Isaías 54:14 - Dios Iwene14 Ja̧danö weti̧ otiwanö a̧ja̧kwö ja̧nö, 'diinö kwö̧jakwujuja. Ja̧danö usula tjemawinö webadö tjö̧jelö ödö kwöjobetjö̧, yebabökönö kwö̧jakwujuja. Ja̧danö inesö yeabikwawa jawatjö̧ ödö kwöjakwujuja, yeabikwawa jawama kwö̧jobekwö yöne ichibökönö. အခန်းကိုကြည့်ပါ။ |
Isaías 54:14
35 ပူးပေါင်းရင်းမြစ်များ
—Jemi ikenama, damötjö̧ tjö̧jinadanö, yemidanö lȩekwa luwedö otiwanö yöbawadönö chujunocha, ja̧danö waisanö tjomukwatobö pjabatadönöbi chujunocha. Ja̧danö jejenö chujuniawö̧, kwiteboduwi comunidad Jerusalen otiwanö ötjabikwobe, –Dios wei̧ a̧ja̧kwadö tjitebo comunidad, -jö̧ba̧lö, ja̧danö, -Jwaikwöda Diosnö ösödö ju̧kwadö tjitebo comunidad, –jö̧ba̧lö ötjabikobe kwiteboduwi Jerusalen comunidadma, —jö̧ba̧lö yöawobe Diosma, Jerusalennö ju̧kwadönöma.
Ökwödö Moab niji a'dewö lotjajawö̧nö weköbaduwo, ökwödö Juda jojodö tjö̧'dade dö̧jobö, ja̧danö tjöbeba̧lö pjabataduwi, söbebö lobadö ökwödönöbi söbebö lotjapji jö̧ba̧lö, –budekwö atjebakwedö Moabitas jojodötjö ya̧döma. —Isabenö ju'winö usula tjemawinö webo̧ma deakobe ditebotjöma, ja̧danö isabenö ju'winö söbebö loawama 'dö̧ibakobe, ja̧danö jojodönö ja̧tö lobo̧ma tjitebotjö laebakobe.
Ja̧ möle tjitebokwena jojodö ju'wedö tjitebo jojodökwö wene tjujuna̧lenama, Isabenö Jo̧ Diosda lȩekwa yöawakwo̧. Ja̧danö tjitebokwena jojodö ölakwabikwawö tjö̧jenama, jo̧bada jwebebö lȩekwa yöawakwo̧. Ja̧danö jobekwö lȩekwa yöawiawö̧, ölakwabikwawökönö tjö̧jakwedö bö̧jȩ jojodöma, jo̧kwajabetjö̧ ölakwabikwawa jawa tjiteama, balewö lobö tjotidakobe, batjo otikwa jawa baibanö. Kwölöte'ijuma, niji soawa ökiya baibanö balewö lotjakobe, ja̧danö tokwötebiyama, towibiya bajale ötjebiya 'wiawaka baibanö balewö lobö tjotidakobe. Ja̧ mölema ju'wedö tjitebo jojodöma, ju'wedö tjitebo jojodökwö tjölakwabikwawökakwedö, ja̧danö ölakwabikwawa jawa tjöwaisachökakwedö, okobe deinö bakobe wene jwiinö tjö̧jakwedö, —jö̧ba̧lö yadakwö baledakwa̧ jawa i̧sȩbinobe Diosma.
Ja̧danö ja̧ möle kwomukwatibaduwakwedöja, ajayinö inesö yekabinaduwi̧ma, ja̧danö yöka̧ladukwedöja, baikwö: —Ökwödönö usula demawinö webinadö, döpöjojo ömöayo̧ wȩyukwa luwo̧bi, uluwo̧nö midawa balada baibanö ditea 'döbebö eminabi, ditebo tjöbebö dotidina dokwa juluwojobö jö̧ba̧lö kwebachö edinabi, dai tju̧ju̧kwobeda?
Jau chömöledö, baikwö wanedö yötawa kwöpöjojodöduwinö chölakwabikwawakwa̧ma: Kwöpöjojodönö idöda tjiteba'o tjukwobö chiyakwo̧sa, ja̧danö ubasobu tjowi̧danö, idöda tjökwösobu owö 'dukwachawö̧ batjibobö chiyakwo̧sa, jö̧ba̧lö. Jau chömöledö, otiwanö ökwödönö pjabatö chölakwabikwawakwo̧sa, ja̧danö okobe deinö bö̧jȩnö ju̧kwadöma edö tjöwaisachibakwedö ötjönö, —Isabenö Jo̧ Diosda, Jacob ömöledö tjösödökwe juluwo̧ma, Diosda israel jojodönö tjö̧ji̧binö pjabato̧ma, jo̧bada tjöbeba̧lö pjabato̧ma, —jö̧ba̧lö edö tjöwaisachibakwedö, jö̧ba̧lö yöawobe Diosma.
Tajawedö ötjö, ökwödönö otidina, Isabenö Jo̧ Diosnö kwo̧'wo jwikibinaduwada chömöledö? Ötjöma isabenö juluwo̧sa, ötjödasa mölȩjȩ sedatö nöninama, ja̧danö ötjödasa bö̧jȩ la'aka lödinama, ötjönö kwomukwataduwo jö̧ka̧laduwajabe. Jo̧kwaijayonö, kwöpöjojodöduwi usula kwemawaduwinö ja̧badö tjölabena, ja̧danö ökwödönö söbebö lotjobö jö̧tja̧lenama, ötjönö omukwatökönö, bakobe yebabinö ja̧döja. Jobadönö yekabiduwobö jwiobe chömöledö, ökwödönö labinadöma ida̧ökö debi batjibajabe.
Tupakwö Jerusalen comunidad jawa wanedö yöawinobe Diosma, jojosujunö yöa̧li̧danö: Yebabökönui Jerusalen, bemi tupakwö tabakwö kwöjökakwujuja. Kwo̧'wo tjo̧kekwobö jwiobe, isabenö ökwönö tabakwö kwö̧jobö wetjökakobetjö̧. Jau, ina möayuju kwö̧jayi, tabakwö kwö̧jinajayonö, ja̧ tabakwö kwö̧jina kwo̧'wo jwikibakwujuja. Ja̧danö, —Bisuma jilekwe wobekwinuju mikwawökuju, —jö̧ba̧lö yötja̧lioko taba lö̧jinajayonö, bemi tupakwö ja̧ sulabenö tjomukwatioko taba lö̧jinö kwö̧jinama la'akatjöda kwomukwatibökakwujuja.
Kwiteboduwitjö ja'yubebi jojodönö suli̧ tjöwaedökakwedö, ja̧danö kwiteboduwi bakwachobe okwama, pjolö loböbi, söbebö loböbi suli̧ tjöwaedökakwedö. Otiwanö kwö̧jibaduwinö pjatatobetjö, pjatataja̧ omukwatö, kwitebo comunidad tjöekwemima, —Ji̧kwawade, —jö̧ba̧lö kwimidaduwakwedöja, ja̧danö apjudema, —Diosnö ösödö lo̧awade, —jö̧ba̧lö kwimidaduwakwedöja.
ja̧danö okobe deinö kwömöledö israel jojodöma, bakobe weti̧ a̧ja̧kwö tjö̧jakwedö, ja̧danö 'döbibajökönö, ba̧kwelöjatebö otiwanö israel nijinö tjö̧jakwedö. Jau chömöledö, jojodö towi tjujuni̧danö, ötjöda israel jojodönö chujunocha, —Duluwo̧ Diosma otiwo̧, —jö̧ba̧lö ötjönö tjösödakobetjö̧. Ja̧danö chujunajawö̧, otiwanö 'diinö tjö̧jakwedö.
Jwiinö cho̧'wo ösöwachibanö chösödobe Isabenö Jo̧nö, —Chösödökwe Diosma otiwanö pjabato̧, —jö̧ba̧lö. Jau, baikwö wanedö yöta̧la, ji̧ikwa jawa kamisinö 'duatajabe ötjönö, ja̧danö otiwanö ja̧bö ja̧kwawa jawa wamesa̧do̧nöbi 'duatajabe. Jobekwö 'duatajökwe, ö'weje pjabato̧bi, ilekwonö emakwo̧bi jwiinö otiwaka butjawaka tjubutjawi̧danö, ja̧danö jilekwenö jemakwuju sasiyu jöni̧danö, otiwanö 'dubawö jo̧sa, chösödökwe Diosma otiwanö pjaatobetjö̧.
Isabenö cho̧'wo tjo̧ekwobe Sion mösa'o ju̧kwadönö, chitebo comunidad Jerusalen omukwatö, cho̧'wo tjo̧ekwobe, jo̧kwajabetjö̧ wi̧inö chö̧jökakwo̧sa. Jau, jwaikwöda yöbawö chö̧jakwo̧sa, Jerusalen comunidad jojodö Dios wei̧ tja̧ja̧kwenanö baibanö. Jau, baikwö wanedö yöta̧la, ja̧ möle tjö̧jibinö Dios pjaatakwa̧ma, dȩju̧wa'yudanö öwawakobe, ja̧danö Dios wei̧ a̧ja̧kwö tjö̧ji̧ma, möle dewachi̧danö salöinö dewakobe.
Jau chuluwo̧, israel jojodo ömöki̧ jawa e'ewakwawö̧'a, tjuluwedö wetjinö̧'a ö̧sö̧'ama, 'debatö loköbajabe, ja̧danö tjuluwedö usula tjemawinö webadö tjitea ö̧sö̧'a kwakwaakwö̧'ama, 'debatö loköbajabe. Damötjö madianitas jojodö israel jojodö usula tjemawinö ja̧tjena pjakatinadanö, yemidanö otiwanö pjakatajabe chuluwo̧, jo̧kwajabetjö̧ kwöba a'otjö tjo̧'wo ösöwachibanö ja̧dö kwömöledöma.
Isabenö inesö la'aka duluwo̧ ö̧jakwo̧ jo̧ba jitji̧ma, ajayitjö bajalekwönönö, ujulu nöamachibanö ba̧kwelöjatebö 'dö̧bibajökönö webö ö̧jakwo̧. Ja̧danö webö ö̧jobetjö̧ 'dö̧bibajökönö ba̧kwelöjatebö wene jwiinö dö̧jakwedösa. Jo̧bama Davidmine iteaka inesö la'aka luwo̧ ö̧binakanö öbamatakwo̧, jadanö David webö ö̧jinemi webö ö̧jakwo̧. Jau, David webö ö̧jinemima yemidanö ditebo baibanö 'diinö 'dö̧bibajökönö ujunakobe, la'akatjöda 'dö̧ibajökö ditebo baibanö, ja̧danö babe jamatö, ba̧kwelöjatebö 'dö̧ibajökönö baibanö, jweinö jwebebö, Dios wei̧danö webö ö̧jakwo̧. Jau, ökwö Okobe Jwiinö Juluwo̧ Isabenö Jo̧ Diosma jobekwö ö̧jobö kwösödobetjö̧, jobekwö baledakobe, jo̧kwajabetjö̧ kwömöledö israel jojodöma kwöba a'otjö tjo̧'wo ösöwachibanö tju̧ju̧kwobe, jö̧balö yöta̧la, tupakwö otiwanö tjö̧jakwa̧ jawama.
Ja̧danö, ökwödö dite'ada̧li̧ma biya̧ chömöledö, mölejȩ 'yayöjȩ, ja̧danö böjȩ 'yayöjȩ Dios otidobö te'ada̧ladösa chömöledö, Dios yöbawö ujuninadanö. Ja̧danö, ja̧ 'yayöjȩ Dios otidakwöjȩma, suli̧ma jwiakobe, Dios inesö otiwi̧da ja̧kobe chömöledö. Jo̧kwajabetjö̧ ina böjȩnö dö̧jayi, Dios ösödi̧danö ja̧bö kwö̧jaduwo chömöledö, ökwödöma mölejȩ 'yayöjȩ jojodököbaduwobetjö̧.
ကြော်ငြာတွေ