Isaías 55:3 - Dios Iwene

³ Teada̧lönö a̧ja̧kwalö, chöjobekwö kwichaduwo chömöledö. Otiwanö kwa̧ja̧kwaduwo, tupakwö 'yaka̧laduwakobetjö̧. Jau, ötjönö kwa̧ja̧kwaduwitjö̧ma, ökwödökwö bakobe dösölö̧jinö dö̧jakwa̧ jawa yöbawö chujunocha, 'dö̧ibajökö ji̧ yöbawö junawama. Jau, damötjö Davidnö yöbawö chujunijatö, jwaikwöda 'dö̧bibajökönö jo̧banö ösödö chö̧jakwa̧ma, ja̧danö ökwödönöbi Davidnö yöbawö chujuninadanö yöbawö chujunena.

Isaías 55:3 ပူးပေါင်းရင်းမြစ်များ

Génesis 17:7

Abraham, ökwönö yöbawö chujuni̧danö isabenö badekwachakobe. Ja̧danö, bakwelöjatebö ja̧kobe, ökwötjö tupadanö jojodönöbi yöbawö chujunobetjö̧. Abraham, ötjöma ökwö Kwuluwo̧ Diossa. Ja̧danö, ökwötjö tupadanö jojodöbi Tjuluwo̧ Dioschakwo̧sa.

Génesis 49:10

Ina yöbawijetö: —Isabenö yötawa, Judá: Ökwötjö tupadanö jojodöma ba̧kwȩlöjatebö la'aka luwedö webö tjuju̧kwakwedö. Jejenö webö tjö̧bakobe bakwo̧, inesö la'aka luwo̧ ichenanö kabatö. Jo̧ba inesö la'aka luwo̧ma okobe deinö jojodö tjuluwo̧ ö̧jakwo̧— yöbawijetö Jacobma itji̧ Judánöma.

2 Samuel 23:5

Jobekwö yöawajabe Diosma, la'aka luwo̧ otiwo̧nö, ja̧danö, jejenö jo̧be, Dios öba a'otjö israel jojodönö yöbawö chö̧ji̧ma. Jo̧kwajabetjö̧, otiwanö israel jojodönö yöbawö chö̧jiökwe, Diosma isabenö ja̧akwa̧ wene yöbawö ujunajabe ötjönö, ba̧kwelöjatebö ja̧kwa̧ yöbawö junawama. Yöbawö ujuni̧ma, okobe jwiinö otiwanö labebö lobö yöawajabe, la'akatjöda balewö loawa jwii̧ wenema. Isabenö ötjönöbi chi̧tji̧mu tupadanö jojodönöbi pjaatakwa̧ wene yöbawö ujunajabe, ja̧danö ja̧ badekwachobö inesö chösödi̧ badekwachinö isabenö ja̧akwo̧ Diosma, la'akatjöda ökwödönö pjabatöma kaatakwawökakobe.

2 Samuel 7:29

jo̧kwajabetjö̧ atebakwö, jö̧ka̧laja̧danö pjakatobö kwösöditjö̧ma, isabenö jejenö ötjönöbi chömöledönöbi pjakatobö, ba̧kwelöjatebö kwöba a'o israel jojodö tjuluwedö dö̧jakobetjö̧. Jau Chuluwo̧ Isabenö Jo̧ Dios, ökwöma pjakatakwa̧ wene yökawajabe, ja̧danö pjakati̧tjö̧, ötjöbi chi̧tji̧mu tupadanö jojodöbi ba̧kwelöjatebö otiwanö pjakatawö̧ dö̧jakwedösa, —jö̧ba̧lö yöa̧linobe Davidma, Diosnö ösödö.

Éxodo 15:26

yöba̧lijetö jobadönö: —Ötjöma Isabenö Jo̧sa, ökwödö kwuluwo̧duwi Diossa. Ökwödöma ötjö yötawi̧ma tjöbeba̧lakwawö a̧ja̧kwö kwö̧jaduwitjö̧ma, ja̧danö, ötjö jweinö omukwatö kwö̧jaduwobö chösödi̧danö ja̧bö kwö̧jaduwitjö̧ma, ja̧danö ötjö weti̧ tjöbeba̧lakwawö omukwatö, ja̧ weawa a̧ja̧kwö kwö̧jaduwitjö̧ma la'akatjöda Egipto jojodönö wotjinö lȩtebinadanöma lȩtebökakobe ökwödönöma. Kwo̧'wo jwikibaduwoko. Ötjödasa Isabenö Jo̧ma, ökwödö kwö'wöchaduwiökönö otiwanö bakibaduwinö pjabato̧sa—yöba̧lijetö Isabenö Jo̧ma Israel jojodönöma.

Proverbios 4:20

Chitji̧, ötjö yötawi̧ma otiwanö kwa̧ja̧kwo, ja̧danö ö'wöyawakwawönö kwomukwato.

Proverbios 7:2

Ötjö weti̧ a̧ja̧kwö kwö̧jo lekwe kwö̧jakobetjö̧ kwo̧'wo ösöwanö. Ja̧danö, jwebebö yötawi̧ma, jwiinö mikwawobe, jö̧ba̧lö, kwite'ada̧lakwawo. Chitji̧, wanedö yötawakwö: Kwöbajale kwite'ada̧lakwawi̧ ji̧danö kwite'ada̧lakwawo ötjö yötawi̧ma, jwiinö mikwawobetjö̧.

Isaías 51:4

Chömöledö, yötawi̧ otiwanö kwa̧ja̧kwaduwo, yötawakwa̧ otiwanö kwa̧ja̧kwaduwobö jo̧be chö̧mö̧ledö̧. Jau chömöledö, bö̧jȩ ba̧kwemeachibanö ju̧kwadönö chö̧ba̧ja̧di̧ yötjawobö wetakwo̧sa, ja̧danö ja̧bö tjö̧jobö weti̧ma, tjitebotenia jojodönö dejuwa̧'yudanö ja̧kobe.

Isaías 54:10

Isabenö jwaikwöda ile 'di̧bebö chösödakwujuja, baikwö wanedö yöta̧la: Mösa'iju pjolachibö laebitjö̧bi, mösa'iju pjei̧ o'iju tjö̧bawö meitjö̧bi, ökwönö ile 'di̧tebi̧ma la'akatjöda katatibökakwo̧sa. Ökwönö yöbawö chujunajabe, dösölö̧jinö pjabatö chö̧jakwa̧ wenema, ja̧danö ja̧ yöbawö chujunina wenema la'akatjöda söbebö loawökakobe, jö̧ba̧lö ötjö Isabenö Jo̧, ökwönö lȩlöjinö edo̧ma yöta̧lakwö.

Isaías 54:8

Jau, jwiinö ökwönö chödameakwobetjö̧, juluwanö lekwökönö jelobekwö chöjalachibijatö, ökwönö öpöjödö, jo̧kwaijayonö lekwemaökö. Ja̧danö ökwönö lȩlöjinö edö ile 'di̧tebi̧ma, ba̧kwelöjatebö 'dö̧ibajökönö ökwönö ile 'di̧tebakwo̧sa, jö̧ba̧lö wanedö yöa̧lobe Isabenö Jo̧, Jerusalen jojodönö tjö̧jibinö pjabato̧ma, Jerusalennö ju̧kwadönö.

Isaías 61:8

Baikwö laebobe Isabenö Jo̧ yöa̧li̧ma chömöledö: Ötjö Isabenö Jo̧ma, jweinö lȩekwa jawa ösödo̧sa. Ötjöma naukwakwawabi, ju'wi sulabenö ja̧awabi öpöjödo̧sa. Jo̧kwajabetjö̧ ju'wedö tjitebokwena jojodö jobadönö sulabenö ja̧tjina omukwatö, jweinö lȩekwa wetakwo̧sa, balekwa mikwa otiwanö chömöledö israel jojodönö tjiyobö wetakwo̧sa. Ja̧danö ötjöma chömöledö israel jojodökwö ba̧kwelöjatebö pjatatakwa̧ wene yöbawö chujunocha.

Mateo 11:28

Tupakwö yöawinobe Jesúsma, jojodönö: —Okobe deinö ökwödö me'dawachibadö, nöinö ömöki̧ jawa kwe'ewaduwajabetjö̧ me'dawachibadöma, chö̧jobekwö ichaduwi, ja̧danö kwö̧'wachaduwobö ja̧takwo̧sa.

Mateo 13:16

Jo̧kwaijayonö ökwödö chöba̧ja̧di̧ waisachadönöma badekwachokobe Isaías iwȩyudinama chömöledö. Ökwödöma kwo̧'wo̧ ösöwanö ja̧döja, kwöbajalenö otiwanö kwedaduwobetjö̧, ja̧danö kwölakiyunö otiwanö kwa̧ja̧kwaduwobetjö̧.

Mateo 17:5

Pedro ina jejenö yöa̧lonö, ojwiyo'wo dewinö dejata'wo jobadö tjöwamenö öwawachinobe, ja̧danö ja'wotjö̧ iwene ökwöinobe baikwö ökwöi̧ma: —Bitema ötjöda chösödökwe chitji̧, cho̧'wo̧ ösöwanö chedobe jo̧banö. Jo̧banö kwa̧ja̧kwaduwo— jö̧ba̧lö iwene ökwöinobe.

Juan 10:27

Ötjö cha̧jwi̧muma ötjö chiwene a̧ja̧kwö waisadö, ja̧danö, jobadönö chöwaisawö̧. Ja̧danö, jobadöma chökömanö ichadö.

Juan 6:37

Ja̧danö, yötawaduwakwö. Chabe'do Dios ötjönö iyawö̧ jojodöma ötjökwö tjichibakwedö. Ja̧danö, ötjökwö ichibo̧nöma a'dewakwawö̧kö̧sa.

Juan 7:37

Ja̧danö, pjiesta mölebiyatjö 'dö̧ibaji̧ möle, jwiinö mikwawi̧ möle Jesúsma jamatö labinö yöawinobe: —Ojwiyo o̧ti̧ tjöbö ja̧dönö jwöta, Ötjökwö ichaduwi kwowaduwo, jö̧ba̧lö.

Juan 8:47

Dios i̧tji̧muma Dios yöawi̧ a̧ja̧kwadö. Ökwödöma Dios i̧tji̧muböködököbaduwobetjö̧ Dios yöawi̧ kwa̧ja̧kwaduwokobe— yöawinobe Jesúsma.

Hechos 13:34

Chömöledö, Diosma Jesúsnö yemidanö tjeachajinö ja̧bijetö yemidanö ö'wöchökönö. I̧lȩdo̧ okwa tjödajökwenöma, a̧tjȩo 'dolobökönö tjeachajinö ja̧bijetö Diosma. Ja̧ baledakwa̧ma Diosma ajayinö yöbawijetö iwenenö. Baikwö laebobe Dios iwenetjö: Davidnö yöbawö chujunina wenema, isabenö jo̧banöbi, jo̧batjö tupadanö jojodönöbi otiwanö pjatatakwo̧, jö̧ta̧li̧ wenema, jö̧ta̧li̧danö otiwanö pjatatakobe ökwödönöma, jö̧ba̧lö laebobe Dios iwenetjö, Dios Davidminetjö tupadanö jojodönöbi pjatatakobe, jö̧ba̧lö, jö̧a̧linama— yöbawijetö Pabloma—

Romanos 10:5

Biya̧ wene labebö lobö yötawa chömöledö. Moisésma baikwö iwȩyudinobe: Bakwo̧ okobe jwiinö Dios weina jawa ja'yubebi junibökönö ja̧itjö̧da, ja̧kwawa ujuna̧lakwo̧, okobe jwiinö Dios weina ja̧obetjö̧, jö̧ba̧lö iwȩyudinobe Moisésma.

Hebreos 13:20

Chömöledö, Duluwo̧ Jesúsma ökwösobu ebawinö iteda Diosnö iyawö midawö ö'wö baibinobe. Ja̧danö, jo̧bama midawö ö'wö baibena, Dios 'yayi̧ balekwa yöbawö ujuni̧ma jamatö 'yi̧nobe. Chömöledö, Jesús ökwösobu ebawinö ö'wö baibiökwe, Dios 'yayi̧ balekwa yöbawö ujuni̧ jamatö 'yo̧bö, Diosma Jesúsnö wobajaletjö yemidanö tjeachajinö ja̧inobe. Ja̧danö, tjeachajinö ja̧inökwenöma ökwödönö la'aka te'ada̧lo̧ baibanö 'da̧batö ujuninobe Diosma, iteda a̧jwi̧mu o̧bȩja̧dödanöbedönö la'aka te'ada̧lo̧ baibanö. Ja̧danö chömöledö Diosnö, do̧'wo̧ luwo̧ okwa wene jwiinö badibobö pjabato̧nö ateba ökwödönöma. Jo̧banö ateba ökwödönö pjaatobö iteda ösödi̧da ja̧bö kwö̧jaduwobö. Ja̧danö, jo̧banö ateba ökwödönö pjaatobö Jesucristo ujulunö kwo̧'wo̧ luwo̧duwi okwanö otiwanö Dios ösödi̧danö balewachinadö bakibaduwobö. Isabenö chömöledö, Diosnö ba̧kwȩlö̧jatebö dösödaduwo, Jo̧bada, jö̧ba̧lö. Ba̧kwȩlö̧jatebö dösödaduwo, Jwiinö juluwo̧, jwiinö otiwo̧, jö̧ba̧lö. Chömöledö, biya̧ yötawi̧ma isabenö ji̧ jawa yötawa.