Isaías 58:8 - Dios Iwene

⁸ Jobekwö ja̧bö kwö̧jaduwitjö̧ma, baikwö wanedö yöta̧la chömöledö: Ökwödö otiwanö kwidejataduwi̧ma, yeayi dewachi̧danö otiwanö kwidejataduwakwedöja, ja̧danö 'dö̧kachaduwi̧tjö juluwanö kwö̧bibajaduwakwedöja. Ja̧danö weti̧ a̧ja̧kwö kwö̧jaduwi̧ma, kwabönöduwi tjöekwakadanö ja̧kobe, ja̧danö ötjö Isabenö Jo̧ dejatinö chujuluma, kwökömaduwikwöchobe tjöekwakadanö ja̧kobe, jö̧ba̧lö yöta̧laduwakwö.

Isaías 58:8 ပူးပေါင်းရင်းမြစ်များ

Diosnö ösödo̧ Job mikwo̧ usula emawina jawa 11:17

—Jau Job, isabenö otiwanö kwö̧jakwo̧ja, baikwö wanedö yötawa: Jawo̧ jweinö ö̧jena dewi̧tjö bajalekwönönö otiwanö dewemi kwö̧jakwo̧ja, la'akatjöda yȩa'wo kwöjökakwo̧ja, baikwö yöta̧la, kwö̧ji̧ yȩi̧ma, sule yȩayi̧ yȩi̧danö yȩena, ja'yubeda yȩena, isabenö otiwanö kwö̧jakobetjö̧.

Éxodo 14:19

Ikenama Dios weajökwe ángel, Israel jojodö tja̧bönö 'yajo̧ma tjö̧kamakwö babibijetö. Ja̧danö, jobekwö jojodö tjö̧kamakwö, ojwiyo'wo ja'da'daa'wobi tja̧bönö 'ya̧ja'woma Israel jojodö tjö̧kömakwö baibijetö,

Proverbios 11:17

Ja̧danö, ju'wibi yötawa: Jojodönö lȩlö̧jinö edö pjabato̧ma itedada pjaatakwo̧. Jao, jojodöma balekwa mikwa jo̧banö lȩlö̧jinö edö pjatjatakobetjö̧, itedada pjaatakwo̧ jojodönö lȩlö̧jinö edö pjabato̧nöma. Jobekwö baledokobe jojodönö lȩ lö̧jökönö edo̧nöma. Jo̧ba lȩ lö̧jökönö edo̧ma itedada wene jwöekwakwo̧, jojodöma balekwa mikwa lȩ lö̧jökönö tjedakobetjö̧ jo̧banöma.

Proverbios 11:25

Ja̧danö, ju'wibi yötawa, wanedö: Ju'wedönö pjabatö iyo̧ma iteda ujuna̧li̧tjö̧ bajalekwönönö ujuna̧lakwo̧. Isabenö, ju'wedönö iyö pjabato̧ma jojodö balekwa mikwa iyö pjatjatakwo̧.

Proverbios 4:18

Jobekwömaökö Dios wei̧ a̧ja̧kwadö tjö̧ji̧ma. Dios wei̧ a̧ja̧kwadöma sulabenö omukwatadö tjö̧ji̧danö jö̧kö̧dö. Wanedö yötawakwö chitji̧: Dewachenama, i̧ya̧nö deapjo dewachobe tjo̧'o̧manö, ja̧wo̧ laebaja̧ tupakwö jwiinö dewobe jweinö öjenanö. Jobekwö Dios wei̧ a̧ja̧kwadö kwetjachamanö dewinö dejatobe, ajayinö dejatemitjö̧ tupakwö jwiinö dewinö dejatobe, otiwanö edö, salöamanöda tji̧'yobö.

Isaías 26:2

Comunidad apjude po̧kebaduwo, Dios wei̧ a̧ja̧kwö ju̧kwadö tetjachobö, Dios wei̧ jwaikwöda a̧ja̧kwadö tetjachakobetjö̧.

Isaías 30:26

Ja̧danö yöte jawo̧ otiwanö idejatobö weakwo, möle jawo̧ idejati̧danö idejatenanö baibanö. Ja̧danö möle jawo̧ ajayitjö bajalekwönönö otiwanö idejatobö weakwo̧, ajayinö idejatinelö, jelemutjö dötölataja baibanö jwiinö salöinö idejatobö weakwo̧. Jobekwö baledakobe chömöledö, Dios ökwödö usula kwemawaduwi̧ otidö loenama. Jau chömöledö, a̧ja̧kwökönö kwö̧jaduwiökwe, ökwödönö lȩbebo̧ Isabenö Jo̧ma, inia tjöbö, 'debawadö bakibaduwanö. Jo̧kwaijayonö ja̧ möle inia tjököbaduwi̧ otidö loakobe, ja̧danö kwaina nii̧ ösöwachibanö otidö loakwo̧.

Isaías 33:24

Ja̧danö okobe deinö ditebonö ju̧kwadöma, bakwo̧bi —'Döbacho̧sa̧, —jö̧ba̧lö yöa̧lökakwo̧, Diosma isabenö ökwödönö pjaatobetjö̧. Ja̧danö Diosma okobe deinö jobe ju̧kwadönö lȩlöjinö edö, sulabenö ja̧tjina lȩbebökönö, tjusula söbebö loakobe.

Isaías 52:12

Jau, ö'öbakwawö yebabinö lakebaduwobö jwiakobe, otiwanö tjo̧'omanö kwȩwa̧jaduwobö ja̧kobe, kwuluwo̧duwi Isabenö Jo̧ Dios kwabönöduwi 'ya̧nö, ökwödönö öbibö i̧'yakobetjö̧. Jau chömöledö, kwabönöduwi tjöbeba̧lö i̧'yakwo̧, ja̧danö ju'wibi kwökömanöduwi tjöeba̧lakwo̧, jo̧kwajabetjö̧ yebabinö dökibaduwobö jwiakobe.

Isaías 57:18

Ötjöma chömöledö sulabenö ja̧bö tjö̧ji̧ chedajabe, jo̧kwaijayonö yayonö jobadönö pjatatakwo̧sa, ja̧danö tjö̧bibajinö otidö lotocha. Jobadönö öbibö jwetebocha, ja̧danö jobadö o̧'wo tjo̧achö budekwadönö, tjo̧'wo ösöwobö pjatatocha.

Isaías 60:1

Chömöledö israel jojodö, a̧la̧ibaduwi. A̧la̧ibö, Dios dejatinö ujulu i̧sȩkwaduwi. Jau chömöledö, Isabenö Jo̧ma iteda dejatinö ujulu i̧sȩbö, ökwödönö pjaatajabe, jo̧kwajabetjö̧ dejatinö ujuluma ökwödönö idejatajabe.

Isaías 60:2

Jau chömöledö, bö̧jȩ ba̧kwemeachibanö yȩa'wo la̧kobe, tjitebo tenia jojodöma inesö yȩa'wonö tjö̧jakwedö. Jo̧kwaijayonö Isabenö Jo̧ma iteda dejatinö ujulu ökwödönö idejatakobe, ja̧danö Diosda ujulu kwi̧sȩkwaduwakwedöja.

Isaías 62:1

Isabenö cho̧'wo tjo̧ekwobe Sion mösa'o ju̧kwadönö, chitebo comunidad Jerusalen omukwatö, cho̧'wo tjo̧ekwobe, jo̧kwajabetjö̧ wi̧inö chö̧jökakwo̧sa. Jau, jwaikwöda yöbawö chö̧jakwo̧sa, Jerusalen comunidad jojodö Dios wei̧ tja̧ja̧kwenanö baibanö. Jau, baikwö wanedö yöta̧la, ja̧ möle tjö̧jibinö Dios pjaatakwa̧ma, dȩju̧wa'yudanö öwawakobe, ja̧danö Dios wei̧ a̧ja̧kwö tjö̧ji̧ma, möle dewachi̧danö salöinö dewakobe.

Mateo 13:15

tjomukwati̧ma omukwatöködö batjibinobetjö̧, ja̧danö tjölakiyu tumachajawö̧ batjibinobetjö̧, ja̧danö tjöbajale yi̧batadö batjibinobetjö̧. Jejenö baibinökötjö̧ma, otiwanö tjedo jö̧tja̧lena, ja̧danö otiwanö tja̧ja̧kwo jö̧tja̧lena, ja̧danö otiwanö tjomukwato jö̧tja̧lena, ja̧danö sulabenö tjomukwati̧ kabatibö, ötjönö tjösödena, jejenö tjösödi̧tjö jobadö tjö'wöchi̧ otidö lotakobetjö̧, jö̧ba̧lö laebobe Isaías iwȩyudinama.

Hechos 10:31

Jo̧bama öwawachö jö̧a̧lijatö, baikwö: Cornelio, Diosma ökwö akebi̧ma a̧ja̧kwö omukwato̧, ja̧danö usula jojodönö pjakati̧bi edö omukwato̧.

Hechos 10:35

Bakwo̧, jelobe jo̧bi jelobe jo̧bi, Diosnö yebabinö omukwato̧nö Diosma otiwanö edobe—yöbawijetö—.

Hechos 10:4

Ja̧danö, Cornelioma jo̧banö edö jwiinö yebaibijetö. Atadijetö: —¿Tajida Chuluwo̧?— jejenö atadökwe ángelma jö̧ba̧lijetö: —Cornelio, Diosma ökwö akebi̧ma a̧ja̧kwö omukwato̧, ja̧danö usula jojodönö pjakati̧bi edö omukwato̧.