Isaías 59:13 - Dios Iwene

¹³ —Ökwö Isabenö Jo̧ weköbi̧ a̧ja̧kwö dö̧jakwedösa, —jö̧da̧linajayonö, a̧ja̧kwökönö sulabenö ja̧badösa. Ja̧danö ökwö dösödökwe ökibi̧danö, kwökömanö ludo jö̧da̧lijayonö, jalachibö kadatibajabe. Ökwödöma jojodönö suli̧ waedö, sulabenö omöna yöba̧ladösa, domajadenö sulabenö omukwatajadö, omöna yöba̧ladösa. Jobekwö usula tjemawinö sulabenö ja̧badösa chuluwo̧ Dios, isabenö kwöba a'otjö wene juna̧ladösa.

Isaías 59:13 ပူးပေါင်းရင်းမြစ်များ

Diosnö ösödo̧ Job mikwo̧ usula emawina jawa 31:28

isabenö Dios lȩebobö jȩna. Jau chömöledö, bȩbachibö jobadönö chösöditjö̧ma, bakwainö mölejebe jo̧ Diosnöda chösödo jö̧ta̧li̧ kabatibö, chösödoko jö̧ta̧lawö̧nö chösödena, jadanö jejenö sulabenö chösödiökwe, isabenö ötjönö lȩebobö jȩna.

Proverbios 30:9

Jobekwö pjakatotjö Chuluwo̧, nöinö chujuna̧lokoböbi, ja̧danö jwibö chö̧jokoböbi. Isabenö, nöinö chujuna̧litjö̧ma ökwönö chomukwatökena, Tida Isabenö Jo̧ma, wajwitökwe, ötjönö pjaatobö jwiyobe, jö̧ba̧lö. Ja̧danö, jwibö chö̧jitjö̧ma chönaukwena, ökwönö sulabenö omukwatö— jö̧ba̧lö Diosnö atebobe.

Isaías 10:1

Isabenö Dios lȩebakwawö̧ja, ökwödö la'aka luwedötjö tjömöayedö usula tjemawinö webadöma, kwömöayedöduwi usula tjemawinö weawa sulabenö wȩyudö weköbaduwobetjö̧.

Isaías 30:12

—Ja̧danö, jobekwö tjöpöjödi̧tjö̧, ötjö Israel jojodö tjösödökwe Sulabe Jwibo̧ma, baikwö yötawadönö: Ökwödönö yötawaja̧ kwöpöjödaduwajabe, mikwa jwii̧ jö̧ba̧lö. Ja̧danö ötjö yötawi̧ öpöjödö, kwomukwataduwajabe, –Jojodönö usula tjemawinö webö, omöna yöbalö ja̧nö dö̧jitjö̧ma, otiwanö dö̧jakwedösa, –jö̧ba̧lö, jadanö jobekwö omukwatö badekwachinö sulabenö ja̧badöja, ja̧tjö otiwanö kwö̧jaduwotö jö̧ba̧lö.

Isaías 31:6

Chömöledö israel jojodö, baikwö yöta̧laduwakwö, ökwödöma sulabenö Dios wei̧ kabatibinadöja, jo̧kwajabetjö̧ sulabenö kwomukwataduwi̧ kabatibö, tjebachajö kakatibinaduwökwe Diosnö kwösödaduwo.

Isaías 32:6

Isabenö wajwibö, jweinö omukwatöködönö otiwanö kwomukwataduwobö jwiobe chömöledö, jobadöjayedöma sulabenö yötja̧lobetjö̧, jadanö sulabenö jatjobö omukwatö isakwadö. Jobadöma Dios öpöjödi̧ jawa sulabenö jabadö, ja̧danö Isabenö Jo̧nö yötja̧lenama, jweinö yöba̧lökönö ö'öbönö sulabenö yöba̧ladö Isabenö Jo̧nö. Ja̧danö ju'wibi a̧wi̧chi̧ tjöbadönöma, kwakwawa iyöködö tjukwobö, ja̧danö o̧ti̧tjö tjöbadönö ojwiyo iyökönö, sulabenö a̧'dȩladö.

Isaías 48:8

Ja̧u, babe ökwödönö yötawi̧ma, ina kwa̧ja̧kwinaduwökö jawa, ina wajwiköbaduwii̧ jawa, ina ökwödönö yötjawinökö jawada yötawocha, a̧ja̧kwajadö, —Ida̧ökö chöwaisi̧ jawada yöawajabe Diosma, —jö̧ba̧lö yöka̧laduwapji jö̧ba̧lö. Ökwödönö chöwaisawö̧ja chömöledö, omöna yöba̧ladö kwö̧jaduwi̧ma. Ja̧danö israelsaso bakibinaduwelö, baikwö bajalenö ba̧kwelöjatebö, Dios wei̧ a̧ja̧kwöködö jö̧ba̧lö ötjabi̧wö̧ja, jö̧ba̧lö chöwaisawö̧ja.

Isaías 5:7

Ja̧ wanedö yötawaja̧ma, baikwö labebö lotaduwakwö chömöledö: Isabenö Jo̧ okobe jwiinö juluwo̧ Dios öbatjo wanekwachi̧ma, Israel mikwina itji̧mu tupadanö jojodönö wanekwachobe, jadanö otiwanö ubasa'ba ujunina wanekwachi̧ma, Juda jojodönö wanekwachobe. Ja̧danö, otiwanö ökwödönö pjaatinobetjö̧, ökwödönö iteada̧linobe, —Chömöledö Juda jojodöma otiwanö weti̧ a̧ja̧kwö tjö̧jo jö̧ba̧ladö, —jö̧ba̧lö. Jo̧kwaijayonö, wei̧ a̧ja̧kwö kwö̧jaduwo jö̧ka̧laduwemi, jojodönö kwabö lobadöja, jadanö otiwanö jabö kwö̧jaduwobö ji̧jayonö, sulabenö ja̧köbaduwawö̧ tjubudekwi̧da ökwöobe.

Isaías 57:11

Chömöledö israel jojodö, tinö yekabinaduwada? O̧'wo jawa jwiinö yekabiduwobetjö ötjönö omöna yöka̧laduwaji̧? Tajawedö ötjönö kwo̧'woduwi jwikibaduwaja̧da, ja̧danö, —Dios ösödi̧ma di̧yajö, —jö̧ba̧lö tajawedö omukwatökönö kwö̧jaduwobeda? Lekwe möle ötjöma wi̧inö ja̧nö, ökwödönö lȩbebökönö chiteada̧lobetjö̧, ötjönö yebaböködö bakibaduwaji̧?

Isaías 58:13

Jau chömöledö, otikwökö möle jawa weti̧ otiwanö a̧ja̧kwö, otidökönö ja̧nö, ökwödöda kwösödaduwi̧ ja̧bökönö kwö̧jaduwo, baikwö yöta̧la: Otikwökö möle kwösödaduwo, —Isabenö Jo̧ Dios 'da̧batö ujuninemi möle otiwa, ja̧ möle otiwanö omukwatö, dösödi̧da ja̧bö dö̧joko. Ja̧ möle ökwödöda dösödi̧ jawa omukwatökönö, ökwödöda yöda̧lakwawi̧ jawa omukwatökönö, jweinö Dios da̧batö ujunina möle omukwatö dö̧jo, —jö̧ba̧lö.

Isaías 58:2

Wamenö otiwanö ötjönö ösödadö, mölekwena chejube ichibö, weti̧ jawa tjöwaisobö ösödinö isakwadö. Jau, wamenö tji̧sȩbi̧ edö, —Bidöma otiwanö tjösödökwe Dios wei̧ a̧ja̧kwö ju̧kwadötö, tjösödökwe Dios lȩekwa yöawi̧ma ja'yubebi kabatiböködötö, —jö̧ba̧lö jojodö edö tjomukwatena. Ba̧kwelöjatebö chöba a'o ichibö abebadö, ötjöda yötawakwa̧ lȩekwa tja̧ja̧kwobö, ja̧danö ba̧kwelöjatebö chöba a'o tjichibobö ösödadö.

Isaías 58:9

Jobekwö ja̧bö ja̧nö ötjönö jwöbö akebaduwakwedöja, ja̧danö ötjö Isabenö Jo̧ma chatadakwo̧sa. Jwököbaduwenama, chatadocha, —Bai chö̧ja chömöledö, abebaduwitjö, —jö̧ba̧lö. Weti̧ a̧ja̧kwö kwö̧jaduwitjö̧ma, jobekwö ja̧kobe chömöledö, baikwö yöta̧la: Kwö̧'dadeduwitjö usula tjemawinö weawa 'da̧batö loköbaduwitjö̧ma, ja̧danö ju'wedönö wanedö, —Sulabenö ja̧badö, —jö̧ba̧lö omöna yöka̧laduwi̧ kakatibaduwitjö̧ma,

Mateo 10:33

Jo̧kwaijayonö okobe deinö böjȩtjö Jesúsnö dösödökökwe jö̧ba̧ladönö, ötjöbi mölejȩbe jo̧ Chabe'donö jobadönö yötawocha, Chömöledöböködö, jö̧ba̧lö— yöawinobe Jesúsma.

Tito 1:16

Jobadöma, Aaa, Diosnö waisadösa. jö̧ba̧lö yötjawijayonö, ja̧tji̧ma wainö i̧sebö yöbawadö, Diosnö öpöjödadösa, jö̧ba̧lö. Ja̧danö, jobadöma sulabedö, Dios wei̧ a̧ja̧kwökönö ja̧badö, ja̧danö ja'yubebi otiwanö ja̧bö tjuju̧kwoböma jwibadö.

Hebreos 3:12

Jo̧kwaobetjö̧ chö̧ja̧wo̧dö, ökwödö bakwo̧nökwena tjöbeba̧lö̧jönö kwite'ada̧laduwo kwo̧'wo̧ luwo̧duwinö, ökwödötjö ju'wedöbi da'dödömine sulabenö tji̧'yinadanö kwi̧'yaduwapji jö̧ba̧lö, kwomajadeduwinö Diosnö jwiinö öpöjödö, yaba̧lo̧ Diosnö kabatibö.

Santiago 1:15

Ja̧danö, bakwo̧, jejenö sulabenö ösödi̧da omukwata̧lö ö̧jitjö̧ma sulabenö omukwata̧li̧danö ja̧bö ö̧jena. Jemi ikenama yemidanö, yemidanöbi jejenö sulabenö ja̧böda jo̧ma, sulabenö omukwati̧ öbalewachökötjö̧ma Diostjö 'da̧bachiböda jo̧, o̧'wo̧ luwo̧nö ö'wö babibo̧da.

Santiago 3:6

Chö̧ja̧wo̧dö, jejenö ökwödö dinenenö yöda̧li̧ma. Ja'yubetjö nötekwajö ubö okobe jwiinö ubi̧danö dinenema ja'yuwijayonö jwiinö sulabenö baibobe. Yelösöda daatjö laebi̧, dinenenö yöda̧li̧ma juluwobe okobe jwiinö dö̧ji̧ma sulabenö baibanö dö̧jobö. Chö̧ja̧wo̧dö, do̧'wo̧ luwo̧nö sulabenö edö dinenenö yöda̧li̧ma Awetja ökwöla juwawa önötekwaji̧danö, okobe jwiinö ubö loobema, okobe jwiinö dö̧ji̧ma sulabenöda baibanö.

Josué 24:27

Jejenö a̧la̧pedö junö, Josuema jojodönö yöawinobe, —Chömöledö, biwa inawama, okobe jwiinö yöbawö dujunaja̧ma a̧ja̧kwajabe ichejekwa, Isabenö Jo̧ yöawaja̧ wenebi, datadaja̧ wenebi. Jo̧kwajabetjö̧ baikwö wanedö yötawa, ökwödöma otiwanö da̧ja̧kwakwedösa jö̧ba̧lö yöka̧laduwajayonö, sulabenö kwuluwo̧duwi Dios wei̧ kakatibaduwitjö̧ma, biwa inabama i̧sȩkwadanö ja̧kobe, –Bidö israel jojodöma yöbawö tjujunina kabatibö, wainö sulabenö ja̧badö, —jö̧ba̧lö.