Isaías 53:5 - Dios Iwene

⁵ Jo̧kwaijayonö jo̧banö tjitjatinama, ökwödöda Dios wei̧ döpöjödobetjö̧ tjitjatinökwe, ökwödöda sulabenö ja̧bö dö̧jobetjö̧, inia tjöbina. Ökwödö wene jwiinö dö̧jakobetjö̧, jo̧banöda kwakwatjinobe, ja̧danö jo̧bada kwakwatji̧ eminobetjö̧, bi̧bajadösa ökwödöma.

Isaías 53:5 ပူးပေါင်းရင်းမြစ်များ

Génesis 3:15

Ja̧danö, ökwöma isuju jöpöjojo kwö̧jakwo̧ja. Ja̧danö, isujuma kwöpöjojosuju jö̧jakwuju. Ba̧kwelö̧jatebö wene ja̧kobe ökwötjö tupadanö ju̧kwadökwö, isujutjö tupadanö jojodökwö. Kwöpöjojodöda tjuju̧kwakwedö. Ja̧danö, isujutjö tupadanö jojodötjö bakwo̧ma kwuunö öja̧takwo̧ja. Ja̧danö, jo̧ba ökesayunö yö̧köbakwo̧ja— lȩbebö jö̧ba̧lijetö Isabenö Jo̧ Diosma a̧ko'danöma.

Diosnö ösödo̧ Job mikwo̧ usula emawina jawa 33:24

Ja̧danö Diosma jo̧banö lȩlö̧jinö edena, jadanö lȩlö̧jinö edö yöa̧lena, –Bite ö'wö baibapji jö̧ba̧lö, ö̧jibinö pjabati, ö̧jibinö midawama chöbadekwajabe, ö̧jibinö pjabati, –jö̧ba̧lö yöa̧lena.

Proverbios 20:30

Ja̧danö, ju'wibi yötawa: Isabenö, sulabenö ja̧bo̧nö kwakwabö lȩtjebobö jo̧be. Jobekwo̧ kwakwabö lȩtjebitjö̧ma sulabenö omukwati̧ma kaatibobö pjaatena. Jao, o̧'wo̧ okwa sulabenö omukwati̧ söawena, otiwanö omukwatobö, jo̧banö kwakwabö lȩtjebitjö̧ma.

Isaías 40:2

Dösölö̧jinö yöka̧lo chömöledö Jerusalennö ju̧kwadönö, jobadönö jwöbö yökawo: —Ölakwabikwawö kwö̧jaduwi̧ma ida̧ökö 'dö̧ibajabe. Ja̧danö sulabenö ja̧bö kwö̧jinaduwijayonö, Isabenö Jo̧ma ida̧ökö dötölatajanö ökwödönö lȩebajabe, ja̧danö kwusuladuwima söbebö loajabe, jö̧ba̧lö yöawobe.

Isaías 57:18

Ötjöma chömöledö sulabenö ja̧bö tjö̧ji̧ chedajabe, jo̧kwaijayonö yayonö jobadönö pjatatakwo̧sa, ja̧danö tjö̧bibajinö otidö lotocha. Jobadönö öbibö jwetebocha, ja̧danö jobadö o̧'wo tjo̧achö budekwadönö, tjo̧'wo ösöwobö pjatatocha.

Isaías 6:7

ja̧danö ubö̧'anö cha̧jȩ mabö̧ yöa̧linobe, —Isaias, Bö̧'a ubö̧'anö kwa̧jȩ matajabe, ja̧danö bö̧'a kwa̧jȩ maajobetjö̧, wene kwujuna̧li söbebö loajabe, ja̧danö kwusula dichö loajabe, —jö̧ba̧lö.

Daniel 9:24

Baikwö yöawinobe Gabrielma Danielnö: —Diosma omukwatö ujunajabe, kwömöledö Israel jojodönö tjö̧jibinö pjaatakwa̧ abönö, ina cuatrociento noventa o̧biya tjöbaledobö jo̧be jö̧ba̧lö. Ja̧danö, Dios badedö ujunina möle badekwachenama, tjusulatjö tjö̧jibinö pjaatakobe. Sulabenö ja̧tji̧ katjatibobö ja̧akobe, ja̧danö tjusula söbebö loakobe, okobe jwiinö suli̧ söbebö loakobe. Ja̧danö ja̧ mölema Diosda yöbawö weakobe, bakwainö otiwanö ba̧kwȩlö̧jatebö yöbawö weakobe. Ja̧ mölema Dios yöawi̧ yöbawo̧ Jeremías iwȩyudinadanö badekwachakobe, ja̧danö ökwö kwi̧'wi̧dinö kwedinadanö badekwachakobe, ja̧danö Jerusalénnö jȩju Dios ejuma, yemidanö isabenö Dios eju baibanö dichö loakobe.

Mateo 20:28

ötjö jojo baibanö jeminökwe ju'wedönö pjabatö chö̧ji̧danö. Jau chömöledö, ju'wedö ötjönö pjatjato jö̧ba̧löma ichinö̧kö̧sa. Ötjöda jojodönö pjabatö ichinasa, ja̧danö ba̧jekwadö tjö̧jibo jö̧ba̧lö midawö wotobö ichinasa— jö̧ba̧lö yöawinobe Jesúsma.

Romanos 4:25

Jau chömöledö, Diosma Cristonö weinobe, ökwödö sulabe dujuna̧li̧ midawö woobö. Ja̧danö, jo̧banö woawatjö tjeachajinö ja̧inobe, ökwödö sulabe jwibadö badibanö ja̧bö.

1 Corintios 15:3

Jau chömöledö, inesö mikwawi̧ wene ötjö cha̧ja̧kwina wenema ökwödönö yötawijatö. Ja̧ yötawina wenema biya̧ chömöledö: Damötjö Dios iwene wȩyudinadö imidawakwo̧nö tjiwȩyudinadanö, Cristoma midawö woinobe, ökwödö dusuli̧ imidawo jö̧ba̧lö.

2 Corintios 5:21

Jau chömöledö, otiwa jawa wenema baikwö laebobe: Cristoma la'akatjöda sulabenö ja̧inököjayonö, Diosma weinobe, ökwödö sulabenö ja̧di̧ma Cristonö baibobö, jo̧bada midawö woobö. Jejenö weinobe chömöledö, ökwödöma Cristokwö dötewanö ja̧nö, Cristonötjö Dios sulabe jwii̧ ökwödöbi dujuna̧lakobetjö̧.

Efesios 5:2

Cristoma ökwödönö ile niebobetjö̧ dumusidi̧ midawö ö'wöchijetö, dö̧jibinö pjabatö. Jejenö pjabatö, Diosnö söinö nöekwi̧ jawa juwö tjiyinadanö Cristoma midawö iyijetö Diosnöma. Ja̧danö chömöledö, Cristo ökwödönö ile niebi̧danö ökwödöbi kwömöledöduwinö ile nibebö ja̧duwi.

Deuteronomio 11:2

Kwöwaisaduwa chömöledö, kwuluwo̧duwi Isabenö Jo̧ Dios ökwödönö jwebebö ö̧ba̧ja̧di̧ma, jö̧tö? Jau chömöledö, kwitji̧muduwinöda yötawitjö̧ma, wajwitjo jö̧tja̧lena, Dios i̧sȩbina jawa tjedinokobetjö̧. Jo̧kwaijayonö ökwödöma isabenö Dios i̧sȩbina edinadöja chömöledö, Diosma isabenö juluwo̧, jö̧ba̧lö. Jau chömöledö, Dios inesö ujulu edinadöja, Isabenö öpöjojodönö ölakwabikwawobö juluwo̧, jö̧ba̧lö.

Hebreos 10:10

Ja̧danö, jo̧ba balekwo̧ iyawina Cristoma Dios wei̧ a̧ja̧kwö jojodö tjusula tjumusidi̧ midawö itedada bakwötanöda iyawinobe. Jejenö imidawinobetjö̧ ökwödöma Dios öba a'o suli̧ jwibadöda ja̧dösa. Isabenö, Cristoma balekwo̧ iyawina, böjȩtjö Diostjö jojodötjö ö'weje pjabatadö tjotidena tebachinama, ökwödö Dios öba a'o suli̧ jwibadö dö̧jobö. Isabenö chömöledö, Cristoma Dios wei̧ a̧ja̧kwö, itedada bakwötanöda iyawö jojodö dusula dumusidi̧ imidawinobetjö̧, ökwödöma Dios öba a'otjö ba̧kwȩlö̧jatebö suli̧ jwibadö babibinadösa.

Hebreos 10:14

Isabenö chömöledö, Cristoma kaatinobe iteda otidawa, jojodö tjö̧jibinö okobe jwiinö pjabatö. Jo̧ba otidawatjö ja'yubebi ji̧binokobe chömöledö. Isabenö, iteda bakwötanöda okobe jwiinö midawö okobe jwiinö jojodö tjö̧jibinö pjaatinobe, Dios öba a'otjö suli̧ jwibadö batjibanö pjaatawö̧nöma. Ja̧danö, jobadö suli̧ jwibadö babibinadöma ba̧kwȩlö̧jatebö Dios öba a'o suli̧ jwibadöda tjö̧jakwedö.

Hebreos 5:8

Jo̧kwaijayonö ¿tajawedö Jesús usula emawobö weinada? Yötawaduwakwö chömöledö. Diosma Jesúsnö weinobe Jesús öwaisachibobö, Dios wei̧ cha̧ja̧kwobö jo̧be, jwiinö labi̧ wei̧bi, jö̧ba̧lö. Jesúsma, Dios Itji̧jayonö öwaisachibinö ichibinobe, Dios wei̧ jwiinö a̧ja̧kwi̧ i̧sebö, towisa'onö la̧nö wobö.

Hebreos 9:28

Ja̧danö, Cristobi bakwötanöda woinobe jojodö tjusula tjumusidi̧ midawö. Ja̧danö, ju'wi möle yemidanö ichenama jojodö dusula dumusidi̧ imidawobö ichökakwo̧. Yemidanö ichenama jo̧ba yemidanö ichakwa̧ te'ada̧ladönö mölejȩbekwö öibobö ichakwo̧. Jejenö okobe jwiinö dö̧jibinö pjaati̧ma tjo̧wi̧ kaatakobe.

1 Pedro 3:18

Jau chömöledö, Diosma isabenö ökwödö usula kwemawaduwobö weena, baikwö yötawa: Duluwo̧ Cristo usula emawobö weinobe, ¿jö̧tö? Ja̧danö Duluwo̧ Cristo usula emawobö ji̧natjö̧ma, ¿ökwödö usula demawobö jwienaji̧? Jȩna chömöledö. Jau chömöledö, sulabe dujuna̧li̧ imidawo jö̧ba̧lö, Cristoma bakwötanöda midawö woinobe, okobe deinö tjusula midawö. Sulabe jwibo̧da midawö woinobe chömöledö, ökwödö dusula juna̧ladö Dioskwö dichibobö ja̧bö. Jau chömöledö, iteba'oma kwabö lotjinobe, jo̧kwaijayonö Diosma o̧'wo̧ luwo̧nö 'yaibajinö ja̧inobe.