Isaías 63:8 - Dios Iwene

⁸ Israel jojodönö yöa̧linobe, —Isabenö ötjöda chömöledö bidö israel jojodöma, chitji̧mu ja̧nö, la'akatjöda ötjönö katjatibökakwedö, —jö̧ba̧lö. Ja̧danö tjö̧jibinö pjabato̧ baibanö, jobadönö pjaatinobe.

Isaías 63:8 ပူးပေါင်းရင်းမြစ်များ

Génesis 17:7

Abraham, ökwönö yöbawö chujuni̧danö isabenö badekwachakobe. Ja̧danö, bakwelöjatebö ja̧kobe, ökwötjö tupadanö jojodönöbi yöbawö chujunobetjö̧. Abraham, ötjöma ökwö Kwuluwo̧ Diossa. Ja̧danö, ökwötjö tupadanö jojodöbi Tjuluwo̧ Dioschakwo̧sa.

Éxodo 14:30

Ja̧ mölema, Isabenö Jo̧ma jejenö Israel jojodönö Egipto jojodötjö tjö̧jibinö pjabatijetö. Ja̧danö, Israel jojodöma edijadötö Egipto jojodö o̧bawö wobajadö, o̧pesobu ö'öbönö lö̧jadönö.

Éxodo 24:7

Ikenama Isabenö Jo̧ weawa wene iwȩyudajöjama emibö 'bobebö yöba̧lijetö Israel jojodönö. Ja̧ Isabenö Jo̧ weawa wene yöa̧liawö̧, ¡Jao otiwa! Isabenö Jo̧ wei̧da a̧ja̧kwö duju̧kwakwedösa, ja̧danö, jo̧ba wei̧da ja̧dakwedösa, ösödijadötö Israel jojodöma.

Éxodo 3:7

Ikenama Isabenö Jo̧ma jö̧ba̧lijetö: —Isabenö chedobe ötjö chömöledönö, Egiptonö ju̧kwadönö juluwanö tjotidobö wetjobema, jwiinö inia tjötjinö. Ja̧danö, tjuluwedötjö tjö̧jibinö pjatatobö jwötjeba̧li̧ma cha̧ja̧kwobe. Chöwaisa, jwiinö usula tjemawobe, jö̧ba̧lö.

Éxodo 6:7

Ja̧danö, ökwödöma ötjö chömöledö bakibaduwanö pjatatakwo̧sa. Ja̧danö, ötjöma ökwödö Kwösödaduwökwe Dios chö̧jakwo̧sa. Ötjö pjatati̧ waisachibö yöka̧laduwakwedöja, Isabenö Jo̧ma, ökwödö Dösödaduwökwe Diosma Egipto jojodö juluwanö dotidobö wetji̧tjö dö̧jibinö pjabato̧, jö̧ba̧lö.

Isaías 12:2

—Jau, edaduwi, Diosda ökwödönö dö̧jibinö pjabato̧ma, jo̧kwajabetjö̧ jo̧banö do̧'wo wa̧nalö ja̧nö, yebabökönö dö̧jakwedösa. Jau, Isabenö Jo̧ Diosda dujuluwachibanö pjabato̧ma, jo̧bada dö̧jibinö pjabato̧ma, ja̧danö döpöjojodötjö dö̧jibobö pjaatinobetjö̧, jo̧banö ösödö lo̧badösa, —jö̧balö yöka̧laduakwedöja.

Isaías 19:20

Ja̧danö, ja̧wa tjujunaja̧wa inawama, Egipto niji jojodö edö tjomukwatibobö ja̧kobe, Isabenö Jo̧ Okobe Jwiinö Juluwo̧ Diosnö, —Bemi niji Egipto nijitjö, Isabenö Jo̧ Diosnö dösödobö jo̧be, —jö̧ba̧lö. Jau, Isabenö Jo̧ Diosma Egipto jojodönöbi tjö̧jibinö pjaatakwo̧. Ju'wedö labinö webö tjö̧jiawö̧, usula emawö tjö̧jelö, Isabenö Jo̧nö budekwö atjebakwedö, ja̧danö atjebökwe, tjö̧jibinö pjaatakwo̧, tjöbeba̧lö̧ ölakwabikwawo̧nö weakobe, tjö̧jibinö pjaatakobetjö̧.

Isaías 3:15

Jobekwö ötjöda chömöledö juda jojodönö suli̧ kwöwaedaduwobö jwibadöja, ajayitjö bajalekwönönö usula jojodö usula tjemawinö kwöwaedaduwobö jwiobe, isabenö sulabedöja, —jö̧ba̧lö lȩbebö yöawakobe Okobe Jwiinö Juluwo̧ Isabenö Jo̧ Diosma, Juda jojodötjö luwedönö.

Isaías 41:8

Tupakwö laebobe Dios yöa̧li̧: Ökwödö Israel jojodöma, isabenö ötjöda chömöayedöja. Ökwödöma omudawö chujuninökwe Jacob itji̧mu tupadanö jojodöja, ja̧danö chömöledöso̧ Abraham itji̧mu tupadanö jojodöja.

Isaías 43:11

Jau, ötjödasa Isabenö Jo̧ Diosma, ötjödasa isabenö tjö̧jibinö pjabato̧ma, jelo̧ma deobe.

Isaías 43:3

Jau chömöledö, ötjöma kwuluwo̧duwi Isabenö Jo̧ Diossa, ötjöma ökwödö Israel jojodö kwösödaduwökwe Suli̧ Jwibo̧ kwö̧jibaduwinö pjabato̧ Diossa, jo̧kwajabetjö̧ isabenö jobekwö pjatatakwo̧sa ökwödönö. Isabenö chösödaduwakwö ökwödö israel jojodönö, baikwö yöta̧la: Ökwödö kwö̧jibaduwoböma, Egipto jojodönö iyö lotajabe, ja̧danö Cus jojodönöbi, Seba jojodönöbi iyö lotajabe, ökwödöda kwö̧jibaduwakobetjö̧.

Isaías 51:4

Chömöledö, yötawi̧ otiwanö kwa̧ja̧kwaduwo, yötawakwa̧ otiwanö kwa̧ja̧kwaduwobö jo̧be chö̧mö̧ledö̧. Jau chömöledö, bö̧jȩ ba̧kwemeachibanö ju̧kwadönö chö̧ba̧ja̧di̧ yötjawobö wetakwo̧sa, ja̧danö ja̧bö tjö̧jobö weti̧ma, tjitebotenia jojodönö dejuwa̧'yudanö ja̧kobe.

Isaías 57:11

Chömöledö israel jojodö, tinö yekabinaduwada? O̧'wo jawa jwiinö yekabiduwobetjö ötjönö omöna yöka̧laduwaji̧? Tajawedö ötjönö kwo̧'woduwi jwikibaduwaja̧da, ja̧danö, —Dios ösödi̧ma di̧yajö, —jö̧ba̧lö tajawedö omukwatökönö kwö̧jaduwobeda? Lekwe möle ötjöma wi̧inö ja̧nö, ökwödönö lȩbebökönö chiteada̧lobetjö̧, ötjönö yebaböködö bakibaduwaji̧?

Isaías 60:16

Jau, tjitebotenia jojodö tjiteabi, inesö la'aka luwedö tjiteabi, ökwödö israel jojodöda otiwanö kwujuna̧laduwakwedöja. Ja̧danö jobekwö balediawö̧, otiwanö kwöwaisachibaduwakedöja, Ötjö Isabenö Jo̧ Diosda kwö̧jibaduwinö pjabato̧ma, jö̧ba̧lö. Jau chömöledö, —Jacob ösödinökwe Inesö Juluwo̧ Diosda dö̧jibinö pjabato̧ma, —jö̧ba̧lö kwöwaisaduwakwedöja.

Isaías 64:8

Chuluwo̧ Isabenö Jo̧, dabe'doma ökwödaja. Ja̧danö, ökwöma lete'otjö dadö otido̧danö jo̧ja, ja̧danö ökwödöma kwotidaja'o lete'odanö ja̧dösa, okobe deinö ökwödöma ökwöda kwotidinawö̧sa.

Isaías 64:9

Chuluwo̧ Isabenö Jo̧, jwiinö dameakwö kwö̧joko, kabatibökönö sulabenö ja̧bö dö̧ji̧ omukwatö kwö̧joko. Atebakwö chuluwo, dö̧jobekwö kwedo, kwo̧'wo jwikiboko, —Okobe deinö Israel jojodöma ötjöda chömöledö, —jö̧ba̧lö.

Juan 1:47

Ja̧danö, Jesúsma jobadö yöneawinö tjichibajena ju'wedönö yöawinobe Natanaelnöma: —Edaduwi. Bite Natanaelma inesö Israel jojo, Israel jojodö tjö̧jo jö̧tja̧li̧danö omukwatö jo̧. Isabenö otiwanö omukwato̧ itema. Omöna yöba̧lö̧kö̧— yöawinobe Jesúsma Natanaelnöma.

Romanos 11:28

Chömöledö, Israel jojodöma otiwa jawa wene tjöpöjödobetjö̧, Dios öpöjojodö tjuju̧kwobe. Ja̧danö öpöjojodö tjuju̧kwiökwe, lȩlö̧jinö edo̧ Diosma, ökwödö Israel jojodöböködönöma. Jo̧kwaijayonö ina ösödo̧ Diosma, Israel jojodönöma, jobadö tja'dödöminenö omudawö ujuninobetjö̧.

Efesios 4:25

Jo̧kwaobetjö̧, Dios isabenö omukwati̧danö omukwatö kwö̧jaduwobetjö̧, sulabenö omukwatö, omöna yöba̧löma kwö̧jaduwa chömöledö. Ökwödöma bakwo̧nökwena omönama yöka̧laduwoko kwö̧jaduwemi ju̧kwadönöma. Jobadönö, Jesúsnö ösödadönö, jweinö yöka̧laduwo, ökwödöma bakwainö Jesús iteba'obedö dö̧jobetjö̧.

Deuteronomio 32:5

Jo̧kwaijayonö ökwödö israel jojodöma, jo̧ba kwabe'doduwi Dios otiwo̧ ö̧ji̧danöböködöja. Dios itji̧muköbaduwijayonö, jo̧ba itji̧mu otiwanö ja̧bö tjö̧ji̧danöma ja̧bö jö̧ködöja. Jau, kwabe'doduwi Diosnö öpöjödö, ökwödöma omöna yöba̧ladö ja̧danö jwiinö sulabedöja.

Deuteronomio 33:29

—Isabenö kwo̧'woduwi ösöwanö kwö̧jaduwobö jo̧be israel jojodö, ju'wedö bö̧je jojodötjö bajalekwönönö Isabenö Jo̧ma otiwanö pjaatobetjö̧. Jau chömöledö, ökwödödanöbedö Dios otiwanö pjaatawö̧ma deobe bö̧jetjö, baikwö yötawa: Isabenö Jo̧ma ökwödönö kwö̧jibaduwinö pjaatinobe, ja̧danö tjöekwapi ji̧danö ökwödönö tjöbeba̧lö pjaatobe, ja̧danö kwölöte'o ji̧danö ölakwabikwawö kwujuluwaduwobö pjaatobe. Jo̧kwajabetjö̧ kwöpöjojodöduwima kwö̧jaduwobekwö bȩbachibö atjeba̧lakwedö, jobadönö lȩlö̧inö kwedaduwobö, ja̧danö jobadönö juluwajadö tjiteboinemi niji mösa'ijunö kwekachaduwakwedöja, —jö̧ba̧lö yöawinobe Moisesma, israel jojodönö.

Colosenses 3:9

Ja̧danö kwömöledöduwinöma omöna yöka̧lakwawaduwoko. Jau chömöledö, wanedö yötawa: Kamijido̧ yo̧tjekwi̧danö ökwödöma ida̧ökö sulabenö kwösödinaduwabi, sulabenö ösödö ja̧köbinaduwabi kabatibö yo̧kekwinaduwobe ichejekwa,

1 Juan 4:14

Ja̧danö chö̧ja̧wo̧dö ju'wi jawabi, Dioskwö dötewinö 'ya̧dösa, jö̧ba̧lö, döwaisoböma. Ökwödö Jesucristonö edinadöma dedina yöbawadösa, Dabe'do Diosma iteda Itji̧nö weinobe böjȩnö ju̧kwadönö tjö̧jibinö pjabatö, jö̧ba̧lö.

Judas 1:25

Jau chömöledö, Diosma bakwo̧da, jelo̧ma deobe, ja̧danö Duluwo̧ Jesucristonötjö Diosda dö̧jibinö pjaatajabe. Jo̧banöda okobe deinö tjösödo jö̧tja̧lökwema, jo̧bada inesö salöinö dejato̧ma, jo̧bada okobe jwiinö juluwo̧ma, jo̧bada inesö la'aka luwo̧ma, la'akatjö böjȩ otidakwa̧ abönöbi, babebi, ba̧kwȩlö̧jatebö 'dö̧ibajökenanöbi, jejenö otiwa. Biya̧data.

1 Samuel 12:22

Isabenö Jo̧nö kakatibaduwoko chömöledö, jo̧bama isabenö ökwödönö kabatibö̧kö̧. Jau chömöledö, kwuluwo̧duwi imima Isabenö Jo̧ jö̧ba̧lö mikwo̧, jo̧bada Inesö Isabenö Jo̧obetjö̧. Ja̧danö, iteda ösödi̧danö, ökwödö israel jojodönö omudawö ujuninobe, Isabenö Jo̧ ömöledö bakibaduwanö. Jo̧kwajabetjö̧, ja̧ wene omukwatö, ökwödönö kabatibö̧kö̧ Isabenö Jo̧ma chömöledö, —jö̧ba̧lö yöawinobe Samuelma.