawayu i̧sa̧yu, jeleyubiya 'da̧de ja̧yu mikwawököyudanö ichejekwo̧. Ja̧danö, lete'oma, dadö otido̧nö, —Taji kwotida? Sulabenö otido̧ja, lete'otjö otikwa wajwibo̧ja, —jö̧ba̧lö yöa̧lobö jȩnaji̧?

Isaías 50:2

Ja̧danö ökwödönö pjatatotö jö̧ba̧lö chichenama, tajawedö deköbinaduwada? Ökwödönö jwötenama, tajawedö bakwo̧bi atadinököda? Kwö̧jibaduwinö pjatatobö chujuluwokobetjö̧, pjatato jö̧ta̧linama waekwinaji̧? Ja̧maökö chömöledö, isabenö juluwo̧sa. Yöba̧löda jwaibalawa webö, —Kököbachibi, —jö̧ba̧lö wetitjö̧ma, juluwanö kököachibawa. Ja̧danö ojwebiya lamatemi kököachibobö wetitjö̧ma, juluwanö kököemi baibanö balewachobe, ja̧danö okwa lö̧ji̧nadö ba̧i̧ma, juluwanö ö'wö babibö woinö 'dö̧ekwobe.

Isaías 54:8

Jau, jwiinö ökwönö chödameakwobetjö̧, juluwanö lekwökönö jelobekwö chöjalachibijatö, ökwönö öpöjödö, jo̧kwaijayonö lekwemaökö. Ja̧danö ökwönö lȩlöjinö edö ile 'di̧tebi̧ma, ba̧kwelöjatebö 'dö̧ibajökönö ökwönö ile 'di̧tebakwo̧sa, jö̧ba̧lö wanedö yöa̧lobe Isabenö Jo̧, Jerusalen jojodönö tjö̧jibinö pjabato̧ma, Jerusalennö ju̧kwadönö.

Isaías 56:4

Jobadö tjöla'yapi 'wibebö lotjinawö̧, weti̧danö otikwökö möle otiwanö otidökönö, chösödi̧ jawa ja̧tjobö omudawö junö, —Dios wei̧ da̧ja̧kwobö jö̧ba̧ladösa, —jö̧ba̧lö israel jojodönö weti̧ a̧ja̧kwö ju̧kwadöma,

Isaías 57:17

Jojodö idöda tjujuna̧lotö jö̧ba̧lö, sulabenö ja̧bö tjö̧jitjö̧, jobadönö chödameakwijatö, ja̧danö lȩbebö, jobadönö lȩtebijatö. Ja̧danö dameakwö ja̧nö, le'dedö lotijatö, —Wainö usula emawö tjö̧jo, —jö̧ba̧lö. Jo̧kwaijayonö, jobekwö jobadönö lȩtebinajayonö, sulabenö ja̧bö tjö̧ji̧ma katjatibinokobe, jwaikwöda idödada tjomajadenö tjösödi̧danö ja̧bö tjö̧jinobe.

Isaías 59:16

Ökwödönö edö, —Tajawedö jojodö sulabenö ja̧tjawö̧nö pjabato̧ deobejö? Tajawedö bakwo̧bi tjö̧'da̧de jamatö, sulabenö ja̧tji̧ katjatibobö weokobejö? Bakobe sulabedö israel jojodöma, —jö̧ba̧lö öpöjödö edajabe. Jo̧kwajabetjö̧ jelo̧ pjabato̧ deiökwe, Diosda dö̧jibinö pjaatakwo̧. Bakwainö otiwanö ja̧bö jo̧ ö̧jobetjö̧, iteda ujulu i̧sȩbö dö̧jibinö pjaatakwo̧.

Isaías 59:2

Ökwödönö pjabatökönö ö̧ji̧ma, baikwö labebö lobö yötawaduwakwö chömöledö: Ökwödö sulabenö ja̧bö kwö̧jaduwi̧ma, tjöekwemidanö ji̧, Diostjö 'da̧bachibö kwö̧jaduwakobetjö̧. Ja̧danö sulabenö ja̧bö kwö̧jaduwiökwe, kwö̧jaduwelö jelobekwö öjalachibajabe Diosma, ja̧danö akebaduwi̧ a̧ja̧kwö̧kö̧.

Isaías 59:4

Lȩekwa luwedö tjöba a'o tjö̧jobö jojodönö ökibaduwenama, jweinö lȩekwa yötjawoböma isakwöködöja. Ökibaduwajökwenö lȩekwa yötjawobö jwiijayonö, tjöba a'o ja̧nö, omöna yöba̧ladöja. Ökwödöma ba̧kwelöjatebö ju'wedönö suli̧ kwöwaedaduwakwa̧ omukwatö junadöja, ja̧danö omukwatö kwujunaduwaja̧danö badekwachinö sulabenö ja̧badöja.

Isaías 63:16

Ökwöma dabe'doja chuluwo̧. Da'dömine Abrahamma ökwödönö wajwibo̧, ja̧danö da'dömine israel mikwo̧bi ökwödönö omukwatö̧kö̧, jo̧kwaijayonö ökwö Isabenö Jo̧ma, ökwödaja dabe'dobo̧ma. Jau chuluwo̧, damötjö baikwö bajalenö, Israel jojodönö tjö̧jibinö pjabato̧, jö̧ba̧lö mikwo̧ja, isabenö ökwöda dabe'do jo̧ja.