Jobekwö tjichibiökwe, Eliseoma Israel la'aka luwo̧ Joramnö yöa̧linobe: —Ökwödöma bakwaiböködösa, ötjöma Diosnö ösödo̧ chö̧jonö, ökwöma ju'wedönö ösödo̧ja. Jo̧kwajabetjö ötjönö abebö a̧ja̧kwökönö, kwabe'do ja̧danö kwojo'do abebö tja̧ja̧kwinawö̧, tjösödawö̧ yötjawi̧ yöbawadönö abebö kwa̧ja̧kwo, —jö̧ba̧lö. Yöa̧liökwe, —Ja̧maökö Eliseo, Isabenö Jo̧ Diosda ökwödönö ko̧ko̧dö jwöbina, baikwö dichibanö iyö loobö, Moab la'aka luwo̧ ökwödönö ujuluwakobetjö̧. Ja̧danö jo̧bada ökwödönö iyö loobetjö̧, jo̧ba yöawi̧ abebö da̧ja̧kwakwö, —jö̧ba̧lö atadinobe Israel luwo̧ Joramma.
Isaías 57:13 - Dios Iwene13 Ökwödöma ba̧jȩkwadö o̧'wo jawanö ösödadöja, jobadönö jwöbeba̧lö, —Pjabataduwitjö, —jö̧ba̧lö jwököbaduwenama, ökwödönö pjatjatakwa̧ji̧? Pjatjatökakwedö chömöledö. Jobadö kwösödaduwawö̧ma, jwa̧lȩ'epjo jelobekwö e'ewakwawö̧, ja'yubenö pjutenama, jelobekwö debi batjibakwedö. Jo̧kwaijayonö ötjönö ösödadö, —Diosda tjöeba̧lakwo̧, —jö̧ba̧lö tjo̧'wo wana̧ladöma, otiwanö tjö̧jakwedö. Jobadöda otiwanö israel nijinö tjö̧jakwedö, ja̧danö jobadöda chitea mösa'o Sion mösa'o tjujuna̧lakwedö, jobe chejutjö otiwanö ötjönö tjösödakobetjö̧, jö̧ba̧lö yöa̧lobe Diosma, israel jojodönö. အခန်းကိုကြည့်ပါ။ |
Isaías 57:13
39 ပူးပေါင်းရင်းမြစ်များ
Jobekwö ja̧tjijayonö, wene jwiinö tjö̧jakwedö, ja̧danö okobe jwiinö Dios itea'o Jerusalen mösa'o ju̧kwadötjö, bakwo̧bi jelo̧nö suli̧ öwaedökakwo̧, jadanö bakwo̧bi jȩlo̧nö kwabö loökakwo̧. Jau, bö̧jȩ ba̧kwemeachibanö okobe deinö bö̧jȩnö ju̧kwadöma Isabenö Jo̧nö tjöwaisakwedö ja̧ möle, wanedö yötawa, jwaibalawa wame ba̧kwemeachibanö ojwiyo li̧danö, bö̧jȩ ba̧kwemeachibanö Isabenö Jo̧nö waisadöda tju̧ju̧kwakwedö.
Jau chömöledö, ju'wedö tjitebotjö yöbawadö ichibö, Jerusalennö ju̧kwadönö abebö tja̧ja̧kwitjö̧ma, atadakwawa baikwö tjatadakwedö: —Isabenö Jo̧ma, Sion mösa'o jȩmi comunidad Jerusalen otidö ujunajabe, iteda ömöledönö tjöeba̧lemi comunidad baibanö, ja̧danö iteda ömöledö usula emawö jinadöma, jobe ja̧nö otiwanö tjö̧jakwedö, —jö̧ba̧lö.
Jau chuluwo̧, jobadö suli̧ waedaso jojodöma, jwa̧lȩ'epjo tjöekwemi do̧ibi̧danö ichejekwadö, ja̧danö jojodö deobetjö jawo̧ tubinö tubedi̧danö ichejekwadö. Jo̧kwaijayonö usula jojodönö tjöbeba̧lö̧ pjabato̧ja, ja̧danö jwibadö tjo̧'wo tjo̧bekwö ja̧dönö 'diinö tjöekwemidanö ichejekwo̧ja. Jau chuluwo̧, jwa̧le'epjo labinö doibapji jö̧ba̧lö tjöbeba̧lo̧ja, ja̧danö jawo̧ tubinö utubedapji jö̧ba̧lö, isadanö tjö'wachobö tjöbeba̧lo̧ja, jo̧kwajabetjö̧ ökwönö yebabinö omukwatadö, ju'wedönö suli̧ waedaso comunidad jojodöma, tjujulu jwiachibobö weköbobetjö̧. Jobadö jelobetjö ichajadö suli̧ tjöwaedotö jö̧ba̧lö labinö ökwöinö tjichibijayonö, ökwöi̧ jwiamachibobö webo̧ja, ja̧danö ojwiyo'wo jawo̧ tubö idejati̧ tjöeba̧li̧danö, juluwadö suli̧ waedadö tjo̧'wo ösöwanö lo̧tji̧ katjatibobö webo̧ja.
Dios öba a'otjö, pokwi̧ juluwökö ji̧danö juluwöködö. Wanedö yötawa, batjo ödebiya tjödaja̧ ikena, niji ina 'diinö do̧alokonö, i̧ya̧nö pokwö laebenama, ja'yubebi juluwökö'ye, jö̧tö? Ja̧ isa'yedanö Dios öba a'otjö juluwöködö bö̧je jojodöma, ja̧danö wanedö yöta̧la, jobadönö pjuitjö̧ma, juluwanö kököbachibö suli̧ waekwadö, ja̧danö sula'wo tjö̧ji̧danö, jwa̧lȩ'epjo juluwanö jelobekwö e'ewawö̧.
Jau, trigo chabö lotji̧danö ja̧köbaduwakwedöja kwöpöjojodöduwinö, ja̧danö jwa̧le'epjo sula'wo e'ewö loi̧danö, jelobekwö e'ewö loakwawö̧ kwöpöjojodöduwinö. Ja̧danö, jobekwö kwujuluwaduwobö pjatatiawö̧, kwo̧'woduwi ösöwachibanö ötjö Isabenö Jo̧nö kwösödaduwakwedöja, ötjö Israel jojodö tjösödökwe Suli̧ Jwibo̧ Diosnö ösödö yöka̧laduwakwedöja, —Dösödökwe Diosma isabenö juluwo̧, —jö̧ba̧lö.
Okobe deinö ko̧ko̧kwö kwichaduwo, bakobe kwichaduwo, tjitebotenia jojodötjö ina 'yaba̧ladöma. Baikwö yötawaduwakwö ökwödönö: Tjösödawö̧ towisa'otjö otikwawö̧ o̧'wo jawa e'ewadö, ja̧danö tje'ewawö̧nö abebö ju̧kwadöma, wajwibadö yelösöda, tjujulu jwibadö tjö̧jibinö pjatjatobö juluwöködönöda ösödö tjö̧jobetjö̧.
Baikwö yöa̧lobe Isabenö Jo̧ma, iteda ömöayo̧nö: Lȩlöjinö edö pjatatakwa̧ möle badekwachenama, akebi̧ a̧jakwö pjatatajabe, tjö̧jibinö pjatatakwa̧ möle badekwachenama, ökwönö pjatatajabe. Ja̧danö, ökwönö tjöbeba̧lö pjatatakwo̧sa, ja̧danö ökwönö chujunocha, tjitebokwena jojodötjö, ötjötjö ö'weje pjabato̧ bakibanö. Ja̧danö ju'wibi ökwönö chujunocha, israel niji yemidanö otiwachibanö kwotidakobetjö̧, ja̧danö tjitebo niji, jojodö deinelö nijima, 'da̧batö junö, ja̧ niji tjö̧jakwedönö kwiyabobö chujunajabe.
Jobadönö öbibö chichejebocha, ötjöda chitea'o mösa'o Sion mösa'obe, ja̧danö jobadö cheju, ötjönö aekwejube ichibajadönö, tjo̧'wo ösöwachibanö pjatatocha. Ja̧danö jwiinö ubinö iyawabi, ötjökwö ösökwö ja̧kwawa iyawabi, ötjönö iyawapjotjö tjiyenama, tjiyaja̧ chösödakwo̧sa, —Ötiwanö ötjönö ösödö iyadöja, —jö̧ba̧lö. Jau chömöledö, ötjö chejuma, —Tjitebotenia ju̧kwadö Diosnö atjebeju, —jö̧ba̧lö ötjabikobe, israel jojodöbököböbi jobetjö ötjönö tjösödakobetjö̧, jö̧ba̧lö yöawobe Isabenö Jo̧ma.
ja̧danö okobe deinö kwömöledö israel jojodöma, bakobe weti̧ a̧ja̧kwö tjö̧jakwedö, ja̧danö 'döbibajökönö, ba̧kwelöjatebö otiwanö israel nijinö tjö̧jakwedö. Jau chömöledö, jojodö towi tjujuni̧danö, ötjöda israel jojodönö chujunocha, —Duluwo̧ Diosma otiwo̧, —jö̧ba̧lö ötjönö tjösödakobetjö̧. Ja̧danö chujunajawö̧, otiwanö 'diinö tjö̧jakwedö.
Jo̧kwaijayonö ökwödötjö ju'wedöma ötjö Isabenö Jo̧ Diosnö kabatibadöja, ja̧danö cheju ja̧'o mösa'o kwo̧'wo jwibibadöja. Ötjönö ösödökönö, ju'wedö tjösödawö̧ Fortuna mikwo̧nöbi, Destino mikwo̧nöbi ösödö, kwakwawa iyawabi, ubasobu o̧'do̧bu iyawabi otidö iyadöja, —Jo̧badöda ökwödönö baledakwa̧ omudawö tjujunakwedö, —jö̧ba̧lö.
Okobe jwiinö chitea'o mösa'o ba̧kwemeachibanö, otiwanö inia tjöbökönö tjö̧jakwedö, otiwanö söbebö lotjököwö̧ tjö̧jakwedö. Ja̧ möle, tebo awilidö lobo ötjabawö̧ma, bakobe obejadökwö dösölö̧jinö ja̧nö, tju̧kwa tjukwakwedö. Ja̧danö didibadöma, meje'ye tjukwakwedö, pakayadö tjukwi̧danö. Ja̧danö a̧ko̧'döma, laböködö ja̧nö, nijinö ba̧nö nijiso̧pja̧da tjukwakwedö. Jobekwö baledakwa̧ ötjö Isabenö Jo̧ yötawajabe, isabenö yötawaja̧danö baledakobe, jö̧ba̧lö yöawobe Diosma.
Chujulu jawa yötjawiawö̧, tjiteboteniatjö kwömöledöduwi israel jojodönö tjichejebakwedö, batjo waji̧ iyawa tjichejebi̧danö, tjö̧'da̧de ju̧kwadö chömöledö israel jojodönö otiwanö iyö tjichejebakwedö, —Isabenö Jo̧, bidö kwömöledönö ichejebö diyakwö, —jö̧ba̧lö. Jau, kabayudö tjoma'anöbi, kolukiyanöbi, tjöböbe'onö wanawa ökiyanöbi, cameyodö tjoma'anöbi tjichejebakwedö. Wanedö yötawa, ökwödö israel jojodö otiwanö tjidichajapa̧ dȩja̧panö, batjo jawa kwiyaduwakwa̧ chejube e'ewö kwi̧'yaduwidanö, kwömöledö israel jojodönö tjitebotjö tjichejebakwedö. Ja̧danö jobadötjö ju'wedönö 'da̧batö chujunocha, ötjötjö jojodötjö ö'weje pjabatadö batjibanö, ja̧danö ju'wedönö weti̧ otidadö Levita jojodö batjibanö chujunocha, jö̧ba̧lö yöawobe Isabenö Jo̧ma.
Ökwödöma ju'wedönöda omudawö kwujunaduwajabe, kwuluwedö diosbedö tjö̧jobö, jo̧kwajabetjö̧ babe usula kwemawaduwenama, jobadö omudawö kwujunaduwajawö̧nöda akebaduwo, kwö̧jibaduwinö pjatjatobö. Jau, jobadö omudawö kwujunaduwajawö̧da pjatatobö jo̧be, ötjö kakatibinaduwökwema pjatatobö jwiobe, —jö̧ba̧lö atadinobe Diosma.
ကြော်ငြာတွေ