Isaías 5:12 - Dios Iwene

¹² Ja̧danö ba'ali junö, lo̧awa jawa arpabi, lirasbi, tamboresbi, flautasbi kwujuna̧laduwijayonö, jadanö ubasobu kwujuna̧laduwijayonö, Isabenö Jo̧ otidi̧ jawa omukwatöködöja. Jau, Diosnö omukwatö, —Isabenö inesö otiwi̧ jawa otidajabe duluwo̧ Isabenö Jo̧ma, —jö̧ba̧lö kwomukwataduwo jö̧ba̧ladöja, jo̧kwaijayonö omukwatöködöja.

Isaías 5:12 ပူးပေါင်းရင်းမြစ်များ

Génesis 31:27

¿Tajawedö detobe okobetjö̧ yöbawökönö döbibajö kwȩwa̧jinada? Yökawinatjö̧ma, lo̧awa lo̧bö, harpa pjebö, la̧tijayudanö chabö, otiwanö ösödö kwȩwa̧ja̧duwakwa̧ pjiesta chujunochijatö.

2 Samuel 19:35

Ina möayo̧ chö̧jitjö̧ma, Jerusalennö ja̧nö cho̧'wo ösöwachibo jö̧a̧lena, jo̧kwaijayonö ida̧ökö ochenta o̧biya juna̧lo̧sa, ja̧danö jwiinö pöe chö̧jobetjö, dakwö jobe ja̧nö cho̧'wo ösöwachibobö. Jau chuluwo̧, jwiinö pöechobema, kwakwawabi, owawabi 'dö̧ekwökönö chukwobe, jo̧kwajabetjö̧ söinö kwiyi̧bi chösödobö jwiena. Ja̧danö ömadöbi ya̧döbi lo̧tji̧ma, ida̧ökö cha̧ja̧kwobö jwiobe, jwiinö otiwanö lo̧tji̧tjö̧böbi, a̧ja̧kwö chösödobö jwiena. Jo̧kwajabetjö̧, jobe ja̧nö cho̧'wo ösödachibobö jwiobema, tajawedö ökwökwö jobe chö̧jobö? Jobe chö̧ji̧tjö̧ma, ökwö la'aka chuluwo̧nö wayena ömöki̧danö, jo̧kwajabetjö̧ chedemi Jerusalenbe chi̧'yoko.

Diosnö ösödo̧ Job mikwo̧ usula emawina jawa 34:27

iteda wei̧ tja̧ja̧kwobö tjöpöjödobetjö̧. Jau, jobadönö weijayonö, mikwawökö ji̧ jö̧ba̧lö a̧ja̧kwö tjö̧jobö tjöpöjödinobe,

Isaías 22:13

Jo̧kwaijayonö, jobekwö omukwatökönö, kwo'woduwi ösöwanö ba'ali junadöja. Jau, Dios wei̧ a̧ja̧kwökönö, baikwö yöba̧ladöja: –Pakayadönöbi, obejadönöbi kwabajadö, itebia kwanö, ubasobu o̧'dobu owö, ba'ali dujunaduwo. Jau, itekwai möle debö di̧'yakwedösa, jo̧kwajabetjö̧ babe möle kwanöbi, owöbi ba'ali dujunaduwo, –jö̧ba̧lö, Dios wei̧ a̧ja̧kwökönö sulabenö yöba̧ladöja, —jö̧ba̧lö laebobe Dios Jerusalen jojodönö yöawi̧ma.

Isaías 24:8

Jojodö tjo̧'wo ösöwanö lo̧tji̧bi 'dö̧ibajakobe, tjo̧'wo ösöwanö tambores kwaböma lo̧tjökakwedö, ja̧danö tjo'wo ösöwachibanö arpa pjeawama katjatibakwedö. Tjo̧'wo ösöwachibanö jwötjeba̧li̧ ökwöi̧ma, bakobe ökwöökönö 'dö̧ibajakobe.

Isaías 29:1

Baikwö laebobe Dios yöawi̧, Jerusalen comunidad jawama: Ayö, Davidmine tjösawö ujuluwinemi comunidad Jerusalen jojodöwe. Isabenö usula kwemawaduwakwedöja ökwödö Jerusalen jojodöma, ökwödö ba̧kwelöjatebö o̧ba bakwabakwena ba'ali junadöma.

Isaías 5:19

Jobadöma sulabenö obö yöbaladö Diosnö, baikwö: —Dios otidobö ji̧tjö̧ma, lekwe iteada̧loko, juluwanö otidobö jo̧be, otidakwa̧ dedakobetjö̧. Jau, Israel jojodö tjösödökwe sulabe jwibo̧ Diosma iteda waisanö omudawö ujunaja̧ i̧sȩbobö jo̧be, waisanö omukwati̧ edö döwaisachibakobetjö̧, —jö̧ba̧lö sulabenö obö yöba̧ladö.

Isaías 56:12

Jau, jobadöma baikwö yöba̧lakwawadö, —Ubasobu o̧'do̧bu demaduwo, ja̧danö ju'wi nio ojwiyo do̧wa̧laduwo, owa̧lö̧ domeawachibenanö baibanö. Ja̧danö jemi ikenama, itekwai babe do̧wa̧li̧tjö bajalekwönönö dowena, do̧'wo ösöwachibanö, —jö̧ba̧lö sulabenö omukwatö yöba̧ladö, israel jojodötjö luwedöma.

Daniel 5:23

Diostjö nija̧kwönönöbo̧sa̧ jö̧ba̧lö omukwatökönö, Mölejȩbe Jo̧ Diostjö bajalekwönönöjo̧sa jö̧ba̧lö kwomukwatajabe, ja̧danö jejenö omukwatö Diosda ejutjö tjichejebina dȩja̧'di̧ju tjichejebobö weköbajabe. Ja̧danö ökwöbi, kwömöayedötjö la'aka luwedöbi, kwi̧lȩkwa̧mubi Dios itea dȩja̧'di̧jutjö ubasobu o̧'dobu kwowaduwajabe, Diostjö bajalekwönönöbedösa jö̧ba̧lö. Ja̧danö ju'wibi o̧'wo̧ jawa kwösödaduwajabe juluwadö jö̧ba̧lö, orotjöbi, platatjöbi, broncetjöbi, 'dii jawatjöbi, towisa'otjöbi, inawiatjöbi otikwedö o̧'wo̧ jawa kwösödaduwajabe, juluwadö jö̧ba̧lö. Jobadö kwösödaduwawö̧ma edöbi edöködö, ja̧danö a̧ja̧kwöbi a̧ja̧kwöködö, ja̧danö waisöbi waisöködö, jo̧kwaijayonö jobadönö ösödadöja, Isabenö Jo̧ Diosnö ösödökönö. Jau chuluwo̧, kwo̧'wo̧ kwemobö iyo̧ Diosnö, ju'wibi okobe jwiinö ökwönö baledakwa̧ webo̧nö otiwanö omukwatö ösödökönö, ju'wedönöda ösödo̧ja.

Lucas 16:19

Jesúsma wanedö yöawinobe du̧ju̧tajanö, usulaso̧nöbi, balada luwo̧nöbi. Baikwö wanedö yöawinobe: —Bakwo̧ balada luwo̧ma ö̧jinobe. Jo̧ba balada luwo̧ma kwakwawatjöbi, 'duawakwawatjöbi otiwanö ö̧jinobe. Nöinö ujuna̧lobetjö, ba̧kwȩlö̧jatebö jwiinö otiwado̧ 'dubawö ö̧jinobe, ja̧danö möletenia jwiinö söi̧ kwakwawa kwanö ö̧jinobe.

1 Corintios 14:7

Lo̧awa jawa asabikwawa jawa flauta ötjabi̧ jawabi, ja̧danö arpa ötjabi̧ jawabi ja̧danö chömöledö. Ja̧ jawama ja̧kwawa jwiijayonö, ökwöo jö̧a̧li̧danö ökwöobö jo̧be. Baikwö yötawa chömöledö: Asabikwawa jawa flauta ötjabi̧ jawabi, ja̧danö arpa ötjabi̧ jawabi ökwöo jö̧a̧li̧danö ökwöökötjö̧ma, ¿dakwö a̧ja̧kwö tjöwaisobö laebi̧ma chömöledö? Wajwitjena, ¿jö̧tö?

Judas 1:12

Jobadönö baikwö yötawa: Wamenö otiwadödanö ichejekwö, jobadöma Duluwo̧ Jesúsnö omukwatö pjiesta bakobe ökwödökwö tjujunobe, jo̧kwaijayonö wamenö otiwadödanö tjichejekwijayonö, isabenö suli̧ waedadö tjö̧jobe. Baikwö wanedö yötawa: Ojwe teebe ba̧wa inawa, isowi töbö meajobö suli̧ waedawadanöbedö, jojodönö suli̧ waedö. Jau chömöledö, ökwödökwö pjiesta junö, taba jwiinö idöda tjö̧ji̧ jawada isakwadö, ju'wedönö omukwatökönö. Jojodönö otiwanö pjabatadösa jö̧ba̧lö yötja̧lijayonö, pjabatöködö. Wanedö yötawa: Ojwiyo'wo o̧bo jö̧a̧laja̧ waekwa'wo, o̧bökönö jelobekwö jwa̧lȩ'epjo e'ewa'wodanö ichejekwadö, ja'yubebi pjatjatokobetjö̧. Isabenö mikwawöködö tjö̧jobe, baikwö wanedö yötawa: Towinö wa̧ji̧ emö tjukwobö baibena, towi ina wa̧jökötjö̧ma mikwawokowi, ¿jö̧tö? Jejenö wa̧jokowidanö mikwawöködö, jo̧kwaijayonö jemi bajalekwönönöbi mikwawöködö, baikwö yötawa: Towi babe wa̧jokowi, tupakwö wa̧jitjö̧ma ina mikwawena, ¿jö̧tö? Jo̧kwaijayonö 'yebö töbebö lotjitjö̧ma la'akatjöda mikwawökawowi, ¿jö̧tö? Jejenöbedö ökwödönö sulabenö yöbawadöma chömöledö, dötölatajanö mikwawöködö. Towi wa̧jokowidanö mikwawöködö, ja̧danö jemi bajalekwönönö towi 'yebö töbebö lotjinowidanö bakobenö mikwawöködö.

1 Samuel 12:24

Isabenö jwaikwöda Isabenö Jo̧nö yebabinö ösödö, wei̧danö ja̧bö kwö̧jaduwobö jo̧be chömöledö, isabenö ökwödönö inesö otiwanö pjaatina wene omukwatö, jo̧banöda kwösödaduwobö jo̧be.