Isaías 48:12 - Dios Iwene

¹² Chömöledö Jacob itji̧mu tupadanö jojodö, ötjöda chömöledö bakibaduwanö jwötinawö̧ israel jojodö, yötawi̧ kwa̧ja̧kwaduwo, baikwö: Ötjödasa ba̧kwelöjatebo jo̧ Diosma. Ajayitjöda ji̧nasa̧ chömöledö, ja̧danö bajaleapo löji mölebi chö̧jakwo̧sa.

Isaías 48:12 ပူးပေါင်းရင်းမြစ်များ

Proverbios 7:24

Jo̧kwaobetjö̧ chitji̧ a̧ja̧kwitjö. Ötjö jwebebö yötawi̧ma ö'wiawakwawönö a̧ja̧kwi.

Proverbios 8:32

Ina yöbawuju jweinö omukwatö ja̧kwawa wanekwachujuma, tjȩmu juna̧luju ji̧tji̧mu̧nö yöjawi̧danö. Baikwö yöbawuju: — Chitji̧mu̧, ajayitjöda jinujuchobetjö̧ ökwödönö yötawi̧ma kwa̧ja̧kwaduwobö jo̧be. ¡A̧ja̧kwaduwitjö! Yötawi̧ma a̧ja̧kwö kwö̧jaduwitjö̧ma kwo̧'wo̧ ösöwanö kwö̧jaduwakwedöja.

Isaías 34:1

Ökwödö tjitebokwena jojodöma, yöne ichibö kwa̧ja̧kwaduwo, tjitebotenia jojodö otiwanö kwa̧ja̧kwaduwo. Bö̧jebi, okobe jwiinö bö̧jȩnö ji̧bi a̧ja̧kwobö jo̧be, okobe deinö bö̧jȩnö ju̧kwadö yötawi̧ tja̧jakwobö jo̧be.

Isaías 40:26

Mölȩjȩbe edö, si̧li̧'idönö kwomukwataduwo. Tida jobadönö otidinama? Tida bakwo̧nökwena imi jwöbö, yö̧tekwena okobe deinö jobadö inesö ba̧jȩkwadö latjebobö öibobeda? Ötjödasa chömöledö, ja̧danö jwiinö chujuluwobetjö̧, latjebobö jwötenama, bakwo̧bi deökönö, okobe deinö weti̧ a̧ja̧kwö labebadö, jö̧tö? —jö̧ba̧lö abebö a̧ja̧kwobe Diosma ökwödönö.

Isaías 41:4

Tida jobekwö ujuluwobö webo̧ma? Ajayitjö baikwö bajalenö, ja̧jaye webo̧ma tida? Ötjödasa jobekwö webo̧ma, ötjö Isabenö Jo̧ Diosda. Ötjödasa ajayinö jobekwö webinama, ja̧danö ötjödasa bajaleapo jobekwö wetakwo̧ma, jö̧ba̧lö laebobe Dios tjitebokwena jojodönö yöa̧li̧ma.

Isaías 43:10

Jo̧kwaijayonö ökwödö israel jojodöma, Isabenö Jo̧ i̧sȩbina edö waisadösa. Baikwö yöa̧lobe Isabenö Jo̧ma: Ökwödö israel jojodöma isabenö chi̧sȩbina edö waisadöja, isabenö Diosbo̧ chö̧ji̧ma. Jau, chömöayedö bakibaduwanö omudawö chujuninawö̧ja, ötjönö kwöwaisaduwobö, ja̧danö ötjönö kwösödaduwobö, ja̧danö okwa jawa otiwanö kwöwaisachibaduwobö, —Okobe deinö tjösödawö̧tjöma, Isabenö Jo̧ Diosda isabenö Diosbo̧, —jö̧ba̧lö. Jau, ötjö chö̧jakwa̧ abönö tjotidinökwema deobe la'akatjöda, ja̧danö chö̧jaja̧ ikena ö̧jakwo̧ diosbo̧bi deakobe la'akatjöda, ötjödasa Diosbo̧ma.

Isaías 43:11

Jau, ötjödasa Isabenö Jo̧ Diosma, ötjödasa isabenö tjö̧jibinö pjabato̧ma, jelo̧ma deobe.

Isaías 44:1

Tupakwö laebobe Dios israel jojodönö yöa̧li̧ma, baikwö: Chömöayedö Jacob itji̧mu tupadanö jojodö, omudawö chujuninawö̧ Israel jojodö, ökwödönö yöta̧li̧ kwa̧ja̧kwaduwo.

Isaías 44:6

Israel jojodötjö inesö la'aka luwo̧, Isabenö Jo̧, israel jojodönö tjöbeba̧lö pjabato̧, Okobe Jwiinö Juluwo̧ Isabenö Jo̧ Diosma baikwö yöa̧lobe: Ötjöma ju'wedötjö ajayinö ji̧nasa̧, ja̧danö ju'wedötjö ikena chö̧jakwo̧sa. Jelo̧ Diosbo̧ma deobe, ötjödasa isabenö Diosbo̧ma.

Isaías 46:3

Baikwö yöa̧lobe Isabenö Jo̧ma: Chömöledö Jacob itji̧mu tupadanö jojodö, ötjöma jobadö Babilonia jojodö tjösödawö̧danöbö̧kö̧sa. Ökwödö Israel jojodötjö ina 'yaba̧ladöma, ötjönö kwe'ewaduwoböma jwibadöja, ju'wedö tjösödawö̧nö tje'ewi̧danöma. Jau chömöledö, ötjöda ökwödönö e'ewö chö̧jijatö, wanedö yöta̧la, kwojo'do ökwönö jemakwa̧ abönö, babe möle baibanö ba̧kwelöjatebö ökwödönö e'ewa̧lö jo̧sa.

Isaías 46:4

Ja̧danö bemi tupakwöbi damö kwöjaduwenabi ökwödönö chiteada̧lakwo̧sa chömöledö, damö waekwö, kwöwö'yeduwi dewa'ye juna̧ladö kwö̧jaduwenama, ökwödönö che'ewakwo̧sa chömöledö. Jau chömöledö, ötjöda ökwödönö otidinasa̧, ja̧danö ötjöda meköbaduwapji jö̧ba̧lö kabebö pjatatakwo̧sa. Ötjöda ökwödönö che'ewakwo̧sa, ja̧danö kwö̧jibaduwinö pjatatakwo̧sa.

Isaías 49:1

Baikwö laebobe Dios ömöayo̧ yöa̧li̧ma: Ökwödö ödö ju̧kwadö jwaibalawa ö'öbö ju̧kwadöbi ju'wedö bö̧jȩ bakwachö̧jȩ ju̧wkadöbi, yötawi̧ kwa̧ja̧kwaduwo. Chojo'do jukwa'wo ina cha̧ja̧yi, Isabenö Jo̧ma ötjönö jwöinobe, iteda ömöayo̧ batibakobetjö̧, ina ötjönö jemakwa̧ abönö, chimi imidinobe Isabenö Jo̧ma.

Isaías 51:1

Okobe deinö ökwödö Isabenö Jo̧ Diosnö isakwadö, jo̧ba wei̧ a̧ja̧kwö kwö̧jaduwobö omukwatadöma, baikwö yöta̧li̧ kwa̧ja̧kwaduwo: Wanedö yötawa, ökwödötjö ajayinö jinawa, Dios 'dȩbö otidinawa kwomukwataduwo, ja̧danö ja̧wa ajayinö ji̧nemi, löwö eminelö kwomukwataduwo.

Isaías 51:4

Chömöledö, yötawi̧ otiwanö kwa̧ja̧kwaduwo, yötawakwa̧ otiwanö kwa̧ja̧kwaduwobö jo̧be chö̧mö̧ledö̧. Jau chömöledö, bö̧jȩ ba̧kwemeachibanö ju̧kwadönö chö̧ba̧ja̧di̧ yötjawobö wetakwo̧sa, ja̧danö ja̧bö tjö̧jobö weti̧ma, tjitebotenia jojodönö dejuwa̧'yudanö ja̧kobe.

Isaías 51:7

Ökwödö weti̧ a̧ja̧kwö ju̧kwadöma, kwomajadeduwinö, —Dios wei̧ma inesö mikwawi̧ a̧ja̧kwö dö̧jobö, —jö̧ba̧lö ösödadöma, ökwödönö yöta̧li̧ kwa̧ja̧kwaduwo: Jojodö ökwödönö obö, sulabenö yötja̧li̧jayonö, jobadönö yekabiduwoko, ja̧danö sulabenö yötja̧li̧ a̧ja̧kwö, kwo̧'woduwi tjo̧kekwaduwoko.

Isaías 55:3

Teada̧lönö a̧ja̧kwalö, chöjobekwö kwichaduwo chömöledö. Otiwanö kwa̧ja̧kwaduwo, tupakwö 'yaka̧laduwakobetjö̧. Jau, ötjönö kwa̧ja̧kwaduwitjö̧ma, ökwödökwö bakobe dösölö̧jinö dö̧jakwa̧ jawa yöbawö chujunocha, 'dö̧ibajökö ji̧ yöbawö junawama. Jau, damötjö Davidnö yöbawö chujunijatö, jwaikwöda 'dö̧bibajökönö jo̧banö ösödö chö̧jakwa̧ma, ja̧danö ökwödönöbi Davidnö yöbawö chujuninadanö yöbawö chujunena.

Mateo 20:16

Jau chömöledö, ja̧ wanedö yötawaja̧danö, babe mikwawöködö jö̧ba̧lö tjomukwatawö̧ma, ju'wedötjö o̧penönö mikwawadö tjö̧jakobe, ja̧danö babe nöinö mikwawadö jö̧ba̧lö tjomukwatawö̧ma, mikwawöködö tjö̧jakobe— jö̧ba̧lö yöawinobe Jesúsma.

Romanos 1:6

Ja̧danö, ökwödö Romanö ju̧kwadönöbi weinobe Diosma, Jesucristonö kwösödaduwo jö̧ba̧lö, jo̧ba wei̧ ja̧köbaduwo jö̧ba̧lö. Chömöledö, Jesucristo ömöledö bakibaduwanö omudawö ujuninobe ökwödö Romanö ju̧kwadönöma, ja̧danö jwiinö ösödobe ökwödönöma chömöledö. Jau, ökwödö Romanö ju̧kwadönöbi jwöinobe Diosma, Jesucristo ömöledö bakibaduwobö. Chömöledö, ökwödönöma Dabe'do Diosbi, Duluwo̧ Jesucristobi lȩlö̧jinö tjedobö chösöda ötjöma chömöledö, kwo̧'wo̧ luwo̧duwi ösöwachibanö tupakwö kwö̧jaduwobö.

Romanos 8:28

Jau chömöledö, Diosma isabenö ökwödönö pjabato̧. Jo̧bada ökwödönö jwöinobe, iteda ömöledö badibobö. Ja̧danö, jemi tupakwöbi iteda jwöinawö̧nö pjabato̧ chömöledö. Ina böjȩnö ja̧nö, döpöjödi̧ jawa baledobe, ¿jö̧tö? Ja̧danö, sulabe jawa baledobe ökwödönöma, usula demawinö, ¿jö̧tö? Jo̧kwaijayonö, döpöjödi̧ jawa baledijayonö, ja̧danö sulabe jawa ökwödönö baledijayonö, okobe jwiinö ja̧ jawa balewö lobo̧ Diosma, ökwödönö pjaati̧ jawa baibanö. Jau chömöledö, ökwödö Diosnö ösödadöma, jo̧bada jwöinawö̧sa, iteda ömöledö badibobö. Ja̧danö, iteda ösödi̧danöda jwöinobe ökwödönöma chömöledö.

1 Corintios 1:24

Jo̧kwaijayonö, Dios jwöinawö̧ma, judío jojodötjöbi, judío jojodöböködötjöbi Dios jwöinawö̧ma, döpöjödokobe ja̧ wenema. Ökwödönö ja̧ Cristo jawa wenema Dios ujulu i̧sebobe, ja̧danö Dios waisanö omukwati̧ i̧sebobe.

Deuteronomio 32:39

Jo̧kwaijayonö, a̧la̧ibö pjatjatokobetjö̧, babe ötjönö edö kwöwaisaduwobö jo̧be, isabenö ötjödasa Diosbo̧ma, jelo̧ ötjödajayo̧ma deobe, jö̧ba̧lö. Jau, kwabö lotoböbi juluwo̧sa, ja̧danö ja̧kwawa tjujuna̧lobö pjabato̧sa. Ja̧danö inia tötjinö kwatobö juluwo̧sa, ja̧danö kwakwatjaja̧ niemi otidö lotoböbi juluwo̧sa. Jau, isabenö jwiinö juluwo̧sa, ja̧danö ju'wedönö lȩtebenama, bakwo̧bi deobe, lȩtȩbi̧tjö tjö̧jibanö pjabato̧ma.

1 Pedro 2:9

Jo̧kwaijayonö jobadö Jesúsnö öpöjödö töbö metjijayonö, töböma meböködöja chömöledö, Dios omudawö ujuninawö̧ja, ja̧danö La'aka Duluwo̧ wei̧ otidadöja, ja̧danö mölejȩ jojodöja, ja̧danö Diosda ömöledöja chömöledö. Jau chömöledö, isabenö Dios wei̧ otidadö kwö̧jaduwobe. Diosma ökwödönöda 'da̧batö ujuninobe, jo̧ba inesö otiwanö pjaati̧ wene jojodönö yökawaduwobö. Jau chömöledö, Diosma isabenö otiwanö ökwödönö pjaatinobe, ökwödönö yȩa'wo okwatjö labeibö, iteda inesö idejatobekwö tekachaduwobö jwöinobe Diosma, ja̧danö jo̧ba inesö otiwanö pjaati̧ wene yökawaduwo jö̧ba̧lö, ökwödönö omudawö ujuninobe.

Apocalipsis 1:11

Ja̧ ökwöi̧ma jojo yöa̧li̧da cha̧ja̧kwijatö. Ja̧danö, baikwö jö̧a̧lijatö ötjönöma: —Juan, biya̧ kwedi̧ma wȩyudi weköbo jelemutjö dötölatajanö tjuju̧kwitenia ju̧kwadönö, ötjönö ösödö ko̧ko̧kwa̧ladönöma. Biya̧ comunidadesnö ju̧kwadönö, Éfesonö, Esmirnanö, Pérgamonö, Tiatiranö, Sardisnö, Filadelfianö, Laodiceanö ju̧kwadönö wȩyudi weköbo, ötjönö ösödö ko̧ko̧kwa̧ladönöma— jejenö weijatö ötjönöma, trompeta pjutji̧danö ökwöinö yöba̧lo̧ma.

Apocalipsis 1:8

Chömöledö, Duluwo̧ Diosma, jwiinö juluwo̧ma baikwö yöawobe: Ötjöma la'akatjöda ji̧nasa. Ja̧danö, 'dö̧ibajenanö baibanöbi chö̧jakwo̧sa, jö̧ba̧lö. Jejenö yöawobe Diosma, babe jo̧bi, la'akatjöda ji̧nabi, 'dö̧ibajenanö baibanöbi ö̧jakwo̧.

Apocalipsis 17:14

Ja̧danö, jobadöma Obeja Itji̧danö Jo̧nö tjujuluwobö tji̧'yakwedö. Jo̧kwaijayonö waekwakwawö̧ yelösöda. Obeja Itji̧danö Jo̧ma jobadönö jwiinö ujuluwakwo̧. Jo̧bama inesö Duluwo̧obetjö̧, inesö La'aka Luwo̧obetjö̧ jobadönö jwiinö ujuluwakwo̧. Ja̧danö, Obeja Itji̧danö Jo̧kwö ja̧döma, jo̧ba jwöbö, omudawö ujuninawö̧ma, jo̧banö kabatibökönö tjo̧'wo̧ wana̧ladö— yöawijatö ángelma ötjönöma.

Apocalipsis 2:8

Ja̧danö, chedökwema ina chiwȩyudobö weijatö ötjönöma: —Juan, biya̧ yötawi̧ma wȩyudi weköbo, Esmirna jojodötjö ötjönö ko̧ko̧kwa̧lö ba̧nö ösödadönö te'ada̧lakwawa jojonöma. Jo̧banö weköbo, ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma ba̧kwȩlö̧jatebö jo̧, ajayinö ji̧nabi, ja̧danö, 'dö̧ibajena baibanö ö̧jakwo̧bi yöawi̧. Ja̧danö wobajo̧ yemidanö tjebachajina yöawi̧, biya̧ chiwȩyudi̧ma.

Apocalipsis 22:13

Ötjödasa la'akatjöda ji̧nama. Ja̧danö, ötjödasa 'dö̧ibajenanö baibanöbi chö̧jakwo̧ma. Ja̧danö, ötjödasa 'dö̧ibajökökwema— jö̧a̧lijatö Jesúsma ötjönöma.