Isaías 57:18 - Dios Iwene

¹⁸ Ötjöma chömöledö sulabenö ja̧bö tjö̧ji̧ chedajabe, jo̧kwaijayonö yayonö jobadönö pjatatakwo̧sa, ja̧danö tjö̧bibajinö otidö lotocha. Jobadönö öbibö jwetebocha, ja̧danö jobadö o̧'wo tjo̧achö budekwadönö, tjo̧'wo ösöwobö pjatatocha.

Isaías 57:18 ပူးပေါင်းရင်းမြစ်များ

Isaías 1:18

Tupakwö yöawobe Isabenö Jo̧ma ökwödö israel jojodönö: —Chömöledö, bakobe omukwatakwawö yöda̧lakwawaduwo, otiwanö kwö̧jaduwakobetjö̧. Ökwödöma sulabenö ja̧badö kwö̧jaduwobetjö̧, isabenö yȩbekwadöja chömöledö, wanedö yöta̧la, nöinö sulabenö ja̧köbaduwi̧ma, jwiinö duwinö yȩkekwachibaduwinö ja̧ajabe ichejekwa. Jo̧kwaijayonö, yayonö otiwanö dichawadö bakibaduwobö jo̧be chömöledö, wanedö yöta̧la, obeja öwö'ye dewi̧danö bakwainö dewadö bakibaduwobö ina jo̧be.

Isaías 12:1

Ja̧danö, ja̧ möle Dios jwiinö otiwanö pjaatiawö̧, baikwö yöka̧laduwakwedöja: —Duluwo̧ Isabenö Jo̧, otiwanö pjabato̧ja jö̧ba̧lö yöda̧lakwö. Jau Duluwo̧, ajayinö ökwödönö kwödameakwijatö, jo̧kwaijayonö ajayinö kwödameakwinajayonö, kwödameakwi̧ma kakatibajabe, ja̧danö do̧'wo ösöwachibanö pjakatajabe.

Isaías 19:22

Jau, Egipto jojodönö lȩbeböbi lȩebakwo̧ Diosma, ja̧danö pjabatöbi, tjö̧bibajinö otidö loakwo̧. Ajayinöma Isabenö Joma Egipto jojodönö lȩebakobe, ja̧danö lȩebawö̧ sulabenö tjomukwati̧ kabatibö tjöbalewachakwedö, ja̧danö Isabenö Jo̧nö tjösödakwedö. Jo̧banö ösödö atjebakwedö, ja̧danö atjebökwe a̧ja̧kwakwo̧ Isabenö Jo̧ma, ja̧danö a̧jakwajo̧, tjö̧bibajinö otidö loakwo̧.

Isaías 30:18

Jo̧kwaijayonö jobekwö baledoböma ösödö̧kö̧ Isabenö Jo̧ma. Jo̧bama o̧'wo 'dibachibö, lekwe teada̧lo̧, ökwödönö dösölö̧jinö pjaatobö ösödobetjö̧. Iteda ujulu i̧sȩbö, ökwödönö lȩlöjinö edobö ösödo̧ chömöledö. Jau chömöledö, Isabenö Jo̧ Diosma, otiwanö ja̧o jö̧a̧li̧danö ja̧bö jo̧, ja̧danö okobe deinö jo̧banö tjo'wo wana̧lö teada̧ladönö isabenö otiwanö pjabato̧, jo̧ba yöawi̧ kwa̧ja̧kwaduwo chömöledö.

Isaías 30:26

Ja̧danö yöte jawo̧ otiwanö idejatobö weakwo, möle jawo̧ idejati̧danö idejatenanö baibanö. Ja̧danö möle jawo̧ ajayitjö bajalekwönönö otiwanö idejatobö weakwo̧, ajayinö idejatinelö, jelemutjö dötölataja baibanö jwiinö salöinö idejatobö weakwo̧. Jobekwö baledakobe chömöledö, Dios ökwödö usula kwemawaduwi̧ otidö loenama. Jau chömöledö, a̧ja̧kwökönö kwö̧jaduwiökwe, ökwödönö lȩbebo̧ Isabenö Jo̧ma, inia tjöbö, 'debawadö bakibaduwanö. Jo̧kwaijayonö ja̧ möle inia tjököbaduwi̧ otidö loakobe, ja̧danö kwaina nii̧ ösöwachibanö otidö loakwo̧.

Isaías 49:10

Ja̧danö a̧wi̧chi̧bi, ojwiyo o̧ti̧bi tjötjökakwedö, ja̧danö jawo̧ma labinö tubinö idejatökakobe jobadönö. Jau, ötjö jobadönö lȩlö̧inö edo̧ma otiwanö tji̧'yakwa̧ jwetebakwo̧sa, ja̧danö otiwanö ötibakwo̧sa, ojwese'dobe ichibö tjowakobetjö̧.

Isaías 51:12

Adebökwe, baikwö atadö yöba̧lo̧ Isabenö Jo̧ma: Chömöledö, kwo̧'wo tjo̧bekwö kwö̧jaduwelö, ötjödasa kwo̧'woduwi ösöwachibanö pjabato̧ma. Ja̧danö ötjöda ökwödönö pjatatobetjö̧, tajawedö bö̧jȩ jojodönö yekabiduwobö? Jobadöma meje'ye, juluwanö kököbachibö, debi baiba'yedanö ichejekwadö, juluwanö debö 'ya̧dö bö̧jȩ jojodöma, tajawedö jobadönö yekabiduwobeda?

Isaías 52:12

Jau, ö'öbakwawö yebabinö lakebaduwobö jwiakobe, otiwanö tjo̧'omanö kwȩwa̧jaduwobö ja̧kobe, kwuluwo̧duwi Isabenö Jo̧ Dios kwabönöduwi 'ya̧nö, ökwödönö öbibö i̧'yakobetjö̧. Jau chömöledö, kwabönöduwi tjöbeba̧lö i̧'yakwo̧, ja̧danö ju'wibi kwökömanöduwi tjöeba̧lakwo̧, jo̧kwajabetjö̧ yebabinö dökibaduwobö jwiakobe.

Isaías 53:5

Jo̧kwaijayonö jo̧banö tjitjatinama, ökwödöda Dios wei̧ döpöjödobetjö̧ tjitjatinökwe, ökwödöda sulabenö ja̧bö dö̧jobetjö̧, inia tjöbina. Ökwödö wene jwiinö dö̧jakobetjö̧, jo̧banöda kwakwatjinobe, ja̧danö jo̧bada kwakwatji̧ eminobetjö̧, bi̧bajadösa ökwödöma.

Isaías 57:15

Jau, baikwö yöa̧lobe inesö mööjȩ mölejȩnö jo̧, ba̧kwelöjatebö jo̧, Suli̧tjö Ödö Jo̧ jö̧ba̧lö mikwo̧ Diosma: Ötjöma inesö möemi, suli̧tjö ödö jȩmi jo̧sa. Jo̧kwaijayonö ju'wibi, bakwo̧ sulabenö ja̧bina, o̧'wo tjo̧bekwö, —Sulabo̧ mikwawö̧kö̧sa, —jö̧ba̧lo̧kwöbi jo̧sa. Jo̧bajayo̧kwö jo̧sa, o̧'wo ujuluwachibanö pjatatakobetjö̧, sulabenö omukwataja̧ kabatibö balewachajo̧nö omajade ujuluwachibanö pjatatakobetjö.

Isaías 58:11

Ja̧danö ötjö Isabenö Jo̧ma ba̧kwelöjatebö ökwödönö jwebebö ötibakwo̧sa, ja̧danö kököemi kwö̧jaduwena, otiwanö jwiköbaduwi̧ chiyakwo̧sa, ja̧danö kwiwe'iju kwujuluwaduwachibanö pjatatakwo̧sa. Jobekwö otiwanö pjatatiawö̧, batjo otiwanö yoliwayudanö kwichejekwaduwakwedöja, ja̧danö ojwese'do la'akatjöda kököachibökö'dodanö kwichejekwaduwakwedöja.

Lucas 15:20

Ja̧danö, jejenö omukwatajo̧, a̧laibö abe'do ö̧jobekwö ȩwa̧jinobe. Abe'do ejube ichibakwa̧ abönö, ina ödö ö̧jayi, abe'doma jo̧banö edinobe, ja̧danö lȩlö̧jinö edö, itji̧ ö̧jobekwö ö'öakwawinobe, ja̧danö itji̧nö wo̧batö, du̧atinobe.

Romanos 5:20

Chömöledö, Diosma iteda wei̧ jojodö ja̧bö tjö̧jo jö̧ba̧lö wei̧ma Moisésnö iwȩyudobö weinobe. Jojodö Dios weökö jawa ja̧tji̧ma tjöwaisachibotö jö̧ba̧lö weinobe, ja̧ Moisés iwȩyudinama. Iwȩyudakwa̧ abönö, ida̧ökö Dios weökö jawa ja̧tjinajayonö, Moisés iwȩyudinelöda tjöwaisachibobö ji̧nobe, Aaa, Dios weökö jawa ja̧badösa, jö̧ba̧lö. Ja̧danö, jemi tupakwö, ina jwaikwöda sulabenö ja̧bö tjö̧jinobe jojodöma. Ja̧danö, jemi tupakwö jojodö sulabenö ja̧tji̧ma nöachinobe ichejekwa. Jo̧kwaijayonö, jojodö sulabenö ja̧tji̧ma nöachijayonö, Diosma ina lȩlö̧jinö edinobe jojodönöma. Ja̧danö, jojodö sulabenö ja̧tji̧ nöachemi o̧pekwönönö nöachinobe Dios lȩlö̧jinö edi̧ma ichejekwa. Ja̧danö lȩlö̧jinö edö, mikwa jwiinö otiwa jawa iyö, jojodönö pjaatinobe Diosma.

Apocalipsis 7:17

Ja̧danö, Obeja Itji̧danö Jo̧ma otiwanö ite'ada̧lobetjö̧ inia tjötjinö baledököwö̧. Ja̧danö, jobadönö otiwanö öbibö 'yo̧ ojwese'do jo̧bekwö, ba̧kwȩlö̧jatebö ja̧kwawa okwe'dokwö. Ja̧danö, jobadöma belöma budekwabinö tjuju̧kwinajayonö, tjo̧wi̧, babema budekwaböködö. Otiwanö ju̧kwadö, Diosma pjaatinobetjö̧— damö la'aka luwedötjö bakwo̧ma jö̧a̧lijatö ötjönöma.