Isaías 49:8 - Dios Iwene

⁸ Baikwö yöa̧lobe Isabenö Jo̧ma, iteda ömöayo̧nö: Lȩlöjinö edö pjatatakwa̧ möle badekwachenama, akebi̧ a̧jakwö pjatatajabe, tjö̧jibinö pjatatakwa̧ möle badekwachenama, ökwönö pjatatajabe. Ja̧danö, ökwönö tjöbeba̧lö pjatatakwo̧sa, ja̧danö ökwönö chujunocha, tjitebokwena jojodötjö, ötjötjö ö'weje pjabato̧ bakibanö. Ja̧danö ju'wibi ökwönö chujunocha, israel niji yemidanö otiwachibanö kwotidakobetjö̧, ja̧danö tjitebo niji, jojodö deinelö nijima, 'da̧batö junö, ja̧ niji tjö̧jakwedönö kwiyabobö chujunajabe.

Isaías 49:8 ပူးပေါင်းရင်းမြစ်များ

2 Samuel 7:13

Jo̧bada cheju otidakwo̧ma, ötjö Isabenö Jo̧ cheju baibanöma. Ja̧danö jo̧ba itji̧mu tupadanö jojodötjö chujunocha, ba̧kwelöjatebö israel jojodö la'aka tjuluwedö tjö̧jobö.

Isaías 26:3

Ökwönö omukwatö jo̧nö, otiwanö teada̧lo̧ja duluwo Dios. Ökwönö o̧'wo wa̧na̧lö ösödö ö̧jobetjö̧, bakwainö wene jwiinö ö̧jobö pjabato̧ja.

Isaías 27:3

—Ötjö Isabenö Jo̧ma, chöbatjo teada̧lo̧sa. Teada̧lönö, ba̧kwelöjatebo otiwanö ojwiyo sa̧sa̧bö otido̧sa, ja̧danö teada̧lönö tjöbeba̧lö jo̧sa, bakwo̧bi chöbatjo suli̧ öwaedapji jö̧ba̧lö. Yötebi, mölebi otiwanö teada̧lö jo̧sa,

Isaías 41:10

Yekabiduwoko ökwödö israel jojodö, ötjöda ökwödökwö jo̧chobetjö̧, ja̧danö kwo̧'wo tjo̧bekwö kwö̧jaduwoko, ötjöda kwösödaduwökwe Dioschobetjö̧. Jau, ötjöda kwujuluwaduwachibanö pjatatakwo̧sa, meköbaduwapji jö̧ba̧lö, ötjöda chömamu juluwamu chöwaisobekwöchobesamunö do̧balö pjatatakwo̧sa.

Isaías 42:1

Baikwö laebobe Dios yöa̧li̧ma: Bitema ötjöda omudawö chujuninökwe chömöayo̧, ujuluwachibanö pjatjatökwema. Jo̧bama ötjö ile 'di̧tebökwe. Jo̧banö chiyajabe ötjöda Cho̧'wo Luwo̧nö, ja̧danö jo̧bama jweinö lȩebo jö̧a̧li̧danö lȩebakwo̧ tjitebotenia jojojodönö.

Isaías 42:6

Ötjöma Isabenö Jo̧ Diossa, ötjödasa ökwönö jwöbinama, weti̧ a̧ja̧kwö kwö̧jakobetjö̧. Ötjöda kwömamu do̧ba̧lö, ökwönö chiteada̧lakwo̧sa. Ja̧danö ökwönö i̧sȩbö chiyakwo̧sa jojodönö, ökwönötjö̧ jojodökwöbi, ötjökwöbi bakobe ja̧nö dö̧jakwa̧ wene yöbawö dujunakobetjö̧, ja̧danö tjitebotenia jojodönö öbibö dejato̧ kwö̧jakobetjö̧.

Isaías 44:26

Jobekwö bö̧jȩ jojodö waisadösa jö̧ba̧lö tjomukwati̧ waekwobö webo̧sa, jo̧kwaijayonö ötjöda chömöayedö, ötjöda yötawi̧ yöbawadö yötjawi̧danö badekwachobö webo̧sa. Jau, wetawö̧, —Isabenö yemidanö Jerusalen comunidadnö tjö̧jakwedö, ja̧danö Juda niji comunidadbiyama, yemidanö tjotidakwedö, —jö̧ba̧lö yöbawadö tupakwö baledakwa̧ma, ja̧danö yötjawi̧danö badekwachinö webo̧sa.

Isaías 49:19

Babema kwiteboduwi Juda nijima, isabenö suli̧ waekwobe, jojodö deobe chömöledö, jo̧kwaijayonö ja'yubenö lekwajabetjö̧ ökwöda kwömöledötjö su̧'bȩ baibakobe kwiteboduwima, kwiteboduwitjö jojodö deobebi tjö̧ba̧jekwachenanö baibanö. Ja̧danö ja̧ möle, kwöpöjojodöduwi, tjö̧möayedö bakibaduwanö ökwödönö juluwinadöma, kwö̧jaduwelö ödö tjö̧jakwedö.

Isaías 51:16

Ja̧danö ötjöma ötjöda yötawi̧ ökwödönö chijayabe, yöka̧laduwobö, ja̧danö ötjöda chömamunö ökwödönö tjöbeba̧lö chösadobe, wene jwiinö kwö̧jaduwobö. Jau chömöledö, ötjöda mölejȩ otidö nöninasa, ja̧danö ötjöda bö̧jȩ la'aka lödinasa, ja̧danö ötjö jobekwö otidinama ökwödö Jerusalen jojodönö yöta̧lajabe, —Ökwödöma ötjöda chömöledöja, —jö̧ba̧lö, jo̧kwajabetjö̧ isabenö kwöpöjojodöduwitjö kwö̧jibaduwakwedöja.

Isaías 51:3

Ja̧danö baikwö yötawaduwakwö chömöledö, jo̧ba itji̧mu tupadanö jojodö o̧bukwedöda tjö̧jijayonö, tja'döminenö pjatatinadanö yemidanö pjatatocha, Jerusalen jojodönö. Ja̧danö jobekwö pjatatenama, tjitebo nijima jwiinö otiwachibakobe. Jojodö deobe kö̧kö̧emima, inesö otiwayu Eden batjodanö baibanö, o̧bubiya otiwanö bo̧akobe. Ja̧ jojodö deobema, Isabenö Jo̧ itea batjo, jö̧ba̧lö ötjabayudanö baibakobe. Ja̧danö jobe ju̧kwadöma jwiinö tjo̧'wo ösöwachibanö tjö̧jakwedö, ja̧danö ötjönö ösödö lo̧tjakwedö, —Isabenö Jo̧ma otiwanö pjabato̧, —jö̧ba̧lö.

Isaías 54:3

Jau, kwöwaisobekwöchobebi, wajwiköbobekwöchobebi kweju jaleju baibanö kwotidobö jo̧be. Ja̧danö kwitji̧muma, ba̧jȩkwadö batjibanö ju'wedö tjitebo nijibi 'döbebö tjemakwedö, ja̧danö jojodö deobe comunidadma, kwitji̧muda jobe tju̧ju̧kwakwedö, jö̧ba̧lö wanedö yöawinobe Diosma, Jerusalen comunidad jawama.

Isaías 55:6

Chömöledö, Isabenö Jo̧ma ina yöne jo̧, ina jo̧banö tjöbadekwajobö jo̧be. Jokwajabetjö̧ babe juluwanö jo̧banö kwisakwaduwobö jo̧be chömöledö, ina jo̧banö kwöbadekwaduwobö ja̧yima. Ja̧danö ina yöne ö̧jonö, jwököbaduwonö.

Isaías 57:13

Ökwödöma ba̧jȩkwadö o̧'wo jawanö ösödadöja, jobadönö jwöbeba̧lö, —Pjabataduwitjö, —jö̧ba̧lö jwököbaduwenama, ökwödönö pjatjatakwa̧ji̧? Pjatjatökakwedö chömöledö. Jobadö kwösödaduwawö̧ma, jwa̧lȩ'epjo jelobekwö e'ewakwawö̧, ja'yubenö pjutenama, jelobekwö debi batjibakwedö. Jo̧kwaijayonö ötjönö ösödadö, —Diosda tjöeba̧lakwo̧, —jö̧ba̧lö tjo̧'wo wana̧ladöma, otiwanö tjö̧jakwedö. Jobadöda otiwanö israel nijinö tjö̧jakwedö, ja̧danö jobadöda chitea mösa'o Sion mösa'o tjujuna̧lakwedö, jobe chejutjö otiwanö ötjönö tjösödakobetjö̧, jö̧ba̧lö yöa̧lobe Diosma, israel jojodönö.

Isaías 58:12

Jau chömöledö, jobekwö weti̧ a̧ja̧kwö kwö̧jaduwitjö̧ma, pjolö lotjinemi comunidad otiwanö kwotidaduwakwedöja, damötjö tjödina comunidad la'aka yemidanö kwotidaduwakwedöja, otiwemi comunidadnö kwö̧jaduwakobetjö̧. Ja̧danö ökwödönö ötjabikwawö̧ja, tjöekwemi pjolö lotjinemi 'yayi baibanö otidadö, ja̧danö jojodö tjö̧jemi mana yemidanö 'yayi baibanö otidadö, ötjabikwawö̧ja.

Isaías 58:5

Ja̧jaye ö̧tö̧chö ja̧kwawa chösödenaji̧ chömöledö? Ökwödöma sulabenö ja̧bö kwö̧jaduwonö, —Mikwawöködösa, —jö̧ba̧lö, isa'ye nijakwö bȩachibobedanö bȩbachibadöja, ja̧danö epju̧yu̧nö kalukaa̧do̧ 'dubawö, ökwölaso̧pja̧nö ba̧jadöja, —O̧'wo tjo̧achadösa, —jö̧ba̧lö kwi̧sȩkwaduwotö jö̧ba̧lö. Jobekwö ja̧bö, —Dios öba a'o ö̧tö̧chö ja̧dösa, —jö̧ba̧ladöja, kwedaduwemi weti̧ a̧ja̧kwökönö, jobekwö kwi̧sȩbaduwi̧ edö, ötjö Isabenö Jo̧ma chösödenaji̧? Chösödökö chömöledö.

Isaías 61:2

Jau, Isabenö Jo̧ jojodönö ösödö pjaatakwa̧ o̧ba badekwachaja̧ yötawobö weinobe, ja̧danö duluwo̧ Dios dameakwö lȩebakwa̧ möle badekwachaja̧ yötawobö, ja̧danö okobe deinö budekwadönö tjo̧'wo ösöwachibanö pjatatobö weinobe.

Isaías 61:4

Ja̧danö 'diinö ja̧nö, ditebotjö pjolö lotjinemi yemidanö tjotidakwedö. Tjöpöjojodö ajayinö söbebö lotina, yemidanö tjotidakwedö, suli̧ waekwinemi comunidadbiya, damötjö söbebö lotjinemi comunidadbiya yemidanö tjotidakwedö.

Isaías 65:9

Jacob itji̧mu tupadanö jojodö, Juda jojodötjö ji̧badönö tjetatakwo̧sa Juda nijibe, ja̧danö jobadönö chiyocha, ötjö chitea mösa'iju, Juda niji mösa'ijunö tjö̧jakobetjö̧. Ötjöda omudawö chujunajawö̧ma, ja̧ niji tjomudaibakwedö, ja̧danö ötjö chömöayedöma jobe tjö̧jakwedö.

Mateo 26:28

Bi'do̧sobu chökwösobuma, Dios 'yayinö yöbawö ujunakwa̧ wene yöawobe, chökwösobu ebawobetjö̧ Dios isabenö jojodö tjusula söbebö loakwa̧ wenema.

Efesios 1:6

Jo̧kwaobetjö̧ iteda i̧tji̧mu badibinobetjö̧ dösödonö, Lȩlö̧jino edo̧, jwiinö otiwo̧, jö̧ba̧lö. Chömöledö ökwödöma Jesúskwö, Dios Itji̧ ile niebökwekwö, dötewinö badibinobetjö̧ Diosma ökwödönö jwiinö lȩlö̧jino edobe.

Hebreos 12:24

Ja̧danö, jobe ichibö kwuju̧kwaduwemima Jesúsbi ö̧jobe, ökwösobu ebawinö dumusidi̧ midawinama. Jo̧bama ökwösobu ebawinö imidawenama Dios 'yayi̧ balekwa yöbawö ujuni̧ma jamatö 'yi̧nobe, ökwödönö pjabatö. Chömöledö, Jesús ökwösobuma, Tjo̧wi̧ Diosma jojodö tjusuli̧ma söbebö loa, jö̧ba̧lö, otiwanö jwöeba̧lobedanö jwöeba̧linobe. Jo̧kwaijayonö damötjö Abel ökwösobu jwöeba̧linadanömaökö, Jesús ökwösobu jwöeba̧linama. Abel ökwösobu nijibe ebawajobuma Abel jwöobedanö jwöinobe Diosnöma, Balekwa mikwa lȩbebi, jö̧ba̧lö. Jo̧kwaijayonö Jesús ökwösobuma jejenömaökö. Otiwanö jwöeba̧lobedanö jwöeba̧linobe, Tjo̧wi̧ tjusuli̧ma söbebö loa, jö̧ba̧lö. Jejenö Jesús imidawinobetjö̧ Dios 'yayi̧ balekwa yöbawö ujuni̧ma jamatö 'yi̧nobe, ökwödö Dios ö̧jobekwö, suli̧ jwibadöda kwichibaduwinö.

Hebreos 5:7

Ja̧danö, Jesúsma, böjȩnö jojo babibö bötjachajo̧ma yelösöda usula emawinobe. Ja̧danö Diosnö, woawatjö ö̧jibinö juluwo̧ Diosnöma budekwabinö aebinobe woawatjö ö̧jibinö pjaatobö. Jo̧kwaijayonö Diosma, ö̧jibinö pjabatökönö weinobe usula emawö woobö. Chömöledö ¿Diosma a̧ja̧kwinököji̧ iteda Itji̧ ubudekwi̧ma? Isabenö a̧ja̧kwinobe, Jesúsma Diosnö yebabinö edö jo̧ba wei̧ a̧ja̧kwöda ö̧jinobetjö̧.

Hebreos 8:6

Jo̧kwaijayonö Diosnö mölejȩbe la'aka iyo̧ Jesús otidi̧ma böjȩtjö Diostjö jojodötjö ö'weje pjabatadö tjotidinatjö jwiinö o̧penönö mikwawobe. Chömöledö döwaisa, Dios ajayinö da'dödöminenö yöbawö ujuninatjö wei̧ma, Ötjökwö bakwainö omukwatö, weti̧ a̧ja̧kwöda kwuju̧kwaduwo, jö̧ba̧lö, weinobe. Ja̧danö, Diostjö jojodötjö ö'weje pjabatadöma babebi Dios ajayinö yöbawö ujuninatjö wei̧danö otidö tjiyobe, Dios wei̧ Moisés iwȩyudinadanö. Jo̧kwaijayonö Jesús, jojodötjö Diostjö ö'weje pjabato̧ma Dios 'yayi̧ balekwa yöbawö ujunina otidobe. Ja̧danö chömöledö, Dios 'yayi̧ balekwa yöbawö junö jö̧a̧li̧ma ajayinö yöbawö junö jö̧a̧linatjö o̧penönö mikwawi̧, jojodönö pjabatö. Ja̧danö, ja̧ 'yayi̧ balekwa yöbawö ujuni̧ma Dios ajayinö yöbawö ujuninatjö o̧penönö mikwawobetjö̧, jojodönö pjabatö, Jesús otidi̧bi ajayinö Diostjö jojodötjö ö'weje pjabatadö tjotidinatjö o̧penönö mikwawobe.