Isaías 63:16 - Dios Iwene

¹⁶ Ökwöma dabe'doja chuluwo̧. Da'dömine Abrahamma ökwödönö wajwibo̧, ja̧danö da'dömine israel mikwo̧bi ökwödönö omukwatö̧kö̧, jo̧kwaijayonö ökwö Isabenö Jo̧ma, ökwödaja dabe'dobo̧ma. Jau chuluwo̧, damötjö baikwö bajalenö, Israel jojodönö tjö̧jibinö pjabato̧, jö̧ba̧lö mikwo̧ja, isabenö ökwöda dabe'do jo̧ja.

Isaías 63:16 ပူးပေါင်းရင်းမြစ်များ

1 Crónicas 29:10

Jemi ikenama, okobe deinö jobe ko̧ko̧kwadö tjöba a'o ja̧nö, Davidma Diosnö ösödö aebinobe: Chuluwo̧, da'dömine Israel ösödinökwe Isabenö Jo̧ Dios, ba̧kwelöjatebö 'dö̧bibajökönö ösödö yöda̧lökweja.

Diosnö ösödo̧ Job mikwo̧ usula emawina jawa 14:21

Jwiinö juluwo̧ja ökwödönö chuluwo̧, baikwö yöta̧la, jwiinö usula demawinö kwujuluwobetjö̧, ja̧ usula demawi̧da omukwatadösa, ditji̧munöbi omukwatöködö badibenanö kabatö. Jau, ditji̧mu otiwanö tjomukwatawö̧ batjibitjö̧bi, mikwawöködö batjibitjö̧bi, jobadö tjö̧ji̧ jawa ja'yubebi omukwatöködösa, kwujuluwajawö̧ ja̧nö, usula emawö, inesö inia tjöbö dö̧ji̧da dubudekwobetjö̧, —jö̧balö yöa̧linobe Jobma Diosnö.

Éxodo 4:22

Ikenama baikwö yökawo faraónnö: Isabenö Jo̧ma ökwönöma yöa̧la, Israel jojodöma ötjöda ile nitebawö̧, bakwuju ajayinö jitji̧nö ile nijebi̧danö, jö̧ba̧lö.

Isaías 1:2

Bö̧jenö ju̧kwadöbi, mölejenö ju̧kwadöbi kwa̧ja̧kwaduwo, Isabenö Jo̧ yöawaja̧ jawama, baikwö: Tjemu chö̧da̧pedinawö̧ma, ötjönö öpöjödö katjatibajabe.

Isaías 29:22

Jobekwö jo̧be chömöledö, jo̧kwajabetjö̧ baikwö yöawobe Abrahamnö ö̧jibinö pjabatina Isabenö Jo̧ma, Jacob itji̧mu tupadanö jojodönö baledakwa̧ma: —Babema damötjö ji̧na Jacobma iteda itji̧mu tupadanö jojodönö edö, öba dewinö baibanö tabakwö jo̧, –Chitji̧mu tupadanö jojodöma sulabenö ja̧batötö, –jö̧ba̧lö. Jo̧kwaijayonö, ja̧ möle badekwachaja̧ ikenama, jobekwö ötabökakwo̧ Jacobma.

Isaías 41:14

Ökwödö Israel jojodöma, yekabiduwoko. Ökwödö Jacob itji̧mu tupadanö jojodöma, sa̧dö juluwöködö kwichejekwaduwijayonö, yekabiduwoko. Jau chömöledö, —Ötjödasa ökwödönö pjabato̧ma, —jö̧ba̧lö ötjö Isabenö Jo̧ma yötawaduwakwö, ökwödönö kwö̧jibaduwinö pjabato̧ma, ötjö Israel jojodö tjösödökwe Suli̧ Jwibo̧ Diosda, jo̧kwajabetjö̧ yekabiduwoko.

Isaías 41:8

Tupakwö laebobe Dios yöa̧li̧: Ökwödö Israel jojodöma, isabenö ötjöda chömöayedöja. Ökwödöma omudawö chujuninökwe Jacob itji̧mu tupadanö jojodöja, ja̧danö chömöledöso̧ Abraham itji̧mu tupadanö jojodöja.

Isaías 43:14

Baikwö yöa̧lobe Isabenö Jo̧ kwöjibaduwinö pjabato̧, ökwödö israel jojodö kwösödaduwökwe Suli̧ Jwibo̧ Diosma: Ökwödö Israel jojodönö pjabatö, ölakwabikwawadönö wetocha, Babilonia comunidad mebibö tjujuluwobö. Ja̧danö Babilonia jojodöma isowibiyanö dötjibajakwedö. Ajayinö tjisowibiya nöinö ösödinadö, —Inesö otiwowi juna̧ladösa, —jö̧ba̧lö, ja̧danö ja̧ owibiyanöda tjöpöjojodö tjöba a'otjö dötjibakwedö.

Isaías 44:6

Israel jojodötjö inesö la'aka luwo̧, Isabenö Jo̧, israel jojodönö tjöbeba̧lö pjabato̧, Okobe Jwiinö Juluwo̧ Isabenö Jo̧ Diosma baikwö yöa̧lobe: Ötjöma ju'wedötjö ajayinö ji̧nasa̧, ja̧danö ju'wedötjö ikena chö̧jakwo̧sa. Jelo̧ Diosbo̧ma deobe, ötjödasa isabenö Diosbo̧ma.

Isaías 45:11

Jau chömöledö, Israel jojodö tjösödökwe, Suli̧ Jwibo̧ Isabenö Jo̧ Diosma baikwö yöa̧lobe iteda otidinökwe, jo̧bakwö ölakwabikwawö jo̧nö baikwö yöa̧lobe: Tajawedö ötjönö abebö kwa̧ja̧kwobeda, ötjöda chi̧tji̧mu jawama? Tajawedö ötjöda chömamunö chotidi̧ jawa, —Sulabenö kwotida, wainö kwotido, —jö̧ba̧lö yöka̧lobeda? Isabenö jobekwö yöka̧lobö jwibo̧ja.

Isaías 51:2

Jau chömöledö, ökwödötjö ajayinö ji̧na Abrahamnö kwomukwataduwo, ja̧danö ilekwo Sara ökwödönö ajayinö eminujunö kwomukwataduwo. Baikwö yöa̧lobe Diosma, kwadömine Abrahamnö: Abrahamnö jwötijatö, ötjö chömöledöso̧ baibobö, ja̧danö jobekwö jo̧banö jwötenama, bakwo̧da, itji̧mu debo̧da ö̧jinobe kwa'döduwima. Jo̧kwaijayonö, jemi ikenama jo̧banö pjatatijatö, ja̧danö pjatatiökwe, ba̧jȩkwaso baibinobe, jö̧tö?

Isaías 54:5

Jau, ökwö kwilekwedanöbo̧ma, ökwönö otidina Isabenö Jo̧ Okobe Jwiinö Juluwo̧ Dios jö̧ba̧lö mikwo̧da. Ökwönö kwö̧ji̧binö pjabato̧ma, Israel jojodö tjösödökwe Suli̧ Jwibo̧ Dios, okobe deinö bö̧jȩnö ju̧kwadö tjuluwo̧ Dios jö̧ba̧lö ötjabökweda kwilekwedanöbo̧ma, jo̧kwajabetjö̧ tabakwö kwö̧jobö jwibujuja.

Isaías 60:16

Jau, tjitebotenia jojodö tjiteabi, inesö la'aka luwedö tjiteabi, ökwödö israel jojodöda otiwanö kwujuna̧laduwakwedöja. Ja̧danö jobekwö balediawö̧, otiwanö kwöwaisachibaduwakedöja, Ötjö Isabenö Jo̧ Diosda kwö̧jibaduwinö pjabato̧ma, jö̧ba̧lö. Jau chömöledö, —Jacob ösödinökwe Inesö Juluwo̧ Diosda dö̧jibinö pjabato̧ma, —jö̧ba̧lö kwöwaisaduwakwedöja.

Isaías 63:12

Iteda inesö ujulunö, Moises inesö juluwi̧ ji̧ jawa i̧sebobö pjabatinama daida? Jobama da'dödö tjöba a'otjö, ojwiyo 'da̧batö ujuninobe, jwaibalawa ö'wejenö otiwanö tjöbaledobö, ba̧kwelöjatebö jo̧banö otiwanö tjomukwatakobetjö̧,

Isaías 64:7

Babe ökwönö abebadöma deobe ditebotjö chuluwo̧, bakwo̧bi jwaikwöda ökwönö ösödö jo̧ma deobe. Jau chuluwo̧, dö̧jelö jelobekwö kwöjalachibajabe chuluwo̧, ökwödönö edökönö, —Wainö sulabenö ja̧bö ja̧nö, usula tjemawo, —jö̧ba̧lö iyö loköbajabe chuluwo̧.

Isaías 64:8

Chuluwo̧ Isabenö Jo̧, dabe'doma ökwödaja. Ja̧danö, ökwöma lete'otjö dadö otido̧danö jo̧ja, ja̧danö ökwödöma kwotidaja'o lete'odanö ja̧dösa, okobe deinö ökwödöma ökwöda kwotidinawö̧sa.

Isaías 9:6

Jau chuluwo̧, isabenö tjo'wo ösöwachibanö ju̧kwadö kwömöledöma, bakwuju jitji̧nö jemajobetjö̧, duluwo̧ baibakwo̧ jitji̧nö jemajobetjö̧. Ja̧danö jo̧ba jemajökwema, isabenö duluwo̧ baibanö webö ö̧jakwo̧, ja̧danö jo̧ba imi baikwö ötjabikwo̧: —Inesö waisanö tjomukwatobö pjabato̧, —jö̧ba̧lö ötjabikwo̧. Ja̧danö ju'wibi, —Juluwo̧ Dios, —jö̧ba̧lö ötjabikwo̧. Ja̧danö ju'wibi, —Dabe'do Ba̧kwelöjatebö Jo̧, —jö̧balö ötjabikwo̧. Ja̧danö ju'wibi, —Wene Jwiinö Dö̧jobö Webö Jo̧, —jö̧ba̧lö ötjabikwo̧, duluwo̧ baibanö jemajökwema.

Mateo 6:9

Jo̧kwajabetjö̧, Diosnö akebaduwenama, baikwö akebaduwo chömöledö: Mölejȩbe jo̧ Dabe'do, jojodö otiwanö ökwönö tjomukwatobö dösöda, Diosma isabenö suli̧ jwibo̧ jö̧ba̧lö.

Juan 8:41

Ökwödöma kwabe'doduwi omukwatö ö̧ji̧danö omukwatö ja̧döja— jö̧a̧liawö̧: —¿Dakwö yöka̧la? Ökwödöma jelo̧ i̧tji̧mubökö̧dösa. Dabe'doma bakwo̧da, Diosda— jö̧tja̧liökwe:

Deuteronomio 14:1

Tupakwö yöawinobe Moisesma, israel jojodönö: —Chömöledö, ökwödö israel jojodöma kwuluwo̧duwi Isabenö Jo̧ Dios itji̧mubedöja. Ja̧danö, jo̧ba itji̧muköbaduwobetjö̧, o̧'wo tjo̧achö 'wikekwaduwoböma jwiobe, ja̧danö kwöwö'yeduwi kwöbasa'ye jwobö loköbaduwobö jwiobe, kwömöledö debö 'yi̧nadönö kwo̧'woduwi tjo̧achi̧ i̧sȩböma.

Deuteronomio 32:6

Ökwödöma wajwibadö omukwatöködödanöbedöja chömöledö, baikwö yötawa: Isabenö Jo̧ma kwabe'doduwibo̧, jo̧bada ökwödönö otidinobetjö̧, ja̧danö ju'wibi ökwödönö otidajo̧, kwiteboduwisaso juluwaso bakibaduwanö ujuninobe, jö̧tö? Isabenö otiwanö pjaatinobe chömöledö, ja̧danö jejenö pjaatiawö̧ balekwa mikwa jo̧banö kwöpöjödaduwobö otiwenaji̧? Sula chömöledö, jo̧banö kwösödaduwo jö̧ba̧ladöja.