Isaías 61:6 - Dios Iwene

⁶ Ja̧danö ökwödö israel jojodönö, Isabenö Jo̧ Diostjö jojodötjö ö'weje pjabatadö ötjabikwawö̧ja. Ökwödö kwotidaduwakwa̧ma, dösödökwe Dios wei̧ otidadö kwö̧jaduwakwedöja. Tjitebotenia jojodö tjitea nöinö mikwawi̧ma, ökwödöda kwemaduwakwedöja. Jobadö ajayinö, —Otiwanö juna̧ladösa, —jö̧ba̧lö ösödö yötja̧lina jawama, ökwödöda kwo̧'woduwi ösöwanö kwujuna̧laduwakwedöja.

Isaías 61:6 ပူးပေါင်းရင်းမြစ်များ

Éxodo 19:6

Ja̧danö, ökwödöma ötjö chömöayedö baibanö kwö̧jaduwakwedöja, ja̧danö, Israel jojodöböködönö ötjönö tjöwaisachibanö yöbawö pjakataduwakwedöja. Ja̧danö, ökwödönöma wainö chujunawö̧ja, ötjönöda kwösödaduwobö. Moisés, jejenö yökawo Israel jojodönö— webijetö Isabenö Jo̧ Moisésnö, wa̧pekwa'otjöma.

Isaías 23:18

Jo̧kwaijayonö, ja̧ möle idöda otiwanö tjö̧joböma tjisakwökakwedö Tiro comunidad jojodöma. Ajayinö idöda tjujuna̧lotö jö̧ba̧lö, emöbi, iyöbi kwebachinadö, jo̧kwaijayonö ja̧ möle tjotidaja̧ mikwama 'da̧batö tjujunakobe, Isabenö Jo̧ itea baibanö. Ja̧danö, jobekwö Dios itea baibanö 'da̧batö tjujunobetjö̧, Isabenö Jo̧ Dios öba a'o ju̧kwadöma otiwanö tjujuna̧lakwedö, tjiyi̧tjö nöinö kwakwawabi, kamisi otiwi̧bi otiwanö tjujuna̧lakwedö.

Isaías 54:3

Jau, kwöwaisobekwöchobebi, wajwiköbobekwöchobebi kweju jaleju baibanö kwotidobö jo̧be. Ja̧danö kwitji̧muma, ba̧jȩkwadö batjibanö ju'wedö tjitebo nijibi 'döbebö tjemakwedö, ja̧danö jojodö deobe comunidadma, kwitji̧muda jobe tju̧ju̧kwakwedö, jö̧ba̧lö wanedö yöawinobe Diosma, Jerusalen comunidad jawama.

Isaías 56:6

Israel jojodöböködötjö ötjö Isabenö Jo̧nö ösödadöbi ja̧danö. Ötjökwö dötewanö tjö̧jotö jö̧ba̧lö, weti̧ a̧ja̧kwö ja̧nö, ötjönö ile nibebö ösödadönö otiwanö pjatatocha. Jau, otikwökö möle jawa weti̧ a̧ja̧kwö, otiwanö ötidökönö tjö̧jobetjö̧, ja̧danö ju'wi chömöledö israel jojodönö weti̧bi otiwanö a̧ja̧kwö tjö̧jobetjö̧, jobadönö ösödö pjatatakwo̧sa, baikwö yötawa:

Isaías 66:12

Baikwö yöawobe Diosma: Baikwö wanedö yötawaduwakwö: Isabenö otiwanö pjatatocha Jerusalennö, ojwe kabatökönö isuwi̧danö, otiwanö jö̧jobö pjatatocha, ja̧danö tjitebotenia jojodö tjitea nöinö mikwawi̧ma, ojwe okwatibi̧danö jobujunö welachobö wetocha. Ja̧danö ökwödö jitji̧muma, otiwanö kwö̧jaduwakwedöja. Kwojo'doduwi Jerusalenma otiwanö jo̧do'bi̧ ojwö jiteada̧lakwawö̧ja, ja̧danö jö̧dö̧lö'anö apjö̧alö je'ewakwawöja, ja̧danö ji̧sȩ'bonö wananö döjeabikwawö̧ kwö̧jaduwakedöja.

Romanos 12:1

Chömöledö, Diosma ökwödönö lȩlö̧jinö edinobetjö̧, yötawaduwakwö, Diosnö kwiyawaduwo, Diosnö iyawadö, ina 'yaba̧ladö iyawadö bakibaduwanö. Jejenö kwiyawaduwobö chösöda chömöledö. Ja̧danö, Diosnö iyawadö kwö̧jaduwobema, jo̧ba wei̧da jwaikwöda ja̧bö kwö̧jaduwo chömöledö, Dios ösödi̧danö. Jejenö Diosnö kwösödaduwobö otiwa chömöledö.

1 Corintios 3:5

Chömöledö, ¿tajawedö Apolosnö kwösödaduwobö? Ja̧danö ötjö Pablonö ¿tajawedö kwösödaduwobö? Apolosbi, ötjö Pablobi sule Dios ömöayedöda dö̧jobe chömöledö. Ja̧danö, bakwo̧nökwena Dios wainökwena pjadatobö weinadanö, Jesúsnö kwösödaduwobö pjadatijatö ötjöbi, Apolosbi.

1 Corintios 4:1

Chömöledö, ötjö Pablonöbi Apolosnöbi baikwö kwomukwataduwo, Cristo ömöayedö jö̧ba̧lö. Jau chömöledö, Cristoma ökwödönö iteda ömöayedönö ujuninobe Dios jawa jojodö ajayinö wajwitjina jawa wene te'ada̧ladö badibanö, ju'wedönö okwa jawa labebö lobö yödawo jö̧ba̧lö.

2 Corintios 11:23

Ja̧danö jobadöma yötja̧lobe, ökwödödasa Cristo ömöayedö otiwadö jö̧ba̧lö, ¿jö̧tö? Wame jawa omukwato̧ yöa̧li̧danö baikwö atadö yöta̧la, ötjöma jobadötjö bajalekwönönö Cristo ömöayo̧ otiwo̧sa, baikwö yöta̧la: Tjotidi̧tjö bajalekwönönö nöinö chotidobe, ka̧lena tjö̧bi̧tjö bajalekwönönö nöinö ka̧lena chö̧bobe, ja̧danö jobadötjö bajalekwönönö chöba̧ja̧dökenanö kwakwatjajökwe chö̧jobe, ja̧danö jobadötjö bajalekwönönö nöinö woto jö̧ta̧lobe.

2 Corintios 6:4

Jau chömöledö, okobe jwiinö ja̧bö ja̧nö di̧sebobe, isabenö Dios ömöayedösa jö̧ba̧lö. Baikwö yötawa jejenö di̧sebi̧ma chömöledö: Do̧'wo̧ 'dibachibö ja̧nö, nöinö wene baledadösa, ja̧danö ju'wibi usula emawakwawa baledadösa, ja̧danö ju'wibi ökwödönö sulabenö baledi̧ baledadösa.

1 Pedro 2:9

Jo̧kwaijayonö jobadö Jesúsnö öpöjödö töbö metjijayonö, töböma meböködöja chömöledö, Dios omudawö ujuninawö̧ja, ja̧danö La'aka Duluwo̧ wei̧ otidadöja, ja̧danö mölejȩ jojodöja, ja̧danö Diosda ömöledöja chömöledö. Jau chömöledö, isabenö Dios wei̧ otidadö kwö̧jaduwobe. Diosma ökwödönöda 'da̧batö ujuninobe, jo̧ba inesö otiwanö pjaati̧ wene jojodönö yökawaduwobö. Jau chömöledö, Diosma isabenö otiwanö ökwödönö pjaatinobe, ökwödönö yȩa'wo okwatjö labeibö, iteda inesö idejatobekwö tekachaduwobö jwöinobe Diosma, ja̧danö jo̧ba inesö otiwanö pjaati̧ wene yökawaduwo jö̧ba̧lö, ökwödönö omudawö ujuninobe.

Apocalipsis 1:6

Jesucristoma ökwödönö 'da̧batö ujuninobe iteda ömöayedö badibanö, itenöda, Duluwo̧, jö̧ba̧lö, öbabidö badibanö. Damötjö, la'aka luwedö, Diostjö jojodötjö ö'weje pjabatadö pjatjatinadanö Jesucristoma 'da̧batö ujuninobe ökwödönöma, jojodönö pjadatobö. Ja̧danö, ökwödöma Diosnö abebadösa, Jesucristo abe'donöma, jojodönö pjaatobö. Chömöledö, Jesucristo otiwanö pjaatinobe ökwödönöma. Otiwanö pjaatinobetjö̧ jo̧banö dösödaduwo, Jwiinö juluwo̧, jö̧ba̧lö, Ba̧kwȩlö̧jatebö webö ö̧jobö jo̧be, jö̧ba̧lö. Chömöledö yötawi̧ma isabenö yötawa.

Apocalipsis 20:6

Yelösöda, wobinadötjö ajayinö tjebachajinadöma, tjo̧'wo̧ ösöwanö ja̧dö, Dios wei̧ a̧ja̧kwö, Cristokwö. Jobadöma nöola ubolanö okwa loawatjö ji̧badö. Ja̧danö, Dioskwö Cristokwö lekwe, mil imiamebiya jenanö, Diostjö jojodötjö ö'weje pjabatadödanö tjotidakwedö. Dioskwö, Cristokwö mil imiamebiya jenanö tjotidakwedö.

Apocalipsis 5:10

Dios ömöledö babibinadönöma bakwaso batjibanö ja̧binaja, bakwainö Dioskwö ja̧nö, iteda wei̧ ja̧badö batjibanö. Jobadönöma Diostjö jojodötjö ö'weje pjabatadödanö batjibanö ja̧binaja, bakwainö Dioskwö, iteda wei̧ ja̧badö batjibanö. Ju'winö böjȩnö ja̧nö, jojodö tjuluwedö batjibanö ja̧köbakwo̧ja, jö̧ba̧lö lo̧tjijatö tjöbajalebiya a̧tja̧bayedöda ju̧kwawö̧ma, damö la'aka luwedökwö Obeja Itji̧danö Jo̧nö ösödö.